Read cisena LUKA 17 Bible Online

LUKA 17 - cisena bible

LUKA 17

¹Yesu adapanga anyakufunzache mbati, “Pinthu pyakudawisa anthu hapinakhonda kudza tayu, pinati pidze, mbwenye dzedze kuna munthu anadza na pyakudawisa anthuyo.

²Mbapidakhala pyadidi kuti munthu weneyo amangirirwe libwe ikulu m'khosi mwache mbaponywa m'nyanza, kusiyana nakuti adawise mbodzi wa anawa.

³Natenepo khalani m'maso na pinachita imwe! “Mbaleako angadawa, msumulule, iye angatchunyuka, mlekerere.

⁴Ngakhala pansiku ibodzi iye anakudawira kanomwe, pontho ndzidzi onsene unakudawira iye, ambalonga kuna iwe kuti, ‘Ndatchunyuka,’ mlekerere.”

⁵Anyakutumwa adapanga Mbuya mbati, “Kulisani chikhulupiro chathu!”

⁶Mbuya adatawira mbati, “Mbamudakhala na chikhulupiro podi kwene chakuchepa ninga mbewu ya chitowe, mbamudapanga muti wanyongolowu kuti, ‘Dulika mbukabzale m'nyanza!’ Iwo mbudakuveranidi!

⁷“Tisangize ngakhala unango wa imwe na nyabasache wakulima kumunda penu wakudyesa mabira, angabwera kubasako, ayi ambampanga kuti, ‘Chimbiza dzakhale pansi kuti udye’?

⁸Nkhabe, hangachite tenepo tayu, mbwenye ambampanga mbati, ‘Ndisasanyire kudya, pontho sasanyika kundifiliviri pandzidzi unadya na kumwa ine. Ndingamala unakwanisambo kudya.’

⁹Ayi anapereka takhuta kuna nyabasayo thangwi aphata pidapangwa iye?

¹⁰Natenepo na imwe enembo, mungaphata pyonsene pidapangwa imwe, mulonge kuti, ‘Ndife anyabasa ene pyathu; taphata kwene pidathema ife kuphata.’ ”

¹¹Paulendo wa Yesu wakwenda ku Yerusalemu, adafamba na m'madire a Samaria na Galilea.

¹²Pikhapita iye m'mudzi unango, adagumanikana na anyamatanya khumi. Iwo adaimira kutali

¹³mbachemera mwakugaluza fala mbati, “Yesu, Mbuya, tiverenimbo nsisi!”

¹⁴Pidaaona Yesu, adaapanga mbati, “Ndokoni kuna anyansembe akakuoneni.” Iwo mbali kwenda, adachena.[21]

¹⁵Pidaona mbodzi wa iwo kuti awanga, adabwerera mbakuza Mulungu mwakugaluza fala.

¹⁶Iye adapiponya pamanyalo a Yesu mbapereka takhuta kuna iye. Munthu weneyu akhali Msamaria.

¹⁷Yesu adalonga mbati, “Anthu akucheneswa akhalipo khumi; anango afemba ale ali kupi?

¹⁸Thangwi yache njanji abwerera dzapereka takhuta kuna Mulungu ndi mlendo eneyu basi?”

¹⁹Tenepo Yesu adalonga kuna iye mbati, “Lamuka uende. Chikhulupiro chako chakuwangisa.”

²⁰Afarisi anango adavunza Yesu mbati, “Mulungu anakhazikisa lini Ufumu wache padziko yapansi?” Yesu adaatawira mbati, “Mulungu hanakhazikisa Ufumu wache mwakuoneka na maso tayu.

²¹Nkhabe mbodzi analonga kuti, ‘Ngayang'anani, Ufumu wa Mulungu uli pano,’ penu, ‘Uwo uli ukowo!’ Thangwi Ufumu wa Mulungu uli muna imwe.”[22]

²²Tenepo Yesu adalonga kuna anyakufunzache mbati, “Ndzidzi unafika wakuti munafuna kuona ibodzi mwa nsiku ya kudza kwa Mwana Munthu, mbwenye nee munaiona tayu.

²³Panakhala anthu ale analonga kuna imwe kuti, ‘Ali pano!’ penu, ‘Ali uko!’ Lekani dzaathamangira.

²⁴Thangwi Mwana Munthu angabwera pansiku yeneyo anakhala ninga ching'ani-ng'ani chile chimbang'anima na kuonesa cheza kubulukira khundu kufikirana khundu inango ya thambo.

²⁵Mbwenye chakutoma athema kusanyika pizinji mbakhondwa na mfendu uno.

²⁶Mwana Munthu mbadzati kudza nsiku zinakhala ninga mudakhalira ipyo nsiku za Nowa.

²⁷Anthu akhadya, kumwa, na kusembana kufikirana nsiku idapita Nowa m'chimwadiya. Tenepo, madzi adadzala, anthu onsenewo adavungika.

²⁸Pikhali chibodzi-bodzi nsiku za Loti. Anthu akhadya na kumwa, kugula na kugulisa, kubzala na kumanga.

²⁹Pansiku idabuluka Loti kumzinda wa Sodomu, Mulungu adagwisa moto na miyala yakugaka ya sulufule kubulukira kudzulu mbaavunga onsene ale.

³⁰Pinakhala tenepo pansiku yakuoneka kwa Mwana Munthu.

³¹“Pansiku yeneyo mamuna ule ali pansoyi mbaleke kutchitha mbakapita m'nyumba mwache kakwata pinthu pyache tayu. Chibodzi-bodzi kuna munthu wakukhala m'munda mwache, aleke bwerera kumusa kwache tayu.

³²Kumbukani pya mkazi wa Loti!

³³Munthu wakufuna kupulumusa moyo wache anautaya; mbwenye nyakuutayayo anaupulumusa.

³⁴Ndikukupangani kuti mosiku wenewo panakhala anthu awiri kugona patalimba ibodzi: mbodzi anakwatwa, unangoyo anasiyiwa.

³⁵Panakhala akazi awiri kupeya mapira palibwe pabodzi: mbodzi anakwatwa, unangoyo anasiyiwa.”[23]

³⁷Anyakufunzache adamvunza mbati, “Mbuya, penepi pinachitikira kupi?” Yesu adalonga mbati, “Konsene kuna chinthu chakufa, malezi anagumanyikana konthoko.”