Read cisena MATEO 5 Bible Online

MATEO 5 - cisena bible

MATEO 5

¹Yesu adaona mwinji ule mbakwira paphiri mbakakhala pansi. Anyakufunzache adagumanyikana mwakumzungulira

²mbatoma kuafunzisa mbati,

³“Ngakutsanzaya anthu ale ambadziwa kunyindira Mulungu kumbachita iwo thangwi Ufumu wa Kudzulu ngwawo.

⁴Ngakutsanzaya anthu ale anasintili ndzidzi uno, thangwi Mulungu anaapukuta misozi.

⁵Ngakutsanzaya anthu ale ambapichepesa, thangwi anatambira pile pidalonga Mulungu kuti anaapasa.

⁶Ngakutsanzaya anthu ale ambasirira pikulu kuchita pinafuna Mulungu, thangwi Mulungu anaakhutisa.

⁷Ngakutsanzaya anthu ale ambachitira anzawo udidi, thangwi Mulungu anaachitirambo udidi.

⁸Ngakutsanzaya anthu ale ngakuchena mtima, thangwi anati aone Mulungu.

⁹Ngakutsanzaya anthu ale ambafuna pya mtendere, thangwi Mulungu anaachemera anache.

¹⁰Ngakutsanzaya anthu ale ambasanyiswa thangwi ya kuchita pinafuna Mulungu, thangwi Ufumu wa Kudzulu ngwawo.

¹¹“Ndimwe akutsanzaya, anthu angakutikanani mbakukusanyisani mbakupambizirani pinthu pyonsene pyakuipa thangwi ndimwe anyakunditewera.

¹²Tsanzayani na kukomerwa, thangwi mwakoyerwa mfupo ukulu kudzulu. Mwenemu ndi sasawambo ninga mudasanyisirwa maprofeti ale akhalipo imwe mbudzati balwa.

¹³“Imwe mwakhala ninga munyu kuna anthu a padziko yapansi. Mbwenye munyuwo ungasuluka, unanyung'unyiswa nanji pontho? Wasanduka ninga wakusowa basa. Tenepo umbatayiwa panja anthu mbaupondedza.

¹⁴“Imwe mwakhala ninga cheza kuna anthu a padziko yapansi. Mzinda wakumangwa padzulu pa phiri humbabisika tayu.

¹⁵Nkhabe munthu ambagasa nyale mbaigudumira na chitomba tayu; m'mbuto mwache iye ambaiikha pakwecha, towera imwinikire anthu onsene m'nyumbamo.

¹⁶Ntchibodzi-bodzi, cheza chanu chimwinikire pamaso pa anthu kuti iwo aone pinthu pyadidi pinachita imwe mbalemedza Babanu kudzulu.

¹⁷“Lekani nyerezera kuti ndadzera dzamalisa penu dzafudza mwambo wa Mose na pifunziso pya maprofeti. Nee sidadzere kupifudza tayu, mbwenye kuchitisa pifunziso pyawo kukwana-kwana.

¹⁸Ndikukupangani pyakuonadi kuti thambo na dziko mbipidzati buluka, pa mwambowo nee panafudzwa kalemba na kang'ono kene penu kansonga kalemba kene tayu kufikirana pinthu pyonsenepi pikwane-kwane.[3]

¹⁹Tenepo munthu angakhonda vera matongero na ang'ono-ang'ono ene mbafunzisa anthu kuchitambo chibodzi-bodzi, iye anakhala wamng'ono mu Ufumu wa Kudzulu. Mbwenye kuna onsene ale ambavera mwambowu, pontho mbafunzisa anangombo kuchita chibodzi-bodzi, anakhalambo wamkulu mu Ufumu wa Kudzulu.

²⁰Ndikukupangani, mphapo, munakwanisa kupita mu Ufumu wa Kudzulu ngakhala ndimwe anthu akukhulupirika kupiringana afunzisi a mwambo na Afarisi pakuchita pinthu pinafuna Mulungu.

²¹“Imwe mwava kuti kale ene anthu akhapangwa kuti, ‘Lekani kupha; munthu angachita kwene penepi apisosera yekha ene mseru.’

²²Mbwenye chinchino ndikukupangani kuti munthu angazhangalira[4] mbaleache, apisosera yekha ene mseru. Munthu analonga mbaleache kuti, ‘Iwe nkhabe basa’ anasumirwa kuthando ya miseru, pontho munthu anathula mbaleache kuti, ‘Pupwe’ anaponywa kumoto wa kugehena.

²³Natenepo iwe ungafuna kupereka mtukwa paguwa kuna Mulungu, penepo ungakumbuka kuti una mseru na mbaleako

²⁴mphyadidi kuti usiye mtukwakowo paguwapo mbauenda kaphatizana na mbaleakoyo, ungamala penepo, ubwerere mbukapereka mtukwa ule kuna Mulungu.

