Read cisena MALIKO 4 Bible Online

MALIKO 4 - cisena bible

MALIKO 4

¹Yesu adatoma pontho kufunzisa kukhundu inango ya nyanza ya Galilea. Mwinji ukulu udagumanyikana mwakumzungulira kweneko, natenepo Yesu adapakira m'mwadiya mbakhala mwenemo. Mwadiya ukhali kwinangombo m'madzi. Anthu akuinjipawa adagumanyikana pagombe chifupi na nkhomole ya madzi.

²Iye adaphatisa basa misangani kuti aafunzise pinthu pizinji mbalonga kuna iwo mbati,

³“Ngavani kuno! Pidachitwa na nyakulima unango, ule adenda kawaza mbewu.

⁴Pikhawaza iye mbewuzo, zinango zidagwera m'njira, tenepo mbalame zidadza mbizidzonkhona mbewuzo.

⁵Zinango zidagwera pambuto yachimwala-mwala, pale pakhali na mataka akuchepa. Mbewuzo zidachimbiza kumera thangwi matakawo hadapite pansi mwakuzwika tayu.

⁶Mbwenye pidakwira dzuwa, idavula umerawo. Na thangwi yakuti mitsitsi yache hidapita pansi mwakuzwika tayu, umerawo udauma kabodzi kene.

⁷Mbewu zinango zidagwera m'matenthere a minga, ale adakula mbaphimbira umerawo, natenepo mbewuzo zidachimwana kubala.

⁸Mbwenye mbewu zinango zidagwera m'mataka adidi, natenepo zidamera, mbizikula na kubala; zinango zidaikha maso makumatatu, zinango makumatanthatu, zinangombo dzana kupiringana zidawazwa zile.”

⁹Tenepo Yesu adalonga mbati, “Ule ana makutu akuva, mbave!”

¹⁰Pidabalalika mwinji ule, anthu anango akhadavesera Yesu ale, pabodzi na anyakufunza khumi na awiri, adadza dzamvunza pya misanganiyo.

¹¹Iye adaapanga mbati, “Mulungu akupasani nzeru kuti mudziwe pya Ufumu wache, mbwenye anango, ale ali kunja, ambava pinthu pyonsenepi m'misangani,

¹²towera kuti, ‘Kuona aone, mbwenye nkhabe onesesa; kuva akave, mbwenye nkhabe vesesa. Thangwi mbadachita tenepo, mbadazungunukira kuna Mulungu, iyembo mbadalekerera pyakudawa pyawo.’ ”

¹³Yesu adaavunza mbati, “Kani imwe nkhabe vesesa tayu msanganiwu? Apo munava tani misangani inango?

¹⁴“Nyakuwaza ambawaza mphangwa za Mulungu.

¹⁵Anthu anango akhala ninga pimbachita mbewu zingagwa m'khundu-khundu mwa njira. Sindzidzi nkhuva mafala a Mulungu, Satana ambadza dzaabulusira mphangwa zidatambira iwo zile.

¹⁶Anthu anango akhala ninga pimbachita mbewu zingagwa m'mataka a pamwala. Sindzidzi nkhuva mafalawo, ambaatambira na kukomerwa.

¹⁷Mbwenye mafalawo nkhabe likha muna iwo tayu, tenepo hambamalave ndzidzi ukulu ene tayu. Natenepo nyatwa penu kusanyika pingadza thangwi ya mafalawo, iwo ambagweratu kabodzi kene.

¹⁸Anthu anangombo akhala ninga pimbachita mbewu zingagwa m'matenthere a minga. Enewa ngale ambava mafala a Mulungu,

¹⁹mbwenye pyakunensa pya moyo uno, na kukhumba mfuma, na pikhumbo pinango pyonsene pimbadza mbipiphimbira mafalawo. Tenepo iwo hambabalave tayu.

²⁰Mbwenye anthu anango akhala ninga pimbachita mbewu zingawazwa m'mataka adidi. Angava mafalawo, ambaatambiradi, mbabala pidawazwa pile: anango makumatatu, anango makumatanthatu, anangombo dzana kupiringana zidawazwa zile.”

