Read cisena LUKA 19 Bible Online

LUKA 19 - cisena bible

LUKA 19

¹Yesu adapita mu Yeriko. Iye akhagwanda kwene pyache.

²Kweneko kukhali mkadamu wa anyamisonkho, pontho wakufuma, dzinache Zakeo.

³Iye akhafuna kuona Yesu ngupi. Mbwenye Zakeo akhali wakuvila, tenepo adapichimwana kuti aone Yesu thangwi ya mwinji.

⁴Natenepo adathamanga patsogolo mbakwira m'muti wamkuyu towera aone Yesu ule akhagwanda na njira yeneyo.

⁵Pidafika Yesu pambutopo, adayang'ana m'dzulu mbalonga kuna Zakeo mbati, “Zakeo, chimbiza, tchitha, thangwi lero ndathema kakhala kumsuwo kwako.”

⁶Zakeo adachimbiza kutchitha mbatambira Yesu kumsuwo kwache na kukomerwa kukulu.

⁷Anthu onsene adapiona ale adatoma kudungunya mbati, “Munthuyu aenda kakhala mlendo kumsuwo kwa nyakudawayu.”

⁸Zakeo adaimira mbalonga kuna Mbuya mbati, “Ngavani, Mbuya, ndinagwanda kati na kati pinthu pina ine mbandipereka khundu ibodzi kuna anyakutcherenga. Ngakhala ndabera munthu ndinambwezera kanayi kuinjipa kwache.”

⁹Yesu adampanga mbati, “Chipulumuso chafika m'nyumba muno lero, thangwi munthuyumbo ngwa dzinza ya Abrahamu.

¹⁰Mwana Munthu adadzera dzasaka-saka na kupulumusa anyakutayika.”

¹¹Pikhavesera anthu penepi, Yesu adathimiza kuapanga msangani. Penepa Yesu akhali chifupi na Yerusalemu, tenepo anthu ale akhanyerezera kuti Ufumu wa Mulungu ukhali chifupiletu kudza.

¹²Iye adalonga mbati, “Pidachitwa na munthu unango wakuveka ule akhafuna kubulukapo kwenda kudziko yakutali kuti akapitiswe ufumu mbanyerezera pyakubwerera kwawo angamala kwizwa ufumuwo.

¹³Mbadzati lamuka ulendo wache, iye adachemera anyabasache khumi mbaapasa kada munthu kobiri za siliva mbaapanga mbati, ‘Ndinafuna ndione ninga munakwanisa kuzithimizira mwenemo ine nkhabepo.’

¹⁴Mbwenye mzika zinzache zidamzonda, tenepo adatuma anthu na mphangwa kalonga kukhaenda iyeko mbati, ‘Ife nkhabe kufuna munthu weneyu kuti akhale mfumu wathu.’

¹⁵“Kwache munthu ule adapitiswa ufumu mbabwerera. Kabodzi kene adachemera anyabasache akhadapasa iye kobiri ale kuti adze kuna iye, towera aone kuti iwo adaganyali nazo kobiri zingasi.

¹⁶Wakutoma adadza mbalonga mbati, ‘Mbuya, kobiri zidandipasa imwe zile ndaganyali nazo kakhumi.’

¹⁷Weneyo adampanga mbati, ‘Wachita pyadidi. Ndiwe nyabasa wadidi. Ndinakupasa utongi pamizinda khumi, thangwi wakhulupirika papinthu ping'onopi.’

¹⁸Wachiwiri adadza mbalonga mbati, ‘Mbuya, kobiri zidandipasa imwe zile ndaganyali nazo kashanu.’

¹⁹Weneyo adampanga mbati, ‘Ndinakupasa utongi pamizinda mishanu.’

²⁰“Nyabasa unango adadza mbalonga mbati, ‘Mbuya, kobiri zidandipasa imwe zile nsizi. Ndidazikoya pamcheka pakubisika.

²¹Ndikhagopa, thangwi ndimwe munthu wakuuma mtima. Imwe mumbakwata pinthu pyakukhonda khala pyanu, pontho mumbavuna pidakhonda imwe bzala.’

²²Mwenechiro kobiri ule adalonga kuna iye mbati, ‘Nyabasa wakuipawe, wakonwa na mafalako onthowo. Ukhapidziwa kuti ndine munthu wakuuma mtima wakukwata pinthu pyakukhonda khala pyanga mbandivuna pidakhonda bzala ine.

²³Udakhonderanji mphapo kazikoyesa kobiri zanga kuna anyakukoya kobiri? Mbudachita tenepo mbandidazitambira na kobiri zinango zakuthimizirapo.’

