Read cisena MALIKO 10 Bible Online

MALIKO 10 - cisena bible

MALIKO 10

¹Tenepo Yesu adabuluka pambutopo mbaenda kunthemba ya Yudea, mbawambuka mkulo wa Yorodani. Mwinji udagomokera pontho kuna Yesu, tenepo iye adaufunzisa ninga mukhachitira iye nsiku zonsene.

²Afarisi anango adadza kuna iye mbayesera kumtapa m'kanwa. Iwo adamvunza mbati, “Tipange, ayi mwambo wathu umbatawirisa mamuna kumwalana na mkazache?”

³Yesu adaatawira mbati, “Ndi mwambo wanji udakupasani Mose?”

⁴Kutawira kwawo kukhali tenepa, “Mose adatawirisa kuti mamuna alembe kalata ninga msiku, angachita tenepo, anakwanisa kumwalana na mkazacheyo.”

⁵Yesu adaatawira mbati, “Mose adakulemberani matongero enewa thangwi ndimwe anthu akuuma mtima pyakwanga.

⁶Pakutoma pandzidzi udalenga Mulungu pinthu pyonsene ninga munalongera Malemba kuti, ‘Mulungu adasasanya iwo mamuna na mkazi.’

⁷‘Na thangwi yeneyi, mamuna anasiya babache na mache mbaphatikana na mkazache,[19]

⁸tenepo uwiriawo anakhala mbodzi.’ Natenepo hanakhalave awiri tayu, mbwenye mbodzi.

⁹Tenepo munthu aleke lekanisa awiriwa, thangwi adaaphataniza ndi Mulungu.”

¹⁰Pidabwerera iwo m'nyumba, anyakufunza adavunza Yesu pya penepi.

¹¹Yesu adalonga kuna iwo mbati, “Ngakhala mamuna anamwalana na mkazache mbasemba mkazi unango, achitira uputa mkazache wakutomayo.

¹²Ntchibodzi-bodzi mkazi angamwalana na mamunache mbasembwa na mamuna unango, achitira uputa mamunache wakutomayo.”

¹³Anthu anango adadza na ana kuna Yesu kuti aasanjike manja, mbwenye anyakufunza adalongera anthu ale.

¹⁴Pidaona Yesu penepi, adazhangali mbalonga kuna anyakufunzache mbati, “Alekeni ana adze kuna ine, pontho lekani kuakhondesa, thangwi Ufumu wa Mulungu ngwa anthu akukhala ninga anawa.

¹⁵Ndikukupangani pyakuonadi kuti anakhonda tambira Ufumu wa Mulungu ninga kamwana, hanaupita na pang'ono pene tayu.”

¹⁶Natenepo adathukula ana m'khaphwa mwache mbaasanjika manja kuatsanzayisa.

¹⁷Pidachita Yesu kuti autome pontho ulendo wache, munthu unango adamthamangira, mbagodama pamaso pache, mbamvunza mbati, “Mfunzisi wadidi, ndichitenji kuti nditambire moyo okhonda mala?”

¹⁸Yesu adamvunza mbati, “Unandithuliranji wadidi? Nkhabe mbodzi wadidi tayu, mbwenye Mulungu ene basi.

¹⁹Mukuadziwa matongero akuti, ‘Leka kupha, leka chita uputa, leka kuba, leka kupambizira, leka kupunza mwanzako, pontho lemedza babako na mako.’ ”

²⁰Munthu ule adalonga naye mbati, “Mfunzisi, kutomera uwananga ndavera matongero onsenewa.”

²¹Yesu adamuyang'ana mbamfuna mbalonga mbati, “Chakusowa ntchinthu chibodzi, kagulise pyonsene pina iwe mbupereke kobirizo kuna anyakutcherenga, iwembo mfuma unakhala nayo kudzulu; tenepo bwera unditewere!”

²²Pidava munthu ule penepi, nkhope yache idagwa, mbaenda pyache wakutsukwala, thangwi akhali wakufuma pyakwanga.

²³Yesu adayang'ana-yang'ana mbalonga kuna anyakufunzache mbati, “Mphyakunensa pyakwanga kuti anthu akufuma atambire Mulungu kukhala Mfumu wawo!”

²⁴Anyakufunza adazunguzika nawo mafala enewa, mbwenye Yesu adathimiza kulonga mbati, “Ananga, mphyakunensa pyakwanga kupita mu Ufumu wa Mulungu!

²⁵Mphyakunensadi pyakwanga pene munthu wakufuma kupita mu Ufumu wa Mulungu, kusiyana na ng'ombe kupita na pabenga ya nsingano!”

²⁶Na mafala enewa anyakufunza ndiye adanyanyiratu kuzunguzika mbavunzana unango na mwanzache mbati, “Mbani mphapo anakwanisa dzapulumuka?”

²⁷Yesu adayang'aniratu pana iwo mbaatawira mbati, “Penepi mphyakuchimwanika na munthu, mbwenye na Mulungu nkhabe, thangwi pyonsene mphyakukwanisika na Mulungu.”

²⁸Natenepo Peturo adalonga mbati, “Ngayang'anani, ife tasiya pyathu pyonsene mbatitewera imwepo.”

