Read cisena LUKA 24 Bible Online

LUKA 24 - cisena bible

LUKA 24

¹Bzobzo pa Dimingu, akazi ale adenda kumasiye. Iwo adathukula pyakununkhira pikhadasasanya iwo pile.

²Iwo adagumana mwala wagulung'undiswapo pamsuwo wa masiye ale.

³Tenepo adapita m'bwalo, kwache mtembo wa Mbuya Yesu hadaugumanemo tayu.

⁴Iwo adamalwa napyo nzeru mbaimira penepo. Kabodzi kene padaonekera amuna awiri akuvala nguwo zakuyetima pyakwanga mbaimira chifupi nawo.

⁵Akazi ale adaphatwa na mantha mbalamba. Tenepo amuna ale adaavunza mbati, “Mwatani munasaka munthu wamoyo pakati pa anthu akufa?

⁶Yesu hali muno tayu; alamuka! Kumbukani pidakupangani iye mbali ku Galilea kuti:

⁷‘Mwana Munthu anati aperekwe m'manja mwa anthu akudawika, akhomerwe pamtanda mbalamuka kuimfa pansiku yachitatu.’ ”

⁸Penepo akazi ale adakumbukadi mafalache ale.

⁹Iwo adabuluka kumasiye kule mbakalonga pyonsene kuna anyakutumwa khumi na mbodzi ale pabodzi na kuna anyakutewera anango onsene a Yesu.

¹⁰Akazi enewa akhali Maria wa ku Magadala, Yohana, na Maria mache Yakobo. Akazi enewa pabodzi na akazi anango adalonga penepi kuna anyakutumwa.

¹¹Mbwenye anyakutumwa ale adayesa mafala enewa ninga akupupwa, tenepo hadaakhulupire tayu.

¹²Mbwenye Peturo adalamuka mbathamangira kumasiye kule. Adakotama mbaona nguwo zidapyangirirwa mtembo wa Yesu zene basi. Peturo adabwerera kumusa mbali kudodoma na pikhadachitikapyo.[32]

¹³Pansiku yonthoyo anyakutewera a Yesu awiri akhaenda kumudzi wa Emau. Nsinzo wakubulukira ku Emau kwenda ku Yerusalemu ukhali mathanyo pikwi khumi na chibodzi.

¹⁴Pikhaenda iwo, akhalonga pya pinthu pyonsene pikhadachitika pile.

¹⁵Mbali kulonga na kuvunzana, Yesu adafika chifupi mbatsagana nawo.

¹⁶Mbwenye iwo hadamdzindikire tayu, thangwi maso awo adakhala ninga afungika.

¹⁷Yesu adaavunza mbati, “Pinalonga imwe ninji?” Penepo amuna ale adaimira na nkhope zakutsukwala.

¹⁸Mbodzi wa iwo dzinache, Kileopa, adamvunza mbati, “Ayi mlendo wache ndiwe ene basi mu Yerusalemu anakhonda dziwa pile pyachitika mwenemu nsiku zapitazi?”

¹⁹Yesu adaavunza mbati, “Pyakuti tani?” Amuna ale adalonga mbati, “Pya Yesu wa ku Nazareti. Weneyu akhali mprofeti, ule mabasa na mafalache pikhali pyamphamvu pamaso pa Mulungu na anthu ene.

²⁰Anyansembe akulu na akadamu athu adampereka kuna atongi kumtonga kuti aphiwe, tenepo iye adakhomerwa pamtanda.

²¹Tikhadikhira kuti iye mbadakhala mbodzi wakufuna dzaombola Israele. Ande, lero ndi nsiku yache yachitatu kubulukira mudachitika ipyo.

²²Si pyokhapyo tayu, akazi anango a m'gulu mwathu atidodomesa; machibese iwo adenda kumasiye,

²³mbwenye mtembo wache hadaugumaneko tayu. Adatipanga kuti adaona angelo kumasomphenya, ale adaapanga kuti Yesu ana moyo.

²⁴Anango a m'gulu mwathu adenda kumasiye kule mbakagumanadi sasawa ninga mudalongera akazi ale, kwache hadamuone tayu.”

²⁵Yesu adaapanga mbati, “Ndimwe anthu akupupwa, thangwi imwe mumbapiona ninga pyakunensa kukhulupira pyonsene pidalonga maprofeti.

