Read cisena MALIKO 9 Bible Online

MALIKO 9 - cisena bible

MALIKO 9

¹Yesu adathimiza kulonga mbati, “Ndikukupangani pyakuonadi kuti pana anango pano hanafa tayu kufikirana aone Mulungu akukhazikisa Ufumu wache na mphamvu.”

²Pidagwanda nsiku zitanthatu, Yesu adakwata Peturo, Yakobo na Yohani mbakwira nawo paphiri yakulapha mbakakhalako okha ene. Kweneko Yesu adasanduzwa pamaso pawo.

³Nguwo zache zidayetimira kupiringana kuchena kule mbudakufulira anthu onsene a padziko yapansi.

⁴Tenepo anyakufunza atatu ale adaona Elia na Mose akulonga na Yesu.

⁵Peturo adalonga kuna Yesu mbati, “Mfunzisi, mphyadidi kuti ife tili pano! Tinati timange makumbi matatu, ibodzi yanu, inango ya Mose, inangombo ya Elia.”

⁶Iwo adagoswerwa pyakwanga mwakuti Peturo nee adadziwa chakuti alonge tayu.

⁷Makole adadza mbaagudumira, tenepo fala idaveka kubulukira m'makolemo kuti, “Weneyu ndi Mwananga wapamtima—mvesereni iye!”

⁸Kabodzi kene anyakufunza ale adayang'ana-yang'ana mbaona Yesu ene basi akhali na iwo, nee munthu unango akhali penepo tayu.

⁹Pikhatchitha iwo paphiripo, Yesu adaapanga mbati, “Lekani kapanga munthu na mbodzi ene pinthu pyaona imwepi, kufikirana Mwana Munthu alamuke kuimfa.”

¹⁰Anyakufunza adaveradi pidapangwa iwo, mbwenye paokha ene adatoma kuvunzana unango na mwanzache mbati, “Kulamuka kuimfamboku nkhulonga kuti tani?”

¹¹Natenepo iwo adavunza Yesu mbati, “Afunzisi a mwambo ambalongeranji kuti Elia ndiye athema toma kudza?”

¹²Kutawira kwache kukhali tenepa, “Elia ndiye athema toma kudza kuti asasanyiletu pinthu pyonsene. Apo Malembambo analongeranji kuti Mwana Munthu anasanyika pyakwanga mbakhondwa?

¹³Mbwenye ndikukupangani kuti Elia adadza kale, anthumbo adachita naye ninga mudafunira iwo, ninga mudalongera Malemba pya iye.”

¹⁴Pidaphatana iwo na anyakufunzache adasalira ale, adaona mwinji ukulu waazungulira, pontho Afunzisi anango a mwambo akuchita nawo mphoka.

¹⁵Pidaona mwinjiwo Yesu, udadodoma pyakwanga mbumthamangira kammwenyika.

¹⁶Yesu adavunza anyakufunzache mbati, “Mukupokanyisananji nawo enewa?”

¹⁷Munthu mbodzi m'mwinjimo adatawira mbati, “Mfunzisi, ndadza na mwananga kuna imwe, thangwi ana mzimu wakuipa mwakuti hambakwanisa kulongabi.

¹⁸Panamphata mzimupo, umbamponya pansi, mbabuluka phovu kukanwa. Iye ambakikita mano, pontho manungo ache onsene ambagwima. Ndidapempha anyakufunzanu kuti aubuluse mzimuwo, mbwenye iwo adapichimwana.”

¹⁹Yesu adalonga kuna iwo mbati, “Shaa! Anthumwe kukhonda khulupira kwenekumbo nkhwanji? Ndikhale namwe kufikirana lini? Ndipirire namwe kufikirana lini? Dzani naye kuno, mwana mphaleyo.”

²⁰Tenepo adadza nayedi. Sindzidzi mzimuwo nkhuona Yesu, udamdzadzamirisa mphale ule. Iye adagwa pansi mbabulumunda-bulumunda, phovu ili kukanwa.

²¹Yesu adavunza babache mphaleyo mbati, “Mphaleyu akhala tenepa kutomera lini?” Babache adatawira mbati, “Kutomera uwanache.

²²Ndzidzi uzinji mzimu wakuipawu wamponyera pamoto na m'madzi kuyesa-yesa kuti umphe. Tiverenimbo ife nsisi mbamutiphedza, ngakhala munakwanisa kuchita tenepo.”

²³Yesu adalonga mbati, “Thangwi ninji mukulonga kuti, ‘Ngakhala imwe munakwanisa kuchita tenepo?’ Pyonsene mphyakukwanisika kuna munthu wakukhala nacho chikhulupiro.”

²⁴Kabodzi na kabodzi babache mphaleyo adalira mbati, “Ndili nacho chikhulupiro, kwache ntchakuchepa. Ndiphedzenimbo kuti ndikhale nacho chizinji!”

