Read cisena MATEO 26 Bible Online

MATEO 26 - cisena bible

MATEO 26

¹Pidamala Yesu kulonga pinthu pyonsenepi, adalonga kuna anyakufunzache mbati,

²“Imwe mukupidziwa kuti pangagwanda nsiku ziwiri panakhala Phwando ya Paska, tenepo Mwana Munthu anaperekwa kuti akakhomerwe pamtanda.”

³Tenepo anyansembe akulu pabodzi pene na akulu-akulu adagumanyikana m'nyumba yachifumu ya Kayafa, Nyansembe Wamkulu,

⁴kusasanya njira zakumanga na kuphera nazo Yesu chibiso-biso.

⁵Iwo adalonga mbati, “Tilekeni kupichita ndzidzi wa phwandowu, gopesera anthu anachita chimpiningu.”

⁶Yesu akhali ku Betania kumusa kwa Simoni, mamuna akhali na matanya pakutoma ule.

⁷Pikhadya Yesu, mkazi unango adadza kuna iye na mtete wakusasanywa na alabasta wakudzala na mafuta akununkhira akudula, adakhuthulira iye mumsolo mwa Yesu ale.

⁸Pidaona anyakufunza penepi, adazhangali napyo mbavunza mbati, “Anavungiranji mafuta onsenewa?

⁹Mafutawa mbadaguliswa, mbatidaphata nawo kobiri zizinji, tenepo kobirizo mbizidaperekwa kuna anthu akutcherenga.”

¹⁰Penepo Yesu adadziwa pikhalonga iwo pile, natenepo adalonga kuna iwo mbati, “Munamsanyisiranji mkaziyu? Pinthu pyandiphatira iyepi mphyadidi.

¹¹Anyakutcherenga munakhala nawo ndzidzi onsene, mbwenye ine nee munakhala nane ndzidzi onsene tayu.

¹²Iye akhuthula mafuta pamanungo panga kuasasanyiratu pandzidzi wakuikhwa kwanga m'masiye.

¹³Chinchino ndikukupangani pyakuonadi kuti konsene kunalalikwa Mphangwa Zadidi padziko yonsene yapansi pano, pyachita mkaziyu pinalongwambo towera anthu amkumbuke.”

¹⁴Tenepo mbodzi wa anyakufunza khumi na awiri ale, dzinache Yudasi Iskarioti, adenda kuna anyansembe akulu

¹⁵mbakavunza mbati, “Ndingampereka Yesu kuna imwe, munandipagalinji?” Iwo adalengesa kobiri zasiliva makumatatu mbampasa Yudasi.

¹⁶Kubulukira ndzidzi wenewo Yudasi adatoma kusaka-saka ndzidzi wadidi wakupereka nawo Yesu kuna iwo.

¹⁷Pansiku yakutoma ya Phwando ya Mikate yakusowa chakufufumisira, anyakufunzache adadza kuna Yesu mbamvunza mbati, “Nkhupi kunafuna imwe kuti tikakusasanyireni Phwando ya Paska?”

¹⁸Iye adalonga mbati, “Ndokoni mumzindamu kumusa kwa munthu unango mukampange kuti Mfunzisi alonga mbati, ‘Ndzidzi wanga wafika; ine na anyakufunzanga tinasekera pabodzi Phwando ya Paska m'nyumba mwako.’ ”

¹⁹Tenepo anyakufunzache adenda kachita ninga montho mudaapangira Yesu mbasasanyadi Phwando ya Paska.

²⁰Pidadoka kunja Yesu na anyakufunzache khumi na awiri adakhala pathebulu kudya.

²¹Pikhadya iwo, Yesu adalonga mbati, “Ndikukupangani kuti mbodzi wa imwe anati andipereke kuna anyamalwanga.”

²²Anyakufunza ale adatsukwala napyo pyakwanga. Tenepo mbodzi na mbodzi adatoma kumvunza mbati, “Ayi, analonga imwe ndine pano, Mbuya?”

²³Yesu adatawira mbati, “Weneyo anafonda na ine pabodzi m'palatomu, ndiye ene nyakundipereka.

²⁴Mwana Munthu anati afe ninga munalongera Malemba. Mbwenye dzedze kuna nyakupereka Mwana Munthuyo! Mbapidakhala pyadidi kuti nyakumperekayo mbadakhonda balwa!”

²⁵Tenepo Yudasi, nyakupereka Yesu ule adalonga mbati, “Ayi, Mfunzisi, analonga imwe ndine pano?” Yesu adamtawira mbati, “Ande, ndiwe ene.”[29]

²⁶Pikhadya iwo, Yesu adakwata mkate mbapereka takhuta kuna Mulungu mbaumenya. Tenepo adaupereka kuna anyakufunzache mbalonga mbati, “Kwatani mudye mkatewu; enewa ndi manungo anga.”

²⁷Kubuluka penepo adakwata khomitcho mbapereka pontho takhuta kuna Mulungu. Iye adaipereka kuna iwo mbalonga mbati, “Monsenene, imwani!

