Read cisena MATEO 24 Bible Online

MATEO 24 - cisena bible

MATEO 24

¹Kubuluka penepo Yesu adabuluka pa Nyumba ya Mulungu ile. Tenepo pikhaenda iye, anyakufunzache adadza kuna iye dzamuonesa mamangiro a Nyumbayo.

²Yesu adalonga mbati, “Ande, imwe mupionesese mwadidi pyonsenepi. Ndikukupangani pyakuonadi kuti nee mwala na ubodzi ene unasiyiwa pambuto pache tayu; yonseneyi inagomokera pansi.”

³Pidakhala Yesu paphiri ya Olivi, anyakufunzache adadza kuna iye mbamvunza payekha ene mbati, “Ngatipangeni, penepi pinachitika lini, pontho panachitikanji kuonesa kuti wenewo ndi ndzidzi wakudza kwanu, pontho wakumala kwa ndzidzi uno?”

⁴Yesu adatawira mbati, “Khalani m'maso kuti paleke khala unango wakukunyengezani.

⁵Thangwi anthu azinji anabwera mbapilonga kuti iwo ndi Khristu, pontho iwo ananyengeza anthu azinji.

⁶Munava chifupi pontho kutali na imwe kuti kuna nkhondo, kwache lekani sanyika mtima, thangwi pinthu penepi pyathema kuchitika. Mbwenye kweneku si kuti mamalisiro afika tayu.

⁷Dzinza inamenyana na dzinza inzache, dziko inachita nkhondo na dziko inzache. Panakhala njala na piteke-teke ponsene pene.

⁸Pinthu pyonsenepi pyakhala ninga nthomatoma ya kuva kupha kwa mkazi wamimba pakubala.

⁹“Tenepo munamangwa mbamuperekwa kuti mubonereswe pontho munaphiwa. Anthu a madziko onsene anakuzondani na thangwi yakuti ndimwe anyakuteweranga.

¹⁰Pandzidzi wenewo anthu azinji anataya chikhulupiro chawo; iwo anaperekana unango na mwanzache, pontho anazondana.

¹¹Tenepo maprofeti akunama azinji anaoneka mbanyengeza anthu azinji.

¹²Kweneku ndiye kunakhala kufalikira kwa kudawa mwakuti kufunana kwa anthu azinji kunachepa.

¹³Mbwenye munthu anapirira mpakana kumamalisiro anati apulumuke.

¹⁴Tenepo Mphangwa Zadidi zakulonga pya Ufumu wa Mulungu zinalalikwa padziko yonsene yapansi kuchita umboni kuna anthu a madzinza onsene, tenepo mamalisiro anafika.

¹⁵“Imwe munaona chinthu chakuipa chimbavunga, chidalonga mprofeti Daniele chile, chikuimira m'Nyumba ya Mulungu. Chidziwiso kuna nyakuwerenga ntchichi: vesa mwadidi kuti penepi pikulonganji!

¹⁶Tenepo ale ali mu Yudea athawire kumapiri.

¹⁷Ngakhala munthu ali pansoyi ya nyumbache aleke vunga ndzidzi kutchitha kabulusamo pinthu pya m'nyumba mwache.

¹⁸Ngakhala munthu ali kumunda, mbaleke bwerera kumudzi kakwata chakufinika chache.

¹⁹Nsiku zenezo zinakhala zakunensa pyakwanga kuna akazi amimba, pontho kuna akazi akuyamwisa.

²⁰Pempherani kuna Mbuya kuti kuthawa kwanu kuleke dzakhala pandzidzi wa mainja, penu pa Nsiku Yakupuma.

²¹Thangwi nyatwa za nsiku zenezo zinakhala zakugoswa pyakwanga kupiringana zonsene zidachitika padziko yapansi kubulukira ndzidzi udalenga Mulungu dziko yapansi kufikirana ndzidzi uno, pontho hakunakhalave pinango ninga penepi tayu.

²²Mbwenye Mulungu apungula kale nsikuzo; iye mbadakhonda kuzipungula, nkhabe na mbodzi ene mbadakhala na moyo. Mulungu anapungula nsikuzo thangwi ya anthu asankhula iye ale.

²³“Pandzidzi wenewo munthu angalonga kuna imwe kuti, ‘Ngayang'anani, Khristu ali pano!’ penu, ‘Uyo ali apo!’ lekani dzakhulupira pinalonga iyepyo.

²⁴Thangwi panaoneka azinji kunyengeza anthu kuti iwo ndiwo anyakhombo akusankhulika penu maprofeti. Iwo anachita pidzindikiro pikulu na pyakudodomesa, towera anyengeze napyo podi na anthu ene akusankhulika a Mulungu ngakhala pinakwanisika.

²⁵Ngavani kuno! Ine ndakupanganiletu penepi ndzidzi mbudzati fika.

