Read cisena LUKA 15 Bible Online

LUKA 15 - cisena bible

LUKA 15

¹Nsiku inango anyamisonkho na anyakudawa anango adadza dzavesera Yesu.

²Penepo Afarisi na afunzisi a mwambo adatoma kudungunya mbati, “Munthu weneyu ambatambira pyache anyakudawa mbadya nawo pabodzi.”

³Tenepo Yesu adaapanga msangani mbati,

⁴“Tisangize unango wa imwe ana mabira dzana, tenepo mbodzi atayika, ambachita tani? Iye ambaasiya mabira anango makumafemba na afemba ale pambuto yakudyeserapo mbaenda kasaka wakutayika ule, kufikirana amgumane.

⁵Angamgumana ambakomerwa pyakwanga mwakuti ambamthukula paphewa pache

⁶mbabwerera naye kumusa. Tenepo ambachemera ashamwali na atsanthembache mbaapanga mbati, ‘Ndakomerwa pyakwanga, thangwi biranga adatayika ule, ndamgumana. Tendeni titsanzaye pabodzi!’

⁷Ndikukupangani kuti ntchibodzi-bodzi; kumbakhala kutsanzaya kukulu kudzulu thangwi ya nyakudawa mbodzi ule analeka pyakudawa pyache kusiyana na anthu makumafemba na afemba akulungama, ale aleka kale pyakudawa pyawo.

⁸“Penu tisangize mkazi ule ana kobiri khumi zasiliva, ibodzi nkhumtayikira, ayi ambachita tani? Ambagasa nyale mbatswaira m'nyumba mwache, mbasaka monsene mwadidi mwene kufikirana aigumane kobiri ile.

⁹Angaigumana, ambachemera ashamwali na atsanthembache pabodzi mbaapanga mbati, ‘Ndakomerwa pyakwanga, thangwi kobiri idatayika ile ndaigumana. Tendeni titsanzaye pabodzi!’

¹⁰Ndikukupangani kuti ntchibodzi-bodzi; angelo a Mulungu ambakomerwa na nyakudawa mbodzi angaleka pyakudawa pyache.”

¹¹Yesu adathimiza kulonga mbati, “Pidachitwa na munthu unango ule akhali na anache achimuna awiri.

¹²Wamng'ono adalonga kuna iye mbati, ‘Baba, ndipaseni khundu yanga ya mfumanuyi.’ Natenepo baba ule adagawa mfuma yache pakati pa anache awiri ale.

¹³Pidagwanda nsiku pang'ono, wamng'ono ule adagulisa khundu ya mfumache mbabuluka pamsuwopo kwenda ulendo na kobiri zachezo. Adenda kudziko yakutali mbakavunga kobiri zache na makhaliro a umambala.

¹⁴Pyonsene pikhali na iye, adapimala. Kubuluka penepo njala yakugoswa idapita m'dziko mule, iye adakhala wakusowa pinthu.

¹⁵Natenepo adenda kaphata basa kuna mzika ibodzi ya m'dziko mule, ule adamtumiza kuzunde kadyesa nkhumba.

¹⁶Mphaleyo adapifuna kukhutisa mimbache na makoko akhadya nkhumba ale, mbwenye munthu wakumpasa chinthu chakuti adye adasowa.

¹⁷Pidatutumuka iye mumtima mwache, adalonga mbati, ‘Anyabasa onsene a baba ana phoso izinji yakudya, inango mbisala pontho, mbwenye ine ndikufa na njala kuno.

¹⁸Ndinati ndilamuke kwenda kuna baba ndikampange kuti, Baba, ndidadawira Mulungu, pontho na imwe ene.

¹⁹Sidatheme kuchemerwa pontho mwananu tayu. Mundiyese pyanga ninga mbodzi wa anyabasanu.’

²⁰Natenepo adalamukadi mbaenda kuna babache. “Mbali pakansinzo na kwawo kudza babache adamuona mbava naye nsisi pikulu. Iye adamthamangira mbamkhumbatira, tenepo adampsompsona.

²¹Mwana ule adalonga kuna babache mbati, ‘Baba, ndadawira Mulungu, pontho na imwe ene. Sidathemeve kuchemerwa mwananu tayu.’

²²Mbwenye baba ule adachemera anyabasache mbalonga mbati, ‘Chimbizani! Kakwateni mkhanjo wadidi makawo mumvazike. Mumvazike mphete m'chala mwache na nsapato kumanyalo kwache.

²³Kakwateni mwanamphulu wakunenepayo mumphe kuti tidye na kusekera.

²⁴Thangwi mwanangayu akhadafa, mbwenye chinchino ana moyo; akhadatayika, mbwenye chinchino agumanwa!’ Natenepo phwando idagundika.

²⁵“Pandzidzi wenewu mwana wamkulu akhali kumunda. Pidafika iye chifupi na nyumba kubuluka kumundako, adava kuimba na kuvina.

²⁶Natenepo adachemera mbodzi wa anyabasa ale mbamvunza mbati, ‘Kwagwanji kani?’

²⁷Nyabasa ule adamtawira mbati, ‘Mbaleako abwera, tenepo babako apha mwanamphulu wakunenepa thangwi amtambira wamoyo.’

²⁸“Mwana wamkulu ule adazhangali pyakwanga mwakuti adakhonda kapita m'nyumba mule. Natenepo babache ule adabuluka m'nyumba mule mbamdembetera kuti apite,

²⁹mbwenye adamtawira babache ule mbati, ‘Ngayang'anani pyaka pyonsenepi pyakuphatirani ine basa ninga bitchu, mbandivera matongero anu ndzidzi onsene. Apo mwandipasanjimbo? Nee na mbuzi ene kuti ndichitembo phwando na ashamwali anga, nkhabe!

³⁰Mwananuyu adavunga mfumanu yonsene na maputa, mbwenye pyabwerera iye kumusa mwamphera mwanamphulu wakunenepa.’

³¹Baba ule adamtawira mbati, ‘Mwananga, iwe una ine ndzidzi onsene, pontho pyanga pyonsene mphyako.

³²Tathema kukomerwa na kutsanzaya, thangwi mbaleakoyu akhadafa, mbwenye chinchino ana moyo; akhadatayika, mbwenye chinchino agumanwa.’ ”