²⁸Chenechi ntchiropa changa chakuchuchusirwa kuna anthu azinji kulekerera pyakudawa pyawo; chiropa chakudziwisa chiverano cha Mulungu.

²⁹Ndikukupangani kuti ine sinamwave vinyuyu tayu kufikirana nsiku inamwa ine vinyu wachinchino na imwe pabodzi mu Ufumu wa Babanga.”

³⁰Natenepo iwo adaimba nyimbo mbaenda ku Phiri ya Olivi.

³¹Tenepo Yesu adalonga kuna iwo mbati, “Mosiku ontho uno, monsenene munati mundithawe mbamundisiya ndekha, thangwi Malemba alonga kuti, ‘Mulungu anapha makabuswa, tenepo mkumbi wa mabira unabalalikana.’

³²Mbwenye ndingalamuka kuimfa ndinati nditsogole ku Galilea.”

³³Peturo adatawira mbati, “Ine sinakuthawani tayu, podi onsene akuthaweni pyawo.”

³⁴Yesu adalonga kuna Peturo mbati, “Ndikukupanga pyakuonadi kuti mosiku ontho uno, dzongwe mbadzati lira, unalonga katatu kuti hunandidziwa tayu.”

³⁵Peturo adatawira mbati, “Sinalonga tenepo tayu, penu na kundipha kwene pabodzi na imwe!” Anyakufunza anango onsene adalongambo chibodzi-bodzi.

³⁶Kubuluka penepo Yesu pabodzi na anyakufunzache adenda kumbuto yakuchemerwa Getsemani, tenepo iye adalonga kuna iwo mbati, “Khalani pano pinaenda ine uko kapemphera.”

³⁷Iye adakwata Peturo, pontho na ana awiri a Zebedeo, mbaenda nawo pabodzi. Tenepo na kuva nsisi mumtima mwache,

³⁸adalonga kuna iwo mbati, “Mtimanga una nsisi zakufa nazo. Khalani pano, pontho mukhale m'maso pabodzi na ine.”

³⁹Iye adafendedza patsogolo pang'ono mbapiponya pansi na fufumimba mbapemphera mbati, “Babanga, pingakhala pinakwanisika, ndibulusirenimbo ine khomitcho ya nyatwayi. Kuleke khala kufuna kwanga, mbwenye kufuna kwanu.”

⁴⁰Tenepo iye adabwerera kuna anyakufunzache atatu ale mbaagumana agona; natenepo iye adalonga kuna Peturo mbati, “Kadi imwe mungakwanise kukhala nane m'maso ora ibodzi tayu?

⁴¹Khalani m'maso, pontho mupemphere kuti muleke kuyeswa na pyakuipa. Mtima ukufuna, mbwenye manungo alenduka.”

⁴²Yesu adenda pontho kapemphera mbati, “Babanga, ngakhala khomitcho ya nyatwayi hinakwanisika kubuluka kuna ine tayu, mbwenye kuti ndathema kuimwa, chitani kufuna kwanu.”

⁴³Iye adabwerera pontho kuna anyakufunzache ale mbaagumana agona, thangwi akhali na chitulo pyakwanga.

⁴⁴Yesu adaasiya mbaenda pontho kapemphera kachitatu na mafala onthowo.

⁴⁵Tenepo iye adabwerera kuna anyakufunzache mbalonga mbati, “Mukugona na kupuma pyanu basi! Yang'anani! Ndzidzi wakwana wakuti Mwana Munthu aperekwe m'manja mwa anthu akudawa.

⁴⁶Lamukani, tiende. Yang'anani nyakundipereka uyo anadzayo!”

⁴⁷Yesu akhali m'kati kulonga, pidafika Yudasi, mbodzi wa anyakufunza khumi na awiri ale, pabodzi na chimwinji chakuphatira matalasada na pigomba. Iwo akhadatumwa na anyansembe akulu pontho na akulu-akulu.

⁴⁸Nyakupereka Yesuyo akhadapangiza mwinji ule chidzindikiro chakuti, “Munthu anamwenyika ine mwakumpsompsonayo ndiye ene anafuna imwe; mmangeni.”

⁴⁹Penepo Yudasi adenderatu kuna Yesu mbakalonga mbati, “Mfunzisi, mtendere mbukhale kuna imwe.” Tenepo adampsompsona.

⁵⁰Yesu adatawira mbati, “Shamwali, chita pyadzera iwe.”[30] Tenepo iwo adadza mbamphata Yesu mbammanga.

⁵¹Mbodzi wa ale akhali na Yesu ale adasolola talasadache mbakhamwadza bitchu wa Nyansembe Wamkulu mbagwandiratu khutu yache.

⁵²Yesu adalonga kuna iye mbati, “Bwezera talasadayo m'mbuto mwache, thangwi onsene anamenyana pakuphatisa basa talasada, anafambo na talasada.

