Read cisena LUKA 11 Bible Online

LUKA 11 - cisena bible

LUKA 11

¹Nsiku ibodzi Yesu akhali pambuto inango kupemphera. Pidamala iye, nyakufunza unango adampempha mbati, “Mbuya, tifunzisenimbo kupemphera ninga mudafunzisira Yohani Nyakubatiza anyakufunzache.”

²Yesu adaapanga mbati, “Mungapemphera longani tenepa: ‘Baba, dzinanu yakuchena mbilemedzwe, Ufumu wanu mbudze.

³Tipasenimbo pyakudya pyathu pya nsiku na nsiku.[14]

⁴Tilekereni pyakudawa pyathu, thangwi ifembo timbalekerera anyakutidawira onsene. Pontho lekani tawira kuti tiyeswe na mayesero.’ ”

⁵Yesu adalonga pontho kuna anyakufunzache mbati, “Tisangize mbodzi wa imwe aende kumsuwo wa shamwaliache pachiti-chiti mbakampanga mbati, ‘Shamwali, ndifiyalimbo mikate mitatu.

⁶Shamwalianga adza kumusa kwanga, mbwenye ine nkhabe chakuti ndimdyese tayu.’

⁷Penepo wa m'nyumbayo nkhumtawira mbati, ‘Leka kundinyangula. Ndafunga kale msuwo, pontho ine na ananga tamala gona. Ine nkhabe kwanisa lamuka kuti ndikupase mikateyo tayu.’

⁸Andedi, ndikukupangani kuti penu akhonde lamuka mbampasa mikateyo thangwi ndi shamwaliache, kwache analamuka thangwi ya phinga ya nyakupempha ule, mbampasa pyonsene pinafuna iye.

⁹“Natenepo ndikukupangani kuti pemphani, tenepo munatambira; saka-sakani, tenepo munapigumana; didimizani, tenepo munafungulirwa msuwo.

¹⁰Thangwi munthu onsene anapempha, anati atambire, munthu onsene anasaka-saka, anati apigumane, pontho munthu onsene anadidimiza, anati afungulirwe msuwo.

¹¹Mbani munthu, mwanache angampempha nsomba ambampasa nyoka?

¹²Penu angampempha dzayi, ambampasa kong'a?

¹³Ngakhala imwe anthu akuipa mumbadziwa kupasa ananu pinthu pyadidi, apo Babanu wa Kudzulu ndiye tani? Ayi iye anapichimwana kupereka Mzimu Wakuchena kuna anyakumpempha ale?”

¹⁴Yesu akhadabulusa mzimu wakuipa wakuchitisa munthu kuchimwana kulonga. Pidabuluka mzimu wakuipawo, munthu ule adatoma kulonga, tenepo anthu azinji akhali penepowo adadodoma pyakwanga,

¹⁵mbwenye anthu anango pakati pawo adalonga mbati, “Mphamvu zidabulusa na iye mizimu yakuipa nsakubulukira kuna Belezebule, mfumu wa mizimu yakuipa.”

¹⁶Anthu anango akhafuna pyakumuyesa, tenepo adampanga kuti aonese chidzindikiro chakuti Mulungu ndiye akhadamtuma.

¹⁷Mbwenye Yesu adaadziwa manyerezero awo, mbaapanga mbati, “Ngakhala anthu muufumu anapandukirana, ufumu wenewo umbavungika. Ngakala anthu m'banja anagawikana, banja yeneyo imbafudzika.

¹⁸Ngakhala ufumu wa Satana unagawikana m'magulu, maguluwo mbamenyana okha ene, ufumu wache unaenda tani m'tsogolo? Imwe mwalonga kuti ine ndimbabulusa mizimu yakuipa na mphamvu za Belezebule.

