Read cisena MALIKO 11 Bible Online

MALIKO 11 - cisena bible

MALIKO 11

¹Pikhafika iwo chifupi na Yerusalemu, pamaluwani a Betifage na Betania, adafika paphiri ya Olivi. Tenepo Yesu adatuma awiri mwa anyakufunzache,

²mbaapanga mbati, “Ndokoni m'mudzi uli patsogolo panuwo. Sindzidzi nkhufika mwenemo, munagumana mwana bulu amangirirwa, ule chipoadzati pakirwa tayu. Kamsudzuleni mudze naye kuno.

³Tenepo ngakhala munthu anakuvunzani kuti munachitiranji tenepo, kampangeni kuti Mbuya[20] anamfuna, mbwenye anati amtumize chinchino.”

⁴Iwo adenda mbakagumanadi mwana bulu m'khundu-khundu mwa njira, amangirirwa chifupi na msuwo wa nyumba. Pikhamsudzula iwo,

⁵anthu anango penepo adavunza mbati, “Munamsudzuliranji mwana buluyi?”

⁶Iwo adaatawira ninga mudaapangira Yesu mule, natenepo anthu ale adaatawirisa kuti aende pyawo.

⁷Pidadza iwo na mwana bulu ule kuna Yesu, iwo adathasika pyakufinika pyawo pamsana pabuluyo, Yesu mbapakira.

⁸Anthu azinji adathasika pyakufinika pyawo m'njira, mwenemo anango akuthasika matsamvu adagwanda iwo m'minda.

⁹Anyakupita patsogolo na anyakutewera m'nduli akhakhuwa mbati, “Mulungu mbalemedzwe! Mulungu mbatsanzayise nyakudza na dzina ya Mbuya!

¹⁰Ngwakutsanzaya ufumu wa babathu Davite unadzawu! Mulungu Wakudzulu-dzulu mbalemedzwe!”

¹¹Yesu adenda mu Yerusalemu mbakapita m'Nyumba ya Mulungu, mbayang'ana-yang'ana pinthu pyonsene. Na thangwi yakuti kunja kudadoka, iye adabuluka mbaenda ku Betania pabodzi na anyakufunza khumi na awiri ale.

¹²Mangwana mwache, pikhabulukira iwo ku Betania, Yesu adava njala.

¹³Iye adaona muti wamkuyu na pakansinzo uli gudu-gudu, tenepo adenda kayang'ana ngakhala ukhali na makuyu. Mbwenye pidafika iye pamutipo, adagumana masamba ene basi, thangwi hukhali ndzidzi wache wakuti ubale tayu.

¹⁴Yesu adalonga kuna muti wamkuyu ule mbati, “Nkhabe mbodzi anadya pontho makuyu kubulukira muna iwe tayu.” Anyakufunzache adamva akulonga penepi.

¹⁵Pidafika iwo ku Yerusalemu, Yesu adenda ku Nyumba ya Mulungu mbathamangisira kunja anyakugulisa na anyakugula malonda. Iye adagudubula mathebulu a anyakuchinja kobiri pontho na mipando ya anyakugulisa nkhangaiwa.

¹⁶Iye hadatawirise munthu na mbodzi ene kuti agwande na pathando ya Nyumba ya Mulungu athukula chinthu tayu.

¹⁷Tenepo adafunzisa anthu mbati, “Pyalembwa m'Malemba kuti Mulungu alonga mbati: ‘Nyumbanga inachemerwa nyumba yakupemphereramo anthu a madzinza onsene.’ Mbwenye imwe mwaisandusa nyumba yakubisaliramo mbava.”

¹⁸Anyansembe akulu na afunzisi a mwambo adava penepi, natenepo adagundika kusaka njira inango yakuphera Yesu. Iwo akhagoswerwa naye, thangwi mwinji onsene ukhadodoma na mfunzisiro wache.

¹⁹Pidadoka kunja, Yesu na anyakufunzache adabuluka mumzindamo.

²⁰Bzobzo mangwana mwache, pikhafamba iwo m'njira, adaona muti wamkuyu ule wafa kutomera kunsonga kufikirana kumitsitsi.

²¹Peturo adakumbuka pile pidachitika mbalonga kuna Yesu mbati, “Mfunzisi, yang'anani muti wamkuyu udatemberera imwe ule wafa.”

²²Yesu adaatawira mbati, “Khalani nacho chikhulupiro muna Mulungu.

²³Ndikukupangani pyakuonadi kuti ule anapanga phiriyi kuti iende kapiponya yokha ene m'nyanza mbakhonda penuka mumtima mwache, mbakhulupira kuti chalonga iye chinachitika, chinati chidzachitikedi kuna iye.

²⁴Na thangwi yeneyi ndikukupangani kuti mungapempha chinthu kuna Mulungu, khulupirani kuti munachitambira, tenepo munapaswa chinthu chinapempha imwecho.

²⁵Mungafuna kupemphera, chakutoma mwathema kulekerera pyakudawirani mwanzanu. Mungachita tenepo, Babanu wa kudzulu anakulekereranimbo pyakudawa pyanu.”[21]

²⁷Iwo adafika pontho ku Yerusalemu. Tenepo pikhafamba Yesu m'Nyumba ya Mulungu, anyansembe akulu, afunzisi a mwambo, na akulu-akulu adadza kuna iye

²⁸mbamvunza mbati, “Una utongi wanji wakuchita nawo pinthu penepi? Adakupasa utongi wenewu mbani?”

²⁹Yesu adaatawira mbati, “Ndinakuvunzanimbo chinthu chibodzi chene basi; munganditawira, ndinati ndikupangeni utongi una ine wakuchita nawo pinthu penepi.

³⁰Utongi wa Yohani wakubatiza nawo, udabulukira kupi? Ayi udabulukira kuna Mulungu penu kuna munthu? Ndipangeni!”

³¹Iwo adatoma kupokanyisana okhokha mbati, “Tinalonga tani? Tingalonga kuti udabulukira kuna Mulungu, anati alonge kuti: ‘Mudakhonderanji, mphapo, kukhulupira pidalonga Yohani?’

³²Mbwenye tingalonga kuti, ‘Udabulukira kuna munthu’…” Penepa akhagopa anthu, thangwi onsene akhapidziwadi kuti Yohani akhali mprofeti.

³³Natenepo adamtawira Yesu mbati, “Ife nkhabe kupidziwa.” Yesu adalonga kuna iwo mbati, “Inembo sinakupangani tayu utongi una ine wakuchita nawo pinthu penepi.”