⁵³Kani imwe nkhabe mukupidziwa tayu kuti ine mbandidakwanisa kuchemera Babanga kuti adze dzandiphedza, iyembo mbadatumiza kabodzi kene gulu ya anyankhondo ya angelo pikwi kupiringana khumi na awiri?

⁵⁴Apo mbandidachita tenepo, mbapidakwana-kwana tani pile pidalonga Malemba kuti pyathema kuchitika?”

⁵⁵Tenepo Yesu adalonga kuna mwinjiwo mbati, “Mwatani munachita kudza na matalasada pontho na pigomba dzandiphata khala ninga ndine phanga? Nsiku zonsene ndikhafunzisa m'Nyumba ya Mulungu, mbwenye imwe hamudandimanga tayu.

⁵⁶Mbwenye pyonsenepi pyachitika towera pile pidalonga Malemba na maprofeti pikwane-kwane.” Tenepo anyakufunza onsene adamsiya mbathawa pyawo.

⁵⁷Amuna akhadamanga Yesu ale adenda naye kunyumba ya Kayafa, Nyansembe Wamkulu, kule kukhadagumanyikana afunzisi a mwambo pabodzi pene na akulu-akulu.

⁵⁸Peturo adamtewera na pakansinzo, kufikirana muchintalo mwa nyumba ya Nyansembe Wamkulu. Iye adapita muchintalo mbakhala pansi pabodzi na anyakulondali, towera aone kuti pyonsene pinamala tani.

⁵⁹Anyansembe akulu na onsene a m'Thando ya miseru ya Chiyuda akhayesa kugumana umboni wakunama kupambizira nawo Yesu, towera amphe;

⁶⁰podi kwene kuti anthu azinji ene adadza patsogolo mbamulongera pyakunama, mbwenye hadaugumane tayu. Pakumalisira amuna awiri adadza patsogolo

⁶¹mbalonga mbati, “Munthuyu adalonga mbati, ‘Ine ndinakwanisa kugwisa Nyumba ya Mulungu mbandiimanga pontho nsiku zitatu basi.’ ”

⁶²Nyansembe Wamkulu adaimira mbalonga mbati, “Hunatawira tayu pinthu pinakulongera anthuwa?”

⁶³Mbwenye Yesu adakhala pyache mulomo phoo. Nyansembe Wamkulu ule adalonga pontho kachiwiri mbati, “Ndikukutonga kuti udumbire pamaso pa Mulungu wamoyo: tipange ngakhala ndiwedi Khristu, Mwana Mulungu.”

⁶⁴Penepo Yesu adamtawira mbati, “Ndimwe mwalonga tenepo. Mbwenye ndikukupangani monsenene kuti kubulukira pa ndzidzi uno munamuona Mwana Munthu akhala kumadyo kwa Mulungu wamphamvu zonsene pontho akudza pamakole a kudzulu!”

⁶⁵Na kuva mafala enewa, Nyansembe Wamkulu ule adang'amba nguwo zache mbalonga mbati, “Ashola Mulungu! Ife nkhabe funa pontho mboni zinango tayu! Penepa mwava kushola kwachita iyeku!

⁶⁶Mphapo, mukunyerezera tani?” Iwo adatawira mbati, “Iye adawa, pontho athema kuphiwa.”

⁶⁷Tenepo iwo adamphulira mata kunkhope mbammenya; tenepo adamgasa mbama ale,

⁶⁸adalonga mbati, “Lotera, Khristu! Mbani akumenya?”

⁶⁹Peturo akhakhala pansi kunja muchintalo cha nyumbayo pidadza nyabasa wachitsikana wa Nyansembe Wamkulu mbalonga mbati, “Iwembo ukhali pabodzi na Yesu wa ku Galilea.”

⁷⁰Mbwenye iye adatuna pamaso pa onsene mbati, “Pinalonga iwepyo, ine sinapidziwa tayu.”

⁷¹Tenepo adabulukiratu na pamsuwo wa chintalocho. Nyabasa unango wachitsikana adamuona mbalonga kuna amuna akhali penepowo mbati, “Uyu akhali pabodzi na Yesu wa ku Nazareti.”

⁷²Penepo Peturo adakhonda pontho mbati, “Ndikudumbira kuti munthu weneyu sinamdziwa tayu!”

⁷³Pidapita ndzidzi pang'ono, amuna adaimira penepo ale adadza kuna Peturo mbalonga mbati, “Ndimomwene, iwe ndiwe mbodzi wa iwo, thangwi malongero akowa akuonesadi kuti ndiwe mbodzi wa iwo.”

⁷⁴Tenepo Peturo adalonga mbati, “Ndikudumbira kuti pinalonga inepi mphakuonadi! Ngakhala ndikulonga pyakunama, Mulungu mbanditchunyuse pyache! Munthuyu sinamdziwa tayu!” Penepo pene dzongwe adalira,

⁷⁵tenepo Peturo adakumbuka pikhadampanga Yesu pile kuti: “Dzongwe mbadzati lira, iwe unati unalonge katatu kuti hunandidziwa tayu.” Iye adabuluka panja mbakalira na kutsukwala kukulu.