¹⁹Ngakhala mphyakuonadi kuti ine ndimbabulusa mizimu yakuipa na mphamvu za Belezebule, apo anyakuteweranumbo ambabulusa mizimu yakuipa na mphamvu za ani? Natenepo anyakuteweranu onthowo ndiye anakupokanyani kuti mwadawa.

²⁰Nkhabe! Ndikubulusa mizimu yakuipa na mphamvu za Mulungu, kutsikimizira kuti Mulungu akhazikisa kale Ufumu wache pakati panu.

²¹“Munthu wamphamvu zache angaonera pamsuwo pache na pida pyache pyonsene pya nkhondo, pinthu pyache pimbakhala mwadidi.

²²Mbwenye unango wamphamvu zakupiringana iye angadza mbamkunda, anampokosera pida pikhanyindira iyepyo, mbagawa pyaba iyepyo.

²³“Munthu anapokanyisana na ineyo, nee ngwanga tayu; nyakukhonda kundiphedza kugumanyayo, kunachita iyeko nkhumwaza.

²⁴“Mzimu wakuipa ungabuluka muna munthu, umbazungulira-zungulira kunthemba zakusowa madzi kusaka mbuto yakuti upume. Ungakhonda kuigumana mbutoyo umbalonga okha ene kuti, ‘Ndinabwerera pyanga kunyumba kudabulukira ine kule.’

²⁵Tenepo umbabwereradi mbugumana nyumba yatswairwa pontho yamala sasanywa.

²⁶Tenepo umbaenda kakwata mizimu inzache minomwe yakuipa pikulu kupiringana iwo ene mbibwera dzakhala mwenemo. Pakumalisira pache makhaliro a munthuyo ambanyanyiratu kuipa kupiringana pakutoma.”

²⁷Pikhalonga Yesu penepi, mkazi unango pakati pa mwinji ule adakhuwa mbati, “Nyakutsanzaya ndi mkazi adakubalani mbakuyamwisani ule!”

²⁸Mbwenye Yesu adalonga mbati, “Anyanya kutsanzaya mbanthu ale ambava mafala a Mulungu mbachita pinalonga iwo!”

²⁹Pikhainjipa mwinji, Yesu adatoma kulonga mbati, “Anthu a mwaka uno ngakuipa: ambapempha kuona chidzindikiro, kwache hanachipaswa tayu, kupambula cha mprofeti Yona chene chile basi.

³⁰Yona akhali chidzindikiro kuna anthu a kumzinda wa Ninevi, chibodzi-bodzi Mwana Munthu anakhala chidzindikiro cha anthu a mwaka uno.

³¹Pa Nsiku inafuna Mulungu dzatonga anthu mseru, mfumukazi wa kudziko ya Sheba anaimira kupokanya anthu a mwaka uno, thangwi iye adafamba nsinzo ukulu pyakwanga kavesera mafala anzeru a Mfumu Solomoni. Chinchino ndikukupangani kuti pano pana unango wamkulu kupiringana Solomoni.

³²Pa Nsiku inafuna Mulungu dzatonga anthu mseru, anthu a mumzinda wa Ninevi anaimira kupokanya anthu a mwaka uno, thangwi iwo adaleka pyakudawa pyawo pidava iwo kulalika kwa Yona. Chinchino ndikukupangani kuti pano pana unango wamkulu kupiringana Yona.

³³“Nkhabe munthu ambagasa nyale mbaibisa penu kuigudumira na chitomba tayu;[15] m'mbuto mwache iye ambaiikha pakwecha, towera anthu akupita m'nyumbamo aone cheza chache.

³⁴Maso ako akhala ninga nyale ya manungo ako. Maso ako angakhala mwadidi, manungo ako onsene ambakhala na cheza, mbwenye ngakhala maso ako hali mwadidi tayu, manungo ako onsene ambakhala mumdima.

³⁵Onesesani, mphapo, kuti muna cheza m'manungo mwanu, nee mdima tayu.