²¹Yesu adathimiza kulonga mbati, “Munthu angapita m'nyumba na nyale, ayi mumbaigudumira na chitomba, penu mumbaiikha m'khungusiri mwa talimba? Ayi si imwe tayu mumbaiikha pakwecha?

²²Pyonsene pyakubiswa pinabuluswa pakwecha pontho pyonsene pyakugudumirwa pinafununkhulwa.

²³Munthu angakhala na makutu akuva, mbave!”

²⁴Iye adalonga pontho kuna iwo mbati, “Nyerezerani mwadidi pinthu pinava imwe! Mdida unaphatisa basa imwe kuna anthu anango, Mulungu anaphatisambo basa onthowo kuna imwe, kwache pyakwanga pene.

²⁵Munthu wakukhala na pinthu kale anapaswa pontho pinango pizinji, mbwenye munthu wakusowa pinthu, Mulungu anampokosera na pinkiti pene pina iye!”

²⁶Yesu adathimiza kulonga mbati, “Ufumu wa Mulungu wakhala ninga tenepa. Munthu ambawaza mbewu m'munda mwache.

²⁷Na mosiku ambagona pyache, kungachena mbalamuka uku mbewu zikumera na kukula kwene, mbwenye iye nkhabe dziwa chimbameresa na kukuza mbewuzo.

²⁸Mataka paokha ene ambaikuza mbewuyo mbibala; imbatoma kuoneka ndi mphesi yakubalika, kubuluka penepo ngala yakusowa maso, pakumalisira pache ngala yakudzala na maso a mapira.

²⁹Sindzidzi mapirawo nkhutokota, munthu ule ambakwata mpeni mbaagwanda thangwi penepo ndzidzi wakuvuna wakwana.”

³⁰Yesu adavunza mbati, “Ufumu wa Mulungu tinausangiza nanji? Msangani wache ngupi unafuna phatisa ife basa kufuthula nawo Ufumu wa Mulunguwu?

³¹Wakhala ninga tenepa. Munthu ambakwata mbewu ya chitowe, mbewu yakufinuka pyakwanga padziko yonsene yapansi, mbakaibzala m'munda mwache. Angabzala

³²imbakula mbikhala mphesi ikulu pyakwanga kupiringana mphesi zonsene. Iyo imbakhala na nthambi zikulu-zikulu mwakuti mbalame zimbakwanisa kumangamo pisa pyawo.”

³³Yesu adalalika mphangwa zache kuna anthu mwakuphatisa basa misangani inango izinji ninga yonthoyi. Iye adaapanga pizinji pile pidakwanisa iwo kuva.

³⁴Nkhabe chibodzi chidalonga iye kuna anthu mbakhonda phatisa basa msangani. Mbwenye pikhali iye yekha ene na anyakufunzache, akhaapanga pyonsene mwakuveka.

³⁵Na mawulo a nsiku ibodzi-bodziyo Yesu adalonga kuna anyakufunzache mbati, “Tendeni tiwambukirembo mtunda unango wa nyanza.”

³⁶Tenepo iwo adausiya mwinjiwo. Anyakufunza adapakira m'mwadiya mudakhala Yesu mule mbaenda naye pabodzi. Miyadiya inango idamtewerambo.

³⁷Vumbu-vumbu chonzi chakugoswa chidagundika, tenepo mabimbi adatoma kugabikira m'mwadiya mule mwakuti ukhali chifupi kudzala madzi.

³⁸Yesu akhali m'nduli mwa mwadiya kugona chitulo msolo wache uli tsami-tsami pansago. Anyakufunza adamulamusa mbati, “Mfunzisi, kadi imwe nkhabe ikha konta tayu kuti tili chifupi kulobzeka?”

³⁹Yesu adalamuka mbatonga mphepoyo mbati, “Matama!” Mbalonga pontho kuna mabimbi mbati, “Lekani!” Mphepo idaleka, tenepo pakhali kumatama kukulu.

⁴⁰Kubuluka penepo Yesu adavunza anyakufunzache ale mbati, “Thangwi yache njanji munagoswerwa tenepa? Kadi imwe na pano nkhabedi chikhulupiro tayu?”

⁴¹Mbwenye iwo adagoswera pyakwanga mbalonga kuna unango na mwanzache mbati, “Weneyu ndi munthu wanji wakuti mphepo na mabimbi ene pikumvera?”