Read cisena DEUTERONOMO 11 Bible Online

DEUTERONOMO 11 - cisena bible

DEUTERONOMO 11

¹“Mfuneni MBUYA Mulungu wanu pontho ndzidzi onsene verani mwambo wache onsene.

²Kumbukani lero pyafunza imwe pya MBUYA kudzera muna kukutchunyusani kudachita iye. Ndimwepo, si ananu tayu, ale adaona pinthu penepi. Imwe mudaona ukulu wa MBUYA, mphamvu zache zikulu,

³pontho pyakudodomesa pidachita iye kuna mfumu wa ku Iguputo pontho na kuna dziko yache yonsene.

⁴Imwe mudaona mule mudatswairira MBUYA monsene mwene anyankhondo a ku Iguputo, pabodzi na akavalo na pingolo pyawo pene pakuabiza m'Nyanza Yakufira pikhakutewerani iwo pile.

⁵Imwe mukupidziwa pinthu pidakuchitirani MBUYA m'thando yatchetcha, imwe mbamudzati fika kuno.

⁶Kumbukani pinthu pidachita iye kuna Datani na Abiramu ana achimuna a Eliabu wa dzinza ya Rubeni. Pamaso pa anthu onsene dziko yapansi idafunguka mbiakhudyula pabodzi pene na mabanjawo, makumbi awo, anyabasawo onsene na pifuyo pyawo pyonsene.

⁷Ande, anthu ache ndimwe mudaona na maso anu ene pinthu pikulu pyonsene pidachita MBUYA.

⁸“Verani mwambo onsene wakupasani ine lerowu. Tenepo imwe munakwanisa kuwambuka mkulo mbamukakwata dziko ili imwe chifupi kuikwata ile.

⁹Imwe munakhala na moyo wakulapha m'dziko yamphonje idadumbira MBUYA kuna makolo anu na pidzukulu pyawo ile.

¹⁰Dziko inafuna imwe kakwata chinchinoyi nee yakhala ninga dziko ya Iguputo, ikhakhala imwe pakutoma ile tayu. Kweneko ndzidzi udabzala imwe mbewu mudathema kuphata basa mwakuwangisa kuthirira minda;

¹¹kwache dziko inafuna imwe kukwata chinchino, ile ndi dziko ya mapiri na maphedi, dziko yakuvumba mvula.

¹²MBUYA Mulungu wanu ambayang'anira dziko yeneyi mbailondali chaka chamumphu.

¹³“Natenepo verani matongero anakupasani ine lerowa: mfuneni MBUYA Mulungu wanu mbamumtumikire na mtimanu onsene.

¹⁴Ngakhala munachita tenepo iye anavumbisa mvula m'dziko mwanu pandzidzi unafunika iyo, ndzidzi wakutonthola na ndzidzi wa mainja, towera pakhale mapira, vinyu na mafuta aolivi,

¹⁵pontho maudzu a pifuyo pyanu. Imwe munakhala na pyakudya pyonsene pinafuna imwe.

¹⁶Lekani kupitawirisa mwekha ene kubauka kubuluka kuna MBUYA kupembedza milungu inango mbamuitumikira.

¹⁷Ngakhala munachita tenepo, MBUYA anakuzhangalirani. Iye nkhabe dzavumbisa mvula tayu, tenepo mataka anauma pyakwanga mwakuti mbewu nkhabe kwanisa kumera tayu. Penepo pene imwe munafa podi kwene kuti dziko inakupasani iyeyi njadidi.

¹⁸“Kumbukani matongero enewa mbamuaikha m'mtima mwanu. Amangirireni m'mikono mwanu pontho avaleni papipumu panu ninga chikumbuso.

¹⁹Afunziseni kuna ananu. Alongeni ndzidzi una imwe m'misa mwanu penu ndzidzi una imwe kutali, ndzidzi unapuma imwe penu ndzidzi unaphata imwe basa.

²⁰Alembeni m'mafufu a misuwo ya nyumba zanu na pamisuwo ya mipandanu.

²¹Penepo imwe na ananu munakhala na moyo wakulapha m'dziko idadumbira MBUYA Mulungu wanu kuna makolo anu ile. Imwe munakhala mwenemo ndzidzi unakhalapo thambo yakudzulu.

²²“Verani mwakukhulupirika mwambo onsene wakupasani ine lerowu: mfuneni MBUYA Mulungu wanu, chitani pyonsene pinatonga iye mbamukhulupirike kuna iye.

²³Iye anathamangisa madzinza enewo ndzidzi unaenda imwe, tenepo imwe munakwata dziko, ile nja madzinza amphamvu pontho akulu pyakwanga kupiringana imwepo.

²⁴Mataka onsene anaponda imwe anakhala anu. Nthembanu inafumuka mpakana kumpoto kwa phiri ya Lebanoni kubulukira kuthando yatchetcha kumwera, pontho anafumuka mpakana ku Bara ya Mediterania kubulukira kumkulo wa Yufurate kumadokero dzuwa.

²⁵Konsene kunaenda imwe m'dziko yeneyi, MBUYA Mulungu wanu anachitisa anthu kukugopani, ninga kudumbira kudachita iye, pontho nkhabe na mbodzi ene anakwanisa kuimisana namwe tayu.

²⁶“Yang'anani, lero ndikuikha pakati panu mtsanzayiso na dzedze kuti musankhule chibodzi:

²⁷Mtsanzayiso ngakhala munavera matongero a MBUYA Mulungu wanu anakupasani ine lerowa,

²⁸mbwenye dzedze ngakhala munakhonda vera matongero enewa mbamubaukira kuna milungu inango yakuti chipo imwe mudzati kuipembedza tayu.

²⁹MBUYA angakudzesani m'dziko inafuna imwe dzaikwata kukhala yanu ene ile imwe mwathema kulonga pya mtsanzayiso paphiri ya Gerizimu, pontho pya dzedze paphiri ya Ebali.

³⁰Mapiri enewa ali kumadokero dzuwa a mkulo wa Yorodani m'nthemba ya Akanani ambakhala m'phedi ya Yorodani ale. Iwo ali chakwendera kumadokero dzuwa, nee kutali na miti yakupambulika yamthundu ya ku More chifupi na luwani ya Giligala.

³¹Imwe muli chifupi kuwambuka mkulo wa Yorodani kukwata dziko inafuna kukupasani MBUYA Mulungu wanu ile. Mungaikwata mbamukhazikikamo,

³²onesesani kuti mwavera matongero onsene anakupasani ine lerowa.