Read cisena LUKA 22 Bible Online

LUKA 22 - cisena bible

LUKA 22

¹Phwando ya Mikate yakusowa chakufufumisira, yakuchemerwa Phwando ya Paska ikhali chifupi.

²Anyansembe akulu na afunzisi a mwambo akhasaka-saka njira yachibiso-biso yakupha nayo Yesu, thangwi iwo akhagopa anthu.

³Satana adapita mumtima mwa Yudasi, wakuchemerwa Iskarioti. Iye akhali mbodzi wa anyakufunza khumi na awiri ale.

⁴Tenepo Yudasi adabuluka mbakalonga na anyansembe akulu na akadamu a anyakulondali a ku Nyumba ya Mulungu pya njira yakupereka nayo Yesu kuna iwo.

⁵Iwo adakomerwa napyo mbaverana naye kuti anampasa kobiri.

⁶Yudasi adatawirizana napyo mbasaka-saka ndzidzi wadidi wakupereka nawo Yesu kuna iwo mwakukhonda dziwa anthu.

⁷Nsiku ya Phwando ya Mikate yakusowa chakufufumisira idakwana. Ikhali nsiku ikhapha anthu anabira akuchitira Phwando ya Paska.

⁸Yesu adatuma Peturo na Yohani mbaapanga mbati, “Ndokoni, mukatisasanyire Phwando ya Paska towera tikadye.”

⁹Iwo adavunza mbati, “Munafuna tikaisasanyire kupi?”

¹⁰Yesu adalonga mbati, “Mungachita kwene piteni mumzinda, munakagumanikana na mamuna athukula mulinga waa madzi. Mukamtewere kufikirana kunyumba inakapita iye.

¹¹Mukampange mwenechiro nyumbayo kuti, ‘Mfunzisi akuvunza kuti, “Njipi subi yakuti ine na anyakufunzanga tidyeremo Phwando ya Paska?” ’

¹²Iye anakakuonesani subi ikulu yapadzulu yakusasanywa kale. Pyonsene mukapisasanyire mwenemo.”

¹³Tenepo adenda mbakagumanadi ninga mudaapangira iye, mbasasanya pya pa Phwando ya Paska.

¹⁴Pidakwana ndzidzi, Yesu adenda kakhala pathebulu pabodzi na anyakutumwache.

¹⁵Iye adaapanga mbati, “Ndapifunadi kuti ndidye Phwando ya Paskayi pabodzi na imwe mbandidzati bonera.

¹⁶Ndikukupangani kuti handinadya pontho Phwando ya Paskayi tayu, kufikirana pyonsene pya Paskapi pikwane-kwane mu Ufumu wa Mulungu.”

¹⁷Tenepo Yesu adathukula khomitcho mbapereka takhuta kuna Mulungu, mbalonga mbati, “Kwatani khomitchoyi mugawizane pakati panu.

¹⁸Ndikukupangani kuti kutomera lero kwenda m'tsogolo ine nkhabe dzamwa pontho vinyu tayu kufikirana Mulungu akhazikisa Ufumu wache.”

¹⁹Tenepo adakwata mkate mbapereka takhuta kuna Mulungu, adaumenya mbaupereka kuna iwo mbati, “Enewa ndi manungo anga, akuperekwa thangwi ya imwe. Chitani penepi kundikumbuka.”

²⁰Pidamala iwo kudya, adaapasa pontho khomitcho mbati, “Khomitcho yeneyi ntchiverano chachinchino cha Mulungu chakukhazikiswa na chiropa changa, chakuchuchiswa thangwi ya imwe chile.”[27]

²¹“Mbwenye ngayang'anani, nyakundipereka kuna anyamalwanga ali pano kudya na ine pabodzi.

²²Mwana Munthu anati aphiwe, ninga mudapisasanyira Mulungu kale ene. Mbwenye dzedze kuna munthu anapereka Mwana Munthu kuna anyamalwache ule.”

²³Penepo iwo adatoma kuvunzana mbati, “Mbani pakati pathumbopa angachite pinthu ninga penepi?”

²⁴Anyakufunza adatoma pokanyana mbati, “Pakati pathumbopa ambalongwa mkulu mbani?”

