Read cisena MATEO 9 Bible Online

MATEO 9 - cisena bible

MATEO 9

¹Yesu adapakira m'mwadiya mbawambuka nyanza kubwerera kuluwani ya kwawo.[8]

²Kweneko amuna anango adamdzesera nyamfutete, wakugoneswa pamachira. Pidaona Yesu chikhulupiro chawo, adalonga kuna nyamfuteteyo mbati, “Wanga mtima, mwananga! Pyakudawa pyako pyalekererwa.”

³Afunzisi a mwambo adalonga okha ene mbati, “Munthuyu akushola Mulungu!”

⁴Yesu adadziwa kale pikhanyerezera iwo, natenepo adalonga mbati, “Mwatani munanyerezera pinthu pyakuipa ninga penepi?

⁵Chifupi ntchipi kulonga kuti, ‘Pyakudawa pyako pyalekererwa,’ penu, ‘Lamuka ufambe’?

⁶Mbwenye ndinakupangizanidi kuti Mwana Munthu ana utongi wakulekerera pyakudawa padziko yapansi.” Tenepo iye adalonga kuna nyamfuteteyo mbati, “Lamuka, thukula makhako uende kwanu.”

⁷Tenepo munthu ule adalamukadi mbaenda kwawo.

⁸Pidaona anthu penepi adaphatwa na mantha, tenepo adakuza Mulungu thangwi ya kupereka utongi ninga wenewu kuna anthu.

⁹Yesu adabuluka pambuto yeneyo. Tenepo pikhafamba iye, adaona nyamisonkho dzinache Mateo ali khale m'nyumba ya misonkho. Yesu adalonga kuna iye mbati, “Nditewere!” Mateo adalamuka mbamteweradi.

¹⁰Pikhadya Yesu kumusa kwa Mateo,[9] anyamisonkho azinji na anthu anango akudawa adadza mbadya pabodzi na Yesu, pontho na anyakufunzache.

¹¹Afarisi anango adaona penepi mbavunza anyakufunzache mbati, “Thangwi yache njanji mfunzisi wanu ambadya pabodzi na anthu ninga enewa?”

¹²Yesu adava mbaatawira mbati, “Anthu akuwanga nkhabe funa ng'anga tayu, mbwenye atenda.

¹³Ndokoni mukayang'ane kuti Malemba akulonganji pinalonga iwo kuti, ‘Sinafuna nsembe za nyama tayu, mbwenye chinafuna ine nkhukoma mtima.’ Ine sidadzere dzachemera anthu akulungama tayu, mbwenye anyakudawa.”

¹⁴Anyakutewera a Yohani Nyakubatiza adadza kuna Yesu mbamvunza mbati, “Pyakhala tani kuti ife na Afarisi timbapimana kudya kazinji kene, mbwenye anyakufunzanuwa nkhabe kupimana kudya tayu?”

¹⁵Yesu adalonga mbati, “Imwe mukunyerezera kuti anthu akuchemerwa kuphwando yakukazhali anatsukwala mwenemo nyakusemba ali nawo pabodzi? Nkhabe tayu, mbwenye ndzidzi unafika unafuna dzabuluswa nyakusembayo pakati pawo, tenepo iwo anapimana kudya.”

¹⁶“Nkhabe munthu ambakwata chigamba cha nguwo itswa mbachisonera panguwo yakale tayu, thangwi chigamba chachinchinocho chinanyomola na kukuziratu benga ya panguwo yakale ile.

¹⁷Pontho nkhabe munthu ambatsanyulira vinyu wachinchino m'mabudu a nthembe akuphatisirwa kale basa tayu, thangwi mabuduwo anatumbuka, vinyuyo mbakhuthukira pansi, pontho mabuduwo anavungika. Chadidi chache vinyu wachinchino atsanyulirwe m'mabudu achinchino. Tenepo pyonsenepyo pinakoyeka mwadidi.”

