Read cisena MATEO 23 Bible Online

MATEO 23 - cisena bible

MATEO 23

¹Tenepo Yesu adalonga kuna mwinji na anyakufunzache mbati,

²“Afunzisi a mwambo na Afarisi apaswa utongi kufuthula mwambo wa Mose.

³Natenepo verani na kuchita pyonsene pinakupangani iwo; mbwenye lekani tsanzira pinachita iwopyo, thangwi iwo hambachita pimbalalika iwopyo tayu.

⁴Iwo ambamangirira mitolo yakulemera paphewa pa anthu, kwache iwo hambafuna na kuphatisa kwene basa chala chawo kuaphedza kuthukula mitoloyo tayu.

⁵Iwo ambachita pyonsenepi towera aoniwe na anthu. Yang'anani akamdedzi akulembwa mafala a Mulungu ambavala iwo papipumi pawo na m'mikono mwawo, pontho yang'anani kukula kwachita ipyo! Pontho yang'anani kulapha kwachita mavulere a pyakufinika pyawo![24]

⁶Iwo ambafuna pikulu kukhala m'mbuto za chilemedzo m'maphwando, pontho kukhala pamipando yakupambulika m'nyumba yakupemphereramo.

⁷Iwo ambafuna pikulu kuti anthu aamwenyike na chilemedzo m'misika, pontho kuti athulwe na dzina yakuti, ‘Afunzisi.’

⁸Lekani tawira kuti anthu akuchemereni, ‘Afunzisi,’ thangwi monsene ngubaleanu pontho kuti muna Mfunzisi mbodzi ene basi.

⁹Pontho lekani chemera munthu na mbodzi ene, ‘Baba’ pansi pano, thangwi muna Baba mbodzi ene basi wa kudzulu.

¹⁰Lekani kuchemerwa ‘Mbuya,’ thangwi muna Mbuya mbodzi yekha basi, weneyu ndi Khristu.

¹¹Mkululetu pakati panu athema kukhala nyabasanu.

¹²Munthu anapikuza yekha ene anachepeswa, mbwenye ule anapichepesa yekha ene anakuzwa.

¹³“Dzedze kuna imwe, afunzisi a mwambo na Afarisi, mfaka-fakamwe! Imwe mumbafunga misuwo ya Ufumu wa Kudzulu pamaso pa anthu, pontho imwe ene nee munapitamo tayu, mbwenye mumbakhondesa anthu ale ambayesa kuti apitemo.[25]

¹⁵“Dzedze kuna imwe, afunzisi a mwambo na Afarisi, mfaka-fakamwe! Imwe mumbaenda maulendo azinji panyanza na pamtunda pene, kusaka munthu mbodzi ene basi kuti asanduke nyakupembedza wa Chiyuda, mungagumana mbodzi, mumbamsandusa kukhala munthu wakuthema kutchunyuswa kugehena kawiri kupiringana imwe.

¹⁶“Dzedze kuna imwe, maboli-boli akutsogolera! Imwe mumbafunzisa kuti, ‘Ngakhala munthu anadumbira na dzina ya Nyumba ya Mulungu, iye nkhabe funika kuti akoye kudumbira kudachita iyeko tayu; mbwenye angadumbira na dzina ya pinthu pya golidi pya m'Nyumba ya Mulungu, mphyakuthema kuti iye akoye kudumbira kudachita iyeko.’

¹⁷Imwe maboli-boli akupupwa! Chakufunika pyakwanga ntchipi, pinthu pya golidipyo, penu Nyumba ya Mulungu, ile imbachitisa pinthupyo kukhala pyakupambulika?

¹⁸Pontho imwe mumbafunzisa kuti, ‘Ngakhala munthu anadumbira na guwa yansembe, iye nkhabe funika kuti akoye kudumbira kudachita iyeko, mbwenye angadumbira na nsembe yakuperekwa paguwapo, mphyakuthema kuti iye akoye kudumbira kwacheko.’

¹⁹Imwe maboli-boli! Chakufunika ntchipi: nsembe, penu guwa, ile imbachitisa kuti nsembe ikhale yakupambulika?

²⁰Natenepo munthu angadumbira na dzina ya guwa, iye akudumbira na guwayo, pontho na nsembe zonsene zili penepo;

²¹pontho angadumbira na dzina ya Nyumba ya Mulungu, iye adumbira na Nyumbayo, pontho na Mulungu, ambakhala mwenemoyo.

