Read cisena MALIKO 15 Bible Online

MALIKO 15 - cisena bible

MALIKO 15

¹Bzobzo na machibese anyansembe akulu, akulu-akulu, na afunzisi a mwambo, na onsene a m'Thando ya miseru ya Chiyuda adagumanyikana pabodzi kuverana pyakuti achite na Yesu. Tenepo adammanga mbaenda naye kamtula kuna Pilato.

²Pilato adavunza Yesu mbati, “Ayi iwe ndiwedi Mfumu wa Ayuda?” Yesu adamtawira mbati, “Mwalonga tenepo ndimwe.”

³Anyansembe akulu ale adampambizira Yesu pinthu pizinji,

⁴natenepo Pilato adamvunza pontho mbati, “Ayi hunatawira tayu? Ngava pyonsene pinakulongera iwopi.”

⁵Mbwenye Yesu hadabuluse fala tayu basi, tenepo Pilato adadodoma.

⁶Pandzidzi onsene wa Phwando ya Paska, ukhali nsambo wa Pilato kusudzula nyaperezo mbodzi anafuna anthu kuti asudzulweyo.

⁷Pakhali mamuna unango dzinache Baraba, ule akhali m'perezo pabodzi na anyakupandukira Boma, ale akhadapha anthu pachimpiningu.

⁸Mwinji udadza dzapempha Pilato kuti aachitire ninga mwa nsambo wache.

⁹Pilato adaavunza mbati, “Munafuna ndikusudzulireni Mfumu wa Ayudayi?”

¹⁰Iye adapidziwa mwadidi mwene kuti anyansembe akulu adamtula Yesu kuna iye thangwi ya bivu.

¹¹Mbwenye anyansembe akulu adaswiswirisa mwinjiwo kupempha kuti Pilato aasudzulire Baraba m'mbuto mwa Yesu.

¹²Pilato adaavunza mbati, “Ndichitenji naye mphapo, analonga imwe kuti ndi Mfumu wa Ayudayi?”

¹³Anthu ale adakhuwa mbati, “Mkhomereni pamtanda!”

¹⁴Pilato adaavunza mbati, “Thangwi yache njanji? Asosa mseru wanji?” Mbwenye iwo adakhuwa mwakugaluza fala mbati, “Mkhomereni pamtanda!”

¹⁵Pilato, na kufuna kuti mwinji ule ukomerwe, adaasudzulira Baraba. Tenepo adatonga kuti Yesu akwapulwe mbampereka kuti akakhomerwe pamtanda.

¹⁶Anyankhondo adenda na Yesu muchintalo cha nyumba ya mkulu wa boma mbagumanyisa pabodzi anyankhondo anango a guluyo.

¹⁷Iwo adavazika Yesu mkhanjo wamsuzi wanyemba, mbasasanya chipewu cha chifumu na matsamvu a minga, mbachivazika mumsolo mwache.

¹⁸Tenepo iwo adatoma kumchitira shawasha mbalonga mbati, “Dondowe! Mfumu wa Ayuda!”

¹⁹Akhamkwapula mumsolo na mtswamu, mbamphulira mata, kumgodamira na kumulambira.

²⁰Pidamala iwo kumselusa, adamdulisa mkhanjo wamsuzi wanyemba ule mbamvazika nguwo zache. Tenepo adenda naye kamkhomera pamtanda.

²¹Panjira iwo adagumanikana na munthu dzinache Simoni, ule akhabulukira kumidzi kwenda kumzinda. Anyankhondo adamkhakhamiza kuti athukule mtanda wa Yesu. Kwawo kwa Simoni kukhali ku Kirene pontho iye akhali babawo Alekezanda na Rufu.

²²Iwo adenda na Yesu kumbuto yakuthulwa Gologota, kweneku nkhulonga kuti, “Ndi mbuto ya Chibade cha msolo.”

²³Kweneko adampasa vinyu wakuvungaza na mtombwe wakuthulwa mure kuti amwe, mbwenye iye hadatawire tayu.

²⁴Tenepo adamkhomera pamtanda mbagawana pyawo nguwo zache pakuchita ntsango kuti aone chinafuna kwata munthu.

²⁵Ikhali ora yachifemba na machibese idakhomera iwo Yesu pamtanda.