²⁹Yesu adalonga kuna iwo mbati, “Ande, inembo ndikukupangani pyakuonadi kuti onsene anasiya nyumba, penu abale, penu anyamainga, penu baba, penu mama, penu ana, penu minda, thangwi ya ine na thangwi ya Mphangwa Zadidi,

³⁰anatambira pansiku zino, madzana-madzana a nyumba, abale, anyamainga, amama, ana na minda mbatambira pontho nyatwa; pontho pandzidzi ukudzawo anatambira moyo okhonda mala.

³¹Mbwenye azinji ale pandzidzi uno ngakutoma anakhala akumalisira, pontho na azinji ale pandzidzi uno ngakumalisira anakhala akutoma.”

³²Pandzidzi wenewu Yesu na anyakufunzache akhali panjira kwenda ku Yerusalemu. Yesu patsogolo, anyakufunza m'nduli. Anyakufunzawo adadodoma pyakwanga, pontho na anthu enembo akhaatewerawo adagoswerwa. Yesu adenda pontho pakhundu na anyakufunzache khumi na awiri ale mbaapanga pinthu pikhafuna dzamgwera m'tsogolo.

³³Iye adaapanga mbati, “Ngavani, tikwenda ku Yerusalemu kule kunafuna kaperekwa Mwana Munthu kuna anyansembe akulu na kuna afunzisi a mwambo. Anakamtonga kuti aphiwe, pontho anati akampereke m'manja mwa anthu okhonda khala Ayuda.

³⁴Anthuwo anati akamsedegule, kamphulira mata, kamkwapula, mbampha; mbwenye nsiku zitatu zingagwanda anati alamuke mbakhala na moyo.”

³⁵Yakobo na Yohani, ana Zebedeo, adadza kuna Yesu mbalonga mbati, “Mfunzisi, pana chinthu chinafuna kukupemphani ife kuti mutichitirembo.”

³⁶Yesu adaavunza mbati, “Ninji chinafuna imwe kuti ndikuchitireni?”

³⁷Iwo adamtawira mbati, “Mungakhala pampando mu Ufumu wanu wademelero, mutitawirisembo kukhala namwe, mbodzi kumabzere kwanu, mbodzimbo kumadyo kwanu.”

³⁸Yesu adalonga kuna iwo mbati, “Pinapempha imwe nee mukupidziwabi. Ayi imwe mungakwanise kumwera ndiko ya nyatwa inafuna mwera ine? Ayi imwe mungakwanise kubatizwa na mbatiziro unafuna batizwa na ine?”

³⁹Iwo adamtawira mbati, “Tinakwanisa.” Yesu adaapanga mbati, “Imwe munati mumweredi ndiko inafuna dzamwera ine, mbamubatizwadi na mbatiziro unafuna dzabatizwa na ine.

⁴⁰Mbwenye ine nkhabe utongi wakusankhula nyakukhala kumadyo penu kumabzere kwanga tayu. Mbwenye Mulungu ndiye nyakupereka mbuto zenezi kuna anthu asasanyira iye ale.”

⁴¹Pidapiva anyakufunza anango khumi ale, adazhangalira Yakobo na Yohani.

⁴²Natenepo Yesu adachemera anyakufunzache onsene pabodzi mbalonga kuna iwo mbati, “Mukupidziwa kuti anthu analongwa kuti mbatongi a anthu okhonda dziwa Mulungu ana mphamvu pana anthuwo; pontho akadamu awo ana utongi wakumalisikiratu.

⁴³Kwache penepi nee pili tenepo tayu pakati panupa. Ngakhala unango wa imwe anafuna kukhala wamkulu, athema kukhala nyabasa wa anango onsene;

⁴⁴pontho ngakhala unango wa imwe anafuna kukhala wakutoma, athema kukhala bitchu wa onsene.

⁴⁵Thangwi na Mwana Munthu ene hadadzere dzatumikirwa tayu; mbwenye dzatumikira na kupereka moyo wache kuombola anthu azinji.”

⁴⁶Tenepo iwo adafika kuluwani ya Yeriko. Pikhabuluka Yesu na anyakufunzache pabodzi na mwinji ukulu mu Yeriko, boli-boli nyakupemphesa dzinache Batimeo, mwana Timeo, akhakhala m'khundu-khundu mwa njira.

⁴⁷Pidapiva iye kuti akhali Yesu wa ku Nazareti, adatoma kukhuwa mbati, “Yesu, mwana Davite! Ndiverenimbo nsisi ine!”

⁴⁸Anthu azinji adamlongera mbampanga kuti amatame. Mbwenye iye adanyanyiratu kukhuwa pyakwanga pene mbati, “Mwana Davite! Ndiverenimbo nsisi ine.”

⁴⁹Yesu adaimira mbalonga mbati, “Mchemereni.” Tenepo iwo adachemera boli-boliyo mbalonga kuna iye mbati, “Wangisa! Lamuka, akukuchemera.”

⁵⁰Iye adakunundula chakufinika chache mbalamuka kabodzi kene mbadza kuna Yesu.

⁵¹Yesu adamvunza mbati, “Unafuna ndikuchitirenji?” Boli-boliyo adamtawira mbati, “Mfunzisi, ndinafuna ndione.”

⁵²Yesu adampanga mbati, “Ndoko, chikhulupiro chako chakuwangisa.” Kabodzi kene adakwanisa kuona mbatewera Yesu paulendowo.