Read cisena MALIKO 1 Bible Online

MALIKO 1 - cisena bible

MALIKO 1

¹Izi ndi Mphangwa Zadidi zakulonga pya Yesu Khristu, Mwana Mulungu.[1]

²Zidatoma ninga mudazilembera mprofeti Yesaya kuti: “Mulungu adalonga mbati, ‘Ndinatuma nyakutumwanga patsogolo pako kudzakusasanyira njira.’

³Munthu unango akukhuwa m'thando yatchetcha kuti, ‘Msasanyireni njira Mbuya, ndendemezani njira towera iye afambemo.’ ”

⁴Tenepo Yohani adaonekera m'thando yatchetcha, kulalika na kubatiza.[2] Iye adapanga anthu mbati, “Lekani pyakudawa pyanu mbamubatizwe; tenepo Mulungu analekerera pyakudawa pyanu.”

⁵Anthu azinji a kunthemba ya Yudea na kumzinda wa Yerusalemu adabuluka mbaenda kavesera Yohani. Iwo adabweka pyakudawa pyawo, tenepo Yohani adaabatiza mumkulo wa Yorodani.

⁶Yohani akhavala nguwo zakusasanywa na ubweya wa nyama ya ngamila, na bande ya nthembe m'chuno mwache, pontho pyakudya pyache pikhali nyadzombe na uchi.

⁷Iye adalalika kuna anthu mbati, “Munthu anadza m'nduli mwangayu, ngwamphamvu pyakwanga kupiringana ine pano. Ine sidatheme tayu kukotama kuti ndisudzule nthambo za nkhwaira zache.

⁸Ine ndimbakubatizani na madzi, mbwenye iye anakubatizani na Mzimu Wakuchena.”

⁹Pandzidzi wenewo Yesu adadza kubulukira kuluwani ya Nazareti m'nthemba ya Galilea, mbabatizwa na Yohani mumkulo wa Yorodani.

¹⁰Sindzidzi Yesu nkhubuluka m'madzi, adaona kudzulu kukufunguka, pontho Mzimu Wakuchena akuphamira pana iye ninga nkhangaiwa.

¹¹Tenepo fala idaveka kubulukira kudzulu kuti, “Iwe ndiwe mwananga wapamtima. Ndakomerwa nawe pyakwanga pene.”

¹²Kabodzi na kabodzi Mzimu Wakuchena adamuendesa kuthando yatchetcha,

¹³kweneko adamalako nsiku makumanayi mbayeswa na Satana. Nyama zam'tsanga zikhali kweneko pontho, mbwenye angelo adadza mbamphedza.

¹⁴Pidakhadaikhwa Yohani m'perezo, Yesu adenda kunthemba ya Galilea mbakalalika Mphangwa Zadidi zakubulukira kuna Mulungu.

¹⁵Iye adalonga mbati, “Ndzidzi wafika! Mulungu ali chifupi kukhazikisa Ufumu wache! Lekani pyakudawa pyanu mbamukhulupire Mphangwa Zadidizi!”

¹⁶Pikhafamba Yesu pagombe ya nyanza ya Galilea, adaona amisiri a nsomba awiri ubaleawo, Simoni na Andrea. Iwo akhapha nsomba na chavi.

¹⁷Yesu adalonga kuna iwo mbati, “Nditewereni, ndinakusandusani kukhala anyakumedza anthu.”

¹⁸Kabodzi na kabodzi iwo adasiya pyavi pyawo mbamtewera.

¹⁹Pidafamba iye pang'ono, adaona pontho amuna anango awiri ubaleawo, Yakobo na Yohani, ana a Zebedeo. Iwo akhali m'mwadiya mwawo kusasanyiratu makokotawo.

²⁰Pidachita Yesu nawo oneni, nkhuachemereratu, iwombo adamsiya babawo Zebedeo pabodzi na anyabasache m'mwadiya mule mbamtewera Yesu.

²¹Yesu na anyakufunzache adafika kuluwani ya Kafaranao. Tenepo pa Nsiku Yakupuma, Yesu adenda kunyumba yakupempherera mbatoma kufunzisa.

²²Anthu adamveserawo adadodoma pyakwanga na mfunzisiro wachewo, thangwi iye hakhakhala ninga afunzisi a mwambo wa Mose tayu, mbwenye iye adafunzisa ninga mwenechiro utongi.

