Read cisena DEUTERONOMO 10 Bible Online

DEUTERONOMO 10 - cisena bible

DEUTERONOMO 10

¹“Kubuluka penepo MBUYA adalonga kuna ine mbati, ‘Sema miyala miwiri ninga yakutoma ile, pontho sasanya bokosi ya matabwa towera uiikhemo. Kwira kuna ine paphiri pano,

²tenepo ine ndinalemba pamiyala yeneyi pinthu pidalemba ine pamiyala idaswa iwe ile, natenepo iwe wathema kuiikha m'bokosimo.’

³“Tenepo ine ndidasasanya bokosi na matabwa akesha mbandisema miyala miwiri ninga yontho yakutoma ile mbandienda nayo paphiri pale.

⁴MBUYA adalemba pamiyalapo mafala ontho ninga akhadalemba iye pakutoma ale, Matongero Khumi adakupasani iye ndzidzi udalonga iye kuna imwe kubulukira m'moto nsiku idagumanyikana imwe paphiri pale. MBUYA adandipasa pyakulemberapo pyamiyala pile,

⁵tenepo ine ndidatchitha paphiripo. Natenepo ninga montho mudandipangira MBUYA, ine ndidaaikha m'bokosi idasasanya ine ile; iwo ali mwenemo kutomera kale ene.”

⁶Aisraele adafuluka pamichera ya anthu a ku Yaakani ile mbaenda ku Mosera. Kweneko Aroni adafa mbaikhwa m'masiye, tenepo mwanache wamamuna Eleazara adapita m'mbuto mwache ninga nyansembe.

⁷Kubuluka penepo iwo adenda ku Gudugoda mbaenda pontho ku Yotibata, mbuto ya mikulo ya madzi mizinji.

⁸Paphiripo[8] MBUYA adasankhula amuna a m'dzinza ya Levi kukhala anyakuyang'anira Bokosi ya Chiverano, kumtumikira ninga anyansembe, pontho kutsanzayisa anthu na dzinache. Yeneyi ndi basawo na lero.

⁹Ndi thangwi yache dzinza ya Levi hidatambire khundu ya dziko ninga mudachitira madzinza anango ale tayu; chidatambira iwo ntchidzo chakukhala anyansembe a MBUYA, ninga kudumbira kudachita MBUYA Mulungu wanu.

¹⁰“Ine ndidathimiza kukhala paphiripo nsiku makumanayi mosiku na masikati, ninga montho mudachitira ine pakutoma pale. MBUYA adandivesera pontho mbatawira kukhonda kukuvungani.

¹¹Tenepo iye adandipanga kwenda kakutsogolerani, towera mukwanise kakwata dziko ikhadadumbira iye kuna makolo anu ile.

¹²“Chinchino Aisraele, veserani pinthu pinafuna MBUYA Mulungu wanu kuti mupichite: pembedzani MBUYA mbamuchite pyonsene pinakutongani iye. Mfuneni mbamumtumikire na mtimanu onsene,

¹³pontho verani mwambo na matongero akupasani ine lerowa kukhala chinthu chakuganyalisa kuna imwe.

¹⁴Podi na kudzululetu nkhwa MBUYA basi; dziko yapansi pontho njache na pyonsene pili mwenemo.

¹⁵Kwache kuafuna kwa MBUYA makolo anu kukhali kwamphamvu pyakwanga mwakuti adasankhula imwe m'mbuto mwa anthu anango onsene, tenepo na lero ndimwe anthu ache akusankhulika.

¹⁶Kubulukira lero kwenda m'tsogolo khalani akuvera kuna MBUYA mbamuleka kuumisa mtima.

¹⁷MBUYA Mulungu wanu ana utongi pana milungu yonsene na pana anyamphamvu onsene. Iye ngwamkulu pontho wamphamvu, tenepo iye athema kugopiwa. Iye nkhabe chita pinthu mwakuyang'ana nkhope pontho iye nkhabe tawira kudyekerwa tayu.

¹⁸Iye ambaonesesa kuti ana masiye na amamfelwa akuchitirwa chilungamo; iye ambaafuna alendo ambakhala pakati pa anthu athu ale mbaapasa phoso na nguwo.

¹⁹Natenepo afunenimbo alendo thangwi imwe mukhalimbo alendo m'dziko ya Iguputo.

²⁰Verani MBUYA Mulungu wanu mbamumpembedze iye ene basi. Khulupirikani kuna iye mbamudumbira na dzinache ene basi.

²¹Mkuzeni iye! Iye ndi Mulungu wanu, pontho imwe mwaona mwekha na maso anu pinthu pikulu pontho pyakudodomesa pyachita iye kuna imwe.

²²Pidenda makolo anu kudziko ya Iguputo akhalipo kwene makumanomwe basi. Mbwenye chinchino MBUYA Mulungu wanu akuchitisani kukhala akuinjipa ninga nyenyezi za kuthambo.