²⁵Penepo Yesu adaapanga mbati, “Mafumu a anthu okhonda dziwa Mulungu ambavekesa utongi wawo kuna anthu awo, na atongi ene ambafuna kuti anthu awo aachemere na dzina yakuti ‘Ashamwali a anthu.’

²⁶Mbwenye kuna imwe pileke khala tenepo. Kwache mkulu akhale ninga mwana pakati panu, pontho mkadamu akhale ninga nyabasa.

²⁷Nyakukhala pansi mbadya, na nyakumtumikira, mkulu mbani? Wamkulu si nyakudyayo tayu? Mbwenye ine ndili pakati panu ninga nyakutumikira.

²⁸“Imwe mwakhala nane kubonera kwanga konsene.

²⁹Ndikukupasani Ufumu ninga kundipasambo kudachita Babanga.

³⁰Munadya na kumwa pathebulu panga mu Ufumu wanga, mbamukhala pamipando yachifumu kutonga mseru madzinza khumi na awiri a Israele.

³¹“Simoni, Simoni, khala m'maso! Satana apempha Mulungu kuti amtawirise kukuyesani monsene pakukupepetani ninga mapira.

³²Mbwenye ine ndakupempherera iwe Simoni kuti uleke taya chikhulupiro chako. Iwe ungazungunukira pontho kuna ine, ukawangisembo mtima abale ako.”

³³Peturo adalonga mbati, “Mbuya ndasasanyika kumangwa na kufa namwe kwene pabodzi!”

³⁴Mbwenye Yesu adamtawira mbati, “Peturo, ndikukupanga kuti mosiku ontho uno dzongwe mbadzati lira, unalonga katatu kuti nee unandidziwabi.”

³⁵Yesu adaavunza mbati, “Pidakutumani ine pile akusowa mabudu a kobiri, penu budu ya paulendo penu nsapato, ayi mudasowa chinthu?” Iwo adatawira mbati, “Nkhabe.”

³⁶Yesu adaapanga mbati, “Mbwenye chinchino ule ana budu ya kobiri, mbaikwate. Akwate pontho budu ya paulendo, pontho nyakusowa talasada, mbagulise mkhanjo wache agule talasada.

³⁷Thangwi ndikukupangani kuti pyathemadi kuchitika pidalonga Malemba pile kuti, ‘Iwo adamuyesa ninga mbodzi wa anthu akuipa.’ Thangwi pyonsene pidalembwa pya ine pinakwana-kwanadi.”

³⁸Anyakufunza ale adapanga Yesu mbati, “Mbuya, ngayang'anani tili nawo kale matalasada mawiri.” Yesu adaapanga mbati, “Basi pyakwana.”[28]

³⁹Yesu akhali na nsambo wakwenda kuphiri ya Olivi kapemphera. Tenepo adabuluka mumzinda mule mbaenda kweneko pabodzi na anyakufunzache.

⁴⁰Pidafika iwo pambutopo, iye adaapanga mbati, “Pempherani kuti muleke yeswa na pyakuipa.”

⁴¹Yesu adafunduka kubuluka pakhali anyakufunza ale mbaenda pakhundu nsinzo wache ninga pakufika mwala ungaponywa. Iye adagodama mbapemphera

⁴²mbati, “Baba, ngakhala munapifuna, ndibulusirenimbo ndiko ya nyatwayi. Kwache kuleke khala kufuna kwanga, mbwenye chitani kufuna kwanu.”

⁴³Mngelo adaonekera kuna iye kubulukira kudzulu mbamuwangisa mtima.

⁴⁴Yesu adasanyika pikulu mumtima mwache mbapemphera pikulu pene. Kaluma yache ikhali ninga madontho a chiropa chakugwera pansi.[29]

⁴⁵Pidamala iye kupemphera, adalamuka mbaenda kuna anyakufunzache. Adaagumana agona, thangwi ya kutopa na kutsukwala.

⁴⁶Yesu adaapanga anyakufunzache mbati, “Mwatani munagona? Lamukani mupemphere kuti muleke yeswa na pyakuipa.”

⁴⁷Pikhali Yesu m'kati kulonga, mwinji udafika wakutsogolerwa na Yudasi, mbodzi wa anyakufunza khumi na awiri ale. Iye adadza kuna Yesu kuti ampsompsone,

⁴⁸mbwenye Yesu adalonga mbati, “Yudasi ukumperekadi Mwana Munthu kuna anyamalwache na kumpsompsona?”