²⁶“Penu, anthu angakupangani kuti, ‘Khristu ali m'thando yatchetcha!’ lekani dzaendako; penu angalonga kuti, ‘Iye abisala pano!’ lekani dzapikhulupira.

²⁷Thangwi Mwana Munthu anabwera ninga njazi ile imbachetuma kuthambo yonsene kubulukira kumabulukiro kufikirana kumadokero dzuwa.

²⁸“Pambuto ponsene pana chinthu chakufa, malezi ambagumanyana penepo.

²⁹“Sindzidzi nyatwa za nsikuzo nkhumala, dzuwa inachita mdima, mwezimbo hunaonesave cheza tayu, nyenyezi zinagwa kudzulu, pontho pinthu pinango pyamphamvu pya kudzulu pinatekenyeka.

³⁰Chidzindikiro cha kudza kwa Mwana Munthu chinaoneka kuthambo; tenepo madzinza onsene a padziko yapansi analira kuona Mwana Munthu akudza pamakole a kudzulu na mphamvu pontho na demelero ikulu.

³¹Ngoma inaveka pikulu, tenepo iye anatuma angelo ache kumakhundu onsene manayi a dziko yonsene yapansi. Iwo anagumanyisa anthu ache akusankhulika kubulukira kumadolomero kufikirana kumadolomero a dziko.

³²“Funzani kubulukira pa muti wamkuyu. Imwe mungaona nthambi zache zatoma kuphwitha, mumbapidziwa kuti mainja ali chifupi.

³³Ntchibodzi-bodzi, mungaona pinthu pyonsenepi, mupidziwe kuti Mwana Munthu ali chifupi kudza.[26]

³⁴Ndikukupangani pyakuonadi kuti pinthu pyonsenepi pinachitika anthu ali m'maso lerowa mbadzati kufa.

³⁵Thambo na pansi pano pinamala, mbwenye mafalanga anakhala na mphamvu kwenda na kwenda.

³⁶“Nkhabe mbodzi anadziwa kuti nsiku na ora zinafika lini, nee angelo a kudzulu, nee Mwana;[27] mbwenye Baba ene basi ndiye ambapidziwa.

³⁷Kudza kwa Mwana Munthu kunakhala ninga pidachitika pandzidzi wa Nowa.

³⁸Nsiku zenezo, mwenemo madzi makulu mbadzati fika, anthu adadya na kumwa pyawo, amuna adasemba, akazimbo adasembwa kufikirana nsiku idapita Nowa m'chimwadiya:

³⁹mbwenye iwo hadadzindikire tayu pikhachitika pile kufikirana madzi makulu adadza mbaakukuludza onsene. Tenepo pinakhalambo sasawa Mwana Munthu angabwera.

⁴⁰Pandzidzi wenewo amuna awiri anaphata basa m'munda: mbodzi anakwatwa, unangomboyo anasiyiwa ponthopo.

⁴¹Akazi awiri anapeya palibwe: mbodzi anakwatwa, unangomboyo anasiyiwa ponthopo.

⁴²“Khalani m'maso mphapo, thangwi imwe nkhabe dziwa tayu nsiku inafuna kudza Mbuyanu.

⁴³Mwenechiro nyumba mbadadziwa ndzidzi wakudza kwa mbava, mbadakhala m'maso mbalondali nyumbache kuti ileke kuswiwa na mbava.

⁴⁴Natenepo imwembo ndzidzi onsene mukhale akusasanyika, thangwi Mwana Munthu anakwanisa kudza pyache pandzidzi unakhonda imwe kumdikhira.

⁴⁵“Mbani, mphapo, nyabasa wakukhulupirika pontho wanzeru. Iye ngule mbuyache amuikha kukhala nyakuyang'anira anyabasa anango onsene, pontho kuapasa phoso ndzidzi ungakwana.

⁴⁶Nyabasa ule anakomerwa pyakwanga mbuyache angabwerera mbamgumana akuchita pinthu penepi.

⁴⁷Ndikukupangani pyakuonadi kuti mwenechiro anamuikha nyabasayo kukhala nyakuyang'anira wa pyonsene pya panyumbache.

⁴⁸Mbwenye nyabasayo angakhala wakuipa, analonga yekha ene mumtima mwache kuti mbuyache hanabwerera chinchino tayu,

⁴⁹natenepo iye ambatoma kumenya anyabasa anzachewo, pontho ambamwa na kudya pabodzi na madombe.

⁵⁰Tenepo mbuyache nyabasa ule anabwerera pansiku inakhonda iye dikhira, pontho ndzidzi unakhonda iye dziwa.

⁵¹Mbuyacheyo anamgwanda mapindi-mapindi[28] mbamponya kumbuto imbakoyiwa mfaka-faka. Kweneko iye analira na kukikita mano ache.