Read cisena LUKA 1 Bible Online

LUKA 1 - cisena bible

LUKA 1

¹Teofilo nyakulemedzwa: Anthu azinji ayesa-yesa kulemba mbiri ya pinthu pyonsene pidachitika pakati pathu.

²Iwo adalemba pya pinthu pidapangwa ife pile na ale adapiona na maso kutomera pakutoma, pontho na ale adalalika Mphangwa Zadidi.

³Na thangwi yakuti ine ndidateweza mwadidi mwene pinthu pyonsenepi kutomera pakutoma, ndapinyerezera kuti mphyadidi kuti ndikulemberenimbo pinthu penepi munyandandandache.

⁴Ndachita tenepa towera mudziwe kuona konsene kwa pinthu pyafunziswa imwe.

⁵Pandzidzi ukhali Herodi mfumu wa Yudea,[1] pakhali nyansembe dzinache Zekaria, wa m'gulu ya anyansembe ya Abia. Mkazache akhali Elizabeti, iyembo akhali chidzukulu cha Aroni, nyansembe.

⁶Uwiriawo akhali akulungama pamaso pa Mulungu mbavera miyambo na matongero a Mulungu mwadidi mwene.

⁷Iwo akhali akusowa ana, thangwi Elizabeti akhali wakuuma nthumbo, pontho iye pabodzi na Zekaria ene akhali akukalamba.

⁸Nsiku ibodzi Zekaria akhaphata basache ninga nyansembe m'Nyumba ya Mulungu, thangwi buswa ya gulu yache ikhadakwana.

⁹Iye adasankhulwa pakuchita ntsango, ninga mwa mtemo wa unyansembe, kuti aende m'Nyumba ya Mulungu kafukiza pinthu pyakununkhira paguwa.

¹⁰Mwinji ukhapemphera panja pandzidzi ukhafukiza iye pyakununkhira.

¹¹Mngelo wa Mbuya adaonekera kuna iye, mngeloyo adaimira kukhundu yamadyo ya guwa ikhafukizirwa pyakununkhirapyo.

¹²Zekaria adatutumuka mbachita mantha pidaona iye mngeloyo.

¹³Mbwenye mngelo adampanga mbati, “Zekaria, leka chita mantha! Mulungu ava kupemphera kwako, pontho mkazako Elizabeti anakubalira mwana wamamuna mbumthula Yohani.

¹⁴Mwana weneyu angabalwa unakomerwa na kusekera, anthumbo anango azinji anakomerwa.

¹⁵Iye anakhala munthu wamkulu pamaso pa Mbuya. Iye nee athema dzamwa vinyu, penu chakumwa chaukali. Kutomera pansiku yakubalwa kwache, anadzazwa na Mzimu Wakuchena.

¹⁶Pontho anadzesa anthu azinji a Israele kuabwezera kuna Mbuya Mulungu wawo.

¹⁷Iye anatsogola patsogolo pa Mbuya, mwakuwangisa na mphamvu ninga mprofeti Elia. Anachitisa ana na ababawo kuti aphatizane pontho; anasandusa anthu okhonda vera kuti anyerezere ninga kunyerezera kumbachita anthu akulungama. Anachitisa kuti anthu a Mbuya asasanyikire kudza kwache.”

¹⁸Zekaria adalonga kuna mngelo ule mbati, “Ine ndine nkhalamba pyanga na mkazanga ene ndi nkhalambambo. Apo ndinapidziwa tani kuti penepi mphyakuonadi?”

¹⁹Mngelo adamtawira mbati, “Ndine Gabriele, nyakuimira pamaso pa Mulungu, ule andituma kuti ndilonge nawe na kukupanga mphangwa zadidizi.

²⁰Mbwenye iwe hudakhulupire mphangwa zangazi tayu, zile zinakhala zakuonadi pandzidzi wache. Na thangwi yakukhonda khulupira kwako, unati ukhale wakuchimwana kulonga; mulomo wako unakhala wakuphopha kufikirana nsiku inafuna dzachitika pidadumbira ine pile.”

²¹Pandzidzi ukhachitika penepi anthu akhadikhira Zekaria ale adadodoma na thangwi ikhamdembukisa m'Nyumba ya Mulungumo.

²²Pidabuluka iye m'Nyumba mule adachimwana kulonga nawo, natenepo iwo adapidziwa kuti Zekaria adaona masomphenya m'Nyumba ya Mulungu mule. Iye akhalonga pyache na manja, thangwi adachimwana kubulusa fala.

