Read cisena MALIKO 12 Bible Online

MALIKO 12 - cisena bible

MALIKO 12

¹Yesu adatoma kulonga nawo m'misangani mbati, “Pidachitwa na munthu unango, ule adabzala mfesa m'munda mwache. Adamanga mpanda kuzungulira mundawo, mbasasanya dzenje yakutchitchithira vinyu, mbamanga pontho nsanja. Mwenechiroyo adabwerekesa munda ule kuna anyantchoche mbaverana nawo kuti ampagali pandzidzi wakuvuna, tenepo adenda pyache paulendo.

²Pidakwana ndzidzi wakutchola mfesa zile, iye adatuma bitchu wache kuna anyantchoche ale kuti akampase khundu yache ya nsapo ikhadaverana iwo ile.

³Mbwenye iwo adamphata nyabasayo mbampamantha, na kumbweza chimanja-manja.

⁴Kubuluka penepo mwenechiro munda ule adatuma nyabasa unango, mbwenye anyantchoche ale adamvanda mumsolo mbamchitira pyakudzedzeduka.

⁵Mwenechiro munda ule adatuma nyabasa unango, weneyo adampheratu. Iye adatuma pontho anyabasa anango azinji; anango a iwo adaamenya, anango kuapha.

⁶Pakumalisira pache pakhadasala mbodzi basi wakuti mwenechiro munda ule atume, weneyu akhali mwanache wapamtima. Tenepo iye adamtuma kuna anyantchoche ale mbalonga mbati, ‘Ndikupidziwa kuti mwanangayu anati akamulemedze.’

⁷Mbwenye anyantchoche ale adaverana mbati, ‘Mwana mwenechiro mundawu ngweneyu, ule anafuna dzasala na mfuma ya babache. Mbatendeni timphe kuti mfumayi ikhale yathu.’

⁸Natenepo adamphata, mbampha, mbamponyera kunja kwa mundawo.”

⁹Yesu adavunza mbati, “Apo mwenechiro munda ule anachita tani? Iye anabwera mbapha anyantchochewo mbabwerekesa mundawo kuna anango.

¹⁰Kani imwe hamudawerenge tayu Malemba ninga na enewa akuti, ‘Mwala udakhonda anyakumanga nyumba ninga wakusowa basa lero wasanduka wakufunika kupiringana inango yonsene.

¹¹Penepi pidachitwa na Mbuya, tenepo mphyakudodomesa pyakwanga kuna ife?’ ”

¹²Tenepo akadamu a Chiyuda adasaka njira yakumanga nayo Yesu, thangwi iwo adapidziwa kuti iye akhaulonga msanganiwo mwakupokanyisana nawo. Mbwenye iwo adagoswerwa na mwinjiwo, natenepo adamuleka mbaenda pyawo.

¹³Kubuluka penepo Afarisi anango na anango a m'gulu ya Mfumu Herodi adatumwa katapa Yesu m'kanwa.

¹⁴Iwo adadza kuna iye mbalonga mbati, “Mfunzisi, timbapidziwa kuti imwe mumbalonga pyakuonadi. Imwe nkhabe gopa manyerezero a anthu, thangwi imwe nkhabe ikha konta tayu kuti iwo mbani. Mbwenye mumbafunzisa pyakuonadi pya makhaliro ambafuna Mulungu kuna anthu. Ngatipangenimbo, ayi nkhudawira mwambo wathu kukhoma msonkho kuna Mfumu wa Roma? Ayi tikhome, penu tileke kukhoma?”

¹⁵Mbwenye Yesu adadziwa unthawatawawo mbaavunza mbati, “Munafuniranji kunditapa m'kanwa? Ndipaseni kobiri ndiione.”

¹⁶Adampasa kobiri ile, iyembo mbaavunza mbati, “Nkhope na dzina pili penepapi mphya ani?” Iwo adamtawira mbati, “Mphya Mfumu wa Roma.”

¹⁷Tenepo Yesu adalonga mbati, “Apo, kaperekeni pya Mfumu wa Roma kuna Mfumu wa Roma, pontho kaperekeni pya Mulungu kuna Mulungu.” Anthu ale adadodoma naye Yesu.

¹⁸Tenepo Asaduki, anango, ale akhalonga kuti anthu nkhabe dzalamuka kuimfa, adadza kuna Yesu mbalonga mbati,

¹⁹“Mfunzisi, Mose adatilembera mwambo wakulonga kuti, ‘Ngakhala mamuna anafa mbasiya mkazi wakusowa ana, mbaleache defuntuyo ampite panyumba mamfelwayo, towera abale naye ana, ale anakhala ninga mbana a defuntu ule.’

²⁰Pidachitwa na amuna anomwe ubaleawo; nanawo adasemba mbafa wakusowa ana.

²¹Kubuluka penepo nyamsolo wache adampita panyumba mamfelwayo mbafambo wakusowa ana. Pyontho-pyonthopyo pidachitika kuna mbaleawo wachitatu,

²²na kuna anango akhadasala ale. Onsene unomweawo akhadasemba mkazi ule, adafa akusowa ana. Pakumalisira pache mkazi ule adafambo.

