Read cisena LUKA 5 Bible Online

LUKA 5 - cisena bible

LUKA 5

¹Nsiku inango Yesu akhaimira pagombe ya nyanza ya Genesareti, mwenemo anthu akumpsinyiza, towera ave mafala a Mulungu.

²Iye adaona miyadiya miwiri ili pagombepo. Amisiri akhadaisiya penepo mbakatsuka makokotawo.

³Yesu adapakira m'mwadiya ubodzi, ule ukhali wa Simoni mbampanga kuti augwinyire m'madzi pang'ono kubuluka pamtundapo. Yesu adakhala m'mwadiyamo mbafunzisa anthuwo.

⁴Pidamala Yesu kulonga, adapanga Simoni mbati, “Gwinyira mwadiya kwakuzwika, pontho iwe na anzako mugwesere kokotanu kuti muphe nsomba.”

⁵Simoni adamtawira mbati, “Mbuya, ife taphuphudza mosiku onsenewu na kuphata basa, nee chibodzi chapha ife. Mbwenye podi ndimwe mwalonga, ndinati ndiigwesere.”

⁶Iwo adaigweseradi mbapha nsomba zizinji zene mwakuti kokota ikhali chifupi kuthaluka.

⁷Natenepo adakhupha anzawo a m'mwadiya unango ule kuti adze dzaaphedza. Iwo adadzadi mbadzaza miyadiya yonsene miwiri mwakuti ikhali chifupi kulilima.

⁸Pidaona Simoni Peturo pinthu pidachitikapyo, adagodama pansi pamaso pa Yesu mbalonga mbati, “Mbuya, bulukani pyanu pana ine! Thangwi ndine nyakudawa!”

⁹Peturo pabodzi na anzache akhali na iye ale adadodoma pyakwanga thangwi ya kuinjipa kwa nsomba zikhadapha iwozo.

¹⁰Yakobo na Yohani, ana Zebedeo, anzache a Simoni adadodomambo. Yesu adapanga Simoni mbati, “Leka gopa, kutomera lero kwenda m'tsogolo unakhala nyakusodza anthu.”

¹¹Iwo adakweyera miyadiyayo kumtunda, tenepo adasiya pyonsene mbatewera Yesu.

¹²Pikhali Yesu kuluwani inango, adagumanikana na nyamatanya. Pidaona iye Yesu, adapiponya pansi mbampempha mbati, “Mbuya, imwe mungapifuna, munakwanisa kundichenesa.”[4]

¹³Yesu adafuthula mkono wache mbamphata mbatawira mbati, “Ndinapifuna, chena!” Kabodzi na kabodzi matanya adammalira munthu ule.

¹⁴Yesu adampanga mbati, “Leka kapanga munthu na mbodzi ene, mbwenye ndokoletu kuna nyansembe akakuone; nakuti onsene akapidziwe kuti wawangadi, kapereke nsembe zidatonga Mose zile.”

¹⁵Kwache mbiri ya Yesu idaveka pikulu pene mwakuti mwinji udadza dzamvesera na kuwangiswa utendawo.

¹⁶Mbwenye kazinji kene Yesu akhaenda kumbuto za yekha ene mbakapemphera.

¹⁷Nsiku inango, pikhafunzisa Yesu, Afarisi na afunzisi anango a mwambo ale, adadza kubulukira kumidzi yonsene ya ku Galilea, Yudea pontho na a ku Yerusalemu akhakhala pansi penepo. Mphamvu za Mbuya zikhali na Yesu zakuti awangise nazo atenda.

¹⁸Amuna anango adadza na nyamfutete pamakha mbapiyesera kupita naye m'nyumba kuti akamtule pamaso pa Yesu.

¹⁹Pidasowa iwo njira yakumpitisira nayo m'nyumbamo thangwi ya mwinji, adakwira naye pansoyi mbabulusa mapali anango mbamtchithisira pamakha m'gulumo mbamfikisa pamaso pa Yesu.

