Read cisena MATEO 3 Bible Online

MATEO 3 - cisena bible

MATEO 3

¹Pandzidzi wenewo Yohani Nyakubatiza adadza kuthando yatchetcha m'nthemba ya Yudea mbatoma kulalika.

²Iye adalonga mbati, “Lekani pyakudawa pyanu thangwi Mulungu ali chifupi kukhazikisa Ufumu wache!”

³Yohani akhali munthu adalongwa na mprofeti Yesaya pikhalonga iye mbati, “Munthu unango akukhuwa m'thando yatchetcha kuti, ‘Msasanyireni njira Mbuya, ndendemezani njira towera iye afambemo.’ ”

⁴Nguwo za Yohani zikhali zakusasanywa na ubweya wa nyama ya ngamila. M'chuno mwache adamanga bande ya nthembe, pontho phoso yache ikhali nyadzombe na uchi.

⁵Anthu adabwera kuna iye kubulukira kumzinda wa Yerusalemu na kunthemba yonsene ya Yudea, pontho na kunthemba zonsene za chifupi na mkulo wa Yorodani.

⁶Iwo adabweka pyakudawa pyawo, tenepo Yohani adaabatiza mumkulo wa Yorodani.

⁷Pidaona Yohani kuti Afarisi na Asaduki azinji ene akhabwera kuna iye kuti aabatize, iye adalonga kuna iwo mbati, “Imwe ana a nyoka! Mbani akupangani kuti munakwanisa kuthawa kutchunyusa kunafuna dzatumiza Mulungu?

⁸Phatani pinthu pyakuonesa kuti mwalekadi pyakudawa pyanu.

⁹Pontho lekani nyerezera kuti munakwanisa kuthawa kutchunyuswa pakulonga kwene kuti Abrahamu ndi kholo wanu. Ndikukupangani kuti Mulungu anakwanisa kusandusa miyalayi kukhala pidzukulu pya Abrahamu.

¹⁰Mbadzo yasasanyika kugwanda miti pamitsitsi; muti onsene okhonda bala nsapo zadidi unagwandwa mbuponywa pamoto.

¹¹Ndimbakubatizani na madzi kuonesa kuti mwalekadi pyakudawa pyanu, mbwenye anadza m'nduli mwangayu, anakubatizani na Mzimu Wakuchena, pontho na moto. Iye ngwamkulu pyakwanga kupiringana ine pano mwakuti sidatheme tayu kuthukula nkhwaira zache.

¹²Iye ana chisero m'manja mwache chakupepetera nacho mapira. Tenepo anagumanya mapira pambuwapo kaaikha m'chikwa mwache, mbwenye anapisa makupu-kupu pamoto okhonda thima.”

¹³Pandzidzi weneyo Yesu adabuluka kunthemba ya Galilea mbaenda kumkulo wa Yorodani, towera akabatizwe na Yohani.

¹⁴Mbwenye Yohani akhayesa kumkhondera mbalonga mbati, “Mwatani munabwera kuna ine kuti ndikubatizeni, nee kuti ine ndibatizwe na imwe tayu?”

¹⁵Mbwenye Yesu adamtawira mbati, “Pileke chinchino pikhale tenepo. Thangwi na njira yeneyi tinakwanisa kuchita pinafuna Mulungu.” Tenepo Yohani adatawira kumbatiza.

¹⁶Sindzidzi pidamala Yesu batizwa, adabuluka m'madzi mule, tenepo kudzulu kudafunguka, pontho iye adaona Mzimu wa Mulungu akutchitha pansi ninga nkhangaiwa mbaphamira pana iye.

¹⁷Tenepo fala idaveka kubulukira kudzulu kuti, “Uyu ndi mwananga wapamtima. Ndakomerwa naye pyakwanga pene.”