Read cisena LUKA 9 Bible Online

LUKA 9 - cisena bible

LUKA 9

¹Yesu adachemera anyakufunza khumi na awiri pabodzi pene mbaapasa mphamvu na utongi wakubulusira mizimu yakuipa yonsene, pontho kuwangisa atenda.

²Tenepo adaatuma kalalika mphangwa za Ufumu wa Mulungu, pontho kawangisa atenda.

³Iye adaapanga mbati, “Lekani kwata chinthu na chibodzi chene paulendo; nee mthondodzo, nee budu ya paulendo, nee phoso, nee kobiri penu mayala apapezi.

⁴Pamsuwo panakatambirwa imwepo kakhaleni ponthopo kufikirana mubuluke muluwanimo.

⁵Kunakhonda imwe katambirwako, mukabuluke muluwani yeneyo mbamugubudza fumbi kumanyalo kwanu kuti pikhale pyakuacheuza.”

⁶Anyakufunza adabuluka mbafamba-famba m'midzi yonsene, kulalika Mphangwa Zadidi, na kuwangisa anthu konsene kwene.

⁷Pidava Herodi, mtongi wa Galilea pinthu pyonsene pikhachitikapyo, adadodoma pyakwanga, thangwi anthu anango akhalonga kuti Yohani Nyakubatiza alamuka kuimfa.

⁸Anango akhalonga kuti mprofeti Elia aonekera, anangombo akhalonga kuti mbodzi wa maprofeti akale ene alamuka kuimfa.

⁹Herodi adalonga mbati, “Yohani ndidamgwandisa msolo, apo munthu anava ine akulongwayu mbani?” Tenepo akhayesa-yesa basi kuti amuone Yesu.

¹⁰Pidabwerera anyakutumwa ale, adapanga Yesu pinthu pyonsene pidachita iwo. Tenepo Yesu adaakwata mbaenda nawo pabodzi kuluwani ya Betesaida.

¹¹Anthu azinji adapiva, natenepo adamtewera. Iye adaatambira mbalonga nawo pya Ufumu wa Mulungu, mbawangisa atenda.

¹²Pikhathobila dzuwa, anyakufunza khumi na awiri adadza kuna Yesu mbati, “Apangeni anthuwa aende pyawo kumidzi na kuminda ili chifupiyi kuti akapisakire okha ene kudya na mbuto zakugona, thangwi kuno nkhutsanga.”

¹³Mbwenye Yesu adaapanga mbati, “Imwe maka apaseni pyakudya.” Iwo adamtawira mbati, “Pina ife pano ndi mikate mishanu na nsomba ziwiri zene basi. Ayi munafuna kuti ife tiende kagula kudya kwakudyesa mwinji onsenewu?”

¹⁴Kulengesapo amunakulu okha akhali pikwi pishanu. Yesu adapanga anyakufunzache mbati, “Akhazikeni anthuwa m'magulu a makumashanu.”

¹⁵Pidamala anyakufunza kuchita tenepo, onsene adakhala pansi.

¹⁶Yesu adakwata mikate mishanu na nsomba ziwiri zile mbayang'ana kudzulu, tenepo adapereka takhuta kuna Mulungu thangwi ya mikate na nsombazo. Iye adapimenya-menya mbapipereka kuna anyakufunzache kuti agawize anthu ale.

¹⁷Anthu onsene adadya mbakhuta. Anyakufunza adalokota pyakusalira mbadzaza pitundu khumi na piwiri.

¹⁸Nsiku inango pikhapemphera Yesu pa yekha ene, anyakufunza adadza kuna iye. Iye adaavunza mbati, “Anthu ambalonga kuti ndine ani?”

¹⁹Iwo adamtawira mbati, “Anango ambalonga kuti ndimwe Yohani Nyakubatiza, anango ati ndimwe Elia, anangombo ati ndimwe mbodzi wa maprofeti akale ule alamuka kuimfa.”

²⁰Iye adaavunza mbati, “Apo imwembo, mumbalonga kuti ndine ani?” Peturo adalonga mbati, “Ndimwe Khristu wakusankhulika wa Mulungu.”

