Read cisena LUKA 6 Bible Online

LUKA 6 - cisena bible

LUKA 6

¹Yesu akhagwanda na m'minda ya tirigu pa Nsiku Yakupuma. Tenepo anyakufunzache adatoma kukwedzula ngala za tirigu, adamting'inda m'manja mwawo mbadya.

²Afarisi anango adavunza mbati, “Munaphatiranji pinthu pinakhondesa mwambo wathu kupiphata pa Nsiku Yakupuma?”

³Yesu adaatawira mbati, “Kadi imwe hamudawerenge tayu pidachita Davite na anzache ndzidzi udava iwo njala?

⁴Iye adapita m'Nyumba ya Mulungu mbakwata mikate yakuperekwa kuna Mulungu, adaidya mbapasambo anthu ache. Pikhali pinthu pyakudawira mwambo kuti munthu ene pyache, kupambula anyansembe, adye pyache mikate yeneyo.”

⁵Tenepo Yesu adalonga kuna iwo mbati, “Mwana Munthu ndi Mbuya wa Nsiku Yakupuma.”

⁶Pa Nsiku inango Yakupuma, Yesu adenda kafunzisa m'nyumba yakupemphereramo. Mwenemo mukhali munthu wakulamala dzanja yamadyo.

⁷Afunzisi anango a mwambo pabodzi na Afarisi anango akhasaka mathangwi akumsumira nawo Yesu thangwi yakuchita pinthu pyakudawika. Natenepo adamuyang'ana naye phanamana kuti aone ngakhala anawangisa pa Nsiku Yakupuma.

⁸Mbwenye Yesu adadziwa manyerezero awo. Tenepo adapanga munthu ule mbati, “Lamuka udze kutsogolo kuno.” Munthu ule adalamukadi mbakaimira kutsogoloko.

⁹Tenepo Yesu adalonga kuna iwo mbati, “Ndikuvunzeni. Ayi mwambo wathu umbatitawirisa kuchitanji pa Nsiku Yakupuma? Kuphedza, penu kuchita pyakudawika? Kupulumusa moyo wa munthu, penu kuupha?”

¹⁰Iye adayang'ana-yang'ana anthu onsenewo mbalonga[5] kuna munthuyo mbati, “Futhula dzanjako.” Iye adachitadi tenepo, dzanjacheyo idabwerera ninga mwakale.

¹¹Anthu ale adazhangali pyakwanga mbaverana pyakuti achite na Yesu.

¹²Pandzidzi wenewo, Yesu adenda kuphiri kapemphera mbaphuphudza na kupemphera kuna Mulungu.

¹³Pidachena kunja, iye adachemera anyakufunzache mbasankhulapo khumi na awiri, adapasa iye dzina yakuti mbanyakutumwa ale.

¹⁴Simoni, ule adapasa iye dzina yakuti Peturo, na mbaleache Andrea, Yakobo na Yohani, Filipi na Batolomeo,

¹⁵Mateo na Tomasi, Yakobo mwana Alufeo, na Simoni (mbodzi wa Ayuda wakufuna kudzesa utumbe kudziko ya Israele),

¹⁶Yudasi mwana Yakobo, na Yudasi Iskarioti akhafuna dzapereka Yesu kuna anyamalwache ule.

¹⁷Pidadza Yesu pabodzi na anyakutumwa kubulukira kuphiri kule, adaimira pambuto yakusowa pitunda pabodzi na mwinji wa anyakufunzache. Mwinji ukulu ukhali penepo kubulukira ku Yudea konsene, ku Yerusalemu, pontho ku Turo na Sidoni, mizinda ya m'khundu mwa nyanza yamunyu.

¹⁸Iwo adadza dzamvesera, pontho dzawangiswa utendawo. Anyakusanyiswa na mizimu yakuipa ale adawangiswambo.

¹⁹Anthu onsene adayesa-yesa kumkhuya thangwi mphamvu zikhabuluka muna iye mbiziwangisa anthu onsene.

²⁰Yesu adayang'ana anyakufunzache mbaapanga mbati, “Akutsanzaya ndimwe anyakutcherenga; thangwi Ufumu wa Mulungu ngwanu!

²¹Akutsanzaya ndimwe munava njala ndzidzi uno, thangwi munakhuta! Akutsanzaya ndimwe munalira ndzidzi uno, thangwi munasekera!

²²“Akutsanzaya ndimwe munachitirwa pyaumalwa na anthu mbakukhondani na kukutikanani, mbakulongani kuti ndimwe akuipa, thangwi ya Mwana Munthu.

²³Penepi pingachitika, komerwani, pontho muvine na kutsanzaya, thangwi mwakoyerwa mfupo ukulu kudzulu. Kumbukani kuti makolo a anthu enewa anafuna dzakusanyisani ale adachita chibodzi-bodzi kuna maprofeti.

²⁴“Mbwenye muna dzedze ndimwe anyakufuma, thangwi mwatambiriratu pyakukutsanzayisani.

²⁵Muna dzedze ndimwe anakhuta ndzidzi uno, thangwi munakhala na njala. “Muna dzedze ndimwe anakomerwa ndzidzi uno, thangwi munatsukwala mbamulira.