²⁶Ayi pikhali pyakuthema tayu kuti Khristu aone nyatwa zonsenezi mbadzati kupita mudemelero yache?”

²⁷Tenepo adaapangiza pile pidalembwa m'Malemba monsene pya iye, kutomera m'mabukhu a Mose kufikirana na a maprofeti onsene.

²⁸Pidafika iwo chifupi na mudzi ukhaenda iwo, Yesu adachita ninga akugwanda.

²⁹Mbwenye iwo adamkhakhamiza mbati, “Mukhale nafe, thangwi dzuwa yadoka, pontho kunjaku kwatoma kuswipa.” Natenepo adapita mbakhala nawo.

³⁰Pikhakhala nawo iye pakudyera, iye adakwata mkate mbapereka takhuta kuna Mulungu; tenepo adaumenya mbaagawiza.

³¹Penepo maso awo adafunguka, mbamdzindikira, mbwenye iye adabisika pamaso pawo.

³²Amuna ale adalonga kuna unango na mwanzache mbati, “Ayi hapikhakhala ninga moto wakugaka muna ife tayu, pikhalonga iye nafe mbatitchululira Malemba m'njira mule?”

³³Kabodzi kene iwo adalamuka mbabwerera ku Yerusalemu. Kweneko iwo adagumana anyakutumwa khumi na mbodzi agumanyikana pabodzi na anthu anango,

³⁴pontho akulonga mbati, “Mbuya alamukadi! Aoneka kuna Simoni!”

³⁵Tenepo amuna awiri ale adalongambo pidaachitikira panjira pale, na mule mudadzindikira iwo Mbuya pidamenya iye mkate.

³⁶Amuna awiri ale mbali kulonga, Mbuya adaonekera mwakututumusa pakati pawo mbalonga kuna iwo mbati, “Mtendere mbukhale namwe.”[33]

³⁷Anthu ale adagoswerwa pyakwanga mbanyerezera kuti akhaona mzukwa,

³⁸mbwenye Yesu adalonga mbati, “Mwatani munagopa? Mwatani munapenuka mumtima mwanu?

³⁹Ngayang'anani manja na manyalo angawa, muone kuti ndine ene pano. Ndiphateni muone; thangwi mzukwa nkhabe mnofu na magogodo ninga munandionera imwe muno.”

⁴⁰Pidalonga iye penepi, adaaonesa manja na manyalo ache.[34]

⁴¹Iwo hadakhulupire tayu basi, thangwi ya kukomerwa pikulu pontho na kudodoma. Tenepo adaavunza mbati, “Muli nacho chakuti mudye?”

⁴²Anthu ale adampasa kansomba kakuphika,

⁴³iyembo adakakwata mbakadya pamaso pawo.

⁴⁴Tenepo adalonga kuna iwo mbati, “Penepi ndiye pinthu pikhakupangani ine pandzidzi ukhali ine namwe. Pyonsene pidalembwa pya ine m'mabukhu a mwambo wa Mose, a maprofeti, na m'Masalimo pile pidathema kuti pikwane-kwane.”

⁴⁵Tenepo iye adaaphedza kuvesa mwadidi Malemba.

⁴⁶Adaapanga mbati, “Pinthu pyalembwa m'Malemba mphyakuti: Khristu aone nyatwa, pontho alamuke kuimfa pansiku yachitatu,

⁴⁷pontho kuti kutomera ku Yerusalemu, mphangwa zilalikwe na dzinache kuna madzinza onsene, kuti aleke pyakudawa pyawo, tenepo Mulungu analekerera pyakudawa pyawo.

⁴⁸Imwe ndimwe mboni za pinthu penepi.

⁴⁹Ine ndinakutumizirani chidadumbira Baba kuti anakupasani chile. Mbwenye imwe khalani mumzinda muno kufikirana mutambire mphamvu zakubulukira kudzulu.”

⁵⁰Tenepo Yesu adaatsogolera kubuluka mumzinda mule mpakana ku Betania. Kweneko adakwiza manjache mbaatsanzayisa.

⁵¹Mbali kuatsanzayisa, adalekana nawo, mbakwatwa kwenda kudzulu.[35]

⁵²Iwo adampembedza mbabwerera ku Yerusalemu na kukomerwa kukulu.

⁵³Ndzidzi onsene iwo akhakhala m'Nyumba ya Mulungu mbakuza Mulungu.