Read cisena LUKA 18 Bible Online

LUKA 18 - cisena bible

LUKA 18

¹Tenepo Yesu adalonga msangani kuna anyakufunzache kuafunzisa kuti apemphere ndzidzi onsene mbakhonda taya mtima.

²Iye adalonga mbati, “Muluwani inango mukhali nyakutonga miseru wakukhonda gopa Mulungu pontho wakukhonda tsalakana pinalonga munthu.

³Muluwani ibodzi-bodziyo mukhali mamfelwa wamkazi ule akhabwera-bwera kuna mtongi dzambulumundira mbati, ‘Nditongerenimbo mseru uli pakati pa ine na mwanzanga.’

⁴Ndzidzi ukulu ene mtongiyi akhakhonda kutonga mseruwo, mbwenye pakumalisira pache adanyerezera yekha ene mumtima mwache mbati, ‘Podi kwene kuti ine nkhabe gopa Mulungu penu tsalakana anthu tayu, kwache

⁵na thangwi yakuti mamfelwayu akundinyangula, ndinati nditonge mseru wache, gopesera anandinyangula na kubwera-bwera kwacheku!’ ”

⁶Mbuya adathimiza kulonga mbati, “Ngavani mafala alonga mtongi okhonda lungamayu.

⁷Ayi Mulungu hanatonga mseru mwadidi tayu anthu ache akumulirira mosiku na masikati? Ayi anadembuka kuaphedza?

⁸Ndikukupangani kuti anatonga mseru mwakuakomera mbapichita mwakuchimbiza. Apo Mwana Munthumbo angabwera, ayi anagumana anthu ana chikhulupiro muna iye padziko yapansi pano?”

⁹Yesu adalonga pontho msangani unango kuna anthu akhapithemba kuti ngakulungama mbaipisa anzawo onsene ale. Iye adalonga mbati,

¹⁰“Pidachitwa na amuna anango awiri ale adenda ku Nyumba ya Mulungu kapemphera. Mbodzi akhali Mfarisi, unangombo akhali nyamisonkho.

¹¹“Mfarisi adaimira pambuto ya yekha ene mbapemphera[24] mbati, ‘Mulungu, ndinapereka takhuta, thangwi si ine nyamtima, nyakunama, penu puta ninga anango onsenewa tayu. Ndinapereka takhuta nakuti sidakhale ninga nyamisonkho ali apo ule tayu.

¹²Ndimbapimana kudya nsiku ziwiri padimingu mbandipereka chakhumi cha pinthu pimbatambira ine pyonsene.’

¹³“Mbwenye nyamisonkho adaimira kwachembo. Iye adakhonda na kuyenusa kwene msolo wache kudzulu, mbwenye adamenya pagangafuwa pache na kutsukwala mbalonga mbati, ‘Mulungu, ndiverenimbo nsisi. Ndine nyakudawa.’ ”

¹⁴Yesu adalonga mbati, “Ndikukupangani kuti nyakukhomesa msonkho ule adenda kumusa kwache wakulungama pamaso pa Mulungu, si Mfarisi ule tayu. Thangwi onsene anapikuza okha ene anachepeswa, pontho onsene anapichepesa okha ene anakuzwa.”

¹⁵Anthu anango adadza na anawo kuna Yesu, towera iye aasanjike manja. Anyakufunza adaona mbaalongera thangwi ya kuchita penepi.

¹⁶Mbwenye Yesu adachemerera ana ale kuna iye mbalonga mbati, “Alekeni ana adze kuna ine, pontho lekani kuakhondesa, thangwi Ufumu wa Mulungu ngwa anthu akukhala ninga anawa.

¹⁷Ndikukupangani pyakuonadi kuti anakhonda tambira Ufumu wa Mulungu ninga kamwana, hanaupita na pang'ono pene tayu.”

¹⁸Mkadamu unango wa Chiyuda adavunza Yesu mbati, “Mfunzisi wadidi, ndinachita tani kuti nditambire moyo okhonda mala?”

¹⁹Yesu adamvunza mbati, “Unandithuliranji wadidi? Nkhabe mbodzi wadidi tayu, mbwenye Mulungu ene basi.

