Read cisena MALIKO 14 Bible Online

MALIKO 14 - cisena bible

MALIKO 14

¹Pakhadasala kwene nsiku ziwiri kuti Phwando ya Paska na Phwando ya Mikate yakusowa chakufufumisira ikwane. Natenepo anyansembe akulu pabodzi na afunzisi a mwambo akhasaka njira yachibiso-biso yakumanga na kupha nayo Yesu.

²Iwo adalonga mbati, “Penepi tileke kupichita pandzidzi wa phwandoyi, gopesera anthu anachita chimpiningu.”

³Yesu akhali ku Betania kumusa kwa Simoni, mamuna akhali na matanya pakutoma ule. Pikhadya Yesu, mkazi adapita m'nyumba mule na mtete wakusasanywa na alabasta, wakudzala na mafuta akudula pontho akununkhira pyakwanga a naridi chadi-chadi. Mkazi ule adaswa mphampha ya mtetewo mbaikha mafutawo mumsolo mwa Yesu.

⁴Anthu anango akhali penepowo adazhangali mbalonga kuna unango na mwanzache mbati, “Thangwi yache njanji akuvunga mafuta akununkhirawa?

⁵Mafutawa ngakukwana kobiri zasiliva zakuphatira munthu basa chaka chamumphu! Mbadagulisa mafutawa mbadapereka kobirizo kuna anyakutcherenga.” Adamkalapira mkaziyo mwavinga.

⁶Mbwenye Yesu adalonga mbati, “Mulekeni pyache mkaziyu. Munanyanguliranji? Pyandiphatira iyepi mphyamaso.

⁷Anyakutcherenga munakhala nawo ndzidzi onsene, na ndzidzi onsene unafuna imwe munakwanisa kuaphedza. Mbwenye ine nee munakhala nane ndzidzi onsene tayu.

⁸Mkaziyu achitiratu pinakwanisa iye kuchita. Adzoza mafuta m'manungo mwanga kuasasanyaletu ndzidzi wakuikhwa kwanga m'masiye mbudzati kwana.

⁹Chinchino ndikukupangani pyakuonadi kuti konsene kunalalikwa Mphangwa Zadidi padziko yapansi pano, pyachita mkaziyu pinalongwambo towera anthu amkumbuke.”

¹⁰Tenepo Yudasi Iskarioti, mbodzi wa anyakufunzache khumi na awiri ale, adabuluka mbaenda kuna anyansembe akulu towera akapereke Yesu kuna iwo.

¹¹Anyansembe ale adakomerwa kuva pidalonga Yudasi mbadumbira kuti anampasa kobiri. Tenepo Yudasi adasaka ndzidzi wadidi wakupereka nawo Yesu.

¹²Pansiku yakutoma ya Phwando ya Mikate yakusowa chakufufumisira, nsiku ikhapha Ayuda anabira a pa Phwando ya Paska, anyakufunza a Yesu adamvunza mbati, “Nkhupi kunafuna imwe kuti tikakusasanyireni Phwando ya Paska?”

¹³Yesu adatuma awiri a anyakufunzache mbaapanga mbati, “Ndokoni mumzindamo, munakagumanikana na mamuna athukula mulinga wa madzi. Mukamtewere.

¹⁴Mukalonge kuna mwenechiro nyumba inakapita iyeyo kuti, ‘Mfunzisi akuvunza kuti, “Njipi subi yakuti ine na anyakufunzanga tidyeremo Phwando ya Paska?” ’

¹⁵Iye anakakuonesani subi ikulu ya nyumba ya m'dzulu, mule mwasasanywa kale pyonsene pyakufunika. Mwenemo mukatisasanyire phwando.”

¹⁶Anyakufunza ale adabuluka mbakapita mumzinda mule, mbakagumana pyonsene ninga mudaapangira Yesu. Iwombo adasasanya kudya kwa pa Phwando ya Paska.

¹⁷Pidadoka kunja, Yesu adadza pabodzi na anyakufunza khumi na awiri ale.

¹⁸Pikhali iwo pathebulu kudya, Yesu adalonga mbati, “Ndikukupangani pyakuonadi kuti mbodzi wa imwe anati andipereke kuna anyamalwanga, weneyu anadya na ine pabodzi.”

¹⁹Anyakufunza adatsukwala napyo mbatoma kumvunza mbodzi na mbodzi mbati, “Ayi si ine analonga imwe tayu, Mbuya?”

²⁰Yesu adaatawira mbati, “Nyakundipereka ndi mbodzi wa khumi na awirimwe weneyo anafonda na ine mkate pabodzi m'palatomu.

²¹Mwana Munthu anati afe ninga munalongera Malemba. Mbwenye dzedze kuna nyakupereka Mwana Munthuyo! Mbapidakhala pyadidi kuti nyakumperekayo mbadakhonda balwa!”