²⁵“Ngakhala unango akusumira kuthando ya miseru mphyakufunika kuti uphatizane naye mbamuli panjira kwenda katongwa, thangwi ungafika kweneko iye anakupereka m'manja mwa nyakutonga miseru. Weneyumbo anakupereka m'manja mwa msikali, tenepo msikali anakuikha m'perezo.

²⁶Ndikukupanga kuti iwe nkhabe dzabuluka tayu m'perezomo kufikirana wamalisa kupagali mangawa onsene a mseru wakowo.

²⁷“Imwe mwava kuti pidalongwa kale ene kuti, ‘Lekani chita uputa.’

²⁸Mbwenye chinchino ndikukupangani kuti: munthu angaona mkazi mbamsirira, penepo pene achita naye kale uputa mumtima mwache.

²⁹Tenepo ngakhala diso yako yakumadyo ikukudawisa, ikonombole mbuitaye. Mphyadidi kuti utaye phindi ibodzi ya manungo ako kusiyana nakuti manungo ako onsene aponywe kugehena.

³⁰Ngakhala dzanjako yakumadyo ikukudawisa, igwande mbuitaye. Mphyadidi kuti utaye dzanjako ibodzi kusiyana nakuti manungo ako onsene akaponywe kugehena.

³¹“Kalene pidalongwa pontho tenepa: ‘Munthu angamwalana na mkazache alembe kalata ninga msiku.’

³²Mbwenye chinchino ndikukupangani kuti: ngakhala mamuna amwalana na mkazache na mathangwi anango ene, nee kuti okhonda khulupirika, mkaziyo mbasembwa pontho, mamunayo achitisa kuti mkaziyo achite uputa. Tenepo mamuna amsembayo achitambo uputa.

³³“Imwe mwapiva pontho kuti kale ene anthu akhapangwa kuti, ‘Lekani kuswa mapangano, mbwenye chitani pidadumbira imwe kuna Mbuya.’

³⁴Mbwenye chinchino ndikukupangani kuti mungachita mapangano na munthu muleke kudumbira. Lekani kudumbira na kudzulu, thangwi kweneko ndi mpando wachifumu wa Mulungu,

³⁵nee na dziko yapansi, thangwi mphakutsamisira manyalo ache, penu na Yerusalemu ene, thangwi wenewo ndi mzinda wa Mfumu Wamkulu.

³⁶Lekani kudumbira na pakhosi panu, thangwi imwe nkhabe kwanisa kuchitisa kuti tsisi ikhale yakuchena penu yakuswipa tayu.

³⁷Mulonge kwene kuti ‘Ande,’ penu ‘Tayu;’ pinango pyonsene pinathimizira imwe kulonga mphyakubulukira kuna Satana, nyakuipa.

³⁸“Imwe mwava kuti pidalongwa kale ene kuti: ‘Diso ibweze diso, dzino ibweze dzino.’

³⁹Mbwenye chinchino ndikukupangani kuti lekani bwezera mwanzanu angakuchitirani chakudawika. Ngakhala munthu anakugasa mbama kuphutu yakumadyo, mpase phutu inango yakumabzereyo kuti amenye pontho.

⁴⁰Pontho ngakhala munthu ali nawe mseru mbakukhakhamiza kuti umpase mayalako, umpase akwate pabodzi na mkhanjo wako ene.

⁴¹Pontho ngakhala nyankhondo akukukhakhamiza kuti umthukhulire mtolo wache pontho umperekeze mathanyo chikwi chibodzi, ndoko naye pikwi piwiri.

⁴²Ngakhala munthu unango akupempha chinthu, umpase; unango angafuna kukubwereka chinthu, umbwereke.

⁴³“Imwe mwava kuti pidalongwa kale ene kuti, ‘Funani ashamwali anu, chitani pyaumalwa kuna anyamalwanu.’

⁴⁴Mbwenye chinchino ndikukupangani kuti funani anyamalwanu pontho pemphererani ambakusanyisani ale,

⁴⁵towera mukhale ana a Babanu wa Kudzulu. Thangwi iye ambagasa dzuwa pana anthu adidi na akuipa ene, pontho ambavumbisa mvula kuna ale ambachita udidi na kuna ale ambachita pyakudawika.

⁴⁶Mulungu anakwanisa tani kukufupani ngakhala imwe mumbafuna kwene anthu ale ambafunambo imwe? Na anyamisonkho ene ambapichita penepi basi!

⁴⁷Ngakhala mumbamwenyika ashamwali anu ene basi, penepa mwasiyana tani na pile pimbachita anthu ene pyawo? Na anthu ene okhonda dziwa Mulungu ambachitambo chibodzi-bodzi.

⁴⁸Khalani akuthema monsene mwene ninga Babanu wa Kudzulu ngwakuthema monsene mwene!