Read cisena MALIKO 5 Bible Online

MALIKO 5 - cisena bible

MALIKO 5

¹Yesu na anyakufunzache adafika kumtunda unango wa nyanza ya Galilea, kunthemba ya Gerasa.

²Pidachita Yesu tchitheni m'mwadiya mule, adagumanikana na munthu akubulukira kumasiye. Munthu weneyu akhadaphatwa na mizimu yakuipa

³mbakhala pakati pa nthumbi. Nkhabeve mbodzi akhakwanisa kummanga na njema zene tayu.

⁴Ndzidzi uzinji akhamangwa na njema m'miyendo na m'mikono, mbwenye iye akhathumula na kuswa njema zikhali m'mikono na m'miyendo mwache zile. Akhali wamphamvu pyakwanga mwakuti nee mbodzi adakwanisa kumkhuludza weneyu tayu.

⁵Mosiku na masikati akhazungulira-zungulira panthumbi na m'mapiri, kukhuwa na kupidzadzada-dzadzada yekha ene na miyala.

⁶Pidaona iye Yesu na kutali, adathamanga, mbakamgodamira.

⁷Adakhuwa mwakugaluza fala mbati, “Yesu, Mwana Mulungu Wakudzulu-dzulu, munafunanji na ine? Dumbirani kuna Mulungu kuti munandisanyisa tayu!”

⁸Adalonga tenepa thangwi Yesu akhadalonga mbati, “Mzimu wakuipa, buluka muna munthuyu!”

⁹Tenepo Yesu adamvunza munthuyo mbati, “Dzinako ndiwe ani?” Munthu ule adatawira mbati, “Ndine Mwinji, thangwi tilimo azinji ene!”

¹⁰Mbwenye iye adathimiza kumpempha Yesu kuti aleke kubulusira mizimu yakuipayo kunja kwa nthembayo.

¹¹Chifupi na penepo pakhali mkumbi ukulu wa nkhumba kudya m'khundu-khundu mwa phiri.

¹²Tenepo mizimu yakuipa ile idapempha Yesu kuti, “Tigwinyeni pyathu kuna nkhumbazo, pontho titawiriseni pyathu kapita muna izomo.”

¹³Iye adaitawirisa kwenda, tenepo mizimu yakuipayo idabuluka muna munthu ule mbikapita muna nkhumbazo. Chimkumbi chonsene cha nkhumba, chakukwana ninga pikwi piwiri, chidatchithira na kuthamanga pamatelero mbichigwera m'nyanza mbichibira.

¹⁴Anyakudyesa nkhumbazo adathawa mbakapanga anthu muluwani na m'minda. Tenepo anthuwo adabuluka mbaenda kaona pidachitikapyo.

¹⁵Pidadza iwo kuna Yesu, adaona munthu ule akhadaphatwa na mwinji wa mizimu yakuipa, ali khale ponthopo, wakuvazikwa pontho wakukhuzumuka, tenepo onsene adagoswerwa.

¹⁶Anyakupionawo adapanga anthu pidachitika kuna munthu wakuphatwa na mizimu yakuipa ule, pontho na kuna nkhumba zene.

¹⁷Natenepo iwo adampempha Yesu kuti abuluke kunthemba kwawoko.

¹⁸Pidapakira Yesu m'mwadiya, munthu akhadaphatwa na mizimu yakuipa ule adampempha mbati, “Nditawirisenimbo ndiende namwe!”

¹⁹Mbwenye Yesu hadamtawirise tayu. Kwache, adampanga mbati, “Bwerera kwanu ukaapange abale ako pinthu pikulu pyakuchitira Mbuya thangwi ya kukoma kwache mtima.”

²⁰Tenepo munthu ule adabuluka mbaenda kagwanda na m'nthemba ya Maluwani Khumi mbakalalika pidamchitira Yesu pile. Anyakupiva onsene adadodoma.

²¹Yesu adabwerera mbakawambuka kumtunda unango wa nyanza. Mwinji ukulu udagumanyikana mwakumzungulira pakhundu ya nyanzayo.

