Read cisena LUKA 2 Bible Online

LUKA 2 - cisena bible

LUKA 2

¹Pansiku zenezo Agusto,[2] Mfumu wa Roma, adatonga kuti anthu onsene a m'madziko akutongwa na iye alembwe.

²Kalembera wakutomayi adachitika pikhali Kirenio mkulu wa boma wa dziko ya Siria.

³Natenepo anthu onsene adenda kalembesa kumaluwani a kwawo.

⁴Yosefe adenda kuluwani ya Betelehemu ku Yudea, mbuto idabalwa mfumu Davite ile, kubulukira kuluwani ya Nazareti ku Galilea. Yosefe adenda kweneko, thangwi akhali chidzukulu cha Davite.

⁵Adenda kalembesa pabodzi na Maria akhadaverana na iye pya banja ule. Mkaziyu akhali na mimba,

⁶tenepo pikhali iwo m'Betelehemu, ndzidzi wakuti iye abale udakwana.

⁷Adabala mwanache wamamuna wautombo. Adamfinikiza nguwo mbamgonesa m'chakudyera ng'ombe, thangwi iwo adasowa mbuto m'nyumba yakugona alendo.

⁸Kukhundu yeneyo ya dziko kukhali amakabuswa akuonera mabirawo na mosiku kutsanga.

⁹Mngelo wa Mbuya adaaonekera, tenepo demelero ya Mbuya idaamwinikira. Iwo adagoswerwa pyakwanga,

¹⁰mbwenye mngelo adalonga kuna iwo mbati, “Lekani goswerwa! Ndadza dzakupangani mphangwa zadidi zakudzesa kutsanzaya kukulu kuna anthu onsene.

¹¹Mosiku uno pano m'mudzi wa Davite mwabalwa Nyankhombo wanu wakuchemerwa Khristu, Mbuya!

¹²Chidzindikiro chache ntchichi, munakagumana kachiya agoneswa m'chakudyera ng'ombe wakufinikizwa nguwo.”

¹³Vumbu-vumbu padaoneka gulu ikulu ya angelo anango a kudzulu pabodzi na mngeloyo. Iwo akhalemedza Mulungu na nyimbo uku akulonga mbati,

¹⁴“Demelero mbikhale kuna Mulungu kudzulu-dzulu, pontho mtendere pansi pano kuna anthu ale Mulungu ambakomerwa nawo!”

¹⁵Pidabuluka angelo kwenda kudzulu, amakabuswa adalonga kuna unango na mwanzache mbati, “Tendeni ku Betelehemu tikaone pinthu pyachitikapi, pyapangwa ife na Mbuyapi.”

¹⁶Natenepo adachimbiza kwenda mbakagumana Maria na Yosefe mbaona pontho kachiya agona m'chakudyera ng'ombe.

¹⁷Pidamuona amakabuswawo, iwo adaapanga pidalonga mngelo ule pya mwanayo.

¹⁸Anthu onsene adava pidalonga amakabuswa ale, adadodoma napyo.

¹⁹Maria adakoya pinthu pyonsenepyo mumtima mwache mbapinyerezera pikulu.

²⁰Amakabuswa adabwerera na kuimba nyimbo zakulemedza nazo Mulungu thangwi ya pinthu pidaona na kuva iwo. Pidachitikadi ninga mudaapangira mngelo ule.

²¹Pansiku yachisere pidabalwa iye, nsiku yakuti kachiyayo agwandwe nsonga yachimuna chache, adathulwa Yesu. Ikhali dzina ikhadapaswa iye na mngelo, mache mbadzati kwata mimba.

²²Ndzidzi udakwana wakuti Yosefe na Maria achite mtemo wakupichenesa kuteweza mwambo wa Mose. Natenepo adakwata kachiyayo mbaenda naye ku Yerusalemu kuti akampereke kuna Mbuya

²³ninga mudalemberwa ipyo m'mwambo wa Mbuya kulonga kuti, “Ana onsene achimuna autombo aperekwe kuna Mbuya.”

²⁴Iwo adenda pontho kapereka nsembe kuteweza mwambo wa Mbuya kuti: “Apereke majiwa mawiri penu nkhangaiwa ziwiri.”

²⁵Pandzidzi wenewo ku Yerusalemu kukhali munthu dzinache Simioni. Weneyu akhali munthu wakulungama pontho wakugopa Mulungu. Iye akhadikhira ndzidzi ukhafuna Mulungu dzapulumusa Aisraele, pontho Mzimu Wakuchena akhali naye.

