Read cisena LUKA 7 Bible Online

LUKA 7 - cisena bible

LUKA 7

¹Pidamala Yesu kulonga pinthu pyonsenepi kuna anthu, adenda ku Kafaranao.

²Mkadamu wa anyankhondo dzana akhali na nyabasache wapamtima. Nyabasayo akhadwala chifupi imfa.

³Pidava mkadamuyi pya Yesu, adatuma akulu-akulu a Chiyuda kampempha kuti adze dzamuwangisira nyabasacheyo.

⁴Pidafika iwo kuna Yesu, adampempha mwakumbulumundira mbati, “Munthuyu athemadi kuti mumphedze.

⁵Iye ambaafuna anthu athu, pontho iye ene adatimangira nyumba yakupemphereramo.”

⁶Natenepo Yesu adenda nawo. Pikhali Yesu chifupi kufika panyumba ya mkadamu ule, iye adatuma ashamwali ache kuna Yesu kampanga mbati, “Mbuya, lekani kupiboneresa, thangwi ine sidatheme tayu kuti imwe mukapite m'nyumba mwanga.

⁷Pontho ine ndidanyerezera kuti sidatheme kudza ndekha ene kuna imwe tayu. Mulile longa kwene, nyabasanga anawanga.

⁸Ine pontho, ndine munthu wakutongwa na akadamu anga. Ine ndina anyankhondo anango ambatonga inembo. Unango ndingampanga kuti, ‘Ndoko!’ Iye ambaendadi; apo ndingapangambo unango kuti, ‘Idza kuno!’ Iye ambadzadi; apo ndingapanga nyabasanga kuti, ‘Chita chakuti!’ Iye ambachitadi.”

⁹Pidava Yesu mafala enewa, adadodoma nawo. Iye adazungunuka mbapanga mwinji ukhamtewerawo mbati, “Ndimomwene, handidagumana tayu munthu wakukhala na chikhulupiro ninga chenechi, podi na mu Israele mwene.”

¹⁰Amuna akhadatumwa ale adabwerera kumusa kwa mkadamuyo mbagumana nyabasayo awanga.

¹¹Sindzidzi nkhubuluka penepo[6] Yesu na anyakufunzache pabodzi na mwinji ukulu, adenda kuluwani ya Naini.

¹²Pidasala Yesu chifupi kufika pamsuwo wa luwaniyo, adagumanikana na maliro. Nyakufayo akhali mphale. Mache mphaleyo akhali mamfelwa, pontho mwanache akhali yekha eneyo basi. Anthu azinji a muluwanimo akhali naye pabodzi.

¹³Pidamuona Mbuya, adava naye nsisi pikulu, mbampanga mbati, “Leka lira.”

¹⁴Yesu adadza chifupi mbakhuya bauluyo, tenepo amuna adathukula bauluyo adaimira. Tenepo Yesu adalonga mbati, “Mphalewe, ndikukupanga kuti lamuka!”

¹⁵Nyakufayo adalamuka mbakhala na matako mbatoma kulonga, tenepo Yesu adampereka kuna mache.

¹⁶Anthu onsene adagoswerwa mbalemedza Mulungu. Iwo adalonga mbati, “Mprofeti Wamkulu aoneka pakati pathu. Mulungu adza dzapulumusa anthu ache.”

¹⁷Mbiri ya Yesuyi idaveka m'dziko yonsene ya Yudea, na kunthemba zonsene zakuzungulira Yudea.

¹⁸Anyakufunza a Yohani adapanga Yohani pinthu pyonsenepyo. Natenepo iye adachemera anyakufunzache anango awiri,

¹⁹mbaatuma kuna Mbuya kamvunza mbati, “Ayi akhalonga Yohani kuti anabwera ule ndimwe, penu tidikhire unango ene?”

²⁰Pidafika iwo kuna Yesu, adampanga mbati, “Yohani Nyakubatiza atituma kuna imwe kuti tidzakuvunzeni ngakhala ndimwedi akhalongwa kuti anabwera, penu tidikhire unango.”

²¹Pandzidzi wenewu Yesu akhawangisa utenda wa anthu azinji, na kubulusa mizimu yakuipa, mbafungula pontho maso a maboli-boli azinji.

²²Natenepo iye adatawira amuna adatumwa na Yohani ale mbati, “Bwererani mbamukampange Yohaniyo pyava na pyaona imwepi. Maboli-boli akuona, anyamfutete akufamba, anyamatanya akucheneswa,[7] madodo akuva, anyakufa akulamuka, pontho Mphangwa Zadidi zikulalikwa kuna anyakutcherenga.

²³Ngwakutsanzaya munthu ule anakhonda taya chikhulupiro, thangwi ya pinachita ine!”

²⁴Pidabuluka amuna akhadatumwa na Yohani ale, Yesu adatoma kulonga kuna mwinji ule pya Yohani mbati, “Pikhaenda imwe kuna Yohani kuthando yatchetcha, chikhadikhira imwe kaona ninji? Mtete wakutekenyeka na mphepo?

²⁵Mudenda kaonanji? Munthu wakuvala nguwo zakufewa? Nkhabe, anthu akuvala ninga tenepo mbachita tsenzo ambakhala m'nyumba zachifumu.