²²Yairosi, mbodzi wa akadamu a kunyumba yakupempherera, adafikambo penepo. Pidaona iye Yesu, adapiponya pamanyalo a Yesuyo

²³mbampempha mwakumbulumundira mbati, “Kamwana kanga kamkazi kakudwala pyakwanga. Ndaphata miyendo, tendeni mukamsanjike manjanu kuti akawange mbakhala na moyo.”

²⁴Yesu adenda naye pabodzi. Anthu azinji adatsagana naye mwakuti adamuwumbikira khundu zonsene.

²⁵Pontho-ponthopo pakhali mkazi ule adasanyika pyakwanga pyaka khumi na piwiri nawo utenda wa msamba-msamba.

²⁶Iye adenda mwa ang'anga azinji mbavunga pyonsene pikhali na iye pile kuti awange, kwache utenda ule ndiye udanyanyiratu.

²⁷Iye adava mbiri ya Yesu, natenepo adamtewera m'nduli mwache m'mwinji,

²⁸thangwi akhalonga mumtima mwache mbati, “Ndingakhuya kwene nguwo zachezo, ndinati ndiwange.”

²⁹Iye adakhuyadi chakufinika chache chile, tenepo kabodzi na kabodzi kuchucha kwa chiropa chache kudaleka mbava kululupirwa m'manungo mwache kuti nyatwa zache zidammalira.

³⁰Kabodzi kene Yesu adapidziwa kuti mphamvu zidabuluka muna iye, natenepo adazungunuka m'mwinjimo mbavunza mbati, “Akhuya nguwo zanga mbani?”

³¹Anyakufunzache adamtawira mbati, “Ngayang'anani kukuwumbikirani kwachita anthuku; nkhuvunza basi kuti, ‘Mbani andikhuya?’ ”

³²Mbwenye Yesu adathimiza kuyang'ana-yang'ana kuti aone mbani adachita penepyo.

³³Mkazi ule adadziwa pidamgwera pile mbadza mwakutetemera na mantha mbagodama pamanyalo pa Yesu, mbampanga pyakuonadi pyonsene.

³⁴Yesu adalonga kuna mkaziyo mbati, “Mwananga, chikhulupiro chako chakuwangisa. Ndoko na mtendere, pontho ukhale wakuwangiswa nyatwa zako.”

³⁵Yesu mbali m'kati kulonga, anthu anango adadza kubulukira kunyumba ya Yairosi mbampanga mbati, “Mwananutu amalisika. Apo munabonereseranji mfunzisiyu?”

³⁶Mbwenye Yesu hadaikhe konta[9] pikhalonga iwo pile tayu, kwache adampanga Yairosi mbati, “Leka gopa, khulupira kwene basi!”

³⁷Tenepo hadatawirise munthu unango kwenda naye pabodzi tayu kupambula Peturo, Yakobo na mbaleache, Yohani.

³⁸Iwo adafika kumsuwo kwa Yairosi, kweneko Yesu adaonako dzunguzo mbava chiliro chikulu.

³⁹Iye adapita m'nyumbamo mbaavunza mbati, “Dzunguzo yonseneyi njanji? Munaliranji? Mwanayu hadafe tayu. Iye ali m'chitulo!”

⁴⁰Anthuwo adamseka Yesu, natenepo adaabulusa onsene panja, mbakwata babache na mache mwanayo pabodzi pene na anyakufunzache atatu ale mbapita m'subi mudagoneswa mwanayo.

⁴¹Yesu adamphata dzanjache mbalonga kuna iye mbati, “Talita khumu!” Kweneku nkhulonga kuti, “Kamtsikanawe, ndikukupanga lamuka!”

⁴²Kabodzi na kabodzi mwanayo adalamukadi mbatoma kufamba-famba. Iye akhali na pyaka khumi na piwiri pyakubalwa. Pidachitika pinthu penepi, onsene adadodoma pyakwanga pene.

⁴³Mbwenye Yesu adaapanga mwakugogomeza kuti aleke kapilonga kuna munthu na mbodzi ene mbalonga pontho mbati, “Mpaseni kudya adye.”