Read cisena MALIKO 13 Bible Online

MALIKO 13 - cisena bible

MALIKO 13

¹Pikhabuluka Yesu pa Nyumba ya Mulungu, mbodzi wa anyakufunzache adalonga mbati, “Mfunzisi! Yang'anani kukula kwa miyala na nyumbazi!”

²Yesu adamtawira mbati, “Ukulonga nyumba zikulu zinaona iwezi? Nkhabe mwala ubodzi pano unasiyiwa padzulu pa unzache tayu; yonseneyi inagomolwa.”

³Pikhakhala Yesu pansi paphiri ya Olivi kuyang'anisana na Nyumba ya Mulungu, Peturo, Yakobo, Yohani na Andrea adamvunza chibiso-biso mbati,

⁴“Tipangenimbo, pinthu penepi pinachitika lini? Pontho panachitikanji kuonesa kuti ndzidzi uli chifupi wakuti pinthu pyonsenepi pichitike?”

⁵Yesu adalonga kuna iwo mbati, “Khalani m'maso kuti paleke khala unango wakukunyengezani.

⁶Thangwi anthu azinji anabwera mbapilonga kuti iwo ndi Khristu, pontho iwo ananyengeza anthu azinji.

⁷Mungava kumenyana penu kwinango kuna nkhondo, lekani sanyika mumtima mwanu. Pinthu ninga penepi mphyakuti pichitike. Mbwenye si kuti pikulonga kuti mamalisiro afika tayu.

⁸Dzinza inamenyana na dzinza inzache, dziko inachita nkhondo na dziko inzache. Panakhala piteke-teke ponsene pene, mbapakhala njala. Nyatwa zenezi zinakhala ninga nthomatoma yakuva kupha kwa mkazi wamimba pakubala.

⁹“Imwe mupiyang'anire mwekha ene. Munati mumangwe mbamuendeswa kuthando ya miseru. Munamenywa m'nyumba zakupemphereramo. Munaimira pamaso pa atongi na mafumu kuchita umboni pya ine kuna iwo.

¹⁰Mphangwa Zadidi zimaliswe lalikwa kuna anthu a madzinza onsene nsiku yakumalisa mbidzati fika.

¹¹Mungamangwa mbamuendeswa kumbuto zakutongerako miseru, lekani gopa pyakuti mukalonge kweneko. Thangwi ndzidzi wakutongwa ungafika, munapaswa chakuti mulonge. Mafala anafuna kalonga imwe, hanakhala anuve tayu, mbwenye anabulukira kuna Mzimu Wakuchena.

¹²“Anthu anapereka abale awo kuti aphiwe, ababambo anachita chibodzi-bodzi kuna anawo. Ana anapandukira makolo awo mbaaphesa.

¹³Anthu onsene anakuzondani thangwi ya ine. Mbwenye munthu anapirira mbafika kumamalisiroyo, anapulumuka.”

¹⁴“Chinthu chakuipa chimbavunga chile munachiona chikuimira pambuto yokhonda kuchithema. Chidziwiso kuna nyakuwerenga ntchichi: uvese mwadidi kuti penepi pikulonganji! Tenepo ale ali mu Yudea athawire kumapiri.

¹⁵Ngakhala munthu ali pansoyi ya nyumbache aleke vunga ndzidzi kutchitha mbapita m'nyumba mule kabulusamo chinthu na chibodzi chene kuthawa nacho.

¹⁶Munthu ali kumunda mbaleke bwerera m'mudzi kakwata chakufinika chache.

¹⁷Nsiku zenezo zinakhala zakunensa pyakwanga kuna akazi amimba, pontho kuna akazi akukhala na ana akuyamwa!

¹⁸Pempherani kuna Mulungu kuti pinthu penepi pileke dzachitika m'mainja!

¹⁹Thangwi nyatwa za nsiku zenezo zinakhala zakugoswa pyakwanga kupiringana zonsene zidachitika padziko yapansi pano kubulukira ndzidzi udalenga Mulungu dziko yapansi kufikirana ndzidzi uno. Pontho hakunakhalave pinango ninga penepi tayu.

²⁰Mbwenye Mbuya avilisa nsikuzo; iye mbadakhonda kuzivilisa, nkhabe na mbodzi ene mbadakhala na moyo tayu. Iye avilisa nsikuzo thangwi ya anthu ache asankhula iye ale.

²¹“Pandzidzi wenewo, munthu angalonga kuna imwe kuti, ‘Ngayang'anani, Khristu ali pano!’ penu, ‘Uyo ali apo!’ muleke dzakhulupira pinalonga iyepyo.

²²Thangwi panaoneka azinji kunyengeza anthu kuti iwo ndiwo Khristu penu maprofeti. Iwo anachita pidzindikiro na pyakudodomesa, towera anyengeze napyo podi na anthu ene akusankhulika a Mulungu ngakhala pinakwanisika.

²³Khalani m'maso! Ndakupanganiletu pinthu pyonsenepi pidzati chitika.”

²⁴“Pansiku zenezo, nyatwazi zingamala, dzuwa inaswipiswa na mdima, pontho mwezi hunaonesave cheza tayu.

²⁵Nyenyezi zinagwa kudzulu, pontho pinthu pyonsene pyamphamvu m'dzulu pinatekenyeka.

²⁶Penepo Mwana Munthu anaoneka akudza m'makole na mphamvu zikulu pontho na demelero.

²⁷Iye anatuma angelo ache kumphepo zonsene zinayi za dziko kugumanyisa anthu ache akhadasankhula iye kale kubulukira khundu na khundu.

²⁸“Funzani kubulukira pa muti wamkuyu. Imwe mungaona nthambi zache zatoma kuphwitha, mumbapidziwa kuti mainja ali chifupi.

²⁹Ntchibodzi-bodzi, mungaona pinthu penepi pikuchitika, mupidziwe kuti ndzidzi uli chifupi kutoma.[23]

³⁰Ndikukupangani pyakuonadi kuti pinthu pyonsenepi pinachitika anthu ali m'maso lerowa mbadzati kufa.

³¹Thambo na pansi pano pinamala, mbwenye mafalanga anakhala na mphamvu kwenda na kwenda.

³²“Nkhabe mbodzi anadziwa kuti nsiku penu ora pinafika lini, nee angelo a kudzulu, nee Mwana, mbwenye Baba ene basi ndiye anadziwa.

³³Onesasani, pontho khalani m'maso, thangwi imwe nkhabe dziwa kuti ndzidzi unafika lini.

³⁴Pinakhala ninga munthu wakubuluka pamsuwo pache kwenda ulendo. Ambasiyira anyabasache utongi wa pamsuwopo mbamala kuapasa mbodzi na mbodzi basa yakuti aphate, mbapanga pontho nyakulondali nyumbacheyo kuti akhale m'maso.

³⁵Khalani m'masotu mphapo, thangwi imwe nkhabe dziwa ndzidzi wakudza kwa mwenechiro nyumba. Mwinango anabwera na mawulo, mwinango pachiti-chiti, mwinango m'madzongwe, mwinangombo na machibese.

³⁶Ngakhala anachita kwene bulukire, aleke dzakugumanani mwagona.

³⁷Pinalonga ine kuna imwe, ndikulonga pontho kuna onsene kuti, ‘Khalani m'maso.’ ”