Read cisena MALIKO 8 Bible Online

MALIKO 8 - cisena bible

MALIKO 8

¹Sindzidzi nkhubuluka penepo mwinji unango ukulu udagumanyikana. Pidasowa anthu chakuti adye, Yesu adachemera anyakufunzache kuna iye mbalonga mbati,

²“Ndikuva nyambalo na anthuwa, thangwi akhala na ine nsiku zitatu, apo chinchino nkhabe chakuti adye.

³Ndingaagwinya kwawo na njala tenepa, anati akomokere m'njira thangwi anango abulukira kutali.”

⁴Anyakufunzache adamvunza mbati, “Nkhupimbo m'tsanga muno kunakwanisa munthu kagumana phoso yakudyesa anthu onsenewa?”

⁵Yesu adaavunza mbati, “Muna mikate mingasi?” Iwo adamtawira mbati, “Minomwe.”

⁶Yesu adapanga mwinjiwo kuti ukhale pansi. Tenepo iye adakwata mikate minomwe ile mbapereka takhuta kuna Mulungu. Iye adaimenya-menya mbaipereka kuna anyakufunzache kuti agawize mwinji ule; iwombo adachitadi ninga monthomo.

⁷Iwo akhali napyo pontho pinsomba ping'ono-ping'ono pyakuchepa. Yesu adapereka takhuta kuna Mulungu thangwi ya pinsombapyo mbapanga anyakufunza kugawiza pontho mwinjiwo.

⁸Anthu onsene adadya mbakhuta. Akhalipo anthu ninga pikwi pinayi. Kubuluka penepo anyakufunza adakwatapo pitundu pinomwe pyakudzala na pyakusalira. Pidagwinya Yesu anthu ale,

¹⁰adapakira m'mwadiya pabodzi na anyakufunzache mbaenda kunthemba ya Dalimanutha.

¹¹Afarisi anango adadza kuna Yesu mbatoma kuchita naye mphoka. Iwo akhafuna kumteyera msampha, natenepo adampempha kuchita chidzindikiro kuonesa ngakhala iye akhalidi na mphamvu za Mulungu.

¹²Mbwenye Yesu adadzuma pikulu mumtima mwache mbati, “Thangwi yache njanji anthu a nsiku zino anafuna chidzindikiro? Nkhabe, ndikukupangani pyakuonadi kuti anthu enewa hanapaswa chidzindikiro ninga chenechi tayu.”

¹³Yesu adaasiya mbabwerera kapakira mwadiya mbatoma ulendo wakuwambukira kumtunda unango wa nyanza.

¹⁴Anyakufunzache akhadaduwalira kukwata mikate yakukwana-kwana mbakhala nawo mkate ubodzi ene basi m'mwadiyamo.

¹⁵Yesu adaacheuza mbati, “Khalani m'maso pontho onesesani pyakufufumisira mkate[16] pya Afarisi na pya Herodi.”

¹⁶Anyakufunza ale adatoma kulonga okha ene mbati, “Yesuyu akulonga tenepa, thangwi ife nkhabe mikate.”

¹⁷Yesu adadziwa pikhalonga iwo, natenepo adaavunza mbati, “Munalongeranji kuti imwe nkhabe mikate? Ayi imwe nkhabe ona na kuvesa tayu? Kani misolo yanu njakuuma?

¹⁸Imwe muna maso, ayi nkhabe kwanisa kuona tayu? Imwe muna makutu, ayi nkhabe kwanisa kuva tayu? Ayi imwe nkhabe kumbuka tayu

¹⁹ndzidzi ule udamenya-menya ine mikate mishanu pa anthu pikwi pishanu? Mudadzaza pitundu pingasi pidalokota imwe pyakusalira pile?” Anyakufunza ale adamtawira mbati, “Khumi na piwiri.”

²⁰Yesu adaavunza mbati, “Pidamenya-menya ine mikate minomwe pa anthu pikwi pinayi, mudathukula pitundu pingasi pyakudzala na pyakusalira?” Iwo adamtawira mbati, “Pinomwe.”

²¹Yesu adaavunza mbati, “Apo na lero nkhabe vesesa tayu?”

²²Iwo adafika kumudzi wa Betesaida kule kudadza anthu anango na boli-boli mbapempha Yesu kuti amsanjike manja boli-boliyo.

²³Yesu adaphata dzanja ya boli-boliyo mbaenda naye kunja kwa mudzi. Pidaphulira Yesu mata m'maso mwa munthu ule, iye adamsanjika manja mbamvunza mbati, “Ayi ukukwanisa kuona?”

²⁴Munthu ule adayang'ana mbalonga mbati, “Ande, ndikuona anthu akufamba-famba, kwache akuoneka ninga miti.”

²⁵Yesu adaikha pontho manjache pamaso a munthu ule. Ndzidzi wenewu maso ache adafunguka, kuona kwache kudabwerera mwakale mbaona pyonsene mwadidi mwene.

²⁶Yesu adampanga mbati, “Leka kwenda m'mudzimu.” Tenepo iye adamgwinya kwawo.

²⁷Yesu na anyakufunzache adenda kumidzi ya kunthemba ya Kesarea-Filipi. Panjira Yesu adaavunza mbati, “Ndipangeni, anthu ambalonga kuti ine ndine ani?”

²⁸Iwo adamtawira mbati, “Anango ambalonga kuti ndimwe Yohani Nyakubatiza; anango ati ndimwe Elia; anangombo ati ndimwe mbodzi wa maprofeti.”

²⁹Yesu adaavunza mbati, “Apo imwembo; mumbalonga kuti ndine ani?” Peturo adamtawira mbati, “Imwe ndimwe Khristu!”

³⁰Yesu adaapanga mwakugogomeza mbati, “Lekani kapanga munthu na mbodzi ene pya ine.”

³¹Kubuluka penepo, Yesu adatoma kufunzisa anyakufunzache mbati, “Mwana Munthu anati asanyike pyakwanga pene mbakhondwa na akulu-akulu, anyansembe akulu na afunzisi a mwambo. Iye anaphiwa, mbwenye pangagwanda nsiku zitatu anati alamuke mbakhala na moyo.”

³²Yesu adapilonga mwakuveka kuna iwo. Penepo Peturo adenda naye pakhundu mbatoma kumsumulula.

³³Mbwenye Yesu adazungunuka mbayang'ana anyakufunzache mbalongera Peturo mbati, “Buluka pana ine, Satana. Manyerezero akowa nkhabe bulukira kuna Mulungu tayu, mbwenye kuna anthu!”

³⁴Yesu adachemera mwinji pabodzi na anyakufunzache kuna iye mbaapanga mbati, “Ngakhala munthu anafuna kunditewera athema kupikhonda yekha ene, pontho asasanyike kuona nyatwa na kufa kwene, tenepo anditewere.

³⁵Thangwi munthu anafuna kupulumusa moyo wacheyo, anati autaye; mbwenye ule anataya moyo wache thangwi ya ine pontho na thangwi ya Mphangwa Zadidi anati aupulumuse.

³⁶Munthu anaganyalinji angakwata dziko yonsene yapansi pano mbataya moyo wache? Nkhabe tayu!

³⁷Nkhabe chibodzi chinakwanisa dzapereka iye kuti akwate pontho moyo wache.

³⁸Ngakhala munthu anachita manyadzo na ine pontho na chifunziso changa nsiku zinakhonda anthu Mulungu pontho zakudawika zino, penepo Mwana Munthu anachitambo naye manyadzo angafika mudemelero ya Babache pabodzi pene na angelo akuchena.”