²²Pikhadya iwo, Yesu adakwata mkate mbapereka takhuta kuna Mulungu mbaumenya. Tenepo adaupereka kuna anyakufunzache mbalonga mbati, “Kwatani mudye mkatewu; enewa ndi manungo anga.”

²³Kubuluka penepo adakwata khomitcho ya vinyu mbapereka takhuta kuna Mulungu mbaipereka kuna anyakufunza; onsene adamwa vinyu kubulukira m'khomitchomo.

²⁴Yesu adalonga kuna anyakufunzache mbati, “Chenechi ntchiropa changa chakuchuchiswa kuombola anthu azinji, chiropa chakutsikimizira chiverano cha Mulungu.

²⁵Ndikukupangani pyakuonadi kuti sinamwave pontho vinyuyo tayu kufikirana nsiku inamwa ine vinyu wachinchino mu Ufumu wa Mulungu.”

²⁶Natenepo iwo adaimba nyimbo mbaenda ku Phiri ya Olivi.

²⁷Yesu adaapanga mbati, “Monsene munathawa mbamundisiya ndekha, thangwi pyalembwa kuti, ‘ndinapha makabuswa, mabira mbamwazikana.’

²⁸Mbwenye ndingalamuka kuimfa ndinati nditsogole ku Galilea.”

²⁹Peturo adamtawira mbati, “Podi onsene akuthaweni kwene, mbwenye ine sinakusiyani tayu!”

³⁰Yesu adalonga kuna Peturo mbati, “Ndikukupanga kuti dzongwe mbadzati lira kawiri mosiku uno, unati ulonge katatu kuti nee unandidziwa tayu.”

³¹Peturo adamtawira na mphamvu zache zene mbati, “Podi na kundipha kwene pabodzi na imwe, sinalonga tenepo tayu!” Anyakufunza anango onsene ale adalongambo chibodzi-bodzi.

³²Iwo adadza kumbuto yakuthulwa Getsemani, Yesu adapanga anyakufunzache mbati, “Khalani pano, pinakapemphera ine.”

³³Iye adakwata Peturo, Yakobo na Yohani mbaenda nawo pabodzi. Yesu adatoma kugoswera na kusanyika mumtima mwache pyakwanga

³⁴mbaapanga anyakufunzawa mbati, “Mtimangawu wadzala na nsisi zakufa nazo, khalani pano, pontho khalani m'maso.”

³⁵Pidafamba iye pang'ono, adapiponya pansi mbapemphera kuti ngakhala pinakwanisika ndzidzi wa nyatwawo ugwande.

³⁶Adalonga mbati, “Baba, Babanga, pinthu pyonsene mphyakukwanisika na imwe. Ndibulusirenimbo khomitcho ya nyatwayi, mbwenye kukhale kufuna kwanu, nee kufuna kwanga tayu.”

³⁷Kubuluka penepo Yesu adabwerera kuna anyakufunzache atatu ale mbaagumana ali m'chitulo. Yesu adavunza Peturo mbati, “Simoni, kani ukugona pyako? Ayi mbamudakwanisa kukhala m'maso ora ibodzi tayu?”

³⁸Yesu adalonga kuna iwo mbati, “Khalani m'maso mbamupemphera towera muleke yeswa na pyakuipa. Mtima ukufuna, mbwenye manungo alenduka.”

³⁹Yesu adenda pontho kapemphera mafala abodzi-bodzi ninga pakutoma.

⁴⁰Iye adadza pontho kuna anyakufunzache mbaagumana akugona; thangwi maso awo adalemera. Natenepo iwo adasowa chakuti alonge kuna Yesu.

⁴¹Pidadza iye pontho kuna iwo kachitatu, Yesu adalonga mbati, “Mukupuma na kugona pyanu basi? Pyakwana! Ndzidzi wafika! Ngayang'anani, Mwana Munthu akuperekwa m'manja mwa anthu akudawa.

⁴²Lamukani, tiende. Yang'anani, nyakundipereka uyo anadzayo!”

⁴³Yesu akhali m'kati kulonga pidafika Yudasi, mbodzi wa anyakufunza khumi na awiri ale, pabodzi na mwinji wakuphatirira matalasada na pigomba. Iwo adatumwa na anyansembe akulu, afunzisi a mwambo na akulu-akulu.

⁴⁴Nyakupereka Yesuyo akhadapangiza mwinji ule chidzindikiro chakuti, “Munthu anamwenyika ine mwakumpsompsonayo ndiye ene anafuna imwe. Mukammange mbamuende naye mwakuyang'anirwa na anyankhondo.”

⁴⁵Sindzidzi pidafika Yudasi, adenderatu kuna Yesu mbakalonga mbati, “Mfunzisi!” Mbampsompsona.

⁴⁶Natenepo anthu ale adamphata Yesu mbammanga.

⁴⁷Mbwenye mbodzi wa anthu adaimira penepowo, adasolola talasadache mbakhamwadza bitchu wa Nyansembe Wamkulu na kumgwandiratu khutu.

