Read cisena LUKA 21 Bible Online

LUKA 21 - cisena bible

LUKA 21

¹Yesu adayang'ana mbaona anthu akufuma akuponya pyakupereka pyawo m'chakuikhiramo kobiri m'Nyumba ya Mulungu.

²Iye adaona pontho mamfelwa wamkazi wakutcherenga pyakwanga akuikha pikobiri piwiri.

³Iye adalonga mbati, “Ndikukupangani pyakuonadi kuti mamfelwa wakutcherengayu apereka pizinji kupiringana anango onsenewa.

⁴Thangwi anango achita kupambula pamfuma zawo, mbwenye mkaziyu, na kutcherenga kwache kwene, apereka pyonsene pikhanyindira iye kuti pinamkoya.”

⁵Anango pakati pa anyakufunzache akhalonga pyakubalika kudachita Nyumba ya Mulungu yakumangwa na miyala yadidi, pontho na mitukwa yakuperekwa kuna Mulungu. Mbwenye Yesu adalonga mbati,

⁶“Ndzidzi unafika wakuti pyonsene pinaona imwe panopi pinagomolwa. Nkhabe mwala ubodzi unasiyiwa padzulu pa unzache tayu.”

⁷Anthu adavunza Yesu mbati, “Mfunzisi, penepi pinachitika lini? Pontho panachitikanji kuonesa kuti ndzidzi uli chifupi kuti penepi pichitike?”

⁸Yesu adalonga mbati, “Khalani m'maso kuti muleke nyengezwa. Thangwi anthu azinji anabwera mbapilonga kuti iwo ndi Khristu, pontho kuti mamalisiro afika. Lekani dzaatewera enewa.

⁹Mungava nkhondo na chimpiningu, lekani dzagoswera. Penepi pyathema toma kuchitika, kwache mamalisiro hanafika ndzidzi onthowo tayu.”

¹⁰Yesu adalonga pontho mbati, “Dzinza inamenyana na dzinza inzache; pontho dziko inachita nkhondo na dziko inzache.

¹¹Panakhala piteke-teke pyakugoswa, njala, pontho miliri ponsene pene; panachitika malengo-lengo na pyakugoswa pyakubulukira kuthambo.

¹²Pinthu pyonsenepi mbapidzati chitika, imwe munamangwa mbamubonereswa. Iwo anaenda namwe kakutongani mseru kunyumba zakupemphereramo mbakuponyani m'perezo. Iwo anaenda namwe kuna mafumu na atongi, thangwi ndimwe anyakuteweranga.

¹³Wenewu unakhala ndzidzi wanu wakulalika Mphangwa Zadidi kuna iwo.

¹⁴Mupidziwe mumtima mwanu kuti imwe nkhabe swipa mtima na pinafuna imwe kalonga kupitchinjiriza pamseru tayu,

¹⁵thangwi ndinakupasani mafala a nzeru akuti nkhabe mbodzi wa anyamalwanu anakwanisa kuakhonda penu kuapokanya tayu.

¹⁶Makolo anu, abale anu a mimba ibodzi, abale anu, pontho ashamwali anu anakusandukirani. Anango a imwe anaphiwa.

¹⁷Anthu onsene anakuzondani thangwi ya ine.

¹⁸Kwache nkhabe tsisi ibodzi ya mumsolo mwanu inafuna tayika tayu.

¹⁹Mungaimira dzololo, munatambira moyo chadi-chadi.

²⁰“Mungaona Yerusalemu azungulirwa na magulu a nkhondo, mupidziwe kuti anati avungwe chinchino.

²¹Penepo onsene akukhala mu Yudea mbathawire kumapiri; ale ali mumzinda mbabulukemo; na onsene akukhala kumidzi mbaleke kapita mumzinda.

²²Thangwi zenezo zinakhala nsiku zinafuna Mulungu kutchunyusa anthu kuchitisa kuti pyonsene pidalonga Malemba pikwane-kwane.

²³Nyatwa zikulu zinakhala kuna akazi a mimba na kuna abzade. Nyatwa zakugoswa zinabwera kuna dziko yeneyi, na kutchunyusa kwa Mulungu kunagwera anthu enewa.

²⁴Anango anaphiwa pankhondo, anango anakwatwa kwenda kumadziko anango onsene kakhala anyaperezo, pontho anthu okhonda khala Ayuda anavuya anthu a mu Yerusalemu kufikirana ndzidzi wakutonga wa anthu okhonda khala Ayudawo umale.

²⁵“Pinthu pyachilendo pinachitika kuna dzuwa, mwezi na nyenyezi. Padziko yapansi pano madzinza anagoswerwa kuona chonzi chikulu na mabimbi panyanza.

²⁶Anthu anakomoka na mantha mbali kudikhira pyakufuna kudza padziko yonsene yapansi, thangwi mphamvu zonsene za kuthambo zinatekenyeka.

²⁷Penepo anthu anamuona Mwana Munthu akudza pamakole na mphamvu pontho na demelero ikulu.

²⁸Penepi pingatoma kuchitika, mulamuke mbamuyenusa misolo yanu kudzulu, thangwi Mulungu ali chifupi kukupulumusani.”

²⁹Penepo Yesu adaapanga anthu ale msangani mbati, “Yang'anani muti wamkuyu na miti inango yonsene.

³⁰Mungaiona kuti yatoma kuphwitha, mumbapidziwa kuti mainja ali chifupi.

³¹Ntchibodzi-bodzi mungaona penepi pikuchitika, mupidziwe kuti Mulungu ali chifupi kukhazikisa Ufumu wache.

³²“Ndikukupangani pyakuonadi kuti penepi pinachitika anthu a mfendu uno mbadzati kufa.

³³Kudzulu na dziko yapansi pinamala, mbwenye mafalanga nkhabe dzamalave tayu.

³⁴“Onesesani kuti mitimanu ileke kwatika na maphwando, kuledzera, pontho na kutsalakana pinthu pya moyo uno, gopesera nsiku yeneyo inakudzerani mwakututumusa.

³⁵Thangwi anthu onsene anakhala pansi pano nsiku yeneyi inabwera kuna iwo ninga msampha.

³⁶Khalani m'maso, pontho pempherani ndzidzi onsene, towera mukhale nazo mphamvu zakupulumukira kuna pyonsene pinafuna dzachitika, pontho kuti imwe mukwanise kuimira pamaso pa Mwana Munthu.”

³⁷Nsiku zonsene Yesu akhafunzisa m'Nyumba ya Mulungu, mbwenye na mosiku akhabuluka mbaenda kakhala paphiri ya Olivi.

³⁸Anthu onsene akhabesera ku Nyumba ya Mulungu kavesera mafalache.