²²Pontho ngakhala munthu anadumbira na kudzulu, iye adumbira na mpando wachifumu wa Mulungu, pontho na Mulungu ule ambakhala pampandopo.

²³“Dzedze kuna imwe, afunzisi a mwambo na Afarisi, mfaka-fakamwe! Imwe mumbapereka kuna Mulungu chakhumi cha pimbewu pyanu pyakukomesera muliwo ninga minti, safarawo na chitowe, mbwenye mumbakhonda kuvera pifunziso pyakufunika pya mwambo. Penepi mphipi: chilungamo, nsisi, pontho kukhulupirika. Imwe mwathema kuchita pinthu penepi, pontho verani matongero anango onsene.

²⁴Imwe maboli-boli akutsogolera! Imwe mumbanula tchunya m'pyakumwa pyanu, mbwenye mumbakhudyula ngamila!

²⁵“Dzedze kuna imwe, afunzisi a mwambo na Afarisi, mfaka-fakamwe! Imwe mumbatsuka kunja kwa makhomitcho na mapalato anu, mbwenye m'bwalo mwache mwadzala na pimbapokosera imwe anango, thangwi ya mtima na kupifuna mwekha ene.

²⁶Iwe Mfarisi, boli-boli! Chakutoma tsuka m'bwalo mwa makhomitcho, ungachita tenepo, kunja kunachenambo!

²⁷“Dzedze kuna imwe, afunzisi a mwambo na Afarisi, mfaka-fakamwe! Imwe mwakhala ninga nthumbi zakukhwazwa mtoto, zile zimbaoneka zakubalalika kunja, mbwenye m'bwalo mwache mwadzala na magogodo a anyakufa, pontho na pyakunyansa pinango pyonsene!

²⁸Ntchibodzi-bodzi kuna imwe, thangwi imwe mumbaoneka adidi kuna anthu onsene, mbwenye mumtima mwanu mwadzala na ufaka-faka pontho pyakudawa.

²⁹“Dzedze kuna imwe, afunzisi a mwambo na Afarisi, mfaka-fakamwe! Imwe mumbasasanyira maprofeti masiye adidi, pontho mumbakomesa nthumbi za anthu akhali na makhaliro adidi ale.

³⁰Pontho mumbalonga kuti, ‘Ife mbatidakhalambo moyo pandzidzi wa makolo athu ule, nee mbatidapha nawo maprofeti.’

³¹Podi imwe mumbatawira mwekha ene kuti ndimwe pidzukulu pya ale adapha maprofeti,

³²apo, chinchino, imaliseni basa idatoma makolo anu ile!

³³Imwe nyoka, pontho ana a nyoka! Munakwanisa tani kuthawa kutchunyuswa kugehena?

³⁴Natenepo ndikukupangani kuti ndinakutumirani maprofeti, amuna anzeru, pontho afunzisi. Anango a iwo munaapha mbamuakhomera pamtanda; anangombo munaakwapula m'nyumba zakupemphereramo mbamuathamangisa kubulukira muluwani kwenda kuluwani inango.

³⁵Natenepo imwe munatchunyuswa thangwi ya kupha anthu onsene okhonda dawa padziko yapansi, kutomera kuphiwa kwa Abele, munthu okhonda dawa, kufikirana kuphiwa kwa Zekaria, mwana Berakia, adapha imwe pakati pa Nyumba ya Mulungu na guwa yansembe ule.

³⁶Ndikukupangani pyakuonadi kuti anthu a nsiku zinowa anatchunyuswa, thangwi ya kupha konsene kudachita iwo!

³⁷“Yerusalemu, Yerusalemu! Iwe umbapha maprofeti, pontho umbaponyera miyala anyamphangwa a Mulungu adakutumira iye ale! Kazinji kene ndapifuna kugumanyisa anthu ako onsene pabodzi ninga mumbaikhira nkhuku anache m'maphaphido mwache, mbwenye iwe hudanditawirisa kuchita tenepo tayu!

³⁸Ngayang'anani, Nyumbanu ya Mulungu inasanduka madembe.

³⁹Ndikukupangani kuti kubulukira ndzidzi uno kwenda m'tsogolo, nee munandionave pontho tayu kufikirana imwe mulonge kuti, ‘Nyakutsanzaya ngule wakudza na dzina ya Mbuya.’ ”