Read cisena LUKA 16 Bible Online

LUKA 16 - cisena bible

LUKA 16

¹Yesu adalonga kuna anyakufunzache mbati, “Pidachitwa na munthu unango wakufuma, ule akhali na mkadamu wakufambisa mfumache. Munthu wakufuma ule adapangwa kuti mkadamu ule akhavunga mfumache ile.

²Tenepo munthu wakufuma ule adamchemera mkadamu ule mbamvunza mbati, ‘Pinava ine pya iwe mphyanji? Ndilembere pyonsene pyaphata iwe, thangwi hunakwanisave kukhala mkadamu wa pinthu pyanga tayu!’

³Mkadamu ule adalonga mumtima mwache mbati, ‘Mbuyanga anati andibuluse basa. Ndinachita tani? Ine nkhabe mphamvu zakulima nazo, pontho kupemphesa ndimbachita nako manyadzo.

⁴Chinchino ndapidziwa! Ndinachita chinthu chinango, towera anthu anditambire m'misa mwawo basanga ingamala.’

⁵“Natenepo adachemera anyamangawa a mbuyache mbodzi na mbodzi. Wakutoma adamvunza mbati, ‘Wafiyali pyakuinjipa tani kuna mbuyanga?’

⁶Iye adalonga mbati, ‘Nkhali dzana za mafuta.’ Mkadamu ule adampanga munthu ule mbati, ‘Kalata idalembwa mangawako njishi, khala pansi ulembepo makumashanu.’

⁷Kubuluka penepo adavunza pontho unango mbati, ‘Iwembo wafiyali pyakuinjipa tani?’ Iye adamtawira mbati, ‘Masakha chikwi chibodzi a mapira.’ Mkadamu adampanga munthu ule mbati, ‘Kalata idalembwa mangawako njishi, khala pansi ulembepo madzana masere.’

⁸“Natenepo mbuyache wa mkadamu wakunama ule adamsimba thangwi ya kuchenjera kwache. Thangwi anthu a padziko yapansi pano ngakuchenjera pakuchita pinthu pyawo kupiringana anthu akukhala m'cheza.”

⁹Yesu adathimiza kulonga mbati, “Ndikukupangani kuti mupisakire mwekha ene ushamwali pakuphatisa basa mfuma ya dziko yapansi pano, towera mfumayo ingakumalirani, mutambirwe kumusa kwakukhala na kukhala.

¹⁰Nyakukhulupirika papinthu pyakuchepa, anakhulupirika pontho papinthu pikulu; wakunama papinthu pyakuchepa, ananama pontho papinthu pikulu.

¹¹Apo ngakhala hamudakhulupirike pamfuma ya dziko yapansi panoyi tayu, mbani anafuna dzakukhulupirani na mfuma chadi-chadi.

¹²Ngakhala hamunakhulupirika na mfuma ya munthu unango tayu, mbani anafuna dzakupasani pyanumbo?

¹³“Nkhabe nyabasa anakwanisa kutumikira ambuya awiri tayu, thangwi anazonda mbodzi mbafuna unangoyo; anakhulupirika kuna mbodzi mbalulupisa unangoyo. Imwe nkhabe kwanisa kutumikira Mulungu na ndzidzi onthowo kutumikira kobiri tayu.”

¹⁴Pidava Afarisi pyonsenepi, adasedegula Yesu, thangwi iwo akhali anthu akuikha mtima pakobiri.

¹⁵Yesu adalonga kuna iwo mbati, “Imwe mumbapiyesa akulungama pamaso pa anthu, mbwenye Mulungu ambadziwa mitimanu. Thangwi pinthu pimbayesa anthu kuti mphyauvololo pyakwanga pile, mphyakusowa basa pamaso pa Mulungu.

¹⁶“Mwambo wa Mose na mabukhu a maprofeti akhali na utongi basi kufikirana ndzidzi wa Yohani Nyakubatiza. Kutomera penepo Mphangwa Zadidi za Ufumu wa Mulungu zikulalikwa, tenepo anthu onsene akupikhakhamiza kuti aupite.

¹⁷Ntchapafupi kuti thambo na dziko yapansi pimale kusiyana nakuti kalemba kang'ono-ng'ono ka mwambo kamale mphamvu.

¹⁸“Mamuna angamwalana na mkazache mbasemba mkazi unango, achitira uputa mkazache wakutomayo. Pontho mamuna wakusemba mkazi wakulekwayo, achitambo uputa.

¹⁹“Pidachitwa na munthu unango wakufuma, ule akhavala nguwo zakudula pyakwanga mbadyerera nsiku zonsene.

²⁰Pakhali pontho munthu wakutcherenga dzinache Lazaro, ule akhaikhwa na anthu pamsuwo wa nyumba ya munthu wakufuma ule. Manungo ache onsene akhali na pironda.

²¹Iye akhadikhira kuti adye mambwera-mbwera akhagwa pathebulu ya nyakufuma ule. Na anambwa enembo akhadza mbamnyanguta pironda pyache.

²²“Ndzidzi udafika, nyakutcherenga ule adafa. Angelo adamthukula mbakamtula kudzulu kukhundu ya Abrahamu. Nyakufuma ule adafambo mbaikhwa m'masiye.

²³Pikhali iye kusanyika kudziko ya anthu akufa,[20] adayang'ana kudzulu mbaona Abrahamu kutali pabodzi na Lazaro kukhundu kwache.

²⁴Tenepo adakhuwa mbati, ‘Baba Abrahamu, ndiverenimbo nsisi ine! Tumani Lazaro avike nsonga ya chala chache m'madzi kuti atontholese lulume yanga, thangwi ndikusanyika pyakwanga m'moto muno!’

²⁵“Mbwenye Abrahamu adalonga mbati, ‘Mwananga, kumbuka kuti udatambiriratu pinthu pyadidi pikhali iwe na moyo, mwenemo Lazaro akhaona nyatwa. Mbwenye lero akutsanzayambo kuno, iwembo ukuva kupha.

²⁶Mbwenye si pyokhapyo tayu, pakati pa ife na iwe pana Chiphompho chikulu mwakuti anyakufuna kubuluka kuno kudza kuna imweko nkhabe kupikwanisa tayu. Pontho nkhabe unango anakwanisa kuwambukira kuna ife kuno kubulukira kweneko tayu!’

²⁷Nyakufuma ule adalonga mbati, ‘Ndaphata miyendo, Baba Abrahamu, tumani Lazaro kumusa kwa babanga.

²⁸Kweneko ndina abale anga ashanu. Mbaende kaacheuze, gopesera anadzambo kumbuto ya nyatwa ino.’

²⁹“Mbwenye Abrahamu adalonga mbati, ‘Kweneko kuna mabukhu a Mose na a maprofeti; mbave pinalonga mabukhuwo.’

³⁰Nyakufuma ule adalonga mbati, ‘Tayu, Baba Abrahamu! Penepyo hapidakwane tayu, mbwenye unango angalamuka kuimfa mbaenda kuna iwo, penepo analeka pyakudawa pyawo.’

³¹Mbwenye Abrahamu adampanga mbati, ‘Ngakhala iwo anakhonda vera Mose na maprofeti, hanakwanisikave tayu podi kwene kuti munthu achite kulamuka pyache kuimfa.’ ”