Read cisena MATEO 25 Bible Online

MATEO 25 - cisena bible

MATEO 25

¹“Pandzidzi wenewo Ufumu wa Kudzulu unakhala ninga tenepa. Amiyali khumi adathukula nyale zawo mbaenda kagumanikana na nyakukazhali.

²Ashanu a iwo akhali akupupwa, anango ashanu ale akhali anzeru.

³Ashanu akupupwa ale adakwata nyale zawo, mbwenye iwo hadakwate mafuta a papezi tayu.

⁴Mbwenye anzeru ale adakwata mitete yakudzala na mafuta a nyale zawo.

⁵Nyakukazhali adadembuka kudza, tenepo amiyali ale adatoma kuwodzira mbagona chitulo.

⁶“Pachiti-chiti kukhuwa kudaveka kuti, ‘Nyakukazhali ali pano! Bwerani mugumanikane naye!’

⁷Amiyali khumi ale adalamuka mbagasa nyale zawo.

⁸Tenepo akupupwa ale adalonga kuna anzeru ale mbati, ‘Tipasenimbo ife mafutanu pang'ono, thangwi nyale zathu zikuthima.’

⁹Mbwenye anzeru ale adatawira mbati, ‘Nyonyo pyathu, ife nkhabe akukwana kuti tikupaseni tayu. Ndokoni kuna anyakugulisa mukapigulire mwekha ene.’

¹⁰Tenepo amiyali ashanu akupupwa ale adenda kagula mafuta; pikhaenda iwo nyakukazhali adafika. Amiyali ashanu adasasanyikiratu ale adapita naye pabodzi muphwando, tenepo msuwo udafungwa.

¹¹“M'nduli mwache, amiyali anango ashanu ale adafika mbachemera mbati, ‘Mbuya! Mbuya! Tifungulirenimbo ife.’

¹²Nyakukazhali ule adatawira mbati, ‘Nyonyo pyanga! Ine sinakudziwani tayu.’ ”

¹³Yesu adamalisa na kulonga mbati, “Khalani m'maso, mphapo, thangwi imwe nkhabe dziwa tayu nsiku penu ora yakudza kwa Mwana Munthu.”

¹⁴“Pandzidzi wenewo Ufumu wa Kudzulu unakhala ninga tenepa: Pidachitwa na mamuna unango, ule akhasasanyika pya kwenda paulendo; iye adachemera anyabasache onsene mbaapasa utongi wa pinthu pyonsene pya panyumba pachepo.

¹⁵Iye adaapasa kobiri malingana na mukhakwanisira iwo kuziphatisa basa mwadidi. Iye adapasa nyabasa mbodzi pikwi pishanu pya kobiri, unango adampasa pikwi piwiri, unangomboyo adampasa chikwi chibodzi. Tenepo iye adenda pyache paulendo wache.

¹⁶Nyabasa ule adatambira kobiri pikwi pishanu adenda kachita malonda na kobiri zachezo mbaganyali pontho pikwi pinango pishanu.

¹⁷Chibodzi-bodzi pidachitika kuna ule adatambira kobiri pikwi piwiri. Iyembo adaganyali na kobirizo pikwi pinango piwiri.

¹⁸Mbwenye nyabasa adatambira kobiri chikwi chibodzi ule, adenda kakumba dzenje mbafikhira pansi kobiri za mbuyache zile.

¹⁹“Pidapita ndzidzi ukulu ene, mbuyawo anyabasa ale adabwerera mbaachemera kuti ampange pidaphata iwo na kobiri zile.

²⁰Nyabasa adatambira kobiri pikwi pishanu ule adadza dzapereka pikwi pinango pishanu. Iye adalonga mbati, ‘Imwe mudandipasa kobiri pikwi pishanu. Mphapo, yang'anani! Ine ndaganyali kobiri zinango pikwi pishanu.’

²¹“Mbuyache ule adalonga mbati, ‘Wachita pyadidi, ndiwe nyabasa wadidi pontho wakukhulupirika! Iwe wakhulupirika papinthu ping'ono, tenepo ndinakuikha kukhala nyakuyang'anira pinthu pikulu. Idza utsanzaye pabodzi na ine!’

²²“Kubuluka penepo nyabasa adatambira kobiri pikwi piwiri ule, adadzambo mwenemo mbalonga mbati, ‘Mbuya, imwe mudandipasa kobiri pikwi piwiri. Mphapo, yang'anani! Ine ndaganyali kobiri zinango pikwi piwiri.’

²³Mbuyache ule adalonga mbati, ‘Wachita pyadidi, ndiwe nyabasa wadidi pontho wakukhulupirika! Iwe wakhulupirika papinthu ping'ono, tenepo ndinakuikha kukhala nyakuyang'anira pinthu pikulu. Idza utsanzaye pabodzi na ine!’