²⁵Yesu adapidziwa kuti mwinji ukhafedzera-fedzera kuna iwo. Natenepo adatonga mzimu wakuipa mbati, “Mzimu wa ugontha na wakukhonda longa, ndikukutonga kuti ubuluke muna mphaleyu pontho leka dzapitave muna iye.”

²⁶Mzimu ule udakhuwa, mbumponya mphaleyo mwakumdzadzamirisa pikulu mbubuluka. Mwana mphale adaoneka ninga wakufa, natenepo onsene adalonga mbati, “Mama! Mwanayu afa!”

²⁷Mbwenye Yesu adaphata dzanja mphaleyo mbamphedza kulamuka, tenepo iye adaimira.

²⁸Pidapita Yesu m'nyumba, anyakufunzache adamvunza pakhundu mbati, “Ifembo tapichimwana tani kuubulusa mzimuwu?”

²⁹Yesu adaatawira mbati, “Nkhabe chinango chingakwanise kubulusa mtundu wa mzimu ninga weneyu, mbwenye kupemphera kwene basi.”

³⁰Yesu na anyakufunzache adabuluka pambutopo mbaenda na m'nthemba ya Galilea. Iye hadafune tayu kuti munthu na mbodzi ene adziwe kukhali iye,

³¹thangwi akhafunzisa anyakufunzache. Iye adalonga kuna iwo mbati, “Mwana Munthu anaperekwa kuna anthu, ale anafuna dzampha. Mbwenye pangagwanda nsiku zitatu anati alamuke mbakhala na moyo.”

³²Mbwenye anyakufunza ale hadavesese tayu pikhalonga iye pile, mbachita mantha kumvunza.

³³Iwo adadza ku Kafaranao. Pikhadapita iwo m'nyumba, Yesu adavunza anyakufunzache mbati, “Pikhalonga-longa imwe m'njiramu ninji?”

³⁴Mbwenye iwo hadamtawire tayu, thangwi m'njira mule akhadapokanyisana kuti mkululetu mbani pakati pawo.

³⁵Yesu adakhala pansi mbachemera anyakufunza khumi na awiri ale, mbalonga kuna iwo mbati, “Ule anathanda kukhala wakutoma, apiikhe yekha ene pambuto yakumalisira ya onsene mbakhala pontho nyabasa wa onsene.”

³⁶Natenepo Yesu adathukula mwana mbamuimirisa pamaso pawo. Iye adamkhumbatira mbalonga kuna iwo mbati,

³⁷“Munthu onsene anatambira mwadidi mbodzi wa anawa thangwi ya ine, atambirambo na ine ene; pontho munthu onsene anatambira ine mwadidi, hadatambire ine ndekha tayu, mbwenye atambirambo adandituma ule.”

³⁸Yohani adalonga kuna Yesu mbati, “Mfunzisi, tidaona munthu akubulusa mizimu yakuipa na dzinanu, natenepo ife tidampanga kuti abasikeletu thangwi iye si mbodzi wa gulu yathu tayu.”

³⁹Yesu adapanga anyakufunzache mbati, “Lekani kumkhondesa, thangwi nkhabe mbodzi ule anachita pinthu pyakudodomesa na dzinanga, ndzidzi onthowo mbakwanisa kundilongera pinthu pyakuipa.

⁴⁰Thangwi ule anakhonda kutipokanyayo ngwathu.

⁴¹Ndikukupangani pyakuonadi kuti ule anakupasani madzi akumwa, thangwi ndimwe anga, anati afupirwedi.

⁴²“Ngakhala munthu anadawisa mbodzi wa anawa ambandikhulupirawa, mbapidakhala pyadidi kuti munthu weneyo amangirirwe libwe ikulu m'khosi mwache mbaponywa m'nyanza.

⁴³Natenepo ngakhala dzanjako ikukudawisa, igwande! Mphyadidi kuti ukapite kumoyo okhonda mala wakusowa dzanja, kusiyana nakuti ukoye manjako onsene mawiri mbuenda kugehena, kumoto okhonda thima.[17]

⁴⁴

⁴⁵Ngakhala dzinyalo yako ikukudawisa, igwande! Mphyadidi kuti ukapite kumoyo okhonda mala wakusowa dzinyalo, kusiyana nakuti ukoye manyalo ako onsene mawiri mbuponywa kugehena.[18]

⁴⁶

⁴⁷Pontho ngakhala diso yako ikukudawisa, ikonombole! Mphyadidi kuti ukapite mu Ufumu wa Mulungu na diso ibodzi, kusiyana nakuti ukoye maso ako onsene awiri mbuponywa kugehena.

⁴⁸Kweneko ‘mfunye zakuadya hazimbafa tayu, na moto wakuaotcha humbathimiswa tayu.’

⁴⁹“Anthu onsene anacheneswa na moto ninga mumbacheneserwa nsembe ya nyama na munyu.

⁵⁰Munyu ngwadidi, mbwenye kunyung'unya kwache kungamala, munaunyung'unyisa nanji pontho? Mukhale nacho chinthu chinango chakukuchenesani mumtima mwanu ninga munyu, pontho mukhale mwamtendere unango na mwanzache.”