Read cisena DEUTERONOMO 12 Bible Online

DEUTERONOMO 12 - cisena bible

DEUTERONOMO 12

¹“Pano pana mwambo na matongero pyathema imwe kuvera ndzidzi onsene unakhala imwe na moyo m'dziko inakupasani MBUYA Mulungu wa makolo anu ile. Avereni matongerowo.

²M'dziko inakwata imweyi, gomolani mbuto zonsene zimbapembedzera anthu milungu yawo pamapiri akulapha, m'pitunda pontho pansi pa miti iwisi.

³Gomolani maguwawo ansembe, iswani piguwa pyawo pyakupambulika, pontho pisani adzimunthu awo a milungu Ashera. Pandulani mifanikizo yawo, towera iwo aleke pembedzave pambuto zenezi.

⁴“Lekani pembedza MBUYA Mulungu wanu ninga mumbapembedzera anthu enewa milungu yawo.

⁵Kubulukira m'nthemba za madzinzanu onsene MBUYA anasankhula mbuto ibodzi, kule kwathema anthu kudza pamaso pache kumpembedza.

⁶Penepo imwe mwathema kupereka nsembe zanu zile zathema kupyerezwa pontho na nsembe zanu zinango, chakhumi na mitukwanu yakupambulika, pyakupereka pidadumbira imwe kuna MBUYA pile, pyakupereka pimbapereka imwe na kufuna kwanu, pontho mwana wakutoma kubalwa wa ng'ombe pontho bira.

⁷Penepo, pamaso pa MBUYA Mulungu wanu akutsanzayisani ule, imwe na mabanja anu munadya mbamukomerwa na kufamba mwadidi kwa pinthu pyaphatira imwe basa.

⁸“Ndzidzi wenewo ungakwana lekani chita ninga mukhachitira imwe m'ndulimu. Kufikira chinchino imwe monsene mwapembedza ninga mumbafunira imwe,

⁹thangwi imwe mudzati fika tayu m'dziko inakupasani MBUYA Mulungu wanu ile, kule kunakwanisa imwe kukhala na mtendere.

¹⁰Mungawambuka mkulo wa Yorodani, MBUYA anakutawirisani kukwata dzikoyo mbamukhala mwenemo. Iye anakuyang'anirani mwadidi gopesera anyamalwanu pontho munakhala mwenemo na mtendere.

¹¹MBUYA anasankhula mbuto ibodzi pathema iye kupembedzwa pale, penepo imwe mwathema kudza na pinthu pyonsene pidakutongani ine; nsembe zanu zathema kupyerezwa pabodzi na nsembe zanu zinango, chakhumi chanu na mitukwanu yakupambulika, pontho pyakupereka pyanu pidadumbira imwe kuna MBUYA pile.

¹²Penepo komerwani pamaso pache pabodzi pene na ananu, anyabasanu, na Alevi ambakhala muluwani mwanu ale; kumbukani kuti Alevi nkhabe dzakhala na mbuto yawo ene tayu.

¹³Lekani pereka nsembe ponsene pene panafuna imwe;

¹⁴kwache mwathema kuzipereka pambuto ibodzi ene basi inafuna sankhula MBUYA m'nthemba ibodzi ya m'madzinza mwanu. Kweneko mwathema kupyereza nsembe zanu pontho kuchita pinango pyonsene pyakutongani ine.

¹⁵“Kwache imwe munakwanisa kupha na kudya nyama zanu ninga munapifunira imwe konsene kwene kunakhala imweko. Imwe munakwanisa kudya pyakuinjipa ninga munakupasirani MBUYA. Munthu onsene wa imwe wakuchena penu okhonda chena pamaso pa Mulungu anakwanisa kudya ninga montho mbamudadyera imwe nyama ya nyasa penu mbala.

¹⁶Kwache imwe mukukhondeswa kudya chiropa; imwe mwathema kuchichuchisira pansi ninga madzi.