²⁴“Tenepo adalonga kuna anthu adaimira penepo ale mbati, ‘Mpokosereni kobiri zina iye mupase nyabasa aganyali kakhumi ule.’

²⁵Mbwenye anthu ale adalonga kuna iye mbati, ‘Mbuya, weneyu ali nazo kale kakhumi.’

²⁶Iye adaatawira mbati, ‘Ndikukupangani kuti anyakukhala na pinthu kale anapaswa pizinji pene, mbwenye munthu wakupisowa, anapokoserwa na ping'ono-ng'ono pene pina iye.

²⁷Mbwenye anyakundizonda, adandikhonda kuti ndikhale mfumu wawo ale, bwerani nawo kuno muaphe ine ndikuona.’ ”

²⁸Pikhadalonga Yesu penepi, adapita patsogolo pawo kwenda ku Yerusalemu.

²⁹Pidafika iye m'midzi ya Betifage na Betania chifupi na phiri ya Olivi, adatuma anyakufunzache awiri

³⁰mbaapanga mbati, “Ndokoni m'mudzi uli patsogolo panuwo; pinapita imwe munagumana mwanabulu amangirirwa, ule chipo adzati pakirwa tayu. Kamsudzuleni mubwere naye kuno.

³¹Ngakhala munthu anakuvunzani kuti mwatani munamsudzula, kampangeni kuti Mbuya[25] ali naye basa.”

³²Anyakufunza awiri ale adenda mbakapigumanadi ninga mudaapangira Yesu.

³³Pikhasudzula iwo mwanabulu ule, enechiro adaavunza mbati, “Munasudzuliranji buluyu?”

³⁴Iwo adalonga mbati, “Mbuya ali naye basa.”

³⁵Adamkwata mbaenda naye kuna Yesu, mbathasika pyakufinika pyawo pamsana pa buluyo, mbapakizapo Yesu.

³⁶Pikhaenda Yesu pabulu pale, anthu adathasika pyakufinika pyawo m'njira.

³⁷Pikhafika iye chifupi na Yerusalemu, panjira yakutchithira phiri ya Olivi, mwinji ukulu wa anyakufunzache udagundika kukomerwa. Adagaluza fala kulemedza Mulungu, thangwi ya pyakudodomesa pikhadaona iwo mbati,

³⁸“Mulungu mbatsanzayise mfumu anadza na dzina ya Mbuya! Mtendere mbukhale kudzulu, pontho kuna Mulungu kukhale demelero!”

³⁹Tenepo Afarisi anango m'mwinjimo adalonga kuna Yesu mbati, “Mfunzisi, pangani anyakufunzanu amatame.”

⁴⁰Yesu adaapanga mbati, “Ndikukupangani kuti enewa angamatama, inafuna khuwa ndi miyalayi.”

⁴¹Yesu adafika chifupi na Yerusalemu, tenepo adalira thangwi ya mzinda wenewu.

⁴²Iye adalonga mbati, “Sha! Mbudapidziwa kwene lero pinthu pyakudzesa mtendere. Mbwenye lero maso ako nkhabe kwanisa kupiona tayu.

⁴³Ndzidzi unafika unafuna dzakuzungulira anyakukuzonda. Iwo analekesa anthu kubuluka na kupita kwene mumzindamo mbakumenya kukhundu zonsene.

⁴⁴Iwo anakuvungiratu mbapha anthu onsene anakhala muna iwe. Iwo anagomola mafufu onsene; nkhabe mwala unasalira padzulu pa unzache tayu. Pinakhala tenepo thangwi iwe hudadzindikire tayu ndzidzi udadza Mulungu dzakupulumusa.”

⁴⁵Tenepo Yesu adapita muchintalo cha Nyumba ya Mulungu mbatoma kubulusa anthu akhachitiramo malonda ale.

⁴⁶Iye adalonga mbati, “Pyalembwa m'Malemba kuti, ‘Nyumbanga inakhala nyumba yakupemphereramo.’ Mbwenye imwe mwaisandusa nyumba yakubisaliramo mbava.”

⁴⁷Yesu akhafunzisa m'Nyumba ya Mulungu nsiku na nsiku. Anyansembe akulu, afunzisi a mwambo pabodzi na akadamu a Chiyuda akhafuna kuti amphe,

⁴⁸kwache njira yakumphera hadaione tayu, thangwi anthu onsene akhathimiza kuvesera mafalache na mtima onsene.