²³Pidamala buswache m'Nyumba ya Mulungu, Zekaria adabwerera kumusa kwache.

²⁴Pandzidzi unango kubuluka penepo Elizabeti mkazache adakwata mimba mbabindikira pyache miyezi mishanu.

²⁵Elizabeti adalonga mbati, “Lero Mbuya andivera nsisi mbandibulusira manyadzo pakati pa anthu!”

²⁶Mwezi wachitanthatu wa mimba ya Elizabeti, Mulungu adatuma mngelo Gabriele kuluwani ya Nazareti m'Galilea.

²⁷Iye akhali na mphangwa kuna mwali ule akhadavunzirwa na mamuna dzinache Yosefe wa dzinza ya mfumu Davite. Dzina ya mwaliyo ikhali Maria.

²⁸Mngelo adadza kuna iye mbalonga mbati, “Komerwa ndiwe! Mbuya ali nawe, pontho akutsanzayisa pikulu pene.”

²⁹Maria adasanyika nazo pyakwanga mphangwa za mngeloyo mbadodoma kuti mafalawo akhalonganji.

³⁰Mngelo ule adalonga kuna iye mbati, “Leka goswerwa, Maria, Mulungu akukomera mtima.

³¹Unakwata mimba mbubala mwana wamamuna. Tenepo unamthula Yesu.

³²Iye anakhala wamkulu mbachemerwa Mwana Mulungu Wakudzulu-dzulu. Mbuya Mulungu anamuikha kukhala mfumu ninga kholo wache Davite

³³mbakhala mfumu wa dzinza ya Yakobo kwenda na kwenda; ufumu wache nkhabe dzamala tayu.”

³⁴Maria adalonga kuna mngelo mbati, “Ine sinamdziwa mamuna tayu, apo penepimbo pinakwanisika tani?”

³⁵Mngelo ule adamtawira mbati, “Mzimu Wakuchena anabwera pana iwe, pontho mphamvu za Mulungu inakugudumira. Na thangwi ya penepi mwana wakupambulika anafuna dzabalwayo anachemerwa Mwana Mulungu.

³⁶Yang'ana, mbaleako Elizabeti, ule akhalongwa kuti ngwakuuma nthumbo, lero na kukalamba kwache kwene ana mimba ya miyezi mitanthatu.

³⁷Thangwi nkhabe chinthu na chibodzi chene chimbachimwanika kuna Mulungu tayu.”

³⁸Penepo Maria adalonga mbati, “Ndine nyabasa wa Mbuya, mbapichitike kuna ine ninga mwapilongera imwe.” Tenepo mngelo ule adamsiya mkaziyo.

³⁹Sindzidzi nkhubuluka penepo Maria adachimbiza kusasanyika kwenda kuluwani ya m'mapiri kunthemba ya Yudea.

⁴⁰Iye adapita m'nyumba ya Zekaria mbakamwenyika Elizabeti.

⁴¹Pidava Elizabeti mwenyikiro wa Maria, mwana adabzongonyoka na kukomerwa m'mimba mwache. Elizabeti adadzazwa na Mzimu Wakuchena

⁴²mbalonga mwakugaluza fala mbati, “Iwe ndiwe nyakutsanzaya pikulu pakati pa akazi onsene; ngwakutsanzaya pontho mwana anafuna iwe dzabala!

⁴³Ndine animbo ine kuti mache Mbuyanga andifambire?

⁴⁴Thangwi sindzidzi pidava ine mwenyikiro wako, mwana adabzongonyoka na kutsanzaya m'mimba mwanga.

⁴⁵Ndiwe wakutsanzaya, thangwi udakhulupira kuti pinakwana-kwana pidakupanga Mbuya.”

⁴⁶Natenepo Maria adalonga mbati, “Mtimanga ukulemedza Mbuya;

⁴⁷mzimu wanga wakomerwa thangwi ya Mulungu Nyankhombo wanga,

⁴⁸thangwi iye andikumbuka ine nyabasache wakupichepesa! Kutomera lero kwenda m'tsogolo mifendu yonsene inandichemera nyakutsanzaya,

⁴⁹thangwi ya pinthu pikulu pyandichitira Mulungu Wamphamvu zonseneyi. Mulungu ngwakuchena,

⁵⁰kutomera mfendu na mfendu iye ambavera nsisi anyakumulemedza.