²¹Yesu adaapanga mwakugogomeza kuti aleke kalonga penepi kuna munthu na mbodzi ene.

²²Iye adaapanga pontho mbati, “Mwana Munthu anati asanyike pyakwanga mbakhondwa na akulu-akulu, anyansembe akulu, na afunzisi a mwambo. Iye anaphiwa, mbwenye pangagwanda nsiku zitatu analamuka mbakhala na moyo.”

²³Tenepo adaapanga onsene mbati, “Ngakhala munthu anafuna kunditewera, athema kupikhonda yekha ene, pontho nsiku na nsiku asasanyike kuona nyatwa na kufa kwene, tenepo anditewere.

²⁴Thangwi munthu anafuna kupulumusa moyo wacheyo, anati autaye; mbwenye anataya moyo wache thangwi ya ine, anati aupulumuse.

²⁵Munthu anaganyalinji angakhala napyo pyonsene pya pansi pano, mbataya na kuvunga moyo wache? Nkhabe tayu!

²⁶Ngakhala munthu anachita manyadzo na ine, pontho na chifunziso changa, Mwana Munthu anachitambo naye manyadzo angafika mudemelero yache, na demelero ya Babache, pontho ya angelo akuchena.

²⁷Ndikukupangani pyakuonadi kuti alipo anango pano ale hanafa tayu kufikirana iwo aone Mulungu akukhazikisa Ufumu wache.”

²⁸Pidagwanda nsiku zisere, pikhadamala Yesu kulonga pinthu penepi, adakwata Peturo, Yohani na Yakobo mbaenda nawo paphiri kapemphera.

²⁹Yesu mbali kupemphera, nkhope yache idasanduzika, pontho nguwo zache zidayetima ninga dzuwa.

³⁰Sindzidzi amuna awiri, Mose na Elia, akhalonga naye.

³¹Iwo adaonekera na demelero mbalonga na Yesu pya kufa kwache kukhafuna iye kuchita mu Yerusalemu kuti achitise kufuna kwa Mulungu kukwana-kwana.

³²Peturo na anzache akhali m'chitulo chakufa nacho. Pidalamuka iwo, adaona demelero ya Yesu, na ya amuna awiri adaimira pabodzi na iye ale.

³³Pikhaenda Mose na Elia, Peturo adapanga Yesu mbati, “Mbuya, mphyadidi kuti ife tili pano. Tinati timange makumbi matatu, ibodzi yanu, inango ya Mose, inangombo ya Elia.” Pikhalonga iye nee akhapidziwabi.

³⁴Iye mbali kulonga, padadza makole mbaagudumira. Anyakufunza adaphatwa na mantha pikhagudumirwa iwo na makolewo.

³⁵Fala idaveka kubulukira m'makolemo kuti, “Weneyu ndi mwananga asankhula ine, mvereni!”

³⁶Pidamatama falayo, anyakufunza adamuona Yesu ali yekha ene. Anyakufunza adafunga milomo yawo nsiku zenezo. Iwo hadapange munthu na mbodzi ene tayu pinthu pikhadaona iwo pile.

³⁷Mangwana mwache, Yesu na anyakufunza atatu ale adatchitha paphiri pale, tenepo mwinji ukulu udenda kagumanikana naye.

³⁸Munthu unango pakati pa anthu ale adakhuwa mbati, “Mfunzisi, ndaphata miyendo! Ndionerenimbo mwanangayu, mwananga ndi mbodzi eneyu basi.

³⁹Mzimu wakuipa ungamphata, ambakhuwa mwakututumuka, mbumtsandisa pyakwanga mwakuti phovu imbakhala chinjiri-chinjiri kukanwa. Umbamkuwaza pikulu, pontho humbafuna kubulukamo tayu!

⁴⁰Ndidapempha anyakufunzanu kuti aubuluse mzimu wakuipawu, kwache iwo adapichimwana.”

⁴¹Yesu adaapanga mbati, “Sha! Imwe ndimwedi anthu akuipa pontho akukhonda khulupira! Ndikhale na kupirira namwe kufikirana lini?” Tenepo adampanga munthu ule mbati, “Idza naye mwanakoyo kuno.”