²⁶“Muna dzedze ndimwe anthu onsene angakusimbani, thangwi makolo awo adachita chibodzi-bodzi kuna maprofeti akunama.

²⁷“Mbwenye imwe anyakundivesera, ndikukupangani kuti afuneni anyamalwanu, chitani udidi kuna anyakukuzondani.

²⁸Tsanzayisani anyakukutembererani, pontho apempherereni anyakukuboneresani.

²⁹Ngakhala munthu unango anakumenya phutu ibodzi, mpase amenye inangoyo. Munthu angakupokosera mkhanjo wako, mpase pontho na mayalako ene.

³⁰Munthu anakupempha chinthu, mpase. Pontho munthu angakwata chinthu chako, leka kumbwezesa.

³¹Chitirani anthu anango pinthu pimbafuna imwe kuti iwo akuchitireni.

³²“Ngakhala mumbaafuna anthu okha ambakufunanimbo ale, munadikhira kutambira mfupo wanji mphapo? Na anthu enembo akudawa, ambafuna ale ambaafunambo.

³³Pontho mungachita udidi kuna anthu okha ambakuchitiranimbo udidi ale, mfupo wache ngwanji unafuna imwe dzatambira? Na anthu enembo akudawa ambachitambo tenepo.

³⁴Ngakhala munafiyalisa anthu okha ambadziwa imwe kuti anakubwezerani ale, mfupo wache ngwanji unafuna imwe dzatambira? Podi na anyakudawa enembo ambafiyalisa anyakudawa anzawo, towera abwezere pyontho-pyonthopyo.

³⁵Tayu! Afuneni anyamalwanu pontho achitireni udidi. Fiyalisani mbamukhonda dikhira kubwezerwa. Tenepo munatambira mfupo ukulu, mbamukhala ana a Mulungu Wakudzulu-dzulu. Thangwi iye ambachitira udidi anthu akuipa, pontho na okhonda pereka takhuta ene.

³⁶Khalani na nsisi ninga zina Babanu.

³⁷“Lekani tonga mseru anthu anango, tenepo Mulungu nee anakutonganimbobi. Lekani longa kuti anthu anango akonwa, tenepo Mulungu nee analongambo kuti mwakonwa tayu. Lekererani anthu anango, tenepo Mulungu anakulekereranimbo.

³⁸Perekani kuna anango, tenepo Mulungu anakupasanimbo. Iye anakhuthulira m'manja mwanu mdida wakudzala, wakutsindirika, pontho wakutayikira. Mdida unapasa imwe anango, Mulungu anaphatisa basa mdida onthowo kupasambo imwe.”

³⁹Yesu adaapanga msangani mbati, “Boli-boli nkhabe phate nsenji boli-boli mnzache tayu, thangwi angachita tenepo onsene uwiriawo anagwera m'dzenje.

⁴⁰Nkhabe nyakufunza anapiringana mfunzisi wache tayu; mbwenye iye angamalisa kufunza kwacheko, anakhalambo ninga mfunzisi wacheyo.

⁴¹“Unayang'aniranji chitsotso chili m'diso mwa mwanzako mbukhonda nyerezera chigo chili m'diso mwakomo?

⁴²Unalonga tani kuna mwanzako kuti, ‘Mwanzanga, ndikubuluse chitsotso chili m'diso mwako,’ mbuchimwana kuona chigo chili m'diso mwakomo? Mfaka-fakawe! Toma wabulusa chigo chili m'diso mwakocho, natenepo unakwanisa kuona mwadidi mbubulusa chitsotso chili m'diso mwa mwanzakocho.

⁴³“Muti wadidi nkhabe bala nsapo zakuipa tayu. Chibodzi-bodzi, muti wakuipa nkhabe bala nsapo zadidi tayu.

⁴⁴Miti yonsene imbadziwika na nsapo zimbabala iyo. Imwe nkhabe tchola nkhuyu m'mikandankhuku, penu kutchola mfesa m'muti wamphinimini tayu.

⁴⁵Munthu wadidi ambalonga pinthu pyadidi pimbakoya iye mumtima mwache; munthu wakuipa ambalonga pyakuipa kubulukira m'pyakuipa pimbakoya iye mumtima mwache. Thangwi mulomo umbalonga pinthu pyakudzala mumtima.

⁴⁶“Munandichemereranji, ‘Mbuya, Mbuya,’ mbamukhonda chita pinalonga ine?

⁴⁷Ndinakuonesani kukhala kwachita munthu wakudza kuna ine, ule ambava mafalanga na kuachita.

⁴⁸Iye akhala ninga munthu angafuna kumanga nyumba. Iye ambakumba pansi mwakuzwika mbaphata phanzwi, penepo ambamanga maziko a nyumbache. Pidakuka mkulo mbutayikira, udamenya nyumbayo, mbwenye iyo hidatekenyeke tayu, thangwi ikhadamangwa mwadidi.

⁴⁹Mbwenye ule anava mafalanga mbakhonda kuachita, akhala ninga munthu wakumanga nyumba padzulu-dzulu okhonda zwikisa maziko. Madzi akutayikira a mumkulo adamenya nyumbayo. Natenepo iyo idagomoka mbisakaliratu kabodzi kene.”