Read cisena MATEO 8 Bible Online

MATEO 8 - cisena bible

MATEO 8

¹Pidatchitha Yesu kubulukira pa phiri pale, mwinji ukulu udamtewera.

²Tenepo nyamatanya adadza kuna Yesu dzagodama pamaso pache mbalonga mbati, “Mbuya, imwe mungapifuna, munakwanisa kundichenesa.”[7]

³Yesu adafuthula mkono wache mbamphata mbatawira mbati, “Ndinapifuna, chena!” Kabodzi na kabodzi matanya ale adammalira munthu ule.

⁴Tenepo Yesu adampanga munthu ule mbati, “Ngava! Leka kapanga munthu na mbodzi ene, mbwenye ndokoletu kuna nyansembe kuti akakuone; nakuti onsene akapidziwe kuti wawangadi, kapereke nsembe zidatonga Mose zile.”

⁵Pidapita Yesu muluwani ya Kafaranao, mkadamu wa anyankhondo dzana adagumanikana naye mbampempha kuti amphedze mbati,

⁶“Mbuya, nyabasanga adwala mwakuti agona patalimba kumusaku, akuchimwana na kufamba kwene, pontho akuva kupha pyakwanga.”

⁷Yesu adalonga mbati, “Ndinati ndiende kamuwangisa.”

⁸Mkadamu ule adatawira mbati, “Waa tayu, Mbuya, thangwi ine sidatheme tayu kuti imwe mukapite m'nyumba mwanga. Mbwenye longani kwene fala basi, nyabasanga anati awange.

⁹Ine ene pano ndili pansi pa utongi wa akadamu anga, pontho pansi pangambo pana anyankhondo mwakuti ndingapanga mbodzi kuti, ‘Ndoko!’ Iye ambaendadi; apo ndingapangombo unango kuti, ‘Idza kuno!’ Iye ambadzadi; apo ndingapanga nyabasanga kuti, ‘Chita chakuti!’ Iye ambachitadi.”

¹⁰Pidava Yesu penepi adadodoma napyo mbalonga kuna anthu akhamtewera ale mbati, “Ndikukupangani pyakuonadi kuti chipo nee ndidzati ndaona munthu wakukhala na chikhulupiro ninga chenechi m'dziko ya Israele tayu.

¹¹Ndikukupangani pyakuonadi kuti anthu azinji anabwera kubulukira kumabulukiro na kumadokero dzuwa mbakhala pansi pabodzi na Abrahamu, Isake na Yakobo paphwando mu Ufumu wa Kudzulu.

¹²Mbwenye ale adachita kuti ndiwo anapita mu Ufumuwo anaponywa kumdima, kweneko iwo analira na kukikita mano awo.”

¹³Tenepo Yesu adalonga kuna mkadamu ule mbati, “Ndoko mudzi, pyakhulupira iwepi pinati pichitikedi kuna iwe.” Tenepo nyabasa wa mkadamu adawangiratu na ndzidzi onthowo.

¹⁴Yesu adenda kumusa kwa Peturo. Kweneko adaonako mebzalache Peturo ali gone patalimba nawo manungo kumpha.

¹⁵Yesu adamphata dzanjache, manungombo adalekeratu. Tenepo mkazi ule adalamuka mbatoma kumfiliviri.

¹⁶Na mawulo, anthu adadza kuna Yesu na anthu azinji ale akhadaphatwa na mizimu yakuipa. Yesu adabulusa mizimu yakuipa na fala ene basi, pontho adawangisa atenda onsene.

¹⁷Na njira yeneyi mafala adalonga mprofeti Yesaya adakwana-kwana pidalonga iye mbati, “Iye adathukula pyakuva kupha pyathu, pontho adabulusa utendathu onsene.”

¹⁸Pidaona Yesu kuti mwinji wamzungulira, adapanga anyakufunzache kuti awambukire kukhundu inango ya nyanza.

¹⁹Mfunzisi unango wa mwambo adadza kuna iye mbalonga mbati, “Mfunzisi, ine ndasasanyika kwenda namwe konsene kunaenda imwe.”

²⁰Yesu adamtawira mbati, “Mibinzi ina madzimba, pontho mbalame zina pisa, mbwenye Mwana Munthu nkhabe mbuto yakugona penu yakupumirapo tayu.”

²¹Nyakufunza unango adalonga mbati, “Mbuya, nditawiriseni kuti nditome kaikha maliro a babanga.”

²²Yesu adatawira mbati, “Nditewere. Aleke anyakufa aikhane anyakufa okhokha.”

²³Yesu adapakira m'mwadiya, mbaenda pabodzi na anyakufunzache.

²⁴Vumbu-vumbu, chonzi chakugoswa chidagundika panyanzapo mwakuti mwadiya ule ukhali chifupi kulirima. Mbwenye Yesu akhali pyache m'chitulo kugona.

²⁵Tenepo anyakufunzache adenda kuna iyeko kamulamusa. Iwo adalonga mbati, “Tipulumuseni Mbuya! Ngayang'anani, tili chifupi kufa!”

²⁶Yesu adaatawira mbati, “Imwe anthu a chikhulupiro chakuchepa, thangwi yache njanji munagoswerwa tenepa?” Tenepo Yesu adalamuka mbatonga mphepo na mabimbi kuti pimatame. Tenepo pakhali kumatama kukulu.

²⁷Tenepo onsene adadodoma mbalonga mbati, “Weneyu ndi mtundu wanji wa munthu wakuti mphepo na mabimbi pimbamvera?”

²⁸Pidadza Yesu kumtunda unango wa nyanza kunthemba ya Gadara, adagumanikana na amuna awiri akubulukira kumadzimba amasiye. Amuna enewa akhadaphatwa na mizimu yakuipa, tenepo akhagoswa pyakwanga mwakuti nee mbodzi adawanga mtima kugwanda na njira yeneyo tayu.

²⁹Kabodzi kene iwo adakhuwa mbati, “Munafunanji na ife, imwe Mwana Mulungu? Kani mwadza dzatisanyisa mbudzati fika ndzidzi wache?”

³⁰Pakansinzo pang'ono pakhadya mkumbi ukulu wa nkhumba.

³¹Natenepo mizimu yakuipa ile idapempha Yesu kuti, “Ngakhala munafuna kutibulusa, titumizeni pyathu muna mkumbi wa nkhumba uli apowo.”

³²Yesu adalonga kuna iyo mbati, “Ndokoni!” Tenepo mizimu yakuipa ile idabuluka mbikapita muna nkhumba. Mkumbi onsene wa nkhumba ule udatchithira pamatelero na kuthamanga mbukagwera m'nyanza mbubira.

³³Amakabuswa a nkhumba zile adathamanga kuluwani kalonga pyonsenepyo, pontho na pile pidachitikira amuna akhadaphatwa na mizimu yakuipa ale.

³⁴Natenepo onsene muluwanimo adenda kaona Yesu. Pidamuona iwo, adampempha kuti abuluke kunthemba kwawoko.