⁴²Pikhadza mphaleyo, mzimu wakuipa udamgwisa pansi mbumtsandisa pyakwanga. Yesu adatonga mzimu wakuipa ule kuti ubulukemo, tenepo adamuwangisa mphaleyo mbampereka kuna babache.

⁴³Anthu onsene adadodoma na mphamvu zikulu za Mulungu. Pikhali anthu m'kati kudodoma na pinthu pyonsene pidachita Yesuyo, iye adapanga anyakufunzache mbati,

⁴⁴“Lekani duwalira pinafuna kukupangani inepi! Mwana Munthu anaperekwa m'manja mwa anthu.”

⁴⁵Mbwenye anyakufunza hadavesese pikhalonga iye tayu, thangwi pikhali pyakuzimbaisa kuna iwo mwakuti hadapivese mwadidi tayu. Iwo akhagopa kumvunza penepi.

⁴⁶Mphoka idalamuka pakati pa anyakufunza yakuti mkulu mbani.

⁴⁷Yesu adadziwa pikhanyerezera iwo, natenepo adakwata kamwana mbakaimisa m'khundu mwache,

⁴⁸mbaapanga mbati, “Munthu onsene anatambira mwadidi kamwanaka thangwi ya ine, atambirambo ine. Pontho munthu onsene anatambira ine mwadidi, atambirambo adandituma ule. Thangwi mng'onoletu pakati pa imwe monsene, ndiye mkululetu.”

⁴⁹Yohani adalonga mbati, “Mbuya, tidaona munthu akubulusa mizimu yakuipa na dzinanu. Tenepo tidampanga kuti abasikeletu thangwi si mbodzi wa gulu yathu tayu.”

⁵⁰Yesu adaapanga mbati, “Lekani kumkhondesa, thangwi munthu anakhonda pokanyana namwe, weneyo ngwanu.”

⁵¹Pidafika nsiku chifupi zakuti Yesu akwatwe kwenda kudzulu, iye adanyerezera pyakwenda ku Yerusalemu, tenepo adendakodi.

⁵²Adatuma anyamphangwa patsogolo pache, ale adenda kumudzi wa Samaria kuti akamsasanyire pinthu pyonsene.

⁵³Mbwenye anthu a m'mudzimo hadamtambire tayu, thangwi iwo akhapidziwa kuti iye akhaenda ku Yerusalemu.

⁵⁴Awiri a anyakufunza, Yohani na Yakobo, pidaona iwo penepi, adavunza Yesu mbati, “Mbuya, munafuna kuti tichemere moto kubulukira kudzulu kuti udzaapise?”[10]

⁵⁵Mbwenye Yesu adazungunuka mbaalongera.[11]

⁵⁶Tenepo iwo adenda kumudzi unango.

⁵⁷Pikhafamba iwo m'njira, munthu unango adalonga kuna Yesu mbati, “Ndinakutewerani konsene kunaenda imwe.”

⁵⁸Yesu adamtawira mbati, “Mibinzi ina madzimba, pontho mbalame zina pisa, mbwenye Mwana Munthu nkhabe mbuto yakugona penu yakupumirapo tayu.”

⁵⁹Yesu adapanga munthu unango mbati, “Nditewere!” Mbwenye munthu ule adalonga mbati, “Mbuya, nditawiriseni kuti nditome kaikha maliro a babanga.”

⁶⁰Yesu adatawira mbati, “Aleke anyakufa aikhane anyakufa okhokha. Mbwenye iwe, kalalike mphangwa za Ufumu wa Mulungu.”

⁶¹Munthu unango pontho adapanga Yesu mbati, “Ndinakutewerani, Mbuya, kwache nditawiriseni nditome kagoneka kumsuwo kwanga.”

⁶²Yesu adamtawira mbati, “Munthu angalima na phaza yakukweyiwa na ng'ombe mbayang'ana m'nduli, munthu weneyo hadatheme kuphata basa mu Ufumu wa Mulungu tayu.”