²⁶Mzimu Wakuchenayo akhadampanga kuti hanafa tayu mbadzati kuona Khristu wakusankhulika wa Mbuya.

²⁷Mzimu Wakuchena adamtsogolera kuti akapite ku Nyumba ya Mulungu. Makolo a Yesu adapita pontho m'Nyumbamo na kachiyayo kachita kuna iye pya mtemo kuteweza mwambo wa Mose.

²⁸Simioni adathukula kachiyayo m'manja mwache mbalemedza Mulungu mbati,

²⁹“Chinchino, Mbuya, tawirisani nyabasanu kuti afe pyache na mtendere, thangwi mwachita pidadumbira imwe.

³⁰Maso anga aona chipulumuso chanu

³¹chidasasanyira imwe anthu onsene kuti achione.

³²Mwapereka cheza kuti chidziwise pyakuonadi pyanu kuna anthu okhonda khala Ayuda, mbichidzesa demelero ya Mulungu kuna anthu anu Aisraele.”

³³Baba na mache mwanayo adadodoma na pinthu pikhalonga Simioni pya mwanayo.

³⁴Simioni adaatsanzayisa mbalonga kuna Maria mache mwanayo mbati, “Mulungu asankhula mwanayu kuti akhale nyakudzesa kuvungika pontho chipulumuso kuna anthu azinji mu Israele. Iye anakhala chidzindikiro chakubulukira kuna Mulungu, chile chinakhondwa na anthu azinji,

³⁵mwakuti iye anabulusa pakwecha manyerezero akubisika a anthu. Kutsukwala kunalasa mumtima mwanu ninga dipa.”

³⁶Pakhali mprofeti wamkazi wakukalamba pyakwanga dzinache Anna. Iye akhali mwanache Fanuele, wa dzinza ya Asheri. Iye akhadakhala pabanja pyaka pinomwe pyokha basi,

³⁷natenepo adakhala mamfelwa. Iye akhali na pyaka makumasere na pinayi.[3] Iye adabindikira pyache m'Nyumba ya Mulungu kupembedza Mulungu mosiku na masikati mbapemphera na kupimana kudya.

³⁸Iye adafikambo pandzidzi onthowo mbatoma kukuza Mulungu mbalonga pya mwanayo kuna anthu onsene akhadikhira ndzidzi wakupulumuswa kwa Yerusalemu na Mulungu ale.

³⁹Pikhadamala Yosefe na Maria kuphata pinthu pyonsene kuteweza mwambo wa Mbuya pile, adabwerera kwawo ku Nazareti m'Galilea.

⁴⁰Mwanayo adakuladi mbakhala wamphamvu, akhali na nzeru pyakwanga, pontho chidzo cha Mulungu chikhali pana iye.

⁴¹Chaka na chaka makolo a Yesu akhaenda ku Yerusalemu ku Phwando ya Paska.

⁴²Pidakwana Yesu pyaka khumi na piwiri, iwo adenda ku phwandoko ninga mwa nsambo wawo.

⁴³Pidamala Phwandoyo, iwo adatoma ulendo wakubwerera kwawo, mbwenye mwanayo Yesu adasalira ku Yerusalemu, makolo ache mbakhonda kupidziwa.

⁴⁴Iwo akhanyerezera kuti iye akhali pabodzi na gulu ya anthu, natenepo iwo adafamba nsiku yonsene. Tenepo adatoma kumsaka pakati pa abale na ashamwali awo.

⁴⁵Iwo hadamgumane tayu, natenepo adabwerera ku Yerusalemu kamsaka.

⁴⁶Pansiku yachitatu adamgumana ali m'Nyumba ya Mulungu, akhala pakati pa afunzisi a Chiyuda kuavesera pontho kuavunza.

⁴⁷Onsene adamvawo, adadodoma naye thangwi ya kutawira kwache na nzeru.

⁴⁸Pidamuona makolo ache, adadodoma naye. Tenepo mache adamvunza mbati, “Mwanawe, watibonereseranji tenepa? Babako na ine taona nyatwa pyakwanga kusaka-saka iwe.”

⁴⁹Yesu adaatawira mbati, “Thangwi yache njanji mukhandisaka? Kadi imwe nkhabe kupidziwa tayu kuti ndathema kukhala m'nyumba mwa Baba?”

⁵⁰Mbwenye iwo hadavesese mwadidi kutawira kwache kule tayu.

⁵¹Tenepo Yesu adabwerera nawo pabodzi ku Nazareti mbaavera. Mache adakoya pinthu pyonsenepi mumtima mwache.

⁵²Yesu akhakula chimo na nzeru, pontho mwakukomera Mulungu na anthu ene.