Read cisena LUKA 10 Bible Online

LUKA 10 - cisena bible

LUKA 10

¹Kubuluka penepo Mbuya adasankhula anthu anango makumanomwe na awiri,[12] mbaatuma awiri-awiri kuti atsogole kumidzi na kumbuto zonsene zikhafuna iye kwenda.

²Adaapanga mbati, “Pyakuvuna mphizinji, mbwenye anyakuvuna ngakuchepa. Pemphani mwenechiro pyakuvunapyo kuti atume anyabasa dzapivuna.

³Ndokoni! Ndikukutumani ninga anabira pakati pa mibinzi.

⁴Lekani kwata budu ya kobiri, penu budu ya paulendo, penu na nkhwaira zene. Lekani imira panjira kuti mumwenyike anthu.

⁵M'nyumba monsene munakapita imwe, chakutoma mukalonge kuti, ‘Mtendere mbukhale m'nyumba muno.’

⁶Ngakhala m'nyumbamo muna munthu wa mtendere, mtendere walonga imwewo unakhala na iye. Mbwenye ngakhala nkhabemo munthu wa mtendere, kwatani pyanu mafala a mtendere alonga imwewo.

⁷Khalani m'nyumba yonthoyo. Mudye na kumwa pinakupasani iwo, thangwi nyabasa athema kupagalwi. Lekani buluka pafikira imwepo mbamuenda kakhala m'nyumba zinango.

⁸Mungapita m'mudzi, anthu mbakutambirani mwadidi, idyani pinakupasani iwo.

⁹Wangisani atenda a m'mudzimo, pontho muapange anthuwo kuti, ‘Ufumu wa Mulungu wadza chifupi na imwe.’

¹⁰Mbwenye mungapita m'mudzi anthu mbakhonda kukutambirani mwadidi, muende kunjira za m'mudzimo mbamukalonga kuti,

¹¹‘Na fumbi ya m'mudzi mwanu ene yaphatirira kumanyalo kwathuyi, tikukugubudzirani kuonesa kuti pyachita imwepi mphyakudawika. Kwache dzindikirani kuti Ufumu wa Mulungu wadza chifupi na imwe.’

¹²Ndikukupangani kuti pa Nsiku inafuna Mulungu dzatonga anthu mseru, iye anavera nsisi Sodomu kupiringana mudzi wenewo.

¹³“Una dzedze ndiwe luwani ya Korazini! Una dzedze ndiwe luwani ya Betesaida. Thangwi pyakudodomesa pidachitwa muna imwe mbapidachitwa m'mizinda a Turo na Sidoni, anthu a kweneko mbadavala kale masakha, na kukhala pansi mbapikhwaza dotha kuonesa kuti alekadi pyakudawa pyawo.

¹⁴Nsiku inafuna Mulungu dzatonga anthu mseru, iye anavera nsisi pikulu anthu a ku Turo na Sidoni kupiringana imwepo.

¹⁵Mphapo iwembo Kafaranao! Ayi ukhafuna kupikwiza wekha ene kudzulu? Iwe unaponywa kugehena!”

¹⁶Yesu adapanga anthu makumanomwe na awiri ale mbati, “Munthu anakuveraniyo, averambo na ine ene. Anakukhondaniyo, akhondambo na ine ene. Kwache nyakundikhondayo, akhondambo na adandituma ene ule.”

¹⁷Amuna makumanomwe na awiri[13] ale adabwerera na kukomerwa mbalonga kuna Yesu mbati, “Mbuya, na mizimu yakuipa ene ikhativera pikhaipanga ife na utongi wa dzinanu!”

¹⁸Yesu adaapanga mbati, “Ndidaona Satana akugwa kudzulu khala ninga ching'ani-ng'ani.

¹⁹Ngavani kuno! Ndakupasani mphamvu kuti mukwanise kuponda nazo nyoka na akong'a, mbamukunda mphamvu zonsene za nyamalwayo. Nkhabe chibodzi chinakukuwazani tayu.

²⁰Kwache lekani komerwa thangwi mizimu yakuipa imbakuverani, mbwenye mukomerwe thangwi madzinanu alembwa kudzulu.”

²¹Pandzidzi wenewo Mzimu Wakuchena adadzaza Yesu na kukomerwa, tenepo iye adalonga mbati, “Baba, Mbuya wa kudzulu na dziko yapansi, ndinapereka takhuta kuna imwe, thangwi mwaonesa kuna anthu okhonda funza pinthu pikhabisira imwe anthu anzeru na akufunza pile. Ande, Baba, mwenemu ndiye mukhapifunira imwe kuti pichitike.