⁴⁸Yesu adaavunza mbati, “Mwatani mwachita kudza na matalasada na pigomba dzandiphata khala ninga ndine phanga?

⁴⁹Nsiku na nsiku ndikhali namwe kufunzisa m'Nyumba ya Mulungu, mbwenye imwe hamudandimanga tayu. Kwache Malemba anati akwane-kwane.”

⁵⁰Tenepo anyakufunza onsene adamsiya mbathawa pyawo.

⁵¹Mphale unango wakuvala chakufinika chache chene basi akhatewera Yesu. Anthu ale adapiyesa kumphata,

⁵²mbwenye iye adathawa chipezi-pezi kusiya chakufinika chachecho m'nduli.

⁵³Kubuluka penepo Yesu adendeswa kunyumba ya Nyansembe Wamkulu kule kudagumanyikana anyansembe akulu onsene, akulu-akulu, na afunzisi a mwambo.

⁵⁴Peturo adatewera m'nduli pakansinzo mbakapita muchintalo cha nyumba ya Nyansembe Wamkulu. Peturo adakhala pansi mwenemo pabodzi na anyakulondali mbaotha moto.

⁵⁵Anyansembe akulu pabodzi na onsene a m'Thando ya miseru ya Chiyuda akhayesa kugumana umboni wakupambizira nawo Yesu, towera amphe, mbwenye hadaugumane tayu.

⁵⁶Mboni zizinji zidalongera Yesu umboni wakunama, mbwenye umboni wawowo hukhaphatizana tayu.

⁵⁷Amuna anango adalamuka mbapambizira Yesu mbati,

⁵⁸“Tidamva weneyu akulonga kuti, ‘Ndinafudza Nyumba ya Mulungu yakumangwa na anthuyi mbandimanga inango yokhonda mangwa na anthu, pangagwanda nsiku zitatu.’ ”

⁵⁹Mbwenye, penepo pene, umboni wawo hudaphatizane pontho tayu.

⁶⁰Nyansembe Wamkulu adalamuka pakati pa anthu onsene mbavunza Yesu mbati, “Watani unakhonda tawira umboni unakulongera anthuwu?”

⁶¹Mbwenye Yesu hadabuluse fala tayu. Iye adakhala pyache mulomo phoo! Nyansembe Wamkulu adavunza pontho Yesu mbati, “Ayi ndiwedi Khristu, Mwana Mulungu Nyakulemedzwa?”

⁶²Yesu adamtawira mbati, “Ndine ene pano. Monsene munati muone Mwana Munthu akhala kudzanja yamadyo ya Mulungu Wamphamvu zonsene pontho munamuona akudza pamakole a kudzulu!”

⁶³Nyansembe Wamkulu adang'amba mkhanjo wache mbalonga mbati, “Ife nkhabe funave mboni zinango pontho tayu!

⁶⁴Mwava mwekha kushola Mulungu kwachita iyeku. Apo mukunyerezera tani?” Anthu onsene adatawira kuti akonwa, pontho athema kuphiwa.

⁶⁵Anthu anango adatoma kuphulira Yesu mata, mbammanga kunkhope mbammenya mbampanga mbati, “Lotera, mbani akumenya!” Anyakulondali adamkwata mbammenyambo.

⁶⁶Pikhali Peturo pansi muchintalo cha nyumba ya Nyansembe Wamkuluyo, nyabasa mbodzi wachitsikana wa Nyansembe Wamkulu adadza mwenemo.

⁶⁷Pidaona iye Peturo akuotha moto, adamuyang'anisisa mbalonga mbati, “Iwe pontho ukhali naye pabodzi Yesu wa ku Nazareti ule.”

⁶⁸Mbwenye Peturo adatuna mbati, “Ine nkhabe kumdziwa, pontho nkhabe vesa pinalonga imwepi.” Tenepo adabulukiratu mbaenda kumsuwo. Penepo pene dzongwe adalira.[24]

⁶⁹Mtsikanayo adamuona pontho mbalonga kuna anthu akhali penepowo mbati, “Mwanzathuyu ndi mbodzi wa enewo.”

⁷⁰Peturo adakhonda pontho. Pidagwanda ndzidzi pang'ono, anthu akuimira penepowo adalonga kuna Peturo mbati, “Ndimomwene, iwe ndiwe mbodzi wa iwo, thangwi ndiwe Mgalilea.”

⁷¹Tenepo Peturo adalonga mbati, “Ndikudumbira kuti pinalonga inepi mphyakuonadi! Ngakhala ndikulonga pyakunama, Mulungu mbanditchunyuse pyache! Munthu analonga imweyu, sinamdziwa tayu!”

⁷²Kabodzi na kabodzi dzongwe adalira kachiwiri. Penepo Peturo adakumbuka pidampanga Yesu kuti: “Dzongwe mbadzati lira kawiri, unalonga katatu kuti hunandidziwa tayu.” Tenepo Peturo adasweka mtima mbalira.