Read cisena MATEO 4 Bible Online

MATEO 4 - cisena bible

MATEO 4

¹Tenepo Mzimu Wakuchena adamtsogolera Yesu kwenda kuthando yatchetcha kayeswa na Satana.

²Pidamala Yesu nsiku makumanayi akupimana kudya mosiku na masikati, iye adava njala.

³Tenepo Satana adadza kuna iye mbalonga mbati, “Ngakhala ndiwedi Mwana Mulungu, tonga miyalayi isanduke mikate.”

⁴Mbwenye Yesu adamtawira mbati, “Malemba akulonga kuti, ‘Munthu nkhabe khala na moyo na mkate okha tayu, mbwenye na mafala onsene analonga Mulungu.’ ”

⁵Kubuluka penepo Satana adendesa Yesu ku Yerusalemu, Mzinda wakuchena, mbamkwirisa pachisusu cha Nyumba ya Mulungu

⁶mbalonga kuna iye mbati, “Ngakhala ndiwedi Mwana Mulungu, piponye wekha ene pansi, thangwi Malemba akulonga kuti: ‘Mulungu anatonga angelo ache pya iwe; iwo anakugampha m'manjawo, towera na manyalo ako ene aleke kuwazika na miyala.’ ”

⁷Yesu adatawira mbati, “Malemba akulonga pontho kuti, ‘Leka yesa Mbuya Mulungu wako.’ ”

⁸Tenepo Satana adakwata Yesu mbakwira naye paphiri yakulapha pyakwanga mbamuonesa maufumu onsene a padziko yapansi na demelero yache yonsene.

⁹Tenepo Satana ule adalonga kuna Yesu mbati, “Pyonsene pinaona iwepi ndinakupasa kuti pikhale pyako, ngakhala unagodama pansi mbundipembedza.”

¹⁰Tenepo Yesu adatawira mbati, “Choka Satana! Malemba akulonga kuti, ‘Upembedze na kutumikira Mbuya Mulungu wako ene basi.’ ”

¹¹Natenepo Satana ule adamsiya Yesu; tenepo angelo adadza mbamphedza.

¹²Pidapiva Yesu kuti Yohani aikhwa m'perezo, adabwerera ku Galilea.

¹³Iye hadakhalemo muluwani ya Nazareti tayu, mbwenye adenda kakhala mu Kafaranao, luwani ya m'khundu mwa nyanza ya Galilea kunthemba za Zebuloni na Nafitali.

¹⁴Tenepo penepi pidachitika kuti pikwane-kwane pidalonga mprofeti Yesaya kuti:

¹⁵“Nthemba ya Zebuloni na nthemba ya Nafitali, panjira yakwendera kunyanza kumtunda unango wa mkulo wa Yorodani, Galilea, nthemba ya anthu okhonda khala Ayuda!

¹⁶Anthu akukhala mumdima anaona cheza chikulu; kuna alembo ambakhala kumbuto zamthunzi wa imfa, cheza chinaamwinikira.”

¹⁷Kubulukira pa ndzidzi wenewo Yesu adatoma kulalika mphangwa zache mbati, “Lekani pyakudawa pyanu, thangwi Mulungu ali chifupi kukhazikisa Ufumu wache.”

¹⁸Pikhafamba Yesu pagombe ya nyanza ya Galilea, adaona amisiri a nsomba awiri ubaleawo. Simoni wakuchemerwa Peturo na mbaleache Andrea, akupha nsomba m'nyanza na chavi.

¹⁹Yesu adalonga kuna iwo mbati, “Nditewereni, ndinakusandusani kukhala anyakumedza a anthu.”

²⁰Kabodzi na kabodzi iwo adasiya pyavi pyawo mbamtewera.

²¹Iye adathimiza kwenda mbaona pontho amuna anango awiri ubaleawo, Yakobo na Yohani, ana Zebedeo. Iwo akhali m'mwadiya pabodzi pene na babawo Zebedeo kusasanyiratu makokotawo. Yesu adaachemera,

²²tenepo kabodzi kene iwo adasiya makokotawo na babawo m'mwadiya mule mbatewera Yesu.

²³Yesu adenda m'nthemba yonsene ya Galilea kufunzisa m'nyumba zakupemphereramo, kulalika Mphangwa Zadidi za Ufumu wa Mulungu, pontho na kuwangisa anthu ale akhali na utenda wa mtundu onsene, pontho na nyatwa zakusiyana-siyana.

²⁴Mbiri yache idaveka m'dziko yonsene ya Siria mwakuti anthu akhadza kuna iye na atenda ale akhali na utenda onsene wakusiyana-siyana na akuva kupha m'manungo; anthu akuphatwa na mizimu yakuipa, anjiri-njiri na anyamfutete, tenepo Yesu adaawangisa onsenewo.

²⁵Anthu azinji akubulukira ku Galilea na ku Maluwani Khumi,[2] akubulukira ku Yerusalemu, Yudea pontho na nthemba ya kumtunda unango wa kumkulo wa Yorodani, adamtewera.