Read cisena LUKA 8 Bible Online

LUKA 8 - cisena bible

LUKA 8

¹Kubuluka penepo Yesu adafamba kumaluwani na kumidzi mbalalika Mphangwa Zadidi za Ufumu wa Mulungu. Anyakufunza khumi na awiri ale adenda pabodzi naye,

²pabodzi na akazi anango akhadabulusa iye mizimu yakuipa na kuawangisa utendawo. Akaziwo mbawa: Maria wakuchemerwa Magadala, ule akhadabuluswa mizimu yakuipa minomwe,

³Yohana, mkazache Chuza, mkadamu wa nyumba ya Herodi, Suzana, na akazi anango azinji ale akhaphatisa basa pinthu pyawo kuphedza napyo Yesu pabodzi na anyakufunzache.

⁴Anthu akhathimiza kudza kuna Yesu kubulukira mudzi na mudzi. Pidagumanyikana mwinji ukulu, Yesu adalonga msangani mbati:

⁵“Pidachitwa na munthu unango, ule adenda kawaza mbewu m'munda mwache. Pikhawaza iye mbewuzo, zinango zidagwera m'njira, mbizipondedzwa, pontho mbalame adazidzonkhona mbewuzo.

⁶Mbewu zinango zidagwera pambuto yachimwala-mwala, tenepo pidabuluka umera, udauma thangwi matakawo akhali nkhabe mtota.

⁷Mbewu zinango zidagwera m'matenthere a minga, ale adakula pabodzi na mbewuzo mbaziphimbira.

⁸Mbewu zinango zidagwera pamataka adidi. Umera udakula mbuikha maso dzana kupiringana zidawazwa zile.” Yesu adamalisa na kulonga penepi mwakugaluza fala mbati, “Ule ana makutu akuva, mbave!”

⁹Anyakufunza a Yesu adamvunza kuti msanganiwu ukhalonganji.

¹⁰Natenepo iye adaapanga mbati, “Mulungu adakudziwisani pinthu pya Ufumu wache pikhali pyakubisika pile. Mbwenye anthu anango ambapiva na m'misangani, towera ayang'ane, mbwenye aleke kuona, pontho ave, mbwenye aleke kuvesesa.

¹¹“Msanganiwu ukulonga tenepa: Mbewu zile ndi mafala a Mulungu.

¹²Mbewu zakugwera m'njira zile mbanthu akuva mafala a Mulungu. Kwache Satana ambabwera dzabulusa mafala ale mumtima mwawo, gopesera kuti anthuwa anakhulupira mafalawo mbapulumuka.

¹³Mbewu zidagwera pamataka a pambuto ya chimwala-mwala zile mbanthu akuva mafala a Mulungu, mbaatambira na kutsanzaya, mbwenye mafalawo hambamera mitsitsi muna iwo tayu. Iwo ambakhulupira kwene ndzidzi wakuchepa basi, tenepo mayesero angadza iwo ambagweratu.

¹⁴Mbewu zidagwera m'matenthere a minga zile mbanthu akuva mafala a Mulungu, mbwenye angamala penepo, nyatwa, mfuma na tsenzo pya moyo uno pimbaachimwanisa kukula. Tenepo iwo nkhabe kola tayu.

¹⁵Mbwenye mbewu zidagwera pamataka adidi zile mbanthu ale ambavadi mafala a Mulungu, mbaakoya na mtima wakukhulupirika pontho wadidi, mbapirira kufikirana kubala nsapo.

¹⁶“Nkhabe munthu ambagasa nyale mbaigudumira na chitomba, penu kuibisa m'khungusiri mwa talimba tayu. Mbwenye ambaiikha pakwecha, towera anthu akupita m'nyumbamo aone cheza chache.

¹⁷“Thangwi pinthu pyonsene pyakubisika pinabuluswa pakwecha. Pinthu pyakugudumirwa pinafununkhulwa mbapioniwa pakwecha.

¹⁸“Natenepo nyerezerani mwadidi munaavera imwe mafala, thangwi munthu ana pinthu kaleyo anapaswa pizinji; mbwenye ule nkhabe chinthu, anapokoserwa na chinthu chakuchepa chene chinanyerezera iye kuti ali nacho.”