²⁰Ukuadziwa matongero akuti, ‘Leka chita uputa, leka kupha, leka kuba, leka pambizira mwanzako, lemedza babako na mako.’ ”

²¹Munthu ule adamtawira mbati, “Kutomera uwananga, ndateweza matongero onsenewa.”

²²Pidava Yesu penepi, adampanga mbati, “Pasala chinthu chinango chibodzi chakuti uchite. Kagulise pyonsene pina iwe mbukapereke kobirizo kuna anyakutcherenga. Iwe unakhala na mfuma kudzulu; tenepo udze unditewere.”

²³Mbwenye pidava munthu ule penepi, adatsukwala pyakwanga, thangwi iye akhali wakufuma pyakwanga.

²⁴Yesu adapiona kuti iye adatsukwala mbalonga mbati, “Mphyakunensa pyakwanga kuna anthu akufuma kupita mu Ufumu wa Mulungu!

²⁵Mphyakunensadi pyakwanga kuna munthu wakufuma kupita mu Ufumu wa Mulungu kusiyana na ng'ombe kupita pabenga ya nsingano.”

²⁶Anyakumvesera ale adavunza mbati, “Mbani, mphapo, anakwanisa dzapulumuka?”

²⁷Yesu adatawira mbati, “Chakuchimwanika na munthu chimbakwanisika na Mulungu.”

²⁸Tenepo Peturo adalonga mbati, “Ngayang'anani, ife tasiya pyonsene pikhali na ife kutewera imwe.”

²⁹Yesu adalonga kuna iwo mbati, “Ande, ndikukupangani pyakuonadi kuti munthu anasiya msuwo wache, penu mkazache, penu abale ache, penu makolo ache, penu ana thangwi ya Ufumu wa Mulungu,

³⁰anatambira pizinji pandzidzi uno, pontho na moyo okhonda mala ndzidzi unafuna kudza.”

³¹Yesu adenda na anyakufunza khumi na awiri ale pakhundu mbalonga kuna iwo mbati, “Ngavani kuno, tikwenda ku Yerusalemu, kule kunafuna kakwana-kwana pyonsene pidalemba maprofeti pya Mwana Munthu.

³²Iye anakaperekwa kuna anthu okhonda khala Ayuda, ale anamselusa, kumtikana, na kumphulira mata.

³³Anamkwapula mbampha, mbwenye pangagwanda nsiku zitatu analamuka kuimfa mbakhala pontho na moyo.”

³⁴Mbwenye anyakufunza ale hadavese na chibodzi chene cha pinthu penepi tayu. Mafala adalonga iyewo akhali akuzimbaisa kuna iwo; iwo hadadziwe tayu kuti Yesu akhafuna kulonganji.

³⁵Pikhafika Yesu chifupi na mzinda wa Yeriko, pakhali boli-boli ule akhakhala m'khundu mwa njira kupemphesa.

³⁶Pidava iye mwinji ukugwanda, adavunza mbati, “Kunanji?”

³⁷Anthu ale adampanga mbati, “Yesu wa ku Nazareti akugwanda.”

³⁸Iye adachemera mwakugaluza fala mbati, “Yesu, Mwana Davite, ndiverenimbo nsisi!”

³⁹Anthu akutsogolo kule adamkalapira mbampanga kuti amatame. Mbwenye iye adanyanyiratu kukhuwa pyakwanga pene mbati, “Mwana Davite, ndiverenimbo nsisi!”

⁴⁰Tenepo Yesu adaimira mbaapanga kuti adze na boli-boli ule kuna iye. Pidadza iye chifupi, Yesu adamvunza mbati,

⁴¹“Unafuna ndikuchitirenji?” Iye adatawira mbati, “Mbuya, ndinafuna ndione.”

⁴²Yesu adampanga mbati, “Onatu, mphapo! Chikhulupiro chako chakuwangisa.”

⁴³Kabodzi kene boli-boli ule adakwanisa kuona, tenepo adatewera Yesu mbapereka takhuta kuna Mulungu. Pidaona mwinji onsene penepi, udakuza Mulungu.