²⁶Chidziwiso cha mseru udapherwa iye chidalembwa kuti, “Mfumu wa Ayuda.”

²⁷Iwo adakhomera pontho mbava ziwiri pamitanda na Yesu, mbodzi kumadyo kwache, unango kumabzere kwache.[25]

²⁸

²⁹Anthu akugwanda na penepo akhakupusa misolo yawo mbatikana Yesu mbati, “Wa! Wa! Udalonga ule si iwe tayu kuti: ‘Ndinafudza Nyumba ya Mulungu mbandiimanga pontho nsiku zitatu?’

³⁰Apo lero tchithatu pamtandapo upipulumuse wekha ene.”

³¹Chibodzi-bodzi anyansembe akulu na afunzisi a mwambo adamselusa mbalonga kuna unango na mwanzache mbati, “Adapulumusa anthu anango, mbwenye akuchimwana kupipulumusa yekha ene!

³²Ngakhala iye ndi Khristudi, Mfumu wa Aisraele, mbatchithetu mphapo pamtandapo kuti tione mbatimkhulupira!” Ale adakhomerwa na iye pabodzi akhamtikanambo.

³³Paora yakhumi na chiwiri na masikati padziko yonsene yapansi padachita mdima. Mdimawo udamala paora yachitatu na mawulo.

³⁴Paora yachitatu na mawulo, Yesu adalira pikulu mbati, “Eloi, Eloi, lema sabakitani?” Kweneku nkhulonga kuti, “Mulungu wanga, Mulungu wanga, mwandisiyiranji ndekha ine?”

³⁵Anthu anango penepo adava kukhuwa kwache mbalonga mbati, “Ngavani, iye akuchemera Elia!”

³⁶Mbodzi adathamanga mbakavika chikhwasa-khwasa muvinyu wakuwawa, mbachifeka kumuti, mbaenda kachipasa Yesu kuti amwe. Munthu ule adalonga mbati, “Dikhirani, tione ngakhala Elia anadza dzamtchithisa pamtandapo.”

³⁷Tenepo Yesu adakhuwa pikulu mbafa.

³⁸Chinguwo chakutchinga nacho mbuto yakuchenesesa ya Nyumba ya Mulungu chidang'ambika kati na kati kutomera padzulu kufika pansi pache.

³⁹Mkadamu wa anyankhondo dzana ule akhaimira patsogolo pamtanda adaona kufa[26] kudachita Yesu. Natenepo iye adalonga mbati, “Ndimomwene munthuyu akhalidi Mwana Mulungu!”

⁴⁰Akazi anango akhapiona na pakansinzo. Pakati pawo pakhali Maria wa ku Magadala, Maria mawo wa Jose na Yakobo wamng'ono, na Salome.

⁴¹Pikhali Yesu m'nthemba ya Galilea, akazi enewa akhadamtewera mbamphedza. Akazi anango azinji ale adadza ku Yerusalemu pabodzi naye akhalimbo ponthopo.

⁴²Pidakwana ndzidzi wa mawulo Yosefe wa ku Arimatea adafika. Iye akhali munthu wakuveka m'Thando ya miseru ya Chiyuda, pontho akhadikhira kuti Mulungu akhazikise Ufumu wache. Ikhali Chishanu, Nsiku ikhasasanyikira Ayuda pya pa Nsiku Yakupuma, natenepo Yosefe adenda kuna Pilato mwakuwanga mtima mbakapempha mtembo wa Yesu.

⁴³

⁴⁴Pilato adadodoma napyo pidava iye kuti Yesu adafa kale. Iye adachemeresa mkadamu wa anyankhondo dzana mbamvunza khala ninga Yesu akhadafa kale.

⁴⁵Pidatawira mkadamu ule kuti Yesu akhadafa kale, Pilatombo adamtawirisa Yosefe kuti akatchithise mtembo wa Yesu.

⁴⁶Yosefe adagula nguwo yakuchena mbatchithisa mtembo wa Yesu ule mbaufinikiza na nguwoyo. Adauikha m'masiye akuchita kukumbwa m'mwala mbagulung'undisa mwala ukulu kufunga nawo pamsuwo wa masiyewo.

⁴⁷Maria wa ku Magadala na Maria mache Jose akhaona kukhaikhwa mtembo wa Yesuwo.