Read cisena DEUTERONOMO 1 Bible Online

DEUTERONOMO 1 - cisena bible

DEUTERONOMO 1

¹Enewa ndi mafala adalonga Mose kuna Aisraele pikhali iwo m'thando yatchetcha kumabulukiro dzuwa a mkulo wa Yorodani. Iwo akhali m'phedi ya Yorodani chifupi na Sufu pakati pa luwani ya Parani khundu inango pontho maluwani a Tofele, Labani, Hazeroti, pontho Dizahabi kukhundu inango.

²Ngulendo wa nsiku khumi na ibodzi kubuluka kuphiri ya Sinai kwenda ku Kadeshi Barinea kudzera na njira ya kunthemba ya mapiri ya Edomu.

³Pansiku yakutoma ya mwezi wakhumi na ubodzi wa pyaka makumanayi pikhadabuluka iwo m'dziko ya Iguputo, Mose adapanga Aisraele pyonsene pikhadampanga MBUYA kuti iye aapange.

⁴Ndzidzi wenewu ukhali ule ukhadakunda MBUYA[1] Sihoni, mfumu wa Aamori, ule akhatonga muluwani ya Heshiboni, pontho Mfumu Ogi wa ku Bashani, ule akhatonga m'maluwani a Ashitaroti na Edrei.

⁵Pikhali anthu kumabulukiro dzuwa a Yorodani m'nthemba ya Moabu, Mose adatoma kulonga pya mwambo na pifunziso pya Mulungu. Iye adalonga mbati:

⁶“Pikhali ife paphiri ya Sinai MBUYA Mulungu wathu adalonga kuna ife mbati, ‘Imwe mwakhala ndzidzi ukulu ene paphiri pano.

⁷Fulusani msasa mbamuende m'tsogolo. Ndokoni kunthemba ya mapiri ya Aamori na kunthemba zonsene zakuzungulira, kuphedi ya Yorodani, kunthemba ya mapiri, kuthando yatchetcha ya Negebu, na m'khundu-khundu mwa Bara ya Mediterania. Ndokoni kudziko ya Kanani pontho kupiringana mapiri a Lebanoni mpakana kumkulo ukulu wa Yufurate.

⁸Yang'ana, dziko yonseneyi njile idadumbira ine MBUYA kuna makolo anu, Abrahamu, Isake na Yakobo na kuna pidzukulu pyawo. Ndokoni mukakhale m'dzikomo.’ ”

⁹Mose adalonga kuna anthu mbati, “Ndzidzi ukhathimiza ife kukhala paphiri ya Sinai ndidakupangani kuti, ‘Basa yakutsogolera imwe yandikulira pyakwanga. Ine nkhabe kwanisa kuiphata ndekha ene tayu.

¹⁰MBUYA Mulungu wanu akuchitisani kukhala akuinjipa pyakwanga ninga nyenyezi za kuthambo.

¹¹MBUYA Mulungu wa makolo anu mbakuchitiseni kuthimizirika kachikwi pontho kuchitisa pinthu pyanu kufamba mwadidi ninga mudadumbira iye!

¹²Kwache ine ndekha ene ndinakwanisa tani kuphata basa yakunensa ninga yeneyi yakutonga miseru pakati panu?

¹³Sankhulani amuna anango anzeru, akuvesa pinthu pontho anyakudziwisa pinthu kubulukira m'dzinza yonsene, tenepo ine ndinaapasa basa yakuyang'anira imwepo.’

¹⁴Imwembo mudatawira kuti penepi pikhali pyadidi kupichita.

¹⁵Natenepo ndidakwata amuna anzeru na anyakudziwisa pinthu adasankhula imwe kubulukira m'madzinza mwanu ale mbandiaikha kukhala anyakukuyang'anirani. Anango basawo ikhali kuyang'anira anthu chikwi, anango kuyang'anira anthu dzana, anango kuyang'anira anthu makumashanu, anangombowo khumi. Ndidasankhula pontho mathubu anango m'madzinza onsene.

¹⁶“Ndzidzi wenewo ndidaapanga kuti, ‘Veserani kuna miseru inalamuka pakati pa anthu anu. Tongani miseru yonsene mwachilungamo podi kwene kuti miseruyo nja pakati pa anthu anu ene basi penu alendo ambakhala pakati panu ale.

¹⁷Lekani tonga mseru mwakuyang'ana nkhope; tongani munthu onsene sasawa, penu munthuyo akhale pyache ani. Lekani chita mantha na munthu na mbodzi ene, thangwi kutonga kumbachita imweko kumbabulukira kuna Mulungu. Ngakhala mseru wakunensani pyakwanga, mudze nawo kuna ine, inembo ndinautonga.’

¹⁸Na ndzidzi onthowo ndidakupasani matongero a pinthu pyonsene pidathema imwe kupichita.

¹⁹“Ife tidachita pinthu pidatitonga MBUYA Mulungu wathu. Ife tidabuluka paphiri ya Sinai mbatienda na m'thando ikulu yatchetcha, pontho yakugoswa paulendo wathu wakwenda kunthemba ya mapiri ya Aamori. Pidafika ife ku Kadeshi Barinea,

²⁰ndidalonga kuti, ‘Chinchino mwafika kunthemba ya mapiri ya Aamori, dziko inatipasa MBUYA Mulungu wathu, Mulungu wa makolo athu. Yang'anani, njeneyi dziko ile. Ndokoni mukaikwate ninga mudatongera iye. Lekani chita mantha penu kutaya mtima.’