²⁰Pidaona Yesu chikhulupiro chawocho, adalonga kuna nyamfuteteyo mbati, “Shamwali, pyakudawa pyako pyalekererwa.”

²¹Afarisi na afunzisi a mwambo adatoma kupivunza okha ene mbati, “Mbani weneyu anashola Mulunguyu? Mbani anakwanisa kulekerera pyakudawa, ayi si Mulungu yekha tayu?”

²²Yesu adadziwa pikhanyerezera iwo mbalonga kuna iwo mbati, “Mwatani munanyerezera pinthu ninga penepi?

²³Chifupi ntchipi, kulonga kuti, ‘Pyakudawa pyako pyalekererwa,’ penu, ‘Lamuka ufambe’?

²⁴Mbwenye ndinakupangizanidi kuti Mwana Munthu ana utongi wakulekerera pyakudawa padziko yapansi!” Tenepo iye adalonga kuna nyamfuteteyo mbati, “Ndikukupanga; lamuka, thukula makhako uende kwanu!”

²⁵Kabodzi na kabodzi munthu ule adaimira, anthu onsene mbamuona. Iye adathukula makhache akhadagonera iye mbaenda kwawo uku akukuza Mulungu.

²⁶Anthu onsene adadodoma pyakwanga. Na mantha pikulu iwo adakuza Mulungu mbati, “Lero taona pinthu pyakudodomesa!”

²⁷Kubuluka penepo Yesu adabuluka mbaona nyamisonkho, dzinache Levi, ali khale m'nyumba ya misonkho. Yesu adalonga kuna iye mbati, “Nditewere.”

²⁸Levi adalamuka, tenepo adasiya pinthu pyonsene mbamteweradi.

²⁹Kubuluka penepo Levi adasasanyira Yesu phwando ikulu kumsuwo kwache. Pakati pa anyakuchemerwa kuphwandoko pakhali anyamisonkho azinji pabodzi na anthu anango.

³⁰Afarisi anango, maka-maka ale akhali afunzisi a mwambo, adadungunya kuna anyakufunza a Yesu mbati, “Munadyeranji na kumwa pabodzi na anyamisonkho pontho na anyakudawawa?”

³¹Yesu adaatawira mbati, “Anthu akuwanga nkhabe funa ng'anga tayu, mbwenye atenda.

³²Ine sidadzere dzachemera anthu akulungama tayu, mbwenye anyakudawawa kuti aleke pyakudawa pyawo.”

³³Anthu anango adalonga kuna Yesu mbati, “Anyakufunza a Yohani ambapemphera na kupimana kudya kazinji kene, pontho anyakufunza a Afarisi ambachita chibodzi-bodzi, mbwenye anyakufunzanuwa ambalila kudya na kumwa kwene pyawo.”

³⁴Yesu adaatawira mbati, “Ayi mungachitise anyakuchemerwa kuphwando yakukazhali kupimana kudya, nyakusembayo mbali ponthopo? Nkhabe tayu!

³⁵Mbwenye ndzidzi unafika unafuna dzabuluswa nyakusembayo pakati pawo, tenepo iwo anapimana kudya.”

³⁶Yesu adaapanga pontho msangani mbati, “Nkhabe munthu angang'ambe chigamba panguwo itswa mbachisonera panguwo yakale. Angachita tenepo, iye ambang'amba nguwo itswa, pontho chigamba cha panguwo itswa nkhabe themerana na panguwo yakale tayu.

³⁷Pontho nkhabe munthu ambatsanyulira vinyu wachinchino m'mabudu a nthembe akuphatisirwa kale basa tayu, thangwi vinyu wachinchinoyo anatumbula mabuduwo. Tenepo vinyu anatayika pontho mabuduwo anavungika.

³⁸Pyadidi pyache vinyu wachinchino atsanyulirwe m'mabudu achinchinombo!

³⁹Pontho munthu nkhabe funa pontho vinyu wachinchino angamala kumwa vinyu wakale tayu, thangwi ambalonga kuti wakale ngwakudzipa.”