Read cisena MATEO 28 Bible Online

MATEO 28 - cisena bible

MATEO 28

¹Pidagwanda Nsiku Yakupuma, pa Dimingu na machibesebese, Maria wa ku Magadala na Maria unango ule adenda kayang'ana kumasiye kule.

²Vumbu-vumbu penepo padachitika chiteke-teke chikulu, thangwi mngelo wa Mbuya adadza kubulukira kudzulu kudzagulung'undisa mwala kuubulusa pamasiyepo, iye mbakhala pamwalapo.

³Iye akhaoneka ninga ching'ani-ng'ani, pontho nguwo zache zikhali zakuchena ninga matalala.

⁴Anyankhondo ale adagoswerwa pyakwanga mwakuti adatetemera na mantha mbakhala ninga anthu akufa.

⁵Mngelo ule adalonga kuna akaziwo mbati, “Lekani chita mantha, ndikupidziwa kuti imwe mukusaka Yesu adakhomerwa pamtanda ule.

⁶Iye hali muno tayu; alamuswa kuimfa, ninga montho mudalongera iye. Pitani muone mbuto idaikhwa iye.

⁷Chinchino chimbizani mukapange anyakufunzache kuti, ‘Iye alamuswa kuimfa, pontho iye atsogola ku Galilea. Kweneko munakamuona!’ Kumbukani pyakupangani inepi.”

⁸Tenepo iwo adabuluka pamasiyepo mwakuchimbiza na mantha, uku akukomerwa pikulu. Iwo adathamanga kapanga anyakufunzache.

⁹Vumbu-vumbu Yesu adagumanikana nawo mbalonga mbati, “Mtendere mbukhale kuna imwe.” Iwo adadza kuna iye mbaphata manyalo ache, mbampembedza.

¹⁰Iye adalonga kuna iwo mbati, “Lekani chita mantha. Ndokoni mukapange abale anga kuti aende ku Galilea. Kweneko anakandiona.”

¹¹Pikhaenda akazi ale, anango mwa anyankhondo akulondali masiyewo, adabwerera kumzinda mbakapanga anyansembe akulu pyonsene pidachitika pile.

¹²Anyansembe akulu na akulu-akulu adagumanyikana pabodzi kuverana pyakuchita; iwo adapereka konta ikulu ya kobiri kuna anyankhondo ale

¹³mbalonga mbati, “Imwe mulonge kuti mosiku pikhagona imwe, anyakufunzache adadza mbaba mtembo wache.

¹⁴Mkulu wa boma ya Roma angava penepi, ife tinamkhuzumusa kuti mwadawa si imwe tayu, natenepo imwe nkhabe chinthu chinafuna imwe dzaswipa nacho mtima tayu.”

¹⁵Anyankhondo ale adakwata kobiri zile mbachita ninga montho mudapangirwa iwo kuti achite. Tenepo mbiri yeneyi idavekeswa pakati pa Ayuda mwakuti ilipo basi na lero.

¹⁶Anyakufunzache khumi na mbodzi ale adenda ku Galilea kuphiri kukhadaapanga Yesu kuti aende kule.

¹⁷Tenepo pidamuona iwo, adampembedza, mbwenye anango a iwo adapenuka basi.

¹⁸Yesu adafendedza chifupi mbalonga kuna iwo mbati, “Ine ndapaswa utongi onsene kudzulu na pansi pano.

¹⁹Natenepo ndokoni konsene kuna anthu a madzinza onsene mbamukaachitise kukhala anyakufunzanga: abatizeni na dzina ya Baba, Mwana, na Mzimu Wakuchena,

²⁰pontho afunziseni kuvera pyonsene pyakupangani ine. Tenepo ndinakhaladi namwe ndzidzi onsene kufikirana kumala kwa dziko yapansi.”