Read cisena LUKA 20 Bible Online

LUKA 20 - cisena bible

LUKA 20

¹Nsiku inango Yesu akhafunzisa anthu m'Nyumba ya Mulungu mbalalika Mphangwa Zadidi. Tenepo anyansembe akulu, afunzisi a mwambo pabodzi na akulu-akulu adadza kuna iye,

²mbamvunza mbati, “Tipange, una utongi wanji wakuchita nawo pinthu penepi? Adakupasa utongi wenewu mbani?”

³Yesu adatawira mbati, “Ndikuvunzenimbo. Ndipangeni,

⁴ayi utongi ukhabatiza na Yohani udabulukira kuna Mulungu penu kuna munthu?”

⁵Iwo adatoma kupokanyisana okhokha mbati, “Tinalonga tani? Tingalonga kuti, ‘Udabulukira kuna Mulungu,’ iye anati alonge kuti, ‘Mudakhonderanji, mphapo, kukhulupira pidalonga Yohani?’

⁶Mbwenye tingalonga kuti, ‘Udabulukira kuna munthu,’ mwinji onsene unatiponyera miyala, thangwi iwo akupidziwadi kuti Yohani akhali mprofeti.”

⁷Natenepo adatawira mbati, “Ife nkhabe kudziwa kudabulukira utongi wache tayu.”

⁸Yesu adalonga kuna iwo mbati, “Inembo sinakupangani tayu utongi una ine wakuchita nawo pinthu penepi.”

⁹Tenepo Yesu adaapanga anthu ale msangani mbati, “Pidachitwa na munthu unango ule adabzala mfesa m'munda mwache mbaubwerekesa kuna anyantchoche, iye adabuluka kwenda pa ulendo mbakakhalako ndzidzi ukulu.

¹⁰Pidakwana ndzidzi wakutchola mfesa zile, iye adatuma bitchu wache kuna anyantchoche ale kuti akampase khundu yache ikhadaverana iwo ile. Mbwenye anyantchoche ale adamenya bitchu ule mbambweza chimanja-manja.

¹¹Tenepo adatuma bitchu unango wachiwiri; mbwenye anyantchoche adammenya pontho, adamtikana mbambweza chimanja-manja.

¹²Kubuluka penepo iye adatuma bitchu wachitatu; mbwenye anyantchoche ale adamkuwaza mbamponyera kunja.

¹³Penepo mwenechiro munda ule adalonga mbati, ‘Ndinachita tani? Ndinatuma mwananga wapamtima, weneyumbo anati akamulemedze.’

¹⁴Mbwenye pidaona anyantchoche mwana mwenechiro munda ule, adalonga kuna unango na mwanzache mbati, ‘Mwana mwenechiro mundawu ngweneyu. Tendeni timphe, towera mfumayi ikhale yathu!’

¹⁵Natenepo adamponyera kunja kwa munda ule mbampha.” Yesu adavunza mbati, “Apo mwenechiro munda ule anachita tani kuna anyantchoche ale?

¹⁶Iye anabwera mbapha aanyantchochewo mbabwerekesa mundawo kuna anango.” Pidava anthu ale penepi, adalonga mbati, “Lekani longa tenepo.”

¹⁷Yesu adaayang'ana mbavunza mbati, “Nkhulonga kuti tani pinalonga Malemba kuti, ‘Mwala udakhonda anyakumanga nyumba ninga wakusowa basa, lero wasanduka wakufunika kupiringana inango yonsene.’

¹⁸Munthu anagwera pamwala wenewo ananyedzeka-nyedzeka, mbwenye ngakhala mwala wenewu unagwera munthu, anapeyeka.”

¹⁹Penepo pene afunzisi a mwambo na anyansembe akulu akhafuna pyakuphata Yesu, thangwi adapidziwa kuti Yesu adalonga msangani ule mwakupokanyana nawo, kwache iwo akhagopa anthu.

²⁰Tenepo adasaka-saka ndzidzi wadidi wakumphatira nawo. Iwo adanyengerera anthu anango akupionesa ninga mbanthu akulungama mbaatuma kuti akatape Yesu m'kanwa pakumvunza, towera akwanise kumpereka m'manja mwa mkulu wa boma wa Chiroma.

²¹Anthu enewa adalonga kuna Yesu mbati, “Mfunzisi, timbapidziwa kuti pimbalonga na kufunzisa imwe mphyakuonadi. Timbapidziwa kuti imwe nkhabe ikha konta kuti munthu mbani tayu, mbwenye mumbafunzisa pyakuonadi pya makhaliro ambafuna Mulungu kuna anthu.