⁵¹Iye achita pinthu pikulu na mkono wache. Abalalisa anthu onsene akudungudza mumtima mwawo.

⁵²Iye atchithisa mafumu pa mipando yawo, mbwenye akwizika anthu akupichepesa.

⁵³Iye akhutisa anthu anjala na pinthu pyadidi, mbwenye anyakufuma adaabweza akusowa pinthu.

⁵⁴Achita pidadumbira iye kuna makolo athu, mbakhala chiphedzo kuna nyabasache Israele.

⁵⁵Iye akumbuka kuonesa nsisi kuna Abrahamu, pontho na kuna pidzukulu pyache pyonsene kwenda na kwenda.”

⁵⁶Maria adakhala na Elizabeti miyezi mitatu mbalamuka kubwerera kwawo.

⁵⁷Ndzidzi wakuti Elizabeti abale udakwana, tenepo adabala mwana wamamuna.

⁵⁸Atsanthembache na abale ache adava udidi ukulu udachita Mbuya kuna Elizabeti, tenepo onsene adasekera naye pabodzi.

⁵⁹Pansiku yachisere kubulukira pidabalwa mwanayo, iwo adadza kuti amgwande nsonga yachimuna ya mwanayo mbafuna kumpasa dzina ya Zekaria, babache.

⁶⁰Mbwenye mache adakhonda mbati, “Tayu! Dzinache ikhale Yohani.”

⁶¹Iwo adalonga mbati, “Mbwenye nkhabe mbodzi pakati pa abale akowa ana dzina ninga yeneyi tayu!”

⁶²Tenepo iwo adalonga na manja kuna babache mwanayo kumvunza dzina ikhafuna iye kuti mwanayo achemerwe nayo.

⁶³Zekaria adapempha chakulemberapo mbalemba kuti, “Dzinache ndi Yohani.” Penepo anthu onsene adadodoma napyo.

⁶⁴Kabodzi kene lulume ya Zekaria idasudzuka mbakwanisa kulonga pontho, tenepo iye adatoma kulemedza Mulungu.

⁶⁵Atsanthembawo adaphatwa na mantha, pontho mbiri ya pinthu penepi idaveka kukhundu yonsene ya kumapiri a Yudea.

⁶⁶Anyakupiva onsene adapinyerezera mbavunza mbati, “Mwana weneyu anakhala wakutani?” Thangwi pidaonekeratu pakwecha kuti mphamvu za Mbuya ikhali pana iye.

⁶⁷Zekaria babache Yohani adadzazwa na Mzimu Wakuchena mbalonga mphangwa zakubulukira kuna Mulungu mbati,

⁶⁸“Tendeni tilemedze Mbuya Mulungu wa Israele, thangwi abwera, pontho aombola anthu ache.

⁶⁹Atipasa Nyankhombo wamphamvu zonsene, chidzukulu cha nyabasache Davite ule.

⁷⁰Iye adalongeratu kudzera muna maprofeti ache akuchena akale ene

⁷¹kuti anatipulumusa kuna anyamalwathu, kubulukira m'manja mwa anyakutizonda onsene.

⁷²Iye adalonga kuti anavera nsisi makolo athu akale, mbakumbuka chiverano chache chakuchena.

⁷³Adadumbira kuna kholo wathu Abrahamu,

⁷⁴kuti anatipulumusa kuna anyamalwathu, pontho kuti anatitawirisa kuti timtumikire mwakukhonda gopa,

⁷⁵mbatikhala akuchena mtima na akulungama kuna iye nsiku zonsene zakukhala kwathu na moyo.

⁷⁶“Iwe, mwananga, unachemerwa mprofeti wa Mulungu Wakudzulu-dzulu. Unaenda patsogolo pa Mbuya kusasanyiratu njirache,

⁷⁷mbupanga anthu ache kuti anapulumuswa pakulekererwa pyakudawa pyawo.

⁷⁸Mulungu wathu ngwansisi pontho wakukoma mtima. Iye anatitumira cheza cha chipulumuso kubulukira kudzulu ninga mumbachitira dzuwa ingafuna buluka.

⁷⁹Chezacho chinamwinikira onsene akukhala mumdima na mumthunzi wa imfa, kutitsogolera kunjira ya mtendere.”

⁸⁰Mwana ule adakula chimo na muuzimu mwene. Iye akhakhala kuthando yatchetcha kufikirana nsiku idaonekera iye kuna anthu a ku Israele pakwecha.