¹⁹Mache na abale ache Yesu adadza kuti amuone, mbwenye iwo adapichimwana kufika chifupi naye thangwi ya mwinji.

²⁰Munthu unango adapanga Yesu mbati, “Manu na abale anu ali panjapa, anafuna aonane namwe.”

²¹Yesu adatawira mbati, “Mama na abale anga ngale ambava mafala a Mulungu mbachita pinalonga iwo.”

²²Nsiku inango Yesu adapakira m'mwadiya pabodzi na anyakufunzache mbaapanga mbati, “Tendeni tiwambukirembo mtunda unango wa nyanza.” Natenepo adalamuka ulendo wawo.

²³Pikhaenda iwo na m'mwadiyawo, Yesu adagona chitulo. Vumbu-vumbu chonzi chakugoswa chidagundika panyanzapo. Mwadiya udatoma kudzala madzi mwakuti anthuwo akhali panyatwa ikulu.

²⁴Anyakufunza adenda kuna Yesu kamulamusa mbati, “Mbuya, Mbuya! Tili chifupi kufa ife!” Yesu adalamuka mbamatamisa mphepo na mabimbiwo. Ipyombo pidalekadi, tenepo pakhali kumatama kukulu.

²⁵Kubuluka penepo Yesu adavunza anyakufunza ale mbati, “Chikhulupiro chanu chili kupi?” Mbwenye iwo adadodoma mbagoswerwa, mbalonga unango na mwanzache mbati, “Weneyu mbani? Anatonga mphepo na mabimbi ene, ipyombo mbapimveradi!”

²⁶Iwo adawambukira kunthemba ya ku Gerasa[8] ile idayang'anisana na Galilea.

²⁷Pidafika Yesu pamtunda, adagumanikana na munthu wa kuluwani yonthoyo wakuphatwa na mzimu wakuipa. Ndzidzi ukulu iye akhakhala chipezi-pezi, pontho nkhabe khala m'nyumba tayu, mbwenye akhakhala kumadzimba a masiye.

²⁸Pidaona iye Yesu, adalira pikulu mbagwa pansi pa manyalo ache, mbakhuwa mwakugaluza fala mbati, “Imwe Yesu, mwana Mulungu Wakudzulu-dzulu, munafunanji na ine? Ndikukupemphani kuti muleke kunditchunyusa!”

²⁹Adalonga tenepo thangwi Yesu akhadatonga mzimu wakuipawo kuti ubulukemo muna munthu ule. Kazinji kene ungamphata mzimu wakuipawo, anthu akhammanga na njema manja na miyendo ninga nyaperezo. Mbwenye akhathumula njema, pontho mzimu wakuipa ukhamyendesa kutsanga.

³⁰Yesu adamvunza mbati, “Dzinako ndiwe ani?” Iye adalonga mbati, “Ndine Mwinji.” Iye adalonga tenepa, thangwi mizimu yakuipa izinji ikhadapita muna iye.

³¹Mizimuyo idapempha Yesu kuti aleke kuitayira ku Chiphompho chikulu.

³²Chifupi na penepo pakhadya mkumbi ukulu wa nkhumba m'khundu-khundu mwa phiri. Mizimu yakuipa ile idapempha Yesu kuti aitawirise kapita muna nkhumbazo, iyembo adaitawirisa.

³³Tenepo mizimu yakuipa ile idabuluka muna munthu ule mbikapita muna nkhumbazo. Mkumbi onsene wa nkhumba ule udatchithira pamatelero na kuthamanga mbukagwera m'nyanza mbubira.

³⁴Pidaona amakabuswa a nkhumbazo pikhadachitikapyo, adathawa mbakapangambo anthu kuluwani na kumidzi.

³⁵Anthu adenda kaona pikhadachitikapyo. Pidafika iwo kuna Yesu, adamgumana munthu akhadabuluswa mizimuyo akhuzumuka, pontho avala mbakhala pansi pa manyalo a Yesu. Anthu onsenewo adagoswerwa.

³⁶Anthu akhadapionawo, adapangambo anthuwo kuwangiswa kudachita munthuyo.