²²Tipangenimbo, ayi nkhudawira mwambo wathu kukhoma msonkho kuna Mfumu wa Roma, penu tayu?”

²³Mbwenye Yesu adadziwa unthawatawawo mbalonga kuna iwo mbati,

²⁴“Ndioneseni kobiri. Nkhope na dzina pili penepapi mphya ani?” Iwo adatawira mbati, “Mphya Mfumu wa Roma.”

²⁵Yesu adalonga mbati, “Apo, perekani pya Mfumu wa Roma kuna Mfumu wa Roma, pontho perekani pya Mulungu kuna Mulungu.”

²⁶Penepo adachimwana kumtapa m'kanwa pamaso pa anthu. Iwo adamalwa nzeru na kuatawira kudachita Yesu mbamatamiratu.

²⁷Tenepo Asaduki anango, ale akhalonga kuti anthu nkhabe dzalamuka kuimfa, adadza kuna Yesu mbalonga mbati,

²⁸“Mfunzisi, Mose adatilembera mwambo wakuti: ‘Ngakhala mamuna anafa mbasiya mkazache wakusowa ana, mbaleache defuntuyo ampite panyumba mamfelwayo, towera abale naye ana, ale anakhala ninga mbana defuntuyo.’

²⁹Pidachitwa na amuna anango anomwe ubaleawo; nanawo adasemba mbafa wakusowa ana.

³⁰Kubuluka penepo nyamsolo wache adampita panyumba mamfelwayo,

³¹mbapitwa pontho panyumba na wachitatu. Penepi pidachitika chibodzi-bodzi kuna onsene anomwe; onsene adafa akusowa ana.

³²Pakumalisira pache, mkazi ule adafambo.

³³Apo pansiku inalamuka anthu kuimfa, mkazi weneyu anakhala wa ani, podi onsene anomwe ubaleawo akhadamsemba?”

³⁴Yesu adaatawira mbati, “Amuna na akazi a pansi pano ambakazhali,

³⁵mbwenye amuna na akazi akuthema dzalamuka kuimfa mbakhala na moyo ndzidzi unafuna kudza ule, nkhabe dzakazhali tayu.

³⁶Anakhala ninga angelo, pontho nkhabe dzafave tayu. Iwo mbana Mulungu, thangwi alamuka kuimfa.

³⁷Mbwenye pya kulamuka kwa anthu kuimfa, Mose ene adapilonga kale. Pambiri yakulonga pya thenthere yakugaka moto iye akuchemera Mbuya kuti ndi Mulungu wa Abrahamu, Mulungu wa Isake, na Mulungu wa Yakobo.

³⁸Iye ndi Mulungu wa anthu amoyo, si wa anyakufa tayu, thangwi pamaso pache anthu onsene ana moyo.”

³⁹Afunzisi anango a mwambo adatawira mbati, “Mwatawira mwadidi, Mfunzisi!”

⁴⁰Tenepo nkhabe na mbodzi ene adawanga mtima kumvunza pontho.

⁴¹Yesu adaavunza mbati, “Pinalongerwanji kuti Khristu ntchidzukulu cha Davite?

⁴²Podi Davite ene mwenechiro adalonga m'bukhu ya Masalimo[26] kuti, ‘Mbuya adalonga kuna mbuyanga kuti: Khala kumadyo kwangaku;

⁴³kufikirana ndisanduse anyamalwako kukhala ninga chakusanjikirapo manyalo ako.’

⁴⁴“Davite adamchemera ‘Mbuya;’ apo Khristu anakhala tani pontho chidzukulu cha Davite?”

⁴⁵Pikhavesera anthu onsene ale pinthu pikhalonga Yesu, iye adapanga anyakufunzache mbati,

⁴⁶“Khalani m'maso na afunzisi a mwambo. Pimbaakomera kufamba-famba uku avala mikhanjo yakulapha, pontho ambafuna pikulu kuti anthu aamwenyike na chilemedzo m'misika. Iwo ambasankhula mipando yakupambulika m'nyumba zakupemphereramo, pontho mbuto za chilemedzo m'maphwando.

⁴⁷Iwo ambavunga mfuma za amamfelwa pakuadyera nkope-kope mbapemphera mwakulapha, towera aoniwe na anthu. Iwo anatchunyuswa pyakwanga pene.”