Read cisena LUKA 13 Bible Online

LUKA 13 - cisena bible

LUKA 13

¹Pandzidzi wenewo pakhali anthu anango, ale adapanga Yesu pya Agalilea adaphiwa na Pilato pikhapereka iwo nsembe kuna Mulungu ale.

²Yesu adaavunza mbati, “Kadi mukunyerezera kuti Agalilea enewo adaphiwa tenepo, thangwi akhali akudawa pikulu kupiringana Agalilea anango onsene?

³Nkhabe, pontho ndikukupangani kuti mungakhonda kuleka pyakudawa pyanu, monsene munati mufembo ninga iwo.

⁴Apo anthumbo khumi na asere ale adafa ku Siloamu pidagwa chinsanja. Kadi mukunyerezera kuti iwo akhali akudawa kupiringana anthu onsene mu Yerusalemu?

⁵Nkhabe, pontho ndikukupangani kuti mungakhonda kuleka pyakudawa pyanu, monsene munati mufembo ninga iwo.”

⁶Yesu adaapanga msangani mbati, “Pidachitwa na munthu unango ule akhali na muti wamkuyu m'munda mwache. Iye adenda kasakamo nsapo, mbwenye hadazigumanemo tayu.

⁷Natenepo adapanga nyakuphata basa m'mundamo mbati, ‘Ngayang'ana papita pyaka pitatu ndikudza kuno dzasaka makuyu m'muti wenewu mbandikhonda kugumanamo na ibodzi ene. Ugwande mutiwu! Unavungiranji mataka?’

⁸Mbwenye nyabasayo adatawira mbati, ‘Mbuya, ulekeni chaka chino chokha. Ndinaukumbira dzenje mwakuzungulira mbandiikhapo ulowa.

⁹Ngakhala chaka chamangwana unabala nsapo, unachita pyadidi, mbwenye ungakhonda bala, dzaugwandeni pyanu.’ ”

¹⁰Pa Nsiku ibodzi Yakupuma Yesu akhafunzisa m'nyumba yakupemphereramo.

¹¹Mwenemo mukhali mkazi unango akhadaphatwa na mzimu wakuipa udamduwaza pyaka khumi na pisere ule. Akhali na msana wakukotama, pontho hakhakwanisa kuyenuka tayu.

¹²Pidamuona Yesu, adamchemera mbampanga mbati, “Mkaziwe, wasudzuka kunyatwa zako.”

¹³Adamsanjika manja, penepo pene adadzongoka mbatoma kukuza Mulungu.

¹⁴Mbwenye mkadamu wa nyumba yakupemphereramo ile adazhangali pidaona iye kuti Yesu awangisa munthu pa Nsiku Yakupuma. Natenepo mkadamuyo adapanga anthu mbati, “Pana nsiku zitanthatu zakuphata basa, natenepo dzani dzawangiswa pansiku zenezi, si pa Nsiku Yakupumayi tayu.”

¹⁵Mbwenye Mbuya adamtawira mbati, “Imwe mfaka-faka, ayi anango a imwe hambafungulira ng'ombe penu bulu wache pa Nsiku Yakupumayi kwenda kammwesa tayu?

¹⁶Yang'anani, mkaziyu wa dzinza ya Abrahamu, ule adamangwa na Satana pyaka khumi na pisere, kadi hadatheme tayu kuti asudzulwe kunyatwa yeneyi pa Nsiku Yakupumayi?”

¹⁷Pidalonga Yesu penepi, anyamalwache onsene adachita manyadzo. Mbwenye anthu anango onsene adakomerwa thangwi ya pinthu pyakudodomesa pikhachita iye.

¹⁸Yesu adavunza mbati, “Ufumu wa Mulungu wakhala ninganji, pontho ndinausangiza nanji?

¹⁹Wakhala ninga mbewu ya chitowe, ile idakwatwa na munthu mbakaibzala m'munda mwache. Idamera mbikula ninga muti. Mbalame zidadza mbizimanga pisa pyawo m'nthambi zache.”

²⁰Yesu adalonga pontho mbati, “Ufumu wa Mulungu ndinausangiza nanji?

²¹Wakhala ninga tenepa. Mkazi ambakwata chakufufumisira mikate mbavungaza na ufa wakudzala ndowa kufikirana mpambo onsenewo ufufume.”

²²Kubuluka penepo Yesu adagwanda na m'maluwani pontho na m'midzi, kufunzisa anthu pikhaenda iye ku Yerusalemu.

²³Anthu anango adavunza Yesu mbati, “Mbuya, kani anthu anafuna dzapulumuswa ndi pang'ono pokha basi?” Yesu adaatawira mbati,

²⁴“Yesa-yesani kupita na pamsuwo wakupapanula, thangwi anthu azinji anayeseradi kuti apite, kwache anapichimwana.

²⁵Mwenechiro nyumba analamuka mbafunga msuwo. Penepo pene imwe anyakuimira panja, munatoma kudidimiza msuwo mbamulonga kuti, ‘Tifungulirenimbo Mbuya.’ Mbwenye iye anakutawirani kuti, ‘Kunabulukira imwe, sinadziwako tayu.’

²⁶Penepo munalonga kuti, ‘Tikhadya na kumwa pabodzi na imwe, pontho mukhafunzisa m'maluwani mwathu.’

²⁷Mbwenye iye analonga pontho kuti, ‘Kunabulukira imwe, ine nkhabe dziwako tayu? Bulukani pano, imwe anthu onsene akuchita pinthu pyakuipa.’

²⁸Penepo munalira na kukikita mano, mungaona Abrahamu, Isake na Yakobo pabodzi na maprofeti onsene mu Ufumu wa Mulungu, mwenemo imwe mwaponywa kunja.

²⁹Anthu anabulukira kumabulukiro na kumadokero dzuwa, kumpoto na kumwera, mbakhala pambuto zawo paphwando mu Ufumu wa Mulungu.

³⁰Natenepo anthu ale ngakumalisira, anakhala akutoma, pontho akutoma ale, anakhala akumalisira.”

³¹Pandzidzi onthowo Afarisi anango adadza kuna Yesu mbampanga mbati, “Bulukani kuno muendembo kwinango, thangwi Herodi anafuna kukuphani.”

³²Yesu adaatawira mbati, “Ndokoni mukaupange, mbinziwu, kuti ‘Ndikubulusa mizimu yakuipa, pontho ndinawangisa atenda lero na mangwana, tenepo pansiku yachitatu ndinamalisa basanga.’

³³Mbwenye ndathema kwenda ulendo wanga lero, mangwana, na nkuchono; hapidatheme kuti mprofeti apherwe kwinango tayu, mbwenye mu Yerusalemu mwene basi.

³⁴“Yerusalemu, Yerusalemu! Iwe umbapha maprofeti, pontho umbaponyera miyala anyamphangwa a Mulungu adakutumira iye ale! Kazinji kene ndapifuna kugumanyisa anthu ako onsene pabodzi ninga mumbaikhira nkhuku anache m'maphaphido mwache, mbwenye iwe hudanditawirisa kuchita tenepo tayu!

³⁵Ngayang'ana, Nyumbako ya Mulungu inasanduka madembe. Ndikukupanga kuti kubulukira ndzidzi uno kwenda m'tsogolo, nee unandionave pontho tayu kufikirana iwe udzalonge kuti, ‘Nyakutsanzaya ngule anadza na dzina ya Mbuya.’ ”