Read cisena MALIKO 3 Bible Online

MALIKO 3 - cisena bible

MALIKO 3

¹Pandzidzi unango Yesu adabwerera kunyumba yakupempherera. Kweneko kukhali munthu wakulamala dzanja.

²Anthu anango akhali mwenemo kusaka thangwi ya kusumira nayo Yesu, natenepo akhamuyang'ana naye phanamana kuti aone ngakhala Yesu akhafuna pyakuwangisa munthuyo pa Nsiku Yakupumayo.

³Yesu adalonga kuna munthu wakulamala dzanjayo mbati, “Bwera uimire patsogolo pa anthu onsenewa.”

⁴Kubuluka penepo Yesu adaavunza anthuwo mbati, “Mwambo wathu umbatawirisa kuchitanji pa Nsiku Yakupuma? Kuchita pyadidi penu pyakudawika? Kupulumusa moyo penu kuupha?” Mbwenye iwo hadalongeve pinthu tayu.

⁵Yesu adayang'ana-yang'ana mwakuzhangali pontho mbava nawo nsisi thangwi ya kuuma kwawo mtima. Yesu adalonga kuna munthuyo mbati, “Futhula dzanjako!” Iye adaifuthuladi, dzanjacheyo mbibwerera ninga mwakale.

⁶Tenepo Afarisi adabuluka mbaenderatu kaverana na a m'gulu ya Mfumu Herodi kuti akasake njira yakuphera Yesu.

⁷Yesu na anyakufunzache adabuluka mbaenda kunyanza ya Galilea, mwinji ukulu udamtewera, kubulukira kumzinda wa Yerusalemu na kunthemba za Galilea, Yudea na Idumea, pontho na kumtunda unango wa mkulo wa Yorodani, kuthimizapo a kunthemba yakuzungulira maluwani a Turo na Sidoni. Anthu onsenewa adadza kuna Yesu thangwi adava pinthu pyonsene pikhachita iye.

⁹Mwinji udakula pyakwanga mwakuti Yesu adapanga anyakufunzache kuti adze na mwadiya towera anthu aleke kumfinyiza.

¹⁰Na thangwi yakuti iye akhadawangisa azinji, anthu onsene akukhala na utenda akhagwinyikira kutsogolo towera kamkhuyambo.

¹¹Tenepo ponsene pakhamuona anthu akuphatwa na mizimu yakuipa, akhagwa pansi pana iye mbakhuwa mbati, “Imwe ndimwe Mwana Mulungu!”

¹²Yesu adaipanga mwakugogomeza mizimu yakuipayo kuti ileke kambweka kuna anango kuti iye mbani.

¹³Yesu adakwira paphiri mbapichemerera amuna akhafuna iye. Iwo adendadi kuna iye,

¹⁴iyembo adasankhulapo khumi na awiri, mbaathula “anyakutumwa.” Adaasankhula kuti akhale naye nakuti akwanisembo kuatuma kalalika,

¹⁵pontho kuti akhale nawo utongi wakubulusira mizimu yakuipa.

¹⁶Khumi na awiri adasankhulwa ale mbawa: Simoni (ule adathula iye dzina kuti ndi Peturo);

¹⁷Yakobo, mwana Zebedeo na mbaleache, Yohani (enewo adaathula kuti Bonagesi, kweneku nkhulonga kuti ngakugoswa ninga chiphaliwali);

¹⁸Andrea, Filipi, Batolomeo, Mateo, Tomasi, Yakobo mwana Alufeo, Tadeo, Simoni (mbodzi wa m'gulu ya Ayuda wakufuna kudzesa utumbe kudziko ya Israele)

¹⁹na Yudasi Iskarioti, adapereka Yesu kuna anyamalwache ule.

²⁰Kubuluka penepo Yesu adapita m'nyumba mukhakhala iye mule. Anthu azinji adagumanyikana pontho, natenepo iye na anyakufunzache hadakwaniseve kudya tayu.

²¹Pidapiva mache na abale ache, adenda kuti akamphate, thangwi anthu akhalonga mbati, “Iye ana nsala!”

²²Afunzisi anango a mwambo ale adadza kubulukira ku Yerusalemu, akhalonga mbati, “Weneyu aphatwa na Belezebule, mfumu wa mizimu yakuipa, ule ambampasa mphamvu zakubulusira mizimu yakuipayi.”

²³Tenepo Yesu adaachemerera kuna iye mbalonga nawo m'misangani mbati, “Satana anabulusika tani yekha ene?

²⁴Ngakhala ufumu unapandukirana, ufumu wenewo hungakwanisikeve kwenda m'tsogolo tayu.

²⁵Ngakhala anthu a banja ibodzi anapandukirana, banjawoyo hingakwanisikeve kwenda m'tsogolo tayu.

²⁶Ngakhala ufumu wa Satana ukhapandukirana mbaumenyana, ufumuwo mbudakwanisikave kwenda m'tsogolo tayu, natenepo kumala kwache mbukudakhala konthoko.

²⁷“Nkhabe mbodzi anakwanisa kuswa nyumba ya munthu wamphamvu zache mbampokosera pinthu pya m'nyumbamo, mbwenye chakutoma amange munthu wa mphamvuyo; angachita tenepo, anakwanisa kuba pinafuna iye m'nyumbamo.

²⁸“Ndikukupangani pyakuonadi kuti anthu anakwanisa kulekererwa pyakudawa pyawo pyonsene na pinthu pyonsene pyakuipa pinakwanisa iwo kulongera Mulungu.[8]

²⁹Mbwenye munthu analongera Mzimu Wakuchena pyakuipayo hanalekererwa tayu, thangwi penepo asosa kudawa kokhonda mala.”

³⁰Yesu adalonga tenepo thangwi anthu anango akhalonga mbati, “Iye aphatwa na mzimu wakuipa.”

³¹Tenepo mache na abale ache Yesu adafika mbaimira kunja kwa nyumba mbatuma munthu kuti akamchemere.

³²Mwinji udakhala pansi mwakuzungulira Yesu ule udampanga kuti, “Ngayang'anani! Manu na abale anu pabodzi na anyamainganu ene ali panjapa, anafuna imwepo.”

³³Yesu adaatawira mbati, “Mama na abale anga mbani?”

³⁴Adayang'ana anthu adakhala mwakumzungulirawo mbalonga mbati, “Ngayang'anani! Mama na abale anga ali pano!

³⁵Munthu anachita pinafuna Mulungu, weneyo ndiye mbaleanga, nyamainganga na mamanga.”