²³Pansiku inalamuka anthu kuimfa, mkaziyo anakhala wa ani, podi onsene anomwe ubaleawo akhadamsemba?”

²⁴Yesu adaatawira mbati, “Imwe mwadodomeka pikulu, thangwi imwe nkhabe dziwa Malemba penu mphamvu za Mulungu tayu.

²⁵Thangwi anthu akufa angalamuka, anakhala ninga angelo a kudzulu, iwo hanasembana tayu.

²⁶Apo pya kulamuka kwa anthu kuimfa, hamudatome werenga tayu m'Bukhu ya Mose pambuto ile ikulonga pya thenthere yakugaka moto? Penepo pene palembwa kuti Mulungu adalonga kuna Mose mbati, ‘Ine ndine Mulungu wa Abrahamu, Mulungu wa Isake, na Mulungu wa Yakobo.’

²⁷Iye ndi Mulungu wa anthu a moyo, si wa anyakufa tayu. Imwe mwadodomeka pikulu.”

²⁸Penepo pakhali mfunzisi unango wa mwambo mbaava akupokanyisana. Pidapiona iye kuti Yesu adatawira Asaduki mwadidi, adavunzambo Yesu mbati, “Pa matongero onsene, akufunika pyakwanga ngapi?”

²⁹Yesu adamtawira mbati, “Matongero akufunika ngakuti, ‘Ngavani, imwe a Israele, Mbuya Mulungu wathu ndiye Mbuya mbodzi ene basi.[22]

³⁰Mfune Mbuya Mulungu wako na mtimako onsene, na moyo wako onsene, na manyerezero ako onsene, pontho na mphamvu zako zonsene.’

³¹Matongero achiwiri akufunika pyakwanga ngakuti, ‘Mfune mwanzako ninga mumbapifunira iwe wekha ene.’ Nkhabe matongero anango akupiringana awiriwa tayu.”

³²Mfunzisi wa mwambo ule adalonga kuna Yesu mbati, “Mwatawira mwadidi, Mfunzisi! Ndimomwene ninga mwalongera imwe kuti Mbuya ndi Mulungu yekha nakuti nkhabe mulungu unango, mbwenye iye ene basi.

³³Nakuti munthu afune Mulungu na mtimache onsene, na kunyerezera kwache konsene, pontho na mphamvu zache zonsene; nakuti pontho afune mwanzache ninga mumbapifunira iye yekha ene. Mphyakufunika pyakwanga kuvera matongero mawiriwa kusiyana na kupereka nsembe za nyama zakupyerera pontho na nsembe zinango kuna Mulungu.”

³⁴Tenepo pidaona Yesu kuti akhadamtawira mwanzeru, adampanga mbati, “Iwe uli chifupi kutambira Mulungu kukhala Mfumu wako.” Pidamala iye kulonga penepi, nkhabe mbodzi adawanga pontho mtima kuvunza Yesu chinthu na chibodzi chene tayu.

³⁵Pikhafunzisa Yesu m'Nyumba ya Mulungu, adavunza mbati, “Afunzisi a mwambo ambalongeranji kuti Khristu anakhala chidzukulu cha Davite?

³⁶Davite adalonga na mphamvu za Mzimu Wakuchena kuti, ‘Mbuya adalonga kuna Mbuyanga kuti: Khala pano kumadyo kwangaku kufikirana ndiikhe anyamalwako pansi pa manyalo ako.’

³⁷“Davite ene adamthula ‘Mbuya;’ apo Khristu anakhala tani chidzukulu cha Davite?” Mwinji ukulu ukhavesera Yesu mwakukomerwa.

³⁸Pikhaafunzisa iye, adalonga mbati, “Khalani m'maso na afunzisi a mwambo. Pimbaakomera kufamba-famba uku avala mikhanjo yawo yakulapha, na kupaswa mwenyikiro wa chilemedzo m'misika.

³⁹Iwo ambasankhula mipando yakupambulika m'nyumba zakupemphereramo, pontho mbuto za chilemedzo m'maphwando.

⁴⁰Iwo ambavunga mfuma za amamfelwa pakuadyera nkope-kope mbapemphera mwakulapha kuti aoniwe na anthu. Iwo anatchunyuswa pyakwanga pene.”

⁴¹Yesu adakhala m'Nyumba ya Mulungu chifupi na mbuto ile ikhaikha anthu chakupereka chawo mbayang'anisisa mwinji ule ukhaikha kobiri zawo m'chakuikhiramo kobiri. Anthu azinji akufuma akhaponya kobiri zizinji;

⁴²mbwenye mamfelwa wamkazi wakutcherenga adadza dzaikha pikobiri piwiri pyakuchepaletu.

⁴³Yesu adachemera anyakufunzache pabodzi mbaapanga mbati, “Ndikukupangani pyakuonadi kuti mamfelwa wakutcherengayu aikha m'chakuikhiramo kobiri pizinji kupiringana anango onsene ale.

⁴⁴Thangwi anangowa apereka pyapambula iwo pamfuma zawo, mbwenye mkaziyu, na kutcherenga kwache kwene, apereka pyonsene pikhanyindira iye kuti pinamkoya.”