Read cisena LUKA 23 Bible Online

LUKA 23 - cisena bible

LUKA 23

¹Anthu onsene penepo adalamuka mbaenda na Yesu kuna Pilato.

²Iwo adatoma kumpangirira Yesu mbati, “Munthuyu tamgumana akudzudzumisa anthu athu. Akhaapanga kuti anthu aleke kukhoma msonkho kuna Mfumu wa Roma. Pontho iye akhalonga kuti ndi Khristu pontho mfumu.”

³Pilato adavunza Yesu mbati, “Ayi iwe ndiwedi Mfumu wa Ayuda?” Yesu adatawira mbati, “Mwalonga tenepo ndimwe.”

⁴Penepo Pilato adaapanga anyansembe akulu na mwinji ule mbati, “Thangwi ya kutongera munthuyu nee ndikuionambobi.”

⁵Mbwenye iwo adakakamira kulonga mbati, “Chifunziso cha munthu weneyu chimbalamusa chimpiningu pakati pa anthu mu Yudea monsene. Iye adatomera ku Galilea, tenepo chinchino afika kuno ku Yudea.”

⁶Pidava Pilato penepi, adavunza mbati, “Ayi munthu weneyu ngwa nthemba ya Galilea?”

⁷Pidapidziwa iye kuti Yesu akhali wa kunthemba yakutongwa na Herodi, adamtumiza kuna Herodi onthoyo, ule akhali mu Yerusalemu pandzidzi wenewo.

⁸Pidaona Herodi Yesu, adakomerwa pyakwanga, thangwi akhava mbiri yache, pontho pandzidzi ukulu akhafuna kuti aone Yesu. Iye akhadikhira kuonambo Yesu akuchita chinthu chakudodomesa.

⁹Herodi adamvunza Yesu pinthu pizinji, mbwenye Yesu hadamtawire tayu.

¹⁰Anyansembe akulu na afunzisi a mwambo adenda kutsogolo mbampangirira Yesu pikulu.

¹¹Herodi na anyankhondo ache adaselusa Yesu mbamtikana. Iwo adamvazika mkhanjo wakubalika mbambweza pontho kuna Pilato.

¹²Herodi na Pilato kale akhazondana, mbwenye kubulukira pa nsiku yeneyo, adasanduka ashamwali.

¹³Pilato adagumanyisa anyansembe akulu, akadamu a Chiyuda na anthu onsene pabodzi.

¹⁴Iye adaapanga mbati, “Mwadzesa munthuyu kuna ine na thangwi yakuti ngwakudzudzumisa anthu. Ine ndamvunza imwe mbamuli ponthopo, kwache sidamgumane na mseru na ubodzi ene papinthu pinampangirira imwepi tayu.

¹⁵Herodi ambweza kuno thangwi na iye enembo hadamgumane na mseru tayu. Weneyu hadasose chinthu chakuthema kumpha nacho tayu.

¹⁶Natenepo ndinalila kwene kumkwapulisa mbandimuleka kuti aende pyache.”[30]

¹⁷

¹⁸Mwinji onsene udakhuwa kuti, “Mpheni weneyu! Mutisudzulire Baraba!”

¹⁹Baraba akhadaikhwa m'perezo thangwi ya kupha anthu na kudzesa chimpiningu mumzinda.

²⁰Pilato akhafuna pyakusudzula Yesu, natenepo adenda kalonga pontho na anthu ale.

²¹Mbwenye anthu ale adakhuwa pontho mbati, “Mkhomereni pamtanda! Mkhomereni pamtanda!”

²²Pilato adalonga nawo kachitatu mbati, “Asosa mseru wanji munthuyu? Ine nkhabe gumana mseru wakumphera nawo tayu. Ndinati ndimkwapulise mbandimsudzula.”

²³Mbwenye iwo adathimiza kukhuwa mwakugaluza fala kuti Yesu akhomerwe pamtanda. Pakumalisira pache Pilato adakundwa na kukhuwa kudachita iwo.

²⁴Natenepo iye adatonga kuti pikhafuna anthu pile pichitike.

²⁵Iye adaasudzulira munthu akhafuna iwo, ule akhadaikhwa m'perezo thangwi ya kupha anthu na kudzesa chimpiningu mumzinda. Iye adapereka Yesu kuna iwo kuti achite naye pikhafuna iwo.

²⁶Anyankhondo adakwata Yesu mbaenda naye. Pikhaenda iwo, adagumanikana na munthu unango wa ku Kirene, dzinache Simoni, ule akhabulukira kumidzi kwenda kumzinda. Iwo adamphata mbamsanjika mtanda wa Yesu kuti authukule kutewera m'nduli mwa Yesu.

²⁷Mwinji ukulu ukhamtewera. Pakati pa anthu enewo pakhali akazi akhalira na kusintili Yesu ale.

²⁸Yesu adazungunukira kuna iwo mbalonga mbati, “Imwe akazi a ku Yerusalemu, lekani kundilira, mbwenye mupilire mwekha ene na ananu.

