Read cisena MALIKO 2 Bible Online

MALIKO 2 - cisena bible

MALIKO 2

¹Pidagwanda nsiku pang'ono, Yesu adabwerera ku Kafaranao. Mbiri idafala kuti iye akhali m'nyumba mukhakhala iye mule.

²Tenepo anthu azinji adagumanyikana pabodzi mwakuti mbuto idamala na pachintalo pene. Pikhalalika iye Mphangwa kuna iwo,

³anthu anayi adadza uku athukula nyamfutete pamakha.

⁴Iwo adapichimwana kufika naye kuna Yesu thangwi ya mwinji. Natenepo adaphola benga pansoyi kutewezana na mbuto ikhali Yesuyo. Pidamala iwo phola bengayo, adatchithisirapo makha a nyamfuteteyo.

⁵Pidaona Yesu chikhulupiro chawo, adalonga kuna nyamfuteteyo mbati, “Mwananga, pyakudawa pyako pyalekererwa.”

⁶Mbwenye afunzisi anango a mwambo wa Mose akhakhalambo penepo mbapivunza okha ene mumtima mwawo mbati,

⁷“Thangwi yache njanji inamulongesa tenepa? Kweneku nkhushola Mulungu! Mbani anakwanisa kulekerera pyakudawa, ayi si Mulungu yekha ene tayu?”

⁸Ponthopo Yesu adapidziwiratu kuti penepi ndiye pikhanyerezera iwo mumtima mwawo, natenepo adalonga kuna iwo mbati, “Mwatani munanyerezera pinthu ninga penepi?

⁹Chifupi ntchipi, kumpanga nyamfuteteyu kuti, ‘Pyakudawa pyako pyalekererwa,’ penu kumpanga kuti, ‘Lamuka, thukula makhako ufambe?’

¹⁰Mbwenye ndinakupangizanidi kuti Mwana Munthu ana utongi wakulekerera pyakudawa padziko yapansi.” Tenepo iye adalonga kuna nyamfuteteyo mbati,

¹¹“Ndikukupanga, lamuka, thukula makhako, uende kwanu.”

¹²Munthu ule adalamukadi, mbathukula makhache mbabuluka pakwecha onsene mbamuona. Anthu onsenewo adadodoma pyakwanga mbakuza Mulungu mbati, “Chipo pinthu ninga penepi nee tidzati kupiona tayu!”

¹³Yesu adabwerera pontho kugombe ya nyanza ya Galilea. Mwinji udadza kuna iye, tenepo iye adatoma kuufunzisa.

¹⁴Pikhafamba iye, adaona Levi, mwana Alufeo, ali khale m'nyumba ya misonkho. Yesu adalonga kuna mbati, “Nditewere!” Levi adalamuka mbamteweradi.

¹⁵Pikhadya Yesu kumusa kwa Levi[6] pabodzi na anyakufunzache, anyamisonkho na anyakudawa[7] azinji ene akhadya nawo, thangwi anyakumtewerache adainjipa.

¹⁶Afunzisi anango a mwambo, a m'gulu ya Afarisi, adaona kuti Yesu akhadya pabodzi na anyakudawa, pontho na anyamisonkho. Afarisi ale adavunza anyakufunza a Yesu mbati, “Thangwi yache njanji imbamdyesa pabodzi na anyamisonkho, pontho na anyakudawawa?”

¹⁷Yesu adava mbaatawira mbati, “Anthu akuwanga nkhabe funa ng'anga tayu, mbwenye atenda. Ine sidadzere dzachemera anthu akulungama tayu, mbwenye anyakudawa.”

¹⁸Anyakufunza a Yohani Nyakubatiza pabodzi na Afarisi akhapimana kudya. Tenepo anthu anango adadza mbamvunza Yesu mbati, “Pyakhala tani kuti anyakufunza a Yohani na anyakufunza a Afarisi ambapimana kudya, mbwenye anuwa nkhabe kupichita?”

¹⁹Yesu adaatawira mbati, “Pinakwanisika tani kuti anyakuchemerwa kuphwando yakukazhali apimane kudya nyakusemba mbali ponthopo nawo pabodzi? Hangakwanise kuchita tenepo tayu iye mbali ponthopo.

²⁰Mbwenye ndzidzi unafika unafuna dzabuluswa nyakusembayo pakati pawo, tenepo iwo anapimana kudya.”

²¹Nkhabe munthu ambakwata chigamba cha nguwo itswa mbachisonera panguwo yakale tayu, thangwi chigamba chachinchinocho chinanyomola na kukuziratu benga ya panguwo yakale ile.

²²Pontho nkhabe munthu ambatsanyulira vinyu wachinchino m'mabudu a nthembe akuphatisirwa kale basa tayu. Angachita tenepo, vinyuyo anatumbula mabuduwo, natenepo pyonsene pene piwiri, vinyu na mabudu ene, pinavungika. Pyadidi pyache ambatsanyulira vinyu wachinchino m'mabudu achinchinombo.

²³Pa Nsiku Yakupuma Yesu pabodzi na anyakufunzache akhagwanda na m'minda ya tirigu. Pikhafamba iwo, anyakufunzache adatoma kukwedzula ngala za tirigu.

²⁴Afarisi adalonga kuna iye mbati, “Ngayang'ana, kweneku nkhudawira mwambo wathu kuti anthu aphate pinthu ninga pinaphata anyakufunzanuwa pa Nsiku Yakupuma.”

²⁵Yesu adaatawira mbati, “Kadi imwe hamudawerenge tayu pidachita Davite na anzache pandzidzi udava iwo njala mbasowa chakuti adye ule?

²⁶Nsiku za Abiatara, Nyansembe Wamkulu, Davite adapita m'Nyumba ya Mulungu, mbakadyamo mikate yakuperekwa kuna Mulungu, ile ikhatawiriswa kudyiwa na anyansembe okha ene basi, mbapasambo anzache akhali na iye ale.”

²⁷Yesu adalonga pontho kuna iwo mbati, “Nsiku Yakupuma idasasanyirwa kuti iganyalise munthu, si kuti munthu adasasanyirwa Nsiku Yakupuma tayu.

²⁸Tenepo Mwana Munthu ndi Mbuya wa Nsiku Yakupuma.”