²³Pontho-ponthopo munthu wakuphatwa na mzimu wakuipa[3] adadza kunyumba yakupemphererayo mbakhuwa mbati,

²⁴“Munafunanji na ife, Yesu wa ku Nazareti? Ayi imwe mwadza kuno kutivunga? Ndimbakudziwani, ndimwedi Nyakuchena wa Mulungu.”

²⁵Yesu adatonga mzimu wakuipa ule mbati, “Matama, pontho buluka muna munthuyu.”

²⁶Mzimu wakuipawo udamgwisa mwamphamvu munthuyo, mbukhuwa pikulu, mbubulukiratu muna iye.

²⁷Anthu onsene adadodoma, tenepo adatoma kuvunzana mbati, “Penepi ninji? Ayi wenewu ndi mtundu unango wa chifunziso chachinchino? Munthu weneyu ana mphamvu zakutonga nazo mizimu yakuipa, iyo mbimveradi.”

²⁸Tenepo mbiri yakulonga pya Yesu idafala msanga-msanga kunthemba yonsene ya Galilea.

²⁹Pidabuluka iwo panyumba yakupempherera ile, iwo adenderatu pabodzi na Yakobo na Yohani kumusa kwa Simoni na Andrea.

³⁰Mebzalache Simoni akhagona patalimba, thangwi manungo akhampha. Pidachita Yesu mbwee, adapangwa pya mkaziyo.

³¹Tenepo iye adenda kukhali mkaziyo mbamphata pamkono kumulamusa. Manungo adalekeratu kumpha, tenepo mkaziyo adatoma kuafiliviri.

³²Na mawulo, pidathobila dzuwa, anthu adadza na atenda onsene, pontho na anyakuphatwa na mizimu yakuipa.

³³Anthu onsene a muluwanimo adagumanyikana pachintalo cha nyumbayo.

³⁴Yesu adawangisa anthu azinji akukhala na utenda wakusiyana-siyana mbabulusa pontho mizimu yakuipa izinji. Iye hadatawirise tayu mizimu yakuipa kuti ilongembo, thangwi iyo ikhamdziwa kuti iye mbani.

³⁵Bzobzo mangwana mwache Yesu adalamuka mbabuluka pamsuwopo. Iye adenda kumbuto ya yekha ene kunja kwa luwaniyo kapemphera.

³⁶Mbwenye Simoni pabodzi na anzache adenda mbamsaka.

³⁷Pidamgumana iwo, adampanga mbati, “Anthu onsene akuyang'anira imwepo.”

³⁸Mbwenye Yesu adaatawira mbati, “Tathema kwendambo kumidzi inango chifupi na pano nakuti ndikalalikembo kweneko, thangwi penepyo ndiye pidadzera ine.”

³⁹Tenepo adafamba-famba m'nthemba yonsene ya Galilea, kulalika m'nyumba zakupemphereramo mbabulusa pontho mizimu yakuipa.

⁴⁰Nyamatanya adadza kuna Yesu mbagodama, mbampempha mbati, “Imwe mungapifuna, munakwanisa kundichenesa.”[4]

⁴¹Yesu adava nyambalo[5] mbafuthula mkono wache mbamphata mbatawira mbati, “Ndinapifuna, chena!”

⁴²Kabodzi na kabodzi matanya ale adammalira munthu ule, natenepo adacheneratu.

⁴³Tenepo Yesu adampanga mwakugogomeza mbati, “Ngava, leka kapanga munthu na mbodzi ene penepi. Mbwenye ndokoletu kuna nyansembe kuti akakuone; nakuti onsene akapidziwe kuti wawangadi, kapereke nsembe zidatonga Mose zile.” Pidamala Yesu kulonga naye, adampanga kuti aendeletu pyache.

⁴⁵Mbwenye munthu ule adenda mbakavekesa pyache pidachitika pile ponsene pikhafamba iye. Adalongadi pyakwanga pene mwakuti Yesu hadakwaniseve pontho tayu kupita na muluwani mwene mwakuoniwa na anthu. Tenepo Yesu adakhala pyache kumbuto za yekha ene, kwache anthu adadza basi kuna iye kubulukira konsene kwene.