Read cisena MATEO 6 Bible Online

MATEO 6 - cisena bible

MATEO 6

¹“Onesesani kuti muleke chita mabasanu akulungama mwakuoniwa, kufuna kusimbwa na anthu. Mungachita tenepo nee munatambira na mfupo ene kubulukira kudzulu kuna Babanu tayu.

²“Tenepo mungapasa chinthu nyakutcherenga, lekani kupilalika kuna anthu ninga mumbachitira mfaka-faka zinangozi m'nyumba zakupemphereramo na m'misikamu. Iwo ambachita tenepo towera asimbwe na anthu anango. Ndikukupangani pyakuonadi kuti enewo apagalwi kale mfupo wawo.

³Mbwenye ngakhala munaphedza nyakutcherenga, mupichite mwakukhonda kupionesera mwakuti shamwalianu wapamtima aleke kupidziwa.

⁴Tenepo pyachita imwepyo pinakhala pyakubisika. Babanu ule ambaona pile pimbachitwa mwakukhonda kupionesera anakufupani.

⁵“Mungapemphera lekani khala ninga mfaka-faka. Izo zingapemphera zimbakomerwa na kuimira m'nyumba zakupemphereramo na m'mphambamo zanjira, towera aoniwe na anthu onsene. Ndikukupangani pyakuonadi kuti iwo apagalwi kale mfupo awo.

⁶Mbwenye mungafuna kupemphera, ndokoni kusubi kwanu, fungani msuwo mbamupemphera kuna Babanu okhonda oneka ule. Tenepo Babanu ule ambaona pimbachita imwe mwakubisika, anakufupani.

⁷“Mungapemphera, lekani bwereza mafala ontho-onthowo ninga mumbachitira anthu okhonda dziwa Mulungu, ale ambanyerezera kuti Mulungu anava pinapempha iwo na kupemphera kwawo mwakulapha.

⁸Lekani khala ninga iwo, thangwi Babanu ambadziwa kale pimbafuna imwe mbamudzati pempha.

⁹Mphapo, mungafuna pemphera, longani tenepa: ‘Babathu wa Kudzulu; dzinanu yakuchena mbilemedzwe;

¹⁰ufumu wanu mbudze; kufuna kwanu kuchitwe pansi pano ninga muna ipyo kudzulu.

¹¹Tipasenimbo pyakudya pyathu pya lero.[5]

¹²Tilekerereni pyakudawa pyathu ninga pyachita ifembo kulekerera anyakutidawira.

¹³Lekani tawirisa kuti tiyeswe na mayesero, mbwenye tipulumuseni kuna Satana, nyakuipayo.’

¹⁴“Mungalekerera pyakudawa pyakuchitirani anthu anango, Babanu wa Kudzulu analekererambo pyakudawa pyanu.

¹⁵Mbwenye ngakhala imwe nkhabe lekerera pyakukudawirani anzanu, Babanu Mulungu hanalekererambo pyakudawa pyanu tayu.

¹⁶“Ngakhala mukupimana kudya, lekani onesa makhuzi ninga mumbachitira mfaka-faka. Iwo ambachita makhuzi towera aoniwe na anthu onsene kuti akupimana kudya. Ndikukupangani pyakuonadi kuti enewo atambira kale mfupo wawo.

¹⁷Ngakhala mukupimana kudya, sambani nkhope pontho sapulani tsisi yanu,

¹⁸towera anthu anango aleke kupidziwa kuti mukupimana kudya, mbwenye apidziwe ndi Babanu ene wakukhonda oneka ule basi. Babanu ule ambaona pimbachita imwe mwakubisika, anakufupani.

¹⁹“Lekani kupikoyera mfuma pansi pano, kule mabelethe na ubzimbiri pinakwanisa kuivunga, pontho mbava zinakwanisa kuswa mbizibamo.

²⁰Mbwenye pikoyereni mfuma kudzulu, kule uchenje na ubzimbiri nkhabe kwanisa kuivunga tayu, pontho mbava nkhabe kwanisa kuswa mbizibamo tayu.

²¹Thangwi kuna mfumanu, mtimanu umbakhalambo konthoko.

²²“Maso ndi nyale ya manungo. Ngakhala maso ako ali mwadidi, manungo ako onsene ambakhalambo na cheza.

²³Mbwenye ngakhala maso ako hali mwadidi tayu, manungo ako ambakhala mumdima. Natenepo ngakhala cheza chanu chasanduka mdima, munakhala mumdima wakugoswa pyakwanga.

²⁴“Nkhabe nyabasa anakwanisa kutumikira ambuya awiri tayu, thangwi anazonda mbodzi mbafuna unangoyo; anakhulupirika kuna mbodzi mbalulupisa unangoyo. Imwe nkhabe kwanisa kutumikira Mulungu na ndzidzi onthowo kutumikira kobiri tayu.

²⁵“Ndi thangwi yache ndikukupangani kuti lekani swipa mtima na moyo wanu kuti munadyanji, munamwanji penu munavalanji? Ayi moyo si wakufunika pyakwanga tayu kupiringana pyakudya? Manungombo si akufunika pyakwanga tayu kupiringana nguwo?

²⁶Ngayang'anani mbalame: Izo nee zimbalima, penu kuvuna, penu kukoya phoso m'pikwa tayu; mbwenye Babanu wa kudzulu ambaziyang'anira mwadidi. Apo imwe, si imwe akufunika pyakwanga kupiringana mbalame tayu?

²⁷Mbani wa imwe anakwanisa kuthimizira nsiku[6] ibodzi ene basi pansiku zache na kuswipa mtima?

²⁸“Mphapo mumbaswipiranji mtima kuti munavalanji? Ngayang'anani kukula kumbachita maluwa am'tsanga: nee ambaphata basa penu kupisasanyira okha ene nguwo tayu.

²⁹Mbwenye ndikukupangani kuti nee Mfumu Solomoni, na kufuma konsene kudachita iye, akhali na nguwo zakubalika ninga abodzi mwa maluwa enewa tayu.

³⁰Apo ngakhala Mulungu ambavazika ninga tenepa maudzu am'tsanga ale ambalila kukhala lero ene basi, mangwana mwache mbaponywa pamoto, ayi weneyu nkhabe dzakuvazikani mwadidi tayu. Imwe anthu a chikhulupiro chakuchepa!

³¹“Natenepo lekani sanyika na kupivunza kuti, ‘Lero tinadyanji?’ penu ‘Tinamwanji?’ penu, ‘Tinavalanji?’

³²Thangwi ambapifuna pinthu penepi mbanthu okhonda dziwa Mulungu. Babanu wa Kudzulu ambadziwa kuti imwe mumbafuna pinthu pyonsenepi.

³³Mbwenye chakutoma imwe mwathema kutsalakana pya Ufumu wa Mulungu mbamuchita pinafuna iye, tenepo iye anakupasani pinthu pinango pyonsenepi.

³⁴Tenepo lekani swipa mtima na pya mangwana, thangwi pya mangwana mphyamangwana. Nsiku yonsene ina nyatwa zache zakukwana-kwanaletu.