¹⁸Pikhali Yesu m'kati kulonga mafala enewa, mkadamu unango wa Chiyuda adadza kuna iye mbagodama pamaso pache mbalonga mbati, “Mwananga wamkazi afa chinchino pano. Apo tendeni mukamsanjike manjanu, tenepo iye anakhala pontho na moyo.”

¹⁹Tenepo Yesu pabodzi na anyakufunzache adalamuka mbamtewera.

²⁰Mkazi, akhadadwala utenda wa msamba-msamba pyaka khumi na piwiri ule, adadza m'nduli mbaphata chikhwayeti cha chakufinika cha Yesu.

²¹Iye adalonga yekha ene mbati, “Ndingakhuya kwene chakufinika chache, ndinati ndiwange.”

²²Yesu adazungunuka mbamuona mkaziyo mbalonga mbati, “Wanga mtima, Mwananga! Chikhulupiro chako chakuwangisa.” Tenepo na ndzidzi onthowo mkazi ule adawangiratu.

²³Tenepo Yesu adenda kapita m'nyumba ya mkadamu ule. Pidaona iye anyakuimba pitoliro na anyakulira maliro ale,

²⁴iye adalonga mbati, “Bulukani panja, monsenene! Mwana mtsikanayu hadafe tayu. Iye ali m'chitulo!” Tenepo onsene mwenemo adamseka Yesu.

²⁵Mbwenye sindzidzi pidabuluswa anthu panja, Yesu adenda kusubi kwa mwanayo mbamphata pamkono, mbamulamusa mtsikanayo.

²⁶Mbiri yeneyi idafala konsene kukhundu yeneyo ya dziko.

²⁷Yesu adabuluka pambutopo. Tenepo pikhaenda iye, maboli-boli awiri adatoma kumtewera m'nduli mwache. Iwo adakhuwa mbati, “Mwana Davite, tiverenimbo nsisi ife!”

²⁸Pidapita Yesu m'nyumba, maboli-boli ale adadza kuna iye. Tenepo iye adaavunza mbati, “Kadi imwe mukukhulupiradi kuti ine ndinakwanisa kukuwangisani?” Iwo adatawira mbati, “Ande, Mbuya!”

²⁹Tenepo Yesu adaaphata maso awo mbalonga mbati, “Pichitike ninga munakhulupira imwe!”

³⁰Penepo kuona kwawo kudabwerera. Yesu adalonga mwakugogomeza mbati, “Lekani kapanga munthu na mbodzi ene.”

³¹Mbwenye iwo adenda mbakavekesa mbiri ya Yesu konsene kukhundu yeneyo ya dziko.

³²Pikhaenda amuna ale, anthu anango adadza kuna Yesu na munthu wakukhonda longa, thangwi iye akhadaphatwa na mzimu wakuipa.

³³Mbwenye sindzidzi mzimu wakuipa nkhubuluswa, munthu ule adatoma kulonga. Natenepo anthu onsene adadodoma mbalonga mbati, “Chipo nee tidzati taona pinthu ninga penepi tayu mu Israele muno!”

³⁴Mbwenye Afarisi adalonga mbati, “Ndi mfumu wa mizimu yakuipa, ule ambampasa mphamvu zakubulusira mizimuyi.”

³⁵Yesu adafamba m'maluwani na m'midzi yonsene. Iye adafunzisa m'nyumba zakupemphereramo, adalalika Mphangwa Zadidi za Ufumu wa Mulungu, pontho adawangisa anthu akukhala na utenda wamtundu na mtundu.

³⁶Pidaona iye mwinji, adava nawo nsisi, thangwi akhali akusanyika pontho akutaya mtima ninga mabira akusowa makabuswa.

³⁷Iye adalonga kuna anyakufunzache mbati, “Pinthu pyakuvuna mphizinji, mbwenye anyabasa akupivuna ngakuchepa.

³⁸Pempherani kuna Mulungu, mwenechiro munda ule, kuti atumize anyabasa kuti akavune.”