¹⁷Nkhabe chinthu na chibodzi chene chimbapereka imwe kuna MBUYA chathema kudyiwa mbuto zinakhala imwe: nee chakhumi cha mapiranu, vinyu wanu penu mafutanu aolivi, nee ana akutoma kubalwa a ng'ombe zanu penu mabiranu tayu, mitukwanu imbadumbira imwe kuna MBUYA, pyakupereka pimbapereka imwe na kufuna kwanu, penu pyakupereka pinango tayu.

¹⁸Imwe na ananu pabodzi pene na anyabasanu na Alevi ambakhala muluwani mwanu ale, mwathema kudya pyakupereka penepi pamaso pa MBUYA Mulungu wanu pokha basi, pambuto ibodzi yakupembedzerapo idasankhula MBUYA Mulungu wanu ile. Penepo imwe munakomerwa na pyonsene pyachita imwe.

¹⁹Pontho onesesani kuti muleke kuataya Alevi ndzidzi onsene unakhala iwo m'dziko mwanu.

²⁰“MBUYA Mulungu wanu angakuza nthemba yanu ninga mudadumbira iye, imwe munakwanisa kudya nyama ndzidzi onsene unafuna imwe.

²¹Ngakhala mbuto ibodzi yakupembedzerapo ili kutali pyakwanga, penepo ndzidzi onsene unafuna imwe munakwanisa kupha ng'ombe, penu mabira pyakupasani MBUYA pile, pontho munakwanisa kudya nyama m'misa mwanu ninga mwakupangirani ine.

²²Munthu onsene wakuchena penu okhonda chena pamaso pa Mulungu anakwanisa kudya nyama yeneyo ninga mbamudadyera iye nyama ya nyasa penu mbala.

²³Kwache imwe mukukhondeswa kudya nyama yakukhala na chiropa, thangwi moyo umbakhala m'chiropa, tenepo lekani kudya moyo pabodzi pene na nyamache.

²⁴Lekani kuyesa chiropa ninga chinthu chakudyiwa, m'mbuto mwache chichuchisireni pansi ninga madzi.

²⁵Ngakhala imwe munavera matongero enewa MBUYA anakomerwa, tenepo pinthu pyanu pyonsene, imwe na pidzukulu pyanu, pinakufambirani mwadidi.

²⁶Ndokoni na mitukwanu na pyakupereka pidadumbira imwe kuna MBUYA pambuto ibodzi yakupembedzera ile.

²⁷Penepo perekani nsembe zile zapyerezwa monsene mwene paguwa ya MBUYA. Pontho perekani nsembe nyamache imbadya imwe ile mbamukhuthulira chiropa chache paguwa.

²⁸Verani mwakukhulupirika pyonsene pinakutongani ine, tenepo pinthu pyanu pyonsene, imwe na pidzukulu pyanu, pinakufambirani mwadidi kwenda na kwenda, thangwi imwe munaphata pinthu pyakulungama pontho pyakukomera MBUYA Mulungu wanu.

²⁹“MBUYA Mulungu wanu anavunga madzinza ndzidzi unazungulira imwe dziko yawo kuipokosera, tenepo munaikwata mbamukhazikika mwenemo.

³⁰MBUYA angamala vunga madzinza enewa chitani mphole-mphole kuti muleke kuteweza pipembedzo pyawo thangwi pinakhala msampha kuna imwe. Lekani yesa kufuna dziwa mumbapembedzera iwo milungu yawo mule, towera imwembo muchite chibodzi-bodzi.

³¹Lekani pembedza MBUYA Mulungu wanu ninga montho mumbapembedzera iwo milungu yawo, thangwi iwo angapembedza milungu yawo ambachita pinthu pyakunyansa pimbazonda MBUYA pile. Iwo ambapereka nsembe na anawo ene pamoto pamaguwawo ansembe.

³²“Chitani pyonsene pyakutongani inepi; lekani thimizirapo chinthu na chibodzi chene penu kubulusapo chinthu na chibodzi chene.