²⁹Thangwi nsiku zikudza zinafuna dzalonga anthu kuti, ‘Anyakutsanzaya mbakazi akusowa ana, anthu okhonda bala, pontho ale adakhonda yamwiwa na kale ene!’

³⁰Wenewo unakhala ndzidzi unafuna dzalonga anthu kuna mapiri kuti, ‘Tigwereni pyanu!’ Mbalonga pontho kuna pitunda kuti, ‘Tibiseni pyanu!’

³¹Ngakhala iwo akuchitira pinthu penepi kuna muti uwisi, apo kuna muti wakuuma ndiye tani?”

³²Iwo adakwata mapanga anango awiri mbaenda nawo kuti akaphiwe pabodzi na Yesu.

³³Pidafika iwo pambuto yakuchemerwa “Chibade cha Msolo,” adakhomera Yesu pamtanda pabodzi na mapanga awiri ale, mbodzi kumadyo, unangombo kumabzere kwa Yesu.

³⁴Yesu adalonga mbati, “Baba, alekerereni pyakudawa pyawo, thangwi pinachita iwo nkhabe kupidziwa tayu.”[31] Adagawana nguwo za Yesu pakuchita ntsango.

³⁵Anthu adaimira penepo mbayang'ana mwenemo akadamu a Chiyuda akuselusa Yesu. Iwo akhalonga mbati, “Adapulumusa anango, mulekenimbo apipulumuse yekha ene ngakhala ndi Khristudi, Nyankhombo adasankhulwa na Mulungu.”

³⁶Anyankhondo adamselusambo. Iwo adadza kuna iye mbampasa vinyu wakujuja

³⁷mbalonga mbati, “Pipulumuse wekha ene ngakhala ndiwe Mfumu wa Ayuda!”

³⁸Padzulu pache padalembwa mafala akuti, “Weneyu ndi Mfumu wa Ayuda.”

³⁹Mbodzi wa mapanga awiri adakhomerwa pabodzi na iye ale adamtikana mbati, “Ayi si iwe Khristu ule tayu? Pipulumuse wekha ene na ife ene.”

⁴⁰Mbwenye phanga unango ule adamulongera mwanzache mbati, “Kadi iwe nkhabe gopa Mulungu tayu? Iwe ukutchunyuswa sawasawambo na iye.

⁴¹Nyatwayi tikuitambira kuthemerana na pidachita ife, mbwenye iyeyu hadadawe tayu.”

⁴²Tenepo adalonga kuna Yesu mbati, “Yesu mungabwera ninga mfumu mundikumbukembo.”

⁴³Yesu adampanga mbati, “Ndikukupanga pyakuonadi kuti lero ene pano unati ukhale na ine kumbuto yakutsanzaya kudzulu.”

⁴⁴Ora yakhumi na chiwiri masikati dzuwa idaleka kugaka, tenepo mdima udagudumira dziko yonsene kufikirana paora yachitatu kumawulo.

⁴⁵Nguwo yakutchinga mbuto yakuchenesesa m'Nyumba ya Mulungu idang'ambika kati na kati.

⁴⁶Yesu adakhuwa pikulu mbati, “Baba, ndinapereka mzimu wanga m'manja mwanu!” Pikhadalonga iye penepi, adafa.

⁴⁷Mkadamu wa anyankhondo dzana adapiona pidachitikapyo mbalemedza Mulungu mbati, “Weneyu akhalidi munthu wakulungama!”

⁴⁸Anthu akhadagumanyikana penepo dzaona ale, pidaona iwo pidachitikapyo, adenda kwawo akukhumata thangwi ya kutsukwala.

⁴⁹Anthu onsene akhadziwa Yesu, kuthimizapo akazi akhamtewera kutomera ku Galilea ale, adaimira pakansinzo kupiona.

⁵⁰Pakhali munthu dzinache, Yosefe wa kuluwani ya Arimatea m'nthemba ya Yudea. Iye akhali munthu wakulungama pontho wadidi. Iye akhadikhira kuti Mulungu akhazikise Ufumu wache. Podi kwene kuti iye akhali mbodzi wa Thando ya miseru ya Chiyuda, iye hadaphatizane na manyerezero pontho machitiro awo pa Yesu tayu.

⁵¹

⁵²Iye adenda kuna Pilato mbakavunza mtembo wa Yesu.

⁵³Tenepo adatchithisa mtembo wa Yesu mbaupyangirira na nguwo yakuchena. Adauikha m'masiye akuchita kusemwa m'mwala. Akhali masiye okhonda phatiswa basa na kale ene.

⁵⁴Penepi pidachitwa pa Chishanu, tenepo Nsiku Yakupuma ikhali chifupi kutoma.

⁵⁵Akazi akhadatewera Yesu kutomera ku Galilea ale adenda pabodzi na Yosefe mbakaona masiye na kuikhwa kwa Yesu.

⁵⁶Tenepo adabwerera kumusa kasasanya pyakununkhira na mafuta kuti adzoze nawo mtembo wa Yesu. Pa Nsiku Yakupuma adapuma kuteweza mwambo.