³⁷Tenepo anthu onsene a kunthemba yeneyo adapanga Yesu kuti aende pyache thangwi akhali na mantha pyakwanga. Natenepo Yesu adapakira m'mwadiya mbabulukako.

³⁸Munthu akhadabuluswa mizimu yakuipa ule adapempha Yesu mbati, “Nditawirisenimbo ndiende namwe.” Mbwenye Yesu adamgwinya mbampanga mbati,

³⁹“Bwerera, ndoko kwanu ukalonge pyakuchitira Mulungu.” Natenepo munthu ule adenda na muluwani monsene mbalonga pidamchitira Yesu.

⁴⁰Pidabwerera Yesu kumtunda unango wa nyanzayo, anthu adamtambira mwadidi, thangwi onsene akhadikhira iye.

⁴¹Penepo pene padafika mamuna, dzinache Yairosi, ule akhali mkadamu wa nyumba yakupemphereramo. Iye adapiponya pamanyalo a Yesu mbampempha kuti aende kumusa kwache,

⁴²thangwi mwanache wamkazi akhali chifupi kufa. Mwanacheyo akhali na pyaka khumi na piwiri pyakubalwa, pontho akhali yekha eneyo basi. Pikhaenda Yesu, anthu akhali naye wumbi-wumbi khundu zonsene.

⁴³Pakati pa anthuwo pakhali mkazi ule adadwala utenda wa msamba-msamba pyaka khumi na piwiri. Iye adamala pyonsene pikhali na iye kupipereka mwa ang'anga,[9] mbwenye nkhabe mbodzi adakwanisa kumuwangisa.

⁴⁴Iye adadza m'nduli mwa Yesu m'mwinjimo mbakhuya chikhwayeti cha chakufinika cha Yesu. Kabodzi na kabodzi kuchucha kwa chiropa chache kudaleka.

⁴⁵Yesu adavunza mbati, “Mbani andikhuya?” Onsene adatuna. Tenepo Peturo adalonga mbati, “Mbuya, anthu onsene ali namwe wumbi-wumbi pontho akukupsinyizani.”

⁴⁶Mbwenye Yesu adalonga mbati, “Unango andikhuya, thangwi ndapiva kuti mphamvu zabuluka muna ine.”

⁴⁷Pidapiona mkazi ule kuti mbadakwanisave tayu kubisa pidamchitikira pile, adadza na kutetemera mbapiponya pamanyalo a Yesu. Iye adalonga pamaso pa anthu onsene thangwi ikhadakhuyira iye Yesu na kuwanga kudachita iye na ndzidzi onthowo.

⁴⁸Yesu adalonga kuna mkaziyo mbati, “Mwananga, chikhulupiro chako chakuwangisa. Ndoko na mtendere.”

⁴⁹Yesu mbali m'kati kulonga, munthu adadza kubulukira kunyumba ya Yairosi, mkadamu wa kunyumba yakupempherera mbampanga mbati, “Lekani boneresa pontho mfunzisiyu, thangwi mwananu amalisika.”

⁵⁰Pidava Yesu penepi, adapanga Yairosi mbati, “Leka gopa; khulupira kwene basi, mwanako anakhala pontho mwadidi.”

⁵¹Pidafika iye kumsuwo kwa Yairosi kule, Yesu hadatawirise kuti unango apite m'nyumba pabodzi naye tayu, mbwenye Peturo, Yohani, Yakobo pabodzi na baba na mache mwanayo.

⁵²Anthu onsene akhalira na kusintili, mbwenye Yesu adaapanga mbati, “Lekani lira. Mwanayu hadafe tayu. Iye ali m'chitulo!”

⁵³Anthu onsene adamseka thangwi akhadapidziwa kuti mwanayo adafadi.

⁵⁴Mbwenye Yesu adaphata dzanja ya mwanayo mbamchemera mbati, “Mwananga, lamuka!”

⁵⁵Moyo wache udabwereramo. Kabodzi kene iye adalamuka. Tenepo Yesu adaapanga kuti ampase mtsikanayo pyakudya kuti adye.

⁵⁶Makolo ache mwanayo adadodoma napyo pyakwanga, mbwenye Yesu adaapanga kuti aleke panga munthu na mbodzi ene pinthu pidachitikapyo.