Read cisena MALIKO 7 Bible Online

MALIKO 7 - cisena bible

MALIKO 7

¹Afarisi anango na afunzisi a mwambo, ale akhadabulukira ku Yerusalemu, adagumanyikana mwakuzungulira Yesu.

²Iwo adaona anyakufunza anango a Yesu akudya okhonda samba m'manja ninga mukhalongera Afarisi kuti pileke chitwa.

³Afarisi na Ayuda anango onsene hambadya okhonda chita mtemo wawo wakusamba m'manja tayu, thangwi ambateweza mtemo wa makolo awo akale.

⁴Pontho hambadya chinthu na chibodzi chene chakubulukira kumsika mbakhonda toma kuchitsuka tayu.[13] Ambateweza pontho mitemo inango izinji ile idatambira iwo, yakukhala ninga njira yakuthema kutsukira nayo makhomitcho, pitomba, pikalango na mabonde.[14]

⁵Natenepo Afarisi na afunzisi a mwambo ale, adavunza Yesu mbati, “Thangwi yache njanji inakhondesa anyakufunzanu kuteweza chifunziso chidaperekwa na makolo athu akale? Iwo ambadya okhonda samba m'manja!”

⁶Yesu adaatawira mbati, “Ndimomwene ninga mudapilembera mprofeti Yesaya pya imwe kuti imwe ndimwe mfaka-faka. Iye adalemba kuti Mulungu adalonga mbati, ‘Anthu enewa ambandilemedza na m'kanwa mwawo mwene basi, mbwenye mitimawo ili kutali na ine.

⁷Kundipembedza kwawo nkhwakusowa basa, thangwi ambafunzisa matongero akusasanywa na anthu khala ninga asasanywa na Mulungu!’

⁸“Mumbaikha pakhundu matongero a Mulungu mbamuvera mitemo ya anthu.”

⁹Yesu adathimiza kulonga mbati, “Imwe muna njira yakuchenjera yakuikhira nayo matongero a Mulungu pakhundu nakuti munyanye kuphatirira pachifunziso chanu mwekha.

¹⁰Thangwi Mose adatonga kuti: ‘Lemedza babako na mako,’ pontho ‘Munthu onsene analulupisa babache na mache athema kuphiwa.’

¹¹Mbwenye imwe mumbafunzisa kuti ngakhala munthu ana chinthu anakwanisa kuphatisa basa kuphedzera nacho babache na mache, mbwenye munthuyo angalonga kuti: ‘Ndi korobani,’ kweneku nkhulonga kuti chenechi chakoyerwa Mulungu,

¹²tenepo imwe nee mumbamtawirisa tayu kuti aphedze babache na mache.

¹³Pakuchita tenepo, mumbalulupisa mafala a Mulungu na mitemo yanu imbasiyirana imwe, mbamuchita pinango pizinji ninga tenepa.”

¹⁴Yesu adachemera pontho mwinji mbalonga nawo mbati, “Ngavani kuno, monsenene, pontho muvesese.

¹⁵Nkhabe chibodzi chinapita muna munthu kubulukira kunja kwa manungo chingamswipise munthu tayu, mbwenye ntchinthu chakubuluka muna munthuyo chimbamswipisa.”[15]

¹⁷Pidasiya Yesu mwinji ule mbakapita m'nyumba, anyakufunzache adampempha kuti afuthule pidalonga iye pile.

¹⁸Yesu adalonga nawo mbati, “Kani misolo yanu njakuuma basi? Imwe nkhabe vesesadi tayu? Nkhabe na chibodzi chene chakupita muna munthu kubulukira kunja kwa manungo chingamswipise,

¹⁹thangwi chinthucho hachimbakapita mumtima mwache tayu, mbwenye m'chifu mwache mbachikabulukira pontho kunja kwa manungo.” Pakulonga pinthu penepi, Yesu akhalonga kuti pyakudya pyonsene mphyakuthema kudyiwa.

²⁰Iye adathimiza kulonga mbati, “Mphinthu pyakubuluka muna munthu pimbamchitisa munthu kukhala wakuswipa.

²¹Thangwi kubulukira muna munthu, mumtima mwache mumbadza manyerezero akuipa ale ambamgwinyira kachita pinthu pyakudzedzeduka, kuba, upandu,

²²uputa, mtima, kunama, kuseluka, bivu, tsweda, kudungudza, pyakupupwa na kuchita pinthu pinango pyakuipa.

²³Pinthu pyakuipa pyonsenepi pimbadza kubulukira muna munthu mbapimswipisa.”

²⁴Tenepo Yesu adabuluka mbaenda kunthemba ya chifupi na mzinda wa Turo. Iye adapita m'nyumba mbakhonda funa kuti munthu na mbodzi ene apidziwe kuti iye akhali kweneko, mbwenye iye adapichimwana kuti akhale mwakubisika.

²⁵Mkazi, ule akhali na mwanache wamkazi wakuphatwa na mzimu wakuipa, adava pya Yesu. Kabodzi kene adadza mbapiponya pansi pa manyalo a Yesu.

²⁶Mkazi ule akhali wa mtundu okhonda khala Ayuda, wakubalwa kunthemba ya Fonike m'dziko ya Siria. Iye adapempha Yesu kuti akabuluse mzimu wakuipa muna mwanache.

²⁷Mbwenye Yesu adamtawira mbati, “Chakutoma tidyese ana. Si pyadidi tayu kukwata kudya kwa ana mbatiponyera anambwa.”

²⁸Mkazi ule adatawirambo mbati, “Mbuya, na anambwa ene akugona pansi pathebulu ambadya pyasiya anapyo!”

²⁹Natenepo Yesu adalonga kuna mkaziyo mbati, “Na thangwi ya kutawira kwakoku, bwerera kwanu. Kweneko unakagumana mzimu wakuipa wabuluka muna mwanayo.”

³⁰Mkazi ule adenda kumusa kwache mbakagumana mwanache akugona patalimba; mzimu wakuipa ukhadabulukadi muna mwanayo.

³¹Yesu adabuluka kumbuto ya Turo mbagwanda na ku Sidoni, kutchithira kunyanza ya Galilea mbaenda pontho kunthemba ya Maluwani Khumi.

³²Kweneko kudadza anthu anango na munthu wakukhonda kuva na kulonga kwene. Iwo adapempha Yesu kuti asanjike manja munthu ule.

³³Pidenda iye naye pakhundu, kumbulusa pamwinji pale, Yesu adapitisa pyala pyache m'makutu mwa munthu ule. Tenepo adaphula mata mbamphata lulume yache.

³⁴Yesu adayang'ana kudzulu mbadzuma pikulu mbalonga kuna iye mbati, “Efatha!” Kweneku nkhulonga kuti, “Funguka!”

³⁵Penepo pene, makutu a munthu ule adafunguka, lulume yache idasudzuka mbatoma kulonga pyakuveka.

³⁶Yesu adapanga anthu ale mwakugogomeza kuti aleke kapilonga kuna munthu na mbodzi ene. Mbwenye na kuakhondesa kukulu kudachita iye, iwombo ndiye adanyanyiratu kuvekesa pinthu pidachitikapyo.

³⁷Anthu adamalwa nzeru mbalonga mbati, “Weneyu aphata pyonsene mwadidi mwene! Akuchitisadi madodo kuva pontho anyakukhonda longa, kulonga!”