²⁴“Kubuluka penepo adatambira kobiri chikwi chibodzi ule adapitambo mwenemo mbalonga mbati, ‘Mbuya, ine ndimbapidziwa kuti imwe ndimwe munthu wavinga. Imwe mumbavuna padakhonda imwe bzala, pontho mumbagumanya padakhonda imwe waza mbewu pale.

²⁵Ine ndikhali na mantha, natenepo ndidakazikumbira kobirizo pansi. Mphapo, yang'anani! Kobiri zanu nsizi.’

²⁶“Mbuyache adalonga mbati, ‘Nyabasa wakuipa pontho wakupolola. Iwe ukhapidziwa kuti ine ndimbavuna padakhonda ine bzala, pontho ndimbagumanya padakhonda ine waza mbewu.

²⁷Mbapidakhala pyadidi kukoyesa kobiri zanga kuna anyakukoya kobiri, towera pakubwerera panga mbandidazitambira na zakuthimizirapo.

²⁸Mpokeni kobiri chikwi chibodzi mbamukazipereke kuna ana kobiri pikwi khumi ule.

²⁹Thangwi munthu ana pinthu kale ule, anati apaswe pizinji kupiringana pina iye; mbwenye munthu anasowa pinthu ule, anati apokwe na ping'ono pene pina iye.

³⁰Ndokoni mukaponye nyabasa wakusowa basa kunja kumdima, kweneko analira na kukikita mano ache.’

³¹“Mwana Munthu angabwera na demelero ninga mfumu pabodzi pene na angelo ache onsene, iye anakhala pampando wache wachifumu wademelero.

³²Tenepo anthu a madzinza onsene anagumanyikana pamaso pache. Iye anaagawa m'magulu mawiri, ninga mumbakhethera makabuswa mabira na mbuzi.

³³Iye anaikha anthu akulungama kumkono wamadyo, akuipambo kumkono wache wamabzere.

³⁴Kubuluka penepo Mfumu analonga kuna anthu a kumkono wache wamadyo ale mbati, ‘Idzani kuno, imwe anthu akutsanzayiswa na Babanga! Idzani mutambire ufumu udakusasanyirani iye ule kutomera pandzidzi udalenga iye dziko.

³⁵Ine ndikhali na njala, imwembo mudandipasa kudya; ndikhali na nyota, imwembo mudandipasa madzi; ine ndikhali mlendo, imwembo mudanditambira m'misa mwanu;

³⁶ine ndikhali chipezi-pezi, imwembo mudandivazika nguwo; ine ndikhadwala, imwembo mukhandiyang'anira; ine ndikhali m'perezo, imwembo mudabwera dzandiona.’

³⁷“Penepo anthu akulungama ale anamtawira kuti, ‘Ndi lini Mbuya, idakuonani ife muna njala, ife mbatikupasani kudya, penu kukuonani na nyota, ife mbatikupasani madzi?

³⁸Ndi lini idakuonani ife mlendo, ife mbatikutambirani m'misa mwathu, penu kukuonani chipezi-pezi, ife mbatikuvazikani nguwo?

³⁹Ndi lini idakuonani ife mukudwala, penu muli m'perezo, ife mbatidzakufambirani?’

⁴⁰Penepo Mfumu anatawira kuti, ‘Ndikukupangani pyakuonadi kuti ndzidzi onsene ukhachitira imwe udidi kuna abale anga okhonda funikawa, udidi wenewo mudachitirambo na ine ene!’

⁴¹“Kubuluka penepo analongambo kuna ale a kumkono wache wamabzere kuti, ‘Chokani pana ine, imwe anthu adzedze! Ndokoni kumoto okhonda thima udasasanyirwa Satana na angelo ache ule!

⁴²Ine ndikhali na njala, imwembo nee mudandipasa kudya tayu; ndikhali na nyota, imwembo nee mudandipasa madzi tayu;

⁴³ine ndikhali mlendo, imwembo nee mudatambira m'misa mwanu tayu; ine ndikhali chipezi-pezi, imwembo nee mudandivazika nguwo tayu; ine ndikhadwala, pontho ndikhali m'perezo, imwembo nee mudabwera dzandifiliviri tayu!’

⁴⁴“Tenepo iwo anamtawira mbati, ‘Ndi lini Mbuya, idakuonani ife muna njala penu muna nyota, penu mlendo, penu chipezi-pezi, penu mukudwala, penu muli m'perezo, ife mbatikhonda kukuphedzani?’

⁴⁵Mfumu anatawira kuti, ‘Ndikukupangani pyakuonadi kuti ndzidzi udakhonda imwe kuphedza anthu okhonda funikawa, mudakhondambo kuphedza na ine ene.’

⁴⁶Mphapo anthu enewa anatchunyuswa na nyatwa zokhonda mala, mbwenye anthu akulungama anaenda kumoyo okhonda mala.”