³⁶Ngakhala manungo ako onsene ana cheza, mbapakhonda khala khundu ibodzi yakukhala mumdima, manungo onsene anagaka khala ninga akumwinikirwa na nyale.”

³⁷Pidamala Yesu kulonga penepi, Mfarisi adamchemera kuti akadye naye kumsuwo kwache. Tenepo Yesu adapita m'nyumba mbakhala pansi kudya.

³⁸Mfarisi adadodoma napyo pidaona iye Yesu kudya okhonda samba m'manja.

³⁹Mbwenye Mbuya adalonga kuna iye mbati, “Imwe Afarisi mumbatsuka kunja kwa khomitcho na palato yanu, mbwenye m'bwalo mwanu mwadzala na nthonga na pyakuipa.

⁴⁰Ndimwe anthu akupupwa! Mulungu nyakusasanya pya kunja ule, ambasasanya pontho na pya m'bwalo mwene.

⁴¹Mbwenye pasani anyakutcherenga pinthu pya m'bwalo mwa khomitcho na palato anu, tenepo pyonsene pina imwe pinacheneswa.

⁴²“Imwe Afarisi muna dzedze, thangwi mumbapereka kuna Mulungu chakhumi cha pimbewu pyakununkhira pontho pyakukomesa miliwo pyanu pya mtundu yonsene, mbwenye nkhabe ikha konta kuchita pyakulungama pontho kumfuna Mulungu tayu. Mwathema kuchita pyonsenepi mbamukhonda siya pinango.

⁴³“Imwe Afarisi muna dzedze, thangwi mumbafuna mipando ya chilemedzo m'nyumba zakupemphereramo, pontho kuti anthu akumwenyikeni na chilemedzo m'misika.

⁴⁴Muna dzedze, thangwi mwakhala ninga nthumbi yakubisika. Anthu akugwanda na penepo nkhabe dziwa kuti akufamba panthumbi tayu.”[16]

⁴⁵Mfunzisi unango wa mwambo adalonga kuna Yesu mbati, “Mfunzisi, pinalonga imwe tenepo, mukushola na ife ene!”

⁴⁶Yesu adatawira mbati, “Imwe maka afunzisi a mwambo, muna dzedze, thangwi mumbathukulisa anthu mitolo yakulemera. Imwe enechiro mbamukhonda kuikhuya na chala chanu chene kuaphedza.

⁴⁷Muna dzedze, thangwi mumbamangira maprofeti adaphiwa na makolo anu akale ale maguwa a masiye.

⁴⁸Penepo mukuonesa kuti mukutawirizana na pidachita makolo anu. Iwo adapha maprofeti, imwembo mudaamangira maguwa.

⁴⁹Ndi thangwi yache Mulungu na nzeru zache adalonga mbati, ‘ndinaatumizira maprofeti na anyakutumwa, mbwenye anthu anapha anango a iwo, anangombo anaasanyisa.’

⁵⁰Natenepo anthu a mwaka uno anatchunyuswa thangwi ya maprofeti onsene adaphiwa kutomera kulengwa kwa dziko yapansi ale,

⁵¹kutomera kuphiwa kwa Abele, kufikirana kuphiwa kwa Zekaria, ule adaphiwa m'Nyumba ya Mulungu pakati pa guwa yansembe na Mbuto Yakuchena. Ande, ndikukupangani kuti anthu a mwaka uno anatchunyuswa thangwi ya pyonsenepi!

⁵²“Muna dzedze, imwe afunzisi a mwambo, thangwi mudabulusa mfungulo wa kunyumba ya nzeru. Imwe enechiro mbamukhonda pitamo, mbamukhondesa akhafuna pya kupitamo ale.”

⁵³Pidabuluka Yesu pambutoyo, afunzisi a mwambo pabodzi na Afarisi adatoma kupokanyana naye mwakuzhangali mbamvunza pya pinthu pizinji.

⁵⁴Akhafuna pya kumtapa m'kanwa.