²⁶Ngandipangeni, mudenda kaonanji? Mprofeti? Andedi, mbwenye mudaona wakupiringana mprofeti.

²⁷Thangwi Yohani ngule analongwa m'Malemba kuti, ‘Mulungu adalonga kuti ndinatuma nyakutumwanga patsogolo pako dzakusasanyira njira.’

²⁸Ndikukupangani kuti pakati pa anthu onsene adabalwa pansi pano, nkhabepo unango wamkulu kupiringana Yohani. Mbwenye wamng'onoletu mu Ufumu wa Mulungu ngwamkulu kupiringana iye.”

²⁹Anthu onsene, pabodzi na anyamisonkho ene, adava mafala a Yesu, pontho adavera matongero akulungama a Mulungu, thangwi iwo adabatizwa na Yohaniyo.

³⁰Mbwenye Afarisi na afunzisi a mwambo adakhonda pikhafuna kuachitira Mulungu, thangwi iwo adakhonda kubatizwa na Yohani.

³¹Yesu adathimiza kulonga mbati, “Chinchino ndinaasangiza nanji anthu a mwaka uno? Iwo akhala ninganji?

³²Iwo akhala ninga ana akukhala pamsika. Gulu ibodzi mbilonga kuna gulu inango kuti, ‘Tidakuimbirani nyimbo zakukazhali nazo, mbwenye imwe nee mudavina tayu! Tidakuimbirani nyimbo za pamaliro, mbwenye imwe nee mudalira tayu!’

³³Yohani Nyakubatiza adadza mbapimana kudya mkate na kumwa vinyu, tenepo imwe mudamulonga kuti iye ana mzimu wakuipa!

³⁴Mwana Munthu adadza mbadya na kumwa, tenepo imwe mudalonga kuti, ‘Ngayang'anani munthu wamtima, pontho dombeyi, shamwali wa anyamisonkho na anyakudawa!’

³⁵Mbwenye onsene anazitambira nzeru za Mulungu ale, ambaonesa kuti nsakuonadi.”

³⁶Munthu unango wa m'gulu ya Afarisi adatchitcha Yesu kuti akadye naye. Natenepo Yesu adenda kunyumba ya mfarisiyo mbakakhala pansi kuti adye.

³⁷M'mudzimo mukhali mkazi wa makhaliro akudawika. Iye adava kuti Yesu akhadya m'nyumba ya mfarisiyo, natenepo adadza na mafuta akununkhira mumtete wakusasanywa na alabasta,

³⁸mbaimira kunduli, kumanyalo a Yesu uku akulira. Iye adatotesa manyalo a Yesu na misozi yache, mbaapukuta na tsisi yache. Adampsompsona manyalowo mbaadzozeka mafuta ale.

³⁹Pidapiona mfarisi adatchitcha Yesu kudya ule, adalonga yekha ene mbati, “Ngakhala munthuyu ndi mprofeti, mbadamdziwa kuti mkazi anamkhuyayu mbani, pontho ngwa makhaliro akutani; kuti ngwakudawika.”

⁴⁰Yesu adamtawira mbati, “Simoni, pana chinthu chakuti ndikupange.” Simoni adalonga mbati, “Ndipangeni, Mfunzisi.”

⁴¹Yesu adampanga mbati, “Anthu awiri adafiyali kobiri zasiliva kuna nyakufiyalisa kobiri. Mbodzi adafiyali kobiri madzana mashanu, unangoyo kobiri makumashanu.

⁴²Na thangwi yakuti iwo akhali nkhabe kobiri zakumbwezera mwenechiroyo, iye adaalekerera onsene awiri. Mbani wa awiriwa anamfuna pikulu?”

⁴³Simoni adalonga mbati, “Ndikunyerezera nyakulekererwa zizinjiyo.” Yesu adampanga mbati, “Walonga pyadidi.”

⁴⁴Tenepo Yesu adachewukira mkazi ule, mbapanga Simoni mbati, “Ayi ukumuona mkaziyu? Ndapita m'nyumba mwako muno, mbwenye iwe hudandipasa madzi akutsukira manyalo anga tayu. Mbwenye iye atotesa manyalo anga na misozi mbaapukuta na tsisi yache.

⁴⁵Iwe hudandimwenyike na kundimpsompsona tayu, mbwenye chipitire changa muno iye hadaleke kumpsompsona manyalo anga tayu.

⁴⁶Iwe hudadzozeke msolo wanga na mafuta tayu, mbwenye iye adzozeka manyalo anga na mafuta akununkhira.

⁴⁷Natenepo ndikukupanga kuti kundifuna kukulu kwaonesa iyeku kukuonesadi kuti pyakudawa pyache pizinji pyalekererwa. Mbwenye munthu wakulekererwa mwakuchepa ambaonesambo kufuna kwakuchepa.”

⁴⁸Tenepo Yesu adampanga mkazi ule mbati, “Pyakudawa pyako pyalekererwa.”

⁴⁹Anthu anango akhadya na iye adatoma kuvunzana okha ene mbati, “Mbani weneyu analekerera na pyakudawa peneyu?”

⁵⁰Yesu adampanga mkazi ule mbati, “Ndoko na mtendere, chikhulupiro chako chakupulumusa.”