Read cisena LUKA 3 Bible Online

LUKA 3 - cisena bible

LUKA 3

¹Chaka chakhumi na chishanu cha Tiberia, Mfumu wa Roma; Pontio Pilato akhali mkulu wa boma wa nthemba ya Yudea; Herodi akhatonga nthemba ya Galilea; mbaleachembo Filipi akhatonga nthemba ya Iturea na nthemba ya Trakoniti; Lisanio akhatonga nthemba ya Abileni;

²Anasi na Kayafa akhali Anyansembe Akulu. Pandzidzi wenewo Mulungu adalonga kuna Yohani, mwana Zekaria, m'thando yatchetcha.

³Tenepo Yohani adenda kunthemba yonsene ya kumkulo wa Yorodani mbalalika kuna anthu mbati, “Lekani pyakudawa pyanu mbamubatizwe, tenepo Mulungu analekerera pyakudawa pyanu.”

⁴Penepi pidachitikadi ninga mudalemberwa ipyo m'bukhu ya mprofeti Yesaya kuti, “Munthu akukhuwa m'thando yatchetcha, akulonga kuti, ‘Msasanyireni njira Mbuya, ndendemezani njira towera iye afambemo.

⁵Maphedi onsene afikhirwe, nthunda na mapiri pyonsene pimwalazwe. Njira zakugongonyeka zindendemezwe, pontho njira zamakolong'ondo zisalazwe.

⁶Anthu onsene konsene kwene anaona chipulumuso cha Mulungu!’ ”

⁷Mwinji udadza dzabatizwa na Yohani. Iye adalonga kuna iwo mbati, “Imwe ana a nyoka! Mbani akupangani kuti munakwanisa kuthawa kutchunyuswa kunafuna dzatumiza Mulungu?

⁸Phatani pinthu pyakuonesa kuti mwalekadi pyakudawa pyanu. Lekani kupilonga mwekha ene kuti Abrahamu ndi kholo wanu. Ndikukupangani kuti Mulungu anakwanisa kusandusa miyalayi kukhala pidzukulu pya Abrahamu.

⁹Mbadzo yasasanyika kugwanda miti pamitsitsi; muti onsene okhonda bala nsapo zadidi unagwandwa mbuponywa pamoto.”

¹⁰Mwinji ule udavunza kuti, “Tinachita tani mphapo?”

¹¹Yohani adaatawira mbati, “Munthu ana mayala mawiri, apasembo abodzi mwanzache wakusowa mayala, pontho munthu ana kudya akugawe.”

¹²Anyamisonkho adadza dzabatizwa mbamvunza Yohani mbati, “Mfunzisi, ifembo tinachita tani?”

¹³Iye adaapanga mbati, “Lekani khomesa msonkho mwakupinza kupiringana mudatongerwa imwe.”

¹⁴Anyankhondo anango adamvunzambo mbati, “Apo ifembo tinachita tani?” Iye adaapanga mbati, “Lekani kukwata kobiri za munthu mwakumthusa penu kupambizira anthu. Kobiri zinapagalwi imwe mungaphata basa mukwane nazo.”

¹⁵Chidikhiro cha anthu chidatoma kukula, onsenembo adatoma kupinyerezera mumtima mwawo kuti penu Yohani akhali Khristu.

¹⁶Tenepo Yohani adaapanga anthu onsene ale mbati, “Ine ndimbakubatizani na madzi, mbwenye unango wamkulu pyakwanga kupiringana ine pano akubwera. Ine sidatheme na kusudzula kwene nkhwaira zache tayu. Iye anakubatizani na Mzimu Wakuchena pontho na moto.

¹⁷Iye ana chisero m'manja mwache chakupepetera nacho mapira. Tenepo anagumanya mapira pambuwapo kaaikha m'chikwa mwache, mbwenye anapisa makupu-kupu pamoto okhonda thima.”

¹⁸Yohani adalalika Mphangwa Zadidi kuna anthu njira zizinji zakusiyana-siyana mbaapanga kuti asanduze makhaliro awo.

¹⁹Mbwenye Yohani adasumulula Herodi mkulu wa boma thangwi adasemba Herodia, mkazi mbaleache, pontho na pinthu pinango pizinji pyakuipa pikhadachita iye.

²⁰Kubuluka penepo Herodi adathimiza kudawa kukulu pakuikha Yohani m'perezo.

²¹Pidamala batizwa anthu onsene, Yesu adabatizwambo. Pikhapemphera iye, kudzulu kudafunguka,

²²pontho Mzimu Wakuchena wakuoneka ninga nkhangaiwa adatchithira pana iye. Tenepo fala idaveka kubulukira kudzulu kuti, “Iwe ndiwe mwananga wapamtima. Ndakomerwa nawe pyakwanga pene.”

²³Pikhali Yesu ninga pyaka makumatatu adatoma basache. Anthu akhanyerezera kuti akhali mwana Yosefe, ule akhali mwana Eli,

²⁴mwana Matati, mwana Levi, mwana Meleki, mwana Yanai, mwana Yosefe,

²⁵mwana Matatia, mwana Amose, mwana Nahumu, mwana Hesili, mwana Nagai,

²⁶mwana Mahati, mwana Maati, mwana Semeni, mwana Yoseke, mwana Yoda,

²⁷mwana Yohanani, mwana Resa, mwana Zerubabele, mwana Shealatiele, mwana Neri,

²⁸mwana Meleki, mwana Adi, mwana Kosamu, mwana Elimadama, mwana Eri,

²⁹mwana Yoswa, mwana Eliezere, mwana Yorimu, mwana Matati, mwana Levi,

³⁰mwana Simioni, mwana Yuda, mwana Yosefe, mwana Yonamu, mwana Eliakimu,

³¹mwana Melea, mwana Mena, mwana Matata, mwana Natani, mwana Davite,

³²mwana Yese, mwana Obedi, mwana Boazi, mwana Salimoni, mwana Nashoni,

³³mwana Aminadabu, mwana Adimini, mwana Arini, mwana Hezironi, mwana Perezi, mwana Yuda,

³⁴mwana Yakobo, mwana Isake, mwana Abrahamu, mwana Tera, mwana Nahori,

³⁵mwana Serugi, mwana Reu, mwana Pelege, mwana Eberi, mwana Shela,

³⁶mwana Kainani, mwana Aripakisadi, mwana Semu, mwana Nowa, mwana Lameki,

³⁷mwana Metusela, mwana Enoki, mwana Yaredi, mwana Mahalalele, mwana Kenani,

³⁸mwana Enosi, mwana Seti, mwana Adamu, mwana Mulungu.