²²“Mbwenye imwe mudadza kuna ine mbamulonga kuti, ‘Tendeni titume amuna atsogole kuti akazonde dzikoyo, towera akwanise kutipanga njira yadidiletu yakuti tiende nayo, pontho mizinda ili mwenemo njakutani.’

²³“Yeneyo idaoneka ninga nzeru yadidi, tenepo ndidasankhula amuna khumi na awiri, munthu mbodzi kubulukira m'dzinza yonsene.

²⁴Iwo adenda m'nthemba ya mapiri mpakana kuphedi ya Eshikolo mbakaiona.

²⁵Iwo adatidzesera nsapo zikhadagumana iwo, mbalonga kuti dziko ikhatipasa MBUYA Mulungu wathu ikhali ya mataka akubalisa pinthu pyakwanga.

²⁶“Kwache imwe mudapandukira matongero a MBUYA Mulungu wanu, tenepo imwe mudakhonda kupita m'dzikomo.

²⁷Imwe mudadungunya kuna unango na mwanzache m'makumbi mwanu kuti, ‘MBUYA ambatizonda. Iye adatibulusa m'dziko ya Iguputo kufuna kutipereka m'manja mwa Aamori, towera atiphe.

²⁸Thangwi yache njanji kuti tiende kweneko? Ife tikuchita mantha. Amuna adatuma ife atipanga kuti anthu a kweneko ngamphamvu pyakwanga pontho akulapha kupiringana ife pano, pontho kuti iwo ambakhala m'mizinda ya kuzungulirwa na mafufu akufika kuthambo. Iwo adaona anyakujintcha kweneko!’

²⁹“Mbwenye ndidalonga kuti, ‘Lekani chita mantha na anthu enewo.

³⁰MBUYA Mulungu wanu anakutsogolerani, pontho iye anakumenyerani nkhondo, ninga mudamuonera imwe akupichita m'dziko ya Iguputo,

³¹pontho m'thando yatchetcha. Imwe mudaona mule mudakuthukulirani iye mwadidi m'njira yonsene kufikirana mbuto ino ninga mbamudachita baba kuthukula mwanache!’

³²Kwache podi kwene kuti ine ndidalonga, imwe mudathimiza basi kukhonda nyindira MBUYA,

³³podi kwene kuti iye adenda patsogolo panu ndzidzi onsene kukugumanirani mbuto kuti mumangepo msasa. Kufuna kukuonesani njira, iye adapita patsogolo panu na mzati wa moto na mosiku pontho mzati wa makole na masikati.

³⁴“MBUYA adava kudungunya kwanu mbazhangali natenepo adadumbira mbati,

³⁵‘Nee mbodzi wa imwe kubulukira mfendu wakuipawu anapita m'dziko ya mataka akubalisa pinthu idadumbira ine kuna makolo anu ile.

³⁶Mbwenye Kalebu mwana wamamuna wa Yefune ene basi ndiye anaipita. Iye athimiza kukhala wakukhulupirika kuna ine, tenepo ine ndinampasa iye na pidzukulu pyache dziko idenda iye kazonda ile.’

³⁷Na thangwi ya imwepo MBUYA adandizhangalira mbalonga mbati, ‘Iwe ene, Mose, nkhabe dzapita tayu m'dzikoyi.

³⁸Kwache wangisa mtima nyakukuphedzera Yoswa mwana Nuni. Iye anatsogolera Aisraele kakwata dziko yeneyi.’

³⁹Tenepo MBUYA adalonga kuna ife tonsene mbati, ‘Ananu, ale mbanang'ono kudziwa chadidi na chakuipa anapita dzikoyi, ana adalonga imwe kuti anaphatwa na anyamalwanu ale. Ine ndinaipereka dzikoyo kuna iwo, tenepo iwo anaikwata kukhala yawo ene.

⁴⁰Mbwenye kulonga pya imwe anthu, zungunukani mbamubwerere m'thando yatchetcha na njira yakwendera ku Nyanza Yakufira.’

⁴¹“Imwe mudatawira kuti, ‘Mose ife tadawira MBUYA. Mbwenye chinchino tinaenda kamenya nkhondo ninga mudatongera MBUYA Mulungu wathu.’ Tenepo munthu onsene asasanyike kamenya nkhondo, kunyerezera kuti pinakhala pyakukhonda nensa kupokosera dziko ya m'mapiri.

⁴²“Mbwenye MBUYA adalonga kuna ine mbati, ‘Acheuze kuti aleke kasosa, thangwi ine nkhabe dzakhala nawo tayu, tenepo anyamalwa anaakunda.’

⁴³Ine ndidakupangani pinthu pikhadalonga MBUYA, kwache imwe hamudapiikhe konta tayu. Imwe mudampandukira tenepo na kupithemba kwanu, mudenda kudziko ya m'mapiri.

⁴⁴Tenepo Aamori akhakhala m'mapiri enewo ale, adakugomokerani ninga nyuchi kudza kuna imwe. Iwo adakuthamangisani mpakana kuluwani ya Horima, pontho adakukundani kweneko kudziko ya m'mapiri ya Edomu.

⁴⁵Natenepo imwe mudalira kuna MBUYA kuti akuphedzeni, kwache iye hadakuvesereni penu kupiikha konta tayu.

⁴⁶“Tenepo tidakhala pa Kadeshi ndzidzi ukulu ene.