²²“Babanga andipasa utongi papinthu pyonsene. Nkhabe na mbodzi ene anadziwa kuti Mwana mbani, mbwenye Baba yekha basi. Pontho nkhabe na mbodzi ene anadziwa kuti Baba mbani kupambula Mwana, pontho na ale ambasankhulwa na Mwanayo kuti iye adziwise Baba kuna iwo.”

²³Tenepo Yesu adazungunukira kuna anyakufunzache mbalonga nawo paokha ene mbati, “Ndimwe a mwayi thangwi ya kuona pinthu pinaona imwepi.

²⁴Ndikukupangani kuti maprofeti azinji na mafumu adafuna kuona pinthu pinaona imwepi, kwache hadapione tayu. Iwo adafunambo kuva pinava imwepi, kwache hadapive tayu.”

²⁵Mfunzisi wa mwambo adadza kuna Yesu kuti amuyese. Iye adavunza Yesu mbati, “Mfunzisi, ndichite tani kuti nditambire moyo okhonda mala?”

²⁶Yesu adamtawira mbati, “Mwambo wa Mose ukulonga tani? Umbauva tani?”

²⁷Munthu ule adamtawira mbati, “Ukulonga kuti, ‘Mfune Mbuya Mulungu wako na mtima wako onsene, na moyo wako onsene, na mphamvu zako zonsene, pontho na manyerezero ako onsene,’ pontho ‘Mfune mwanzako ninga mumbapifunira iwe.’ ”

²⁸Yesu adampanga mbati, “Walonga pyadidi. Chita penepyo, tenepo unakhala na moyo okhonda mala.”

²⁹Mbwenye mfunzisi wa mwambo akhafuna apilungamise yekha ene, natenepo adavunza Yesu mbati, “Apo mwanzangacheyo mbani?”

³⁰Yesu adamtawira mbati, “Pidachitwa na munthu unango ule akhatchithira kwenda kuluwani ya Yeriko kubulukira ku Yerusalemu. Iye adaphatwa na mapanga panjira. Iwo adamdulisa nguwo, adammenya, mbamsiya akomoka.

³¹Pidachitika kuti nyansembe akhagwanda na njira yonthoyo. Mbwenye pidaona iye munthu ule adachalira pyache.

³²Mlevi unango, adachita chibodzi-bodzi. Pidafika iye pambutoyo mbaona munthu ule, adachalira pontho na khundu inango ya njirayo.

³³Mbwenye pikhali Msamaria unango paulendo wache, adafikambo pambuto yonthoyo. Pidaona iye munthu ule, adava naye nsisi pikulu.

³⁴Adadza mbamthotha mafuta na vinyu pironda pyache, mbapimanga. Pidamala iye kuchita tenepo, adamkwizika pabulu wache, adenda naye kunyumba ya alendo, mbakamuyang'anira mwadidi.

³⁵Mangwana mwache adabulusa kobiri zasiliva zakuphatira munthu basa nsiku ziwiri mbazipereka kuna mwenechiro nyumba ya alendo ile. Adapanga mwenechiro nyumbayo mbati, ‘Mumuyang'anire mwadidi. Mungavunga kobiri zinango thangwi ya iye, ndinakubwezerani pakubwerera panga.’ ”

³⁶Yesu adamvunza mfunzisi ule mbati, “Iwembo kupiona kwako, ukunyerezera kuti pa anthu atatuwa adakhala ninga mwanzache wa nyakuphatwa na mapanga ule ngupi?”

³⁷Mfunzisi wa mwambo ule adamtawira mbati, “Ngule adamkomera mtima.” Yesu adampanga mbati, “Na iwe enembo, ndoko kachite chibodzi-bodzi.”

³⁸Pikhali Yesu na anyakufunzache paulendo wawo, adafika m'mudzi unango. Penepo mkazi unango dzinache Marita adamtambira kumsuwo kwache.

³⁹Iye akhali na nanache, dzinache Maria, ule adakhala pansi chifupi na Yesu towera avesere pikhafunzisa iye.

⁴⁰Marita adadungunya na kuinjipa kwa basa yonsene ikhaphata iye ile. Natenepo adadza kuna Yesu mbamvunza mbati, “Mbuya, kadi mukupiona tayu kuti nanayu andilekera basa yonseneyi? Mpangeni andiphedzembo!”

⁴¹Mbuya adampanga mbati, “Marita, Marita, ukuswipa mtima na kusanyika na pinthu pizinji,

⁴²mbwenye chinafunika ntchibodzi chene basi. Maria asankhula chinthu chakufunika, pontho nkhabe dzapokoserwa kuna iye tayu.”