⁴⁹Pidaona anyakufunza pikhafuna kuchitika pile, adavunza Yesu mbati, “Mbuya, tiphatise basa matalasadathu?”

⁵⁰Mbodzi wa anyakufunza ale adatema bitchu wa Nyansembe Wamkulu mbamgwandiratu khutu yakumadyo.

⁵¹Mbwenye Yesu adaapanga mbati, “Ngalekani penepi!” Tenepo adaphata khutu ya munthu ule mbamuwangisa.

⁵²Yesu adalonga kuna anyansembe akulu na akadamu a anyakulondali a ku Nyumba ya Mulungu pabodzi na akulu-akulu adadza penepo ale kuti amphate mbati, “Mwatani mwachita kudza na matalasada na pigomba khala ninga ndine phanga?

⁵³Ine ndikhali namwe m'Nyumba ya Mulungu nsiku zonsene, mbwenye imwe hamudandimanga tayu? Mbwenye ora ino yakutongwa na mphamvu za mdima njanu kuti muphate mabasanu.”

⁵⁴Anthu ale adakwata Yesu mbaenda naye kunyumba ya Nyansembe Wamkulu. Peturo adatewera m'nduli pakansinzo.

⁵⁵Moto udagaswa muchintalo pakati. Peturo adadza dzakhala pabodzi na anthu adazungulira moto ule.

⁵⁶Mbodzi wa anyabasa achitsikana adaona Peturo akhala m'khundu mwa moto. Mtsikanayo adamuyang'anisisa mbalonga mbati, “Munthuyu akhali pabodzi na Yesu!”

⁵⁷Mbwenye Peturo adatuna mbati, “Mkaziwe, munthu analonga iweyu, sinamdziwa tayu!”

⁵⁸Pidachita thimize, mamuna unango adamuona pontho Peturo mbalonga mbati, “Iwe pontho ndiwe mbodzi wa enewa!” Mbwenye Peturo adalonga mbati, “Si ine tayu, mamunawe!”

⁵⁹Pidagwanda ora ibodzi, munthu unango pontho adakakamira kulonga mbati, “Ndimomwene weneyu akhali pabodzi na Yesu thangwi kwawo nkhu Galilea.”

⁶⁰Mbwenye Peturo adalonga mbati, “Mamunawe, pinalonga iwepi, sinapidziwa tayu.” Iye mbali kulonga, kabodzi kene dzongwe adalira.

⁶¹Mbuya adazungunuka mbayang'ana Peturo. Penepo Peturo adakumbuka mafala akhadalonga Mbuya ale kuti: “Mosiku ontho uno dzongwe mbadzati lira, unati undikhonde katatu.”

⁶²Penepo Peturo adabuluka mbakalira na kutsukwala kukulu.

⁶³Anthu akhalondali Yesu ale adamselusa. Iwo adammenya,

⁶⁴adammanga chitambaya m'maso mbamvunza mbati, “Lotera, akumenya mbani?”

⁶⁵Iwo adamulongera pontho pinango pizinji pyakutikana.

⁶⁶Pidachena kunja, Yesu adaendeswa ku Thando ya miseru ya Chiyuda kukhadagumanyikana akulu-akulu, anyansembe akulu na afunzisi a mwambo kule.

⁶⁷Adampanga mbati, “Utipange ngakhala Khristu ule ndiwe?” Mbwenye Yesu adaatawira mbati, “Podi ndikupangeni kwene, nee munandikhulupira tayu;

⁶⁸pontho ndingakuvunzani, nee munanditawira tayu.

⁶⁹Mbwenye kutomera chinchino kwenda m'tsogolo, Mwana Munthu anakhala kumadyo kwa Mulungu Wamphamvu zonsene.”

⁷⁰Onsene ale adamvunza mbati, “Mphapo, ndiwedi Mwana Mulungu?” Yesu adaapanga mbati, “Ndimwe mukupilonga.”

⁷¹Penepo anthu ale adalonga mbati, “Tinasakiranji pontho